أبناؤنا الطلاب مستمرون بالذهاب الى المدارس لما بعد 15 يونيو!

[khaldoon]

طول ساعات الدوام اليومي في المدرسة
ما يعني ان احنا أطول سنة دراسية و لا اقل الأيام في الاجازات..
احنا عندنا أسبوعين عطلة الربيع + أسبوع شهر ابريل+ أسبوع عيد الفطر+ شهرين و خريدات الاجازة الصيفية.

ترى الأرقام المحطوطة فوق .. بعضها يعتبر متوسط الساعات 6 ساعات لان في مدارس يابانية
تعدي ال 8 ساعات..
في أمريكا طلاب الابتدائية يداومون 7 ساعات من غير ساعة الفسحة و الاكل.

فلما انت تقول ان ساعات الدوام اليومي عالي.. قول لي كم عدد الأطفال اللي مرضوا من طول يومهم المدرسي؟!!
لا تقول لي انا احس بولدي تعبان او بنتي متضايقة.. قول لي شنهو اللي افقده ولدك في حياته و صحته لما
داوم 6 او 7 ساعات في المدرسة.. وشنهي الامراض اللي عانى منها بسبب هالدوام!!

ولدي ممكن يلعب 9 ساعات في اليوم تحت المكيف وفي الحوش ويراكض و يلعب في الطين و الرمل
لكن انه يكون في مكان يسمونه مدرسة.....> نقول الولد دوامه طويل؟


اخوي معماري شخصيا احترم عقليتك و نوعية ردودك بحكم انك انسان مطلع و مستوعب حاجة البلاد
الى التطور و التغيير..
ما تتطلع له انت مستحيل نحصل عليه في ظل وجود أولياء أمور متذمرين يبون التعليم يمشي حسب مزاجهم.
مستحيل هالشي يصير.

اليوم الدنيا تطورت.. قبل 30 سنة لما تستلم الشهادة كانوا يسئلونك هاا ناجح و لا ساقط؟
بعد 30 سنة من السؤال الموجه لك السؤال صار.. هااه كم نسبتك في الشهادة؟
بعد 10 سنين صار حققت متطلبات الجامعة؟
الحين تعدينا مرحلة حققت متطلبات الجامعة الى التركيز على نوعية الجامعات اللي لازم نحث عيالنا انهم ينتسبون لها.
و كيف نحث عيالنا انهم يتخلصون من هموم مواد في مرحلة دراستهم الثانوية علشان يركزون في مواد اكثر أهمية
و في صميم الدراسة الجامعية.

يمكن البعض يختلف معاي و هذا حق لهم.. و من حقي اني أطالب بتطوير التعليم في البلاد حتى نوصل للمرحلة
اللي تكلمت عنها.. و وصلونا للمرحلة هذه ما بيتم على مستوى الدولة دام ان هناك تذمر مستمر من الوزارة او الجهة
المخولة لتعليم الناس في قطر.

انا راح اقترح اقتراح يعمل به في كثير من دول العالم و هو ببساطة اعطي الخبز لخبازه حتى لو اكل نصه .... بمعنى بدل ما نحاول نقلد المدارس الدولية اللي حضرتك تتكلمي عنها و نفشل و نتعب من التقليد و يمكن نمارسه بطريقة خطا لكذا سنة يتعلمون في الطلاب و يصير عنا جيل ضحية حتى يطلعوا بالمخرجات المطلوبه....ليش ما يتفقون مع أصحاب المدارس الدولية اللي حضرتك تقصديها و هم يقومون بإدارة التعليم في المدارس الحكوميه


ليش ما نتعامل مع وزارة التعليم مثل ما نتعامل مع إدارة الجمارك لما تجيبي مؤسسات متخصصة بهالمجال كما يحدث في بعض الدول و هم يديرون الجمارك او مؤسسات الكهرباء و الماء و الطيران و المستشفيات و الرعاية الصحية الأولية ..الناس راح تتحلذم شوي و بعدين غصب عنهم يتقبلون ذالما ما في بديل...المدارس الحكومية و الخاصه تدرس نفس الشي

