هل تخبره .................... أم تكتم سرها ؟

[الجـــوديّ]

السلام عليكم ورحمة الله وبركاته ،،

عودة بعد انقطاع .. أتمنى أن يكون الجميع بخير

، . ،


أسرتني صديقتي بقصتها ............. واحترت في أمرها ...

فقلت أطرح قصتها هنا لنعرف آرائكم .... بنرمز لاسم صديقتي باسم "" حصــــة ""


القصة إنسانية ... يمكن ما تعجب البعض فأرجو عدم التجريح ... فلنقل خيراً أو لنصمت

وما خاب من استشار.



/////////////////////


تقول حصة يا طويلين العمر والسلامة :



إنها في شغلها.. كانت تدور على وظيفة جديدة .. فعلمت ربعها يشوفون لها وظيفة منيه مناك

اتصلت زميلتها القديمة : كلمت المدير عنج وزكيتج عنده .. ويدور ناس كفاءة .. مقابلتج بكرة .

تقول حصة استغرب من طلب المقابلة المستعجل .. وهالمدير جديد ماصار له اسبوع وقاعد يطلب موظفين جدد

شكله من اسمه ثقيل دم وغثيث .... وخلني بس اروح اشوف شعرضهم دام طالبيني بالاسم.



تقول جاء وقت المقابلة .. وفي بالي ان هالمؤسسة ما عمرهم عينوا مدير عدل .. بس خلني أتطمش أشوف شكو ماكو.


دخلت حصة وهي متوقعة أشوف واحد ويهه معفوس وغلق من وصف صديقاتها لها مع المدير الجديد.


تقول أول ما دخلت كانت الصدمة .. المدير كلش غير ما توقعته ..

شخصية .. ومتعلم .. مهندم .. وإنسان راقي

وتقول: تكلمت بطلاقة وحرية في المقابلة على أساس اني جاية اتطمش مو أتعين .. ما اهتميت له وايد وما أتوقع إنه يقبلني على جرائتي في الكلام.

وما اطلعت منه ووصلت البيت إلا نست موضوع المقابلة... ولا كأنها صارت.



تقول: عدا الليل .. الا جايها اتصال من صديقتها اللي زكتها عند المدير : المدير وافق عليج .. ويبيج تداومين عنده بكرة!

تقول قعدت اضحك واقول عز الله هاللادارة خربوطة .. باكلمه وبقوله يبي لي وقت على ما أخلص اجراءات النقل.

المهم .. بعد 10 ايام انتقلت حصة للادارة الجديدة .. وصار اللي ماكان في الحسبان



تقول حصة إنها من أول يوم دوام .. لاحظت ان المدير معجب فيها ومهتم فيها غير عن الموظفات مع إن عنده من الكفاءات وايد

ومع كل شغل يبين إنه مستانس على شغلها واياه وايد .. ويثني عليها قدام الموظفات.


مع بداية أول عطلة نهاية اسبوع .. تقول مرت علي كأنها شهر .... لأنه ما راح عن بالها!

شنو ذيه ؟ وليش المدير عالق ببالي ؟ وليش افكر فيه اصلاً ؟

تقول حصة عشت ويكند كله ضيقه وتفكير غصبن عني وأنا مب عارفة شفيني


تقول: بعد الويكند داومت وأنا متضايقة ... ناداها المدير يبي منها أوراق معاملة .....

تقول قمت أرجف وقلبي يخفق بقو وأنا أحاول أخفي هالعفسة وضيقة النفس اللي فيني

وما أدري نجحت وإلا لأ ..... لكن الغريبة إنها لاحظت نفس الحالة عليه.



هذي كانت البداية بس .. ودارت الأيام لين اتضح لها إنها حبته وحبها من أول نظرة بس بدون إرادة أو قصد منهم

ولأنه كان يحبها ويحاول يخفي حبه قسى عليها وايد كموظفة وظلمها وايد بدون سبب بس عشان يخفي حبه




تقول كنت أصييييح من التوجد بمشاعر أنا مب مسؤولة وما أبيها بس هي انفرضت علي .. وتعبت وايد وساءت حالتها وايد

لين انعزلت وابتعدت ماتبي تخرب بيته لأنه متزوج وأبو عيال ... وافتعلت مشاكل بس عشان تشين في عينه وينقلها عنه.



تمت واياه في الشغل 8 سنين ..

والحين بعد ما اطلعت عنه ..

الظاهر جاتها الفكرة بعد السكرة وتسالني


اذا كانت المشاعر جات بدون تخطيط او ترتيب او اختيار .. والله خلقها بينهم

اشفيها لو صارحته بحبها له أو حتى لمحت له ... والقرار عنده عاد .. يتقدم لها والا مجرد يدري عنها بس.


