مجالس ................. ولكن ؟!

[الجـــوديّ]

و عليكم السلام ورحمة الله وبركاته
صباح الخير يالجودي..

ما ينطبق على المجالس ينطبق على داخل البيوت
و أي تجمع للناس في اي مكان .

لذلك لما تلاحظين بروز الوقاحة و قلة الادب
و السب و الشتم و التنمر و الاستهزاء بشكل ملفت
للنظر .. هذا يدل على ان ساكني هذه البيوت
و المجالس و رواد هذه المواقع الطبع فيها غلب التطبع..

اضافة الى ان غاب القانون و غابت الصرامة
في الضرب بيد من حديد لكل من سولت له نفسه يسب
و يشتم و يعتبر انتقاد دول حلف الفجار ما يكون
الا بالتعرض لحكامهم باللعن و السب و الشتم
في الوقت اللي احنا نتأذى من سبهم و شتمهم للامير
و الاسرة الحاكمة و بلادنا.

فالمجالس يحكمها روادها من الكبار و الصغار..
فمع الثورة الرقمية اصبح الجلوس في المجالس
جلوس رقمي.. اغلب الناس جواويلهم في اياديهم.

قدوتهم للاسف ناس وقحين و متنمرين او سفهاء
صاروا مشاهير و بدوا يمثلون دور الحكماء على الناس.

لذلك اليوم المجلس ما عاد نفسه المجلس القديم
اللي لو دخل حكيم بيتكلم الكل بيسمع له..

اليوم الحكيم و غير الحكيم جالسين في المجالس
و مشغولين بجواويلهم.

فشكل المجلس و كبره مب مقياس على مخرجاته
رواد هالمجلس سواء كان صغير او كبير هم من
يبرزون قيمته .

حي الله اليمامة

اتفق معاج ان حجم المجلس مب معيار لكن اللي ياخذ العين

ماشاءالله ان المجالس صارت من كبرها قاعة مؤتمرات

بكل مرافقها .. وطابقين فوق وتحت .. باقي خدمة الفاليت ..

وماستبعد انهم سووها.


مو مشكلة .. اكيد الرجاجيل لما يقعدون يتفاكرون وياخذون علوم الدنيا ..

عااادي كل الناس تقعد وتسولف

لكن مع زيادة الثراء ومع تطور الحياة ومستجداتها سواء حصار والا ثراء والا غيره

ومع قيادة شابة متطلعة ..... تصير الفجوة كبيييييييييرة بين القيادة والشعب واذا خصينا الرجال

مايصر (مايصير=في مقياسي وتقديري والا كلن بكيفه ) هالاشياء ماتستثمر بشي مفيد

يرجع على الشخص نفسه وماترجع على بلاده بشكل أو بآخر

يمكن الجواويل شوي وعّت الناس وخلتنا نشوف المجتمعات الثانية

شلون تناقش وتطرح موضوع وشلون تتناوله

احنا التناول ضعيييييف سطحي .. مافي خبرات حياة..

بينما تعالي شوفي الكويتيين .. لأن عندهم مجلس أمه منتخب ..

صار النقاش والتناول والطحنة مع أكلهم وفي دمهم

لاول كنت اقول ليش هالطحنة والقيادة موفرة كل شي للمواطن .. ليش عوار الراس

الحين عرفت ان الطحنة تعلم شلون الواحد يطالب بحريته وحقوقه

وشلون يحللون الامور ظاهرها وباطنها

وعندهم النقد الحاذق .. وروح الفكاهة السياسية ...

وايد اشياء تنعكس بظلالها على كياناتهم وأشخاصهم


الكويتي اليوم يناقش حصار قطر بكل تفاصيله

ومعطيات قطر السياسية افضل بوااايد من القطريين

من غير شر والله لا يقدر بكرة صار في الكويت شي نقدر نكون مثلهم في التعاطي!

(أشقائنا وحبايبنا الله يحفظهم من كل شر .. معاهم قلباً وقالباً والتاريخ يشهد)

تعلموا ياخذون موقف .. مايطالعون ويسكتون

حتى أشكره يعلمون القطريين شيقولون في تويتر وشلون يتعاملون .. وعمك أصمخ

أسكت هنيه أحسن .. لحد يزعل .. للأسف هذا الواقع :/

[الجـــوديّ]

لا المجالس ولا الصحافة ولا غيرها بتفيد في المجتمعات اللي فيها طبقية، حتى مجتمعاتنا لول ما كان فيها نفس الطبقية المقيتة اللي أوجدناها اليوم.

مثلك عارف الله يسلمك .. مالا يدرك جله لا يترك كله

مش كل المجالس فيها طبقية .. بالعكس فيه مجالس كريمة طيبة

لكن تبي من يوعى ويتحرك وخاصة من الشباب .. يتدرجون بخلق توجه جديد يعلم الكبار والصغار

الحين الكل شغوف انه يسمع ويعرف ويتعلم كبار وصغار .. على الاقل مرة في الشهر


شفت ايام العيد .. في فيديو منتشر .. مجلس قبيلة معروفة .. عاملين مسابقات وجوائز وترتيييييب

وكل الاعمار حاضرين الكبار كلش .. كبار القبيلة والشباب الصغار وكانت الاجواء مرحة

وحلوة وتزيد ترابط الأسر ببعضها مافيه نفس ثقيلة أو شينة

دام أوجدنا مكان للمرح والترفيه مب صعب انهم ينظمون جلسة أدبية أو دينية او ثقافية ..

هنا يكون التباهي والفخر.