مثل ما شكينا من أسلوب الرعاية الصحيه اللي صارت كلها مواعيد و فاضية دايما و الحين غصب عنا تأقلمنا مع الوضع الجديد

[يمامـة]

ما دام كل شيء تغير ليش نسبح ضد التيار

نقلل الدوام اليومي ونقلل السنة الدراسية .. نعطي فرصة للأهالي يشوفون عيالهم ويشاركون في تربيتهم وتعليمهم كذلك .. هم خذوا الطالب طاقة فل وتركوه طاقته بالماينس .. نفس الوضع للأهل اللي يداومون .. الإنسان يحتاج شوية وقت يبند مكينته شوي

بعدين يقولون تعليم على البحث والتحري والمناقشة وتعليم حديث غير عن التلقيني والحفظ لكن الواقع غير .. التعليم اللي كانوا يتكلمون عنه يعني مشاركة وكتب مفتوحة ووسائل متاحة للحصول على المعلومة .. إذا المدرس كل سنة ينسخ المنهج في دفتر جديد بس حتى يشوفونه ملون ومزركش .. ليش ما يستخدم القديم ويضيف عليه ويطور من وقت لوقت حسب ما يستجد

اخوي معماري

ترى الموضوع قايمين عليه ناس فاهمين الامور حسب مكانتهم في التعليم..

فما اعتقد اللي يطبق السياسة التعليمية الحالية في البلاد ناس اطباء او مهندسين
او حرفيين علشان ما يستوعبون شنهي قدرات الطلاب و شنهي طاقتهم الاستيعابية في الفهم
و الحل في المدرسة او في البيت..

كل المطلوب ان نعطي الوزارة فرصة و نحث عيالنا على لعب دور الانسان اللي يبي يتعلم

لما عيالنا طووول السنة هاملين كتبهم و انيي حزة الاختبارات نبيهم يحلون اسئلة قدرات عالية
بالذمة هذي اشلون تصير؟

[يمامـة]

انا راح اقترح اقتراح يعمل به في كثير من دول العالم و هو ببساطة اعطي الخبز لخبازه حتى لو اكل نصه .... بمعنى بدل ما نحاول نقلد المدارس الدولية اللي حضرتك تتكلمي عنها و نفشل و نتعب من التقليد و يمكن نمارسه بطريقة خطا لكذا سنة يتعلمون في الطلاب و يصير عنا جيل ضحية حتى يطلعوا بالمخرجات المطلوبه....ليش ما يتفقون مع أصحاب المدارس الدولية اللي حضرتك تقصديها و هم يقومون بإدارة التعليم في المدارس الحكوميه


ليش ما نتعامل مع وزارة التعليم مثل ما نتعامل مع إدارة الجمارك لما تجيبي مؤسسات متخصصة بهالمجال كما يحدث في بعض الدول و هم يديرون الجمارك او مؤسسات الكهرباء و الماء و الطيران و المستشفيات و الرعاية الصحية الأولية ..الناس راح تتحلذم شوي و بعدين غصب عنهم يتقبلون ذالما ما في بديل...المدارس الحكومية و الخاصه تدرس نفس الشي

مثل ما شكينا من أسلوب الرعاية الصحيه اللي صارت كلها مواعيد و فاضية دايما و الحين غصب عنا تأقلمنا مع الوضع الجديد

خلدو

هذه هي الدولة ما قلدت المدارس الدولية و الناس تصرخ من الحكومي
بينما لما عطوهم الكوبونات شلوا عيالهم للمدارس الدولية و يبون المدارس
الدولية تسمع كلامهم و تطبق لهم اللي يبونه حق عيالهم!!