تقول .. بعد هالسنين ... جذوة الحب صارت صغيرة جداً لكنها موجودة

ولو صارت فرصة اي لقاء حتى لو بالصدفة راح اتذكر وتحيى مشاعرها القديمة .. وهالشي مضايقها ومربطها من داخل


تقول لو صارحته وصدني أو كرهني أرحم من حالة اللوم وأكلة النفس اللي انا فيها.

الحب في معناه جميل ... ليش ما نساعد انه يتم وينتهي بالحلال


///////////////


جاتني حصة تستشيرني .... وللأسف الموقف صعب ماعرفت أرد عليها.



ممكن تعطونها رايكم ..

هي محتاجة الحين تطلع من دوامة لوم النفس واحساسها انه ظلمها وانها هي بعد ظلمت نفسها

هل تأيدون إن الرجال أو المرأة إذا حب طرف ثاني يصارحون بعض من غير خراب بيوت

والا يكتمون حبهم وتتم المشاعر شابة في قلوبهم طول العمر..

والحياة كلها على بعضها بنعيشها مرة وحدة بس؟

[دينالي]

الموضوع غريب ثمان سنوات اربع سنين يتطالعون بالعيون ومافي بينهم اي كلام غير حوار الشغل و نظرات الاعجاب
اللي احسه والعلم عند الله ان المدير مايحب حصة بس ويمكن هي متصورة هالشي لانها تبغي هالشي
الرجل بطبيعته جريء وحساس يحس بشعور المرأه واكيد هو حاس بمشاعرها صوبه ولو يبغيها كان حصل اي طريقه يتواصل معاها سواء بالحلال او بعلاقة
هي تحبه وهو طبيعته يمكن مرح وهي تفسر هالشي حب وبعدين الرجل عموما يخاف من العلاقات داخل العمل لانها تشكل خطورة على مصدر رزقه
الاحسن تشوف حد يوصل رسالتها له اذا نيتها تتزوج او اذا ماتقدر تشيله من مخها فالاحسن تغير قسمها عشان ماتضيع ثمان سنوات ثانية عالفاضي

[sara jsm]

وعليكم السلام اختي الجودي ..

عزيزتي عندي تعليق بسيط على موضوعج ..
الحب او الاعجاب بمعنى اصح اذا انولد يحسون فيه الطرفين ..
واذا راح يصير ارتباط بالحلال فبيصير من اول سنه على الاقل ..
اما الموضوع صارله 8 سنين .. فهالمشاعر كلها كلام فاضي ..
لين جاها نصيب خلها تتيسر ابرك لها وراح تنساه على طول ..
والله يوفقها

[qatarman8008]

الموضوع فيه كثير من النزوات..
شخصيا لا اؤيد اي عواطف بين رجل وامراة خارج منظومة الاسرة..
المدير هذا يجب اعادته الى صوابه وان يتق الله في اداء مهنته..
اي عواطف واي رغبات سواءا كانت ايجابية او سلبية يجب ان تكون خارج مقر العمل وبالطرق المتعارف عليها بين الاهل..
والا لتفشى الفساد في مجتمعنا..

[سالم الزهران]

أثنينهم مفتونين.

لو المدير مب عازب ورغم اعجابه بك يا حصة ما تقدم لج؟ وش بيكون موقفك!
ما بالك اذا هو متزوج؟
مثل ما قال اخوي الدينالي لو يبغيك كان ما تردد.. وحتى لو تقدم لج ما انصحك.. لان الشغلة مالها دافع قوي.. فما ترضين تصير حياتك في وضع اسوء.

الله يهدي الجميع والانسان يعمر قلبه بالخير عشان تخف نوازع الغفلة والوساوس.

[sweet qatar]

عزيزتي القصة متكررة في أي مكان فيه تواصل بين الجنسين

أخبر وحدة في دوامي القديم مديرها كان يهاوشها ويصيحها و تزوجها .. يعني الي يبي يتزوج مب محتاج اشارة من البنت

من طبيعة الرجل انتهاز أي فرصة .. البنت اعجبته وظفها عنده لكنه ما تقدم لها

دام انها طلعت وعقب كل هالعمر أنصحها تنساه تماماً، ما في مبرر يخليها ترجع ورا

واضحه يالجودي انه ما يبيها او حسبها لصالح استقرار بيته واعتقد انها تعاني من فراغ عاطفي الحين قولي لها تخلي الموضوع ورا ظهرها والله يعوضها بالأحسن

[sweet qatar]

في شي نسيت أقوله

حصه ما تدري ان هالمدير المزيون عنده عشرين حصه

السالفه مب انه مغازلجي مابي احط في ذمتي شي عن الريال ، لكن عادة الرجل صاحب المنصب تكون عليه ضغوط و في صراعات ما تعرفونها

اصلا اصغر موظف بتلقينه يدور الكلمة الحلوة بس البنات اذا شافوا اهتمام من مسؤولهم حسوا بالتميز ( شعور غير حقيقي ) لأنه هو المستفيد أولا وأخيرا

لا تحطون نفسكم بهالموقف يا بنات انتي مب زوجته ولا اخته عشان تدعمينه وتساعدينه خلكم بأضيق حدود الشغل اشتروا راحتكم و كرامتكم

هل تأيدون إن الرجال أو المرأة إذا حب طرف ثاني يصارحون بعض من غير خراب بيوت

والا يكتمون حبهم وتتم المشاعر شابة في قلوبهم طول العمر..

