اسمحوا لي اخواني الجوكر وسارة حكمكم خاطيء ومعاكم حق فيه لأن الاستشارات والمقاولات خربوها ناس قلة يمكن دخلاء على هذي الصنعة والعيب في قوانين البلاد وأجهزتها الرقابية والإدارية لهذي الشغلات .. للحين ما زال فيه ناس شغالين بهمة ومهنية بس بعد لازم يضمنون لقمة عيشهم حسب الاتفاق وحسب أُصول المهنة

كم مقاول قابلت ينصحني نصيحة واضحة ومخلص بها وكم استشاري كذلك ولكل شغلة ناسها .. مثال مقاول بغيته يسوي لي كل شيء وحسب تفاصيل وعقد واضح ودقيق .. قالها صراحة انه نسق وجاب أسعار من مقاولين ثانيين للخشب وللأعمال المعدنية وللتكييف .. والأسعار بعضها طلعت غالية وحتى اسم المقاول مسجل في العقد المبدئي .. مع التفاوض مع الاستشاري وصلت لحل إن المقاول الرئيسي يسوي كل شيء ما عدا شغل الحديد درابزين وأبواب والخشب هو عليه الفريم الاساسي اللي اسمه سب فريم يتركب عليه الفريم .. والصبغ والجبس ورخام الدرج أما باقي أعمال البلاستر والكهربة والارضيات عليه حتى خارج الحوش وعليه حماية الموقع ومسؤوليته حتى في وجود مقاولين ثانيين

كل أعمال المياه وتركيب الحمامات عليه وعلي التوريد وهو مسؤول يستلم ويعاين ويحافظ على القطع .. اللي صار المقاول كان ماسك الموقع من البداية للنهاية وكان ناصح أمين لي هو والاستشاري ويتابع الاستشاري بتخصصات احتاجها مثل الكهرباء والميكانيك واستفدت من مهندسيه وايد .. من ضمن الأشياء اللي سويتها معمارياً كان درج معلق من تحت وفوق وبارز بشكل خطر بدون عمود تحته يتوازن بالشد من جهتين .. هذا تصميمه صعب وكان المقاول خايف من التصميم ومخلي الدعامات الحديد تحته فوق شهرين

الاستشاري راجع تصميمه وتخوف وجاوا كم مهندس انشائي وقتها وطلبوا من المقاول تمديد حديد 20 ملم بكامل الطول من أسفل الدرج وقاعدته لين الصالة العلوية حتى ينربط الدرج ربط قوي .. بالصدفة كنت موجود ووضحوا لي تخوفهم وحلهم المقترح والمقاول نفذه بالحرف وبدون أي تكلفة اضافية

لو بنجي للحسابات شركات رخيصة درجة رابعة وحتى غير مصنفة عطوني فوق 3 ملايين عرض سعر وهذا المقاول عطاني 1.1 مليون وهو درجة أُولى وقوي .. وفي المناقصة خذت سنة في ركضة مع الاستشاري واجتماعات لين قدرت اقرر ولا رحت لرخيص بغالي بل توفقت في غالي برخيص والحمد لله