فأنت اليوم تتكلم عن الوزارة كأنك عاش في اروقتها" اعذرني"
لا انا و لا انت نقدر نحدد مقدار المجهودات اللي تقوم بها الوزارة او نحدد
اذا كانت هناك شركات استشارية او غيرها تدعمها ..

احنا كل اللي نسويه ان ننتقد وبس. ونبي عيالنا من غير واجبات و نبي دوامهم اليومي يقل
و دوامهم السنوي يقل.. و ما نركز في نقاط اهم من هذه الا وهي
هل ولدي محقق المعايير؟
كيف هي مخرجات ولدي قياسا مع مخرجات س من الابناء في مدرسة خاصة؟
ما هي المميزات اللي اكتسبها ولدي في عامه الدراسي؟

كل هالامور مب موجودة في حساب اولياء الامور.
و اذا شفت طلاب متفوقين في المدارس الحكومية او الخاصة
تأكد ان هالطلاب وراهم اسر تدعمهم و تزيدهم فوق منهجهم المدرسي
علشان الطالب يتطور.

[يمامـة]

شيء جميل انه يكون في مدارس للنخبة و العباقره بس اعتقد انه هالمدارس راح تسبب عقد نفسية لبعض الطلاب اللي فيها....تخيلي واحد معدله %93 و هو يعتبر اتيس طالب بالصف و انتوا بكرامة

انا شوفت هالشي كمثال من جيرانا في الأردن.....ابنهم الكبير كان ابوه يقوله انت راح تطلع عامل نظافه قبل الثانويه بسنة و الله العظيم فاجأهم انه جاب معدل يدخله طب في اهم جامعة بالأردن... 94% ...الجامعه الأردنية.....و درس طب غصب عنه مب بكيفه و هو كان طالب بمدرسة حكومية

اخوه الأصغر منه و المتفوق على طول و بمدرسة افضل و فرنسية كانوا متوقعين انه يطلع من العشر الأوائل على المملكة طالما ابنهم الهامل دخل طب ...راح جاب معدل 93.7% ....والله كأنه راسب ...احتقار من اهله و هو محطم نفسيا و مكتئب يوم طلعت النتيجة و درس صيدله في جامعة العلوم و التكنولوجيا يا حرام ههههههه

النخبة اعتقد راح يعملون لهم اختبارات قبول

يعني الجامعات المرموقة تجيب لهم شهادتك 100% عيني عليك باردة وانا جدتك
هم يختبرونك اذا نجحت في اختبارهم و حققت المعايير المطلوبة للقبول قالوا لك حياك الله
اما انك تكون يايب لهم شهادة فل مارك في كل شي و ترسب في تحقيق ابسط المعايير
بيقولون لك للخلف در..

فلاحظ يا ستو يا خلدون الله يرضى عليك
ان ابسط هالامور احنا كأولياء امور ما ندري عنها.. و للاسف نتكلم و نفتي فيها
و فوقه نبي نتدخل في شغل ناس مختصين في التعليم و مسؤولين عن تحديد ما يناسب
التعليم في قطر.

[khaldoon]

حتى اللي يشعر و يقنص تراه ينظر للمتعلم انه وصل للي هو ما قدر يوصل له ويشعر بالنقص
و يتمنى انه مكمل دراسته و محصل شهادته. و يفتخر بنفسه انه متعلم.

فالدولة لما تصرف هالمليارات على الشعب علشان يتطور و يتعلم أكيد مب عيزانة تخصص
هالمبلغ تطلع أجيال من الشعراء..
بس التعليم مهم في تطور الأمم بينما الشعر رزق ربنا ساقه للي الله حباهم في اتقانه.

