الطبيلات الخارجية بين الإيجابية والرفض

[بوخالد911]

الشيء بالشيء يذكر

لما كنت ببيتي السابق
السايق صور لي تنبيه البلدية بضرورة إزالة المظلة !!!
وكنت مسافر حزتها

ولما رجعت
راجعتهم
قالوا عندنا مشروع إنارة الشارع !!!
قلت يعني معقوولة أشيل المظلة عشان إنارة؟!؟!!

خلهم يحطون عامود الليت قبل المظلة أو عقبها !!!

ما يبيله مخ عبقرري

[بومحمد المطاوعه]

كلام جميل 100‎%‎

الله يجمل ايامك

[بومحمد المطاوعه]

لها حل ياخوي

المواتر توقف بزاويه 45 درجه مثل مواقف بعض المولات

مب لازم 90 درجه و صدام الموتر بنص الشارع

يميل الموتر شوي بيكون بحدود الرصيف

اشوف جنب بيتي مجال للوقوف بهالسكل ولا يفكرون فيها الله يهداهم

لو اصور لك كيف طالعين ع الشارع بتعرف قصدي في خطوره الوضع

عيالهم بغوا يموتون يا ريال

شرايك ان جدام بيوتهم لفه فيها مجال لسبع سيارات وما بيمشون لهذا المكان الا 40 متر يعني ولا شي و بيفكون ازمه

الي فهمته من التعليقات ان السالفه كلها تحتاج موظف بلديه يشوف طلب الموافقه ع الطبيله و يمر يشوف و يحدد اوكي او يخليها مائله بدرجه 45 او يرفض الطلب اذا توفر حل قريب من البيت مثل زاويه شارع كبيره بمساحه للوقوف بدون حجب نظر السائقين

مـ؏ـاگ يالغالي كل شي له حل

اذا بيمنعون الطبيلات برع
تحتاج ترصيف للشوارع + انترلوك + ترتيب الشارع
اغلب الفرجان شوارعها قديمه ومافيها ترتيب ولا رصيف ولا شي

ف من جذي البلديه ناسيه الموضوع لان لو تبي تحكم الناس يصفون يزاويه 45 لازم
تنسق الشارع وترتبه بالكامل

اما بخصوص الرفض والطلب
دام مافي عامود يضرب الارض مايقولون لك شي

تخيل بيت الوالده حاط طبيلتين برع بس فيه مجال واسع وقدامنا شارع وارض فاضيه
المهم البلديه حطو لنا لزقه علشان البيب ضارب الارض

كلمت الشركه وشلو البيبات على الارض خلوها معلقه
ههههه ولا قالو شي البلديه قالو جذي تمام
انزين نفس الشي ماغيرت شي انا الا البيبات بس

[بومحمد المطاوعه]

حياك الله اخوي بومحمد المطاوعة
للاسف ان الاعتداء صار حتى على الساحات الصغيرة المخصصة
للتشجير وبطبيلات بأربع ارجل ومسكره من كل صوب

الله يحييك ويبقيك اخوي

اي اشوف بعض بيوت الي فالدفنه وشفت كذا بيت مادري اشلون عنده تصريح

تحصله حاط طبيله تقول غرفه وجدام الساحه الي مقابل بيته

مستغرب محد يكلمه؟!

[معماري قطري]

والله ياخوي بوعبدالله شفت مناظر كئيبة
واحد مسوي كراج في حوطة جنب بيته ومسوي طبيلات
من جهتين ومستولي على ساحة قدام البيت وتارسها
من مخلفات الجيش هذا ما استوى سكن صارت
منطقة صناعية وتلوث الله وكيلك اكثر من
100 سيارة ومعدات
اذا يبي يدير مشروع عنده الصناعية وعليه
بالعافية اما تلويث المدن وسلب حقوق الناس
وإقلاق راحتهم فنحن ضدها

معاك حق في كل ما قلت ونتمنى البلدية تشتغل صح للأمن والراحة العامة

واحد مسوي حضيرة كلاب ( تكرمون ) في فريج وواحد كراج في الطريق والله حالة

من أيام سيارة معوقة وقفت وسدت الطريق وخلاها راعيها فترة .. كلمه اخوي يشيلها وكانت جدام بيته وماطل .. كلم الشرطة وجاوا وسحبوها .. انا كسر خاطري وقلت فقير مسكين بس المشكلة سيارته ما اعتقد مرخصة ومتهالكة وجريمة أصلاً إنه يسوقها

[معماري قطري]

واحد صدمني بمعلومة إن شوارع الفرجان والمناطق السكنية يسوونها من طبقة بسمك 6 سم للقار .. مع المساويء اللي عارفينها من شغل الدك والحفر والدفان الرديء .. هذا ما يفيد شغل ياخذ فترة أحياناً توصل لسنتين وأرصفة وشغل مزعج للسكان وهذا ما عانينا منه في الشارع اللي ورا بيتنا القديم

كانوا عيالي وقتها صغار والغبار الخفيف المتطاير يبقى عالق في الجو سبب حساسية قوية لنا كلنا .. سنتين وهم يشتغلون وفي النهاية بعد ما نزلوا كيابل الكهرباء الهوائية لتحت الارض وسووا انترلوك فوقها وضيقوا الشارع لمسارين فقط وعملوا جزر كبيرة للمشاة وكأن من كثرهم عندنا .. مع أول رشة مطر تسرب الماي للكهرباء الأرضية وصار شوط قوي وبند الكهرب وجات الشركة حفرت ورمت الانترلوك على جنب واستووا البتان يلعبون به كورة في الشارع

ألحين من خلص الطريق حول 15 سنة وزحمة تستوي عليه خيالية واهترى وتكسر وتحفر وخفق في أماكن عديدة .. شغل سنتين ما خدم 15 سنة صح شنتوقع من هالمشاريع الفاشلة

تجون تسوون لي طريق داخلي طويل وعليه عشرات الدوارات وضيق وانتوا تدرون إنه بيخدم تجمعات سكنية كثيرة كالحاصل في مناطق معيذر وعين خالد وهي مهما يكون تعتبر مناطق حديثة .. الوضع اشوفه يتكرر في الوجبة وبالحيران والسيلية .. لا وبعض الطرق عليها رادارات والسرعة 50 مع مطبات مزعجة وشغل سيء للغاية من الناحية التخطيطية والتنفيذية

الطرق الداخلية في الفرجان صح 50 لكن المحورية المفروض تكون 100 وتكون خالية من الدوارات المزعجة أو لأقل درجة نقلل منها

نحصل فجأة تكتل دكاكين وسوق مرتب مخسرين عليه ملاكه .. لكن تعالوا للطريق الموصل له .. دفان صخري مزعج يحتاج سيارة عسكرية مصفحة تمشي عليه

في النهاية اللي خسر وتعب وبنى يتمنى مرافق نظيفة توصل لبنيانه وشوية زراعة وتجميل عملي ما يتغير بين يوم وليلة أو يخترب ويحتاج اصلاح جذري .. بعضهم يعانون لين يوصلون لين بيوتهم وكنت من اللي الشارع منتهي قبل بيتي بحول 10 متر وتستوي نقعة كبيرة وغيلة وقت المطر ولولا معرفتي بأحد المدراء ما كان خلص الشارع أو وصلة الشارع بسهولة .. يمكن سكنت 4 سنين لين انبنى الشارع