والحياة كلها على بعضها بنعيشها مرة وحدة بس؟

طريقة وحدة الي تحدد .. يدخل من الباب على ما يقولون غير جذي ذنوب و عمر ضايع على وهم

[Dana’1]

ما تسوي ولا أي شي و لا أي مشاعر ولا أي تلميح حتى
هي تقول شافت الأعجاب بعينه مو بقلبه لدرجه إنه يتقدم لها
و الرجال عيونهم بحر إلا من رحم الله.
و أنا ما اقصده هو تحديدا الله أعلم بنياته يمكن يكون جادالله يوفق كل جاد ،، بس الكلام بشكل عام.

و إلي أعرفه بـ كثيير قصص واقعيه،، إن الرجال لو يبغى فلانه من النساء زوجه له،،،إلا ما يتقدم لها بطريقة رسميه تحفظ كرامتها حتى ما يتواصل معها مبااشرة لا بنظرات ولا بكلمات.

[ابو عبدالله.]

نظرات المدير او زميل العمل لا تعني الحب. ولو كان كذلك لتكلم معها جديا

يمكن معجب بها كأنثى لكن مش كزوجه و احذر من مثل هذه النظرات لانها تغوي اكثر مما تنم عن اعجاب شرعي يتلوه زواج

الي يبي يتزوج ما يجلس ثمان سنوات يناظر

[khaldoon]

اعتقد الموضوع المذكور بالاعلى لا يمكن الرد عليه مره واحده....لابد من التوقف عند عدة نقاط فيه حتى نحلل ما بين السطور

مثلا اول القصه تقول حصة : تكلمت بطلاقة وحرية في المقابلة على أساس اني جاية اتطمش مو أتعين .. ما اهتميت له وايد وما أتوقع إنه يقبلني على جرائتي في الكلام.

هذا اول الخيط....ابي أقول شي واضح و صريح... الرجل العادي غير التقي بشكل عام اول ما يشوف بنت جريئه في الكلام معاه على طول تلفت انتباهه و يتمنى من كل قلبه انه يشوفها مره ثانيه و ثالثه و عاشره و ما يخسر شوفتها للابد... لو رفض تعيينها كان ما راح يشوفها نهائيا ... استغل قدرته و صلاحياته انه يوظفها و تظل معاه و استغل أيضا هالصلاحيات انه يتقرب منها في الشغل بالمديح المبالغ فيه حسب قولها ....قد يكون على خبث و دهاء او انه كان في مرحلة انعدام الوزن

لما الرجل يلاقي وحده جريئه و بتكون موظفه تحت قيادته يعني ليست ندا له أي انه عنده سلطة فوقيه عليها.....أحيانا اول شي يخطر بباله يقول ...هذه لوين ممكن أوصل معها؟و ايش ممكن احصل منها؟.... طبعا انا اتلكم عن رجل ما عنده أي وازع ديني حقيقي ..ممكن يكتفي بالتواصل معها و التسليه وغيره... ليش.... لانه أي علاقة بين رجل و امرأة تبدأ بتسلية من جانب الرجل لا اكثر بينما تبدأها المرأه و هي عندها استعداد انها تحولها لعلاقة زوجية لو وجدت في هذا الرجل ما يستحق ان يكون شريك حياتها.... أقول لو وجدت يعني ممكن تكون مخدوعة باحساسها او ما عندها خبره او معها حق ...

لازم نعرف انه علاقة المرأة بالرجل هي علاقة ردود أفعال.... يعني المرأة كانت جرئية بالبداية و ردة الفعل هي انه هذا المدير مستحيل يفرط فيها و يخسرها.... يبي يضل على تواصل معها بأي شكل من الاشكال هو يحدده...كيف يحدده... يحدده بقدر جرأته و ظروفه و شجاعته و طبعا كل هذا بمقدار ما هي تعطيه مجال على التمادي

يعني الرجل ما عنده مانع تضل معاه للابد بدون زواج و يتواصل و يضحك معها لو انه ظروفه ما تسمحله يتزوجها او انه خواف

لي عودة أخرى ان شاء الله