صراحة لاحظت انه ناس وايد مب متعلمة بس نجحت في حياتها العملية و جمعت فلوس اكثر من المتعلمين...كان معي صديق و ابن جيرانا و انا و هو نجلس جنب بعض على مقاعد الدراسه....انا خلصت هندسة و هو خلص ثانوية بس او يمكن ما خلص لا اذكر

المهم يوم تخرجت لقيته يشتغل مع ابوه خمس سنوات اللي انا قضيتهم بالهندسة في ورشة حدادة و صار معاه فلوس بحكم شغل ابوه الخاص و انه متوصي فيه لانه ابنه الوحيد لحد الكذب و المبالغه......يعني يقولي مثلا سيارتي الكورفيت هذه ما في منها الا ثلاثه بقطر ....و كل شوي يقولي انه هو يحصل احسن من خمس مهندسين و يضل يحاول يحسسني انه هو الصح و انا معاي شهادة هندسة بس كم راتبي و كم معي بالبنك.....و هذا بس دليل على عقد نقص و حقد من داخله لانه يعرف انه ممكن مستقبلا يصير معاي فلوس بس هو ولا يمكن يصير معاه شهادة جامعية

بسبب سلوكه العدواني معاي و الشعور الدائم بالنقص قطعت علاقتي معاه

انا متأكد انه كل انسان مب متعلم بيضل يشعر بعقدة التقص هذه مع احترامي للجميع.....ابن جيران اخر قال لنا مره في جلسة نقاش و صراحة انا صحيح مب متعلم و فاشل دراسيا مب مثلكم بس معاي فلوس ....لما اجلس بين ناس متعلمين في سهرة.....اروح متنكد و مهموم و منزعج بس ثاني يوم اصحى الصبح و أقول انا اقدر اشتري خمسه منهم و يواسي نفسه بهالكلام

في نظرية المربع المفقود بالسقف.... يعني لو السقف او false ceiling مسكر تماما الا من مربع واحد بتضل عينك متسلطة على هذا المربع الناقص

كل واحد مننا عنده هذا المربع الناقص اللي ما يشوف غيره او خلنا نقول اكثر شي يركز عليه في علاقته مع الاخرين ممن حوله...يعني مثلا السمين اول شي يشوفه هو نحافة من حوله.....القصير يشوف طول من حوله....الفاشل دراسيا يشوف نجاح من حوله...هذا اول شي يشوفه...الفقير بس يشوف انه الكل معاه فلوس .....لهالسبب قالوا القناعة كنز لا يفنى

[khaldoon]

اخوي معماري..
هل لقيتني قلت ان نظامنا التعليمي كامل من مجاميعه؟

اكيد هناك سلبيات ما نقدر ننكرها و نتمنى ان تنحل و تتغير..

بس نقطة التذمر من وجود عيالنا للحين في فترة الاختبارات و صراخ المعلمات من الظلم
اللي يعانون منه.. و انهم انهد حيلهم و انهم يداومون و ينكرفون و ما عندهم وقت يتنفسونه
و طول السنة شكاوي في كل مكان .. حتى مع نهاية السنة بدل الطالب يدخل الاختبارات بدعم و تشجيع
يدخل و كم كبير من الشحنات السلبية تزفه زف للاختبارات و ناطر تعزيز من الاهل و المحيطين لالقاء اللوم
على الوزارة في أي تراجع يسجله في النتايج.

الكل يشتكي من طول أيام الدراسه و حشو المناهج باشياء غير ضروريه و ما في دخان من غير نار...هل المعقول ان الكل غلطان و الا انه الكل ما عنده ثقافة و عقل و تفهم ما تفضلتي به يا ستو؟

[khaldoon]

عيل ليش التعنت في هذي السياسة التعليمية

قبل كنت اشوف اللي حولي من مدرسات بنسخون دفاتر التحضير نسخ ويجددونها .. لماذا وليشٌ كل هذا؟

شفت مدرسين الجامعة في أمريكا يكررون الامتحانات ويمكن يغيرون شيء بسيط ويكررون الوظائف أو المشاريع وبعض الطلبة عندهم القديم وعارفين خارطة الطريق .. في يدهم دفتر أو ملف التحضير مهتري من سنوات ما تغير يضيفون عليه بس ويشخبطون .. مستغرب ليش ما يخلون معلمينا مثلهم

في الصيف كانت الاجازة توصل 4 شهور بس فيه فصل صيفي قليل من المعلمين باختيارهم يعطون حصص فيه وقليل من الطلاب يداومون فيه بعد باختيارهم .. حتى المدرسين لهم ساعات عمل محددة وحصص معينة بعدها فيه أوقات مكتبية لمراجعة الطلاب وباقي الوقت بعض المدرسين يشتغلون شغل غير في شركات وبعضهم يعطون ساعات زيارة هناك في مقر شغلهم .. يعني عادي نشوف مدرس يداوم يومين بس وكل يوم كم ساعة

شوفي عندنا كيف الابتزاز فيه مدرسين يعطون حصة ويقعدون باقي الوقت دوام كرسي فقط ولو كلفوا بشغلات ثانية اتوقع مب من واجبهم يسوونها

ما يبون المدرسين يشتغلون شي ثاني علشان يركزون على التدريس في المدارس اللي يشتغلون فيها.....يبونهم دايما مشغولين بحالهم و مب ملحقين و سياسة حلب و عصر للمدرسين علشان يحللون رواتبهم .....الضغط على الجميع على المدرسين و التلاميذ

[khaldoon]

ياخوي الدكتور الحمادي مستلم الوزارة من 2013 يعني كل الإخفاقات بنقطها في راس الوزيرة السابقة ؟؟

اكيد لا.....عيل ليش شالوها و جابوا واحد يكمل مسيرتها...وين بصمته...ايش أضاف للتعليم في هالحاله....ايش الفايدة من تغييرها ....

[khaldoon]

انتقادي حتى لأُم عيالي هي مع هذي المنظومة ومقتنعة بوجهة نظري شلوا التربية كلش وركزوا على العلوم وخلوا اللغة العربية وألحين افاقوا من خطأهم وقرروا التعديل باستحياء

زمان كانت المدارس حكوميه و بعدين صارت مستقله و الحين رجعت حكوميه مثل اول .....ليش لسه اسمها مستقله للحين...مستقلة بايش بالزبط؟

الرجوع للخطط القديمة اعتراف صريح انه الخطط التغييريه الجديده اثبتت فشلها و عدم نجاعتها و الضحيه طبعا الطلاب و لهالسبب صعب الاعتراف بالخطأ لانه الضحية هي أجيال من ابناءنا يفترض بهم انهم يمسكوا مناصب مهمه و حساسه بالبلد مستقبلا وما نبي نقول انهم تعلموا غلط و انهم كانوا حقل تجارب

[khaldoon]

الحكومة خسرت على مدارس جيدة بس مظلمة ما تدخلها الشمس وما خسرت على سياسة تعليمية فيها حتى شوية عقاب .. دخلت مدرسة ثانوية كل حوائطها الداخلية صوب الصفوف مرسوم عليها ومشخبطين .. شوي الا اثنين يتراكضون كل واحد يرش حبر على الثاني .. سألت المشرف شيصير قال هذا شيء بسيط ولو نحاسبهم تنقلب المسالة علينا .. عذرتهم .. هذا مب تعليم وضع صعب جداً على المدرسين والاداريين مقيدين ومطلوب منهم الشيء الكبير

ايه والله معاك حق......الضرب ممنوع و المدرس مكبل .....بس أيضا كان هناك ضرب ممنهج سابقا مثل التعذيب و الاذلال من بعض المدرسين....كان عنا مدرس رياضيات يخلي الطلاب يبوسون العصايه اللي ينضربون فيها و يسميها عزيزه و يقولهم اسمها ايه؟؟!! ....و بعدين ترك التعليم و عمل ممثل في برنامج الكاميرا الخفيه عرض في شهر رمضان في قطر.....مسخره