[معماري قطري]

,

,


مرحبا


شكرا على الموضوع


الحاله الاقتصاديه في اخر 10 سنوات في قطر بفضل من الله زادت كثير عند جميع الناس
نحمد الله ونشكره

وظهرت فئه ما كانت معروفه ( تحاول ) تعلن عن نفسها من خلال ( المبالغه ) في المظهر العام للمجالس وسعه الأراضي والموقع المميز
وكبر وفخامه المجالس

أتكلم عن ( البعض )

يمكن ينقصهم حب الظهور وهذي وسيله سهله

تعطيهم هذا الإحساس ( بالظهور ) الي يلبي حاجه في انفسهم

هذي النوعيه من المجالس مافيها غير اللعب بالورق
وفئه قليله من المقربين يجالسونهم


هناك مجالس صغيره وروادها ما شاء الله بشكل يومي وفيها الراحه النفسيه والسمعه الطيبه


الموضوع المهم
هو المجالس ( الثقافيه ) وما يدور فيها من ( مناقشات )
هناك دول سابقتنا كثير
مثل الكويت في مجالسهم جلسات علم وجلسات سياسيه واقتصاديه
وفيها مفكرين ومحللين
وفنانيين بشكل اسبوعي عندهم موضوع يتناولونه

في قطر ما زال هذه النوعيه من المجالس ( تعد على الأصابع )

لاعتبارات كثيره جدا أهمها

المجالس عندنا تتسم ( بالبساطه ) وتتجنب الخوض في المجالات السياسيه او المواضيع
( الحساسه ) او المواضيع العميقه

ما انتشر عندنا المجالس الثقافيه او تحويل المجلس الى مكان ثقافي


المجلس بمفهومه البسيط سابقا
مكان التقاء يومي و للمناسبات والضيوف ويجمع الاهل والأصدقاء واهل المنطقه
او اهل الفريج الواحد
تجمع جميل وعاده رائعه تنتقل بين الأجيال وهي مدرسه يتعلم فيها الصغير فن الحديث
والعادات والتقاليد ويتعارف اهل المنطقه ويزيد اللحمه بينهم



المجالس الحين ( البعض ) منها

لعب ورق
لعب بلاي ستيشن
واكثر من يجلس فيها المراهقين

اذا كل واحد جالس بمجلسه ( كيف يلتقي الناس )



,

,

أحد الإخوان مسوي تطبيق اسمه مجالس قطر أو أهل قطر ما عرفت شلون بالضبط طريقته بس عن طريقه تعرف رفيجك متواجد في أي مجلس أو إذا بيفتح مجلسه من الساعة كم للساعة كم .. قال لي عنه من فترة ولا جربته

[معماري قطري]

مثلك عارف الله يسلمك .. مالا يدرك جله لا يترك كله

مش كل المجالس فيها طبقية .. بالعكس فيه مجالس كريمة طيبة

لكن تبي من يوعى ويتحرك وخاصة من الشباب .. يتدرجون بخلق توجه جديد يعلم الكبار والصغار

الحين الكل شغوف انه يسمع ويعرف ويتعلم كبار وصغار .. على الاقل مرة في الشهر


شفت ايام العيد .. في فيديو منتشر .. مجلس قبيلة معروفة .. عاملين مسابقات وجوائز وترتيييييب

وكل الاعمار حاضرين الكبار كلش .. كبار القبيلة والشباب الصغار وكانت الاجواء مرحة

وحلوة وتزيد ترابط الأسر ببعضها مافيه نفس ثقيلة أو شينة

دام أوجدنا مكان للمرح والترفيه مصعب انهم ينظمون جلسة أدبية أو دينية او ثقافية ..

هنا يكون التباهي والفخر.

صحيح 100% والشيء الطيب يتباهون به هله

عندنا مجلس فريجنا من أيام الوالد عبدالعزيز بن خالد الغانم الله يرحمه وتتابعت فيه أجيال وتمت فيه بعض الإضافات والتعديلات بس الأساسي والقديم كلش بعمر يزيد على الخمسين سنة موجود .. وموجود ليس كمكان فقط بل نجتمع فيه كلنا بعد صلاة الجمعة ويومياً على مدار الساعة مفتوح وأوقات فيه ثلاثة أجيال جالسين مع بعض

[الجـــوديّ]

بالنسبة لنا في قطر الطبقية شبه مفقودة لكن تتضح لين يجيك في المجلس واحد لابس غترة وعقال وهو دخيل على أهل البلاد .. أما القطري المعروف ففي كل المجالس مرحب به وما اقصد المعروف اللي وزير أو حوله المعروف كواحد من اهل البلاد .. أوقات تمر ناس ما تتوقع تحصل حد تعرفه لكن تتفاجأ بعدد كبير يعرفونك

انا مؤيد للمجالس اللي تجمع المواطن وبعض المقيمين على الخير وحتى لتخليص بعض المعاملات وجزاهم الله خير اللي فاتحين مجالس يومية .. حتى أوقات الترفيه والضحك بحدود مطلوب

أما مسألة السب والقذف في وسائل التواصل الاجتماعي هذي نتيجة وردة فعل ما أايد صاحبها بس اعذره ولو نلاحظ أي شيء يستوي ضد الكويت من تصريح أو تلميح نحصل شعب الكويت غالبيتهم ردوا عليه ومسحوا به الأرض وهذا الشيء يخلي الكلاب الضالة تخفف نباحها وتعرف إن جايها الرد .. شعب قطر سكت وايد ورد بطيب لكن الطيب ما ينفع مع العفنين والمهاجمين

اتفق ... فيه مجالس لها قوانين التحلي بالاخلاق والالتزام بالسلوكيات الطيبة

ممنوع الدخان .. ممنوع الحضور بغير الثوب والغترة والعقال .. وخاصة في وجود الكبار

وأي فعل مايتوافق مع عادات القطريين .. ينطرد من المجلس وياويله لو قرب.

الحمدلله .. مازالت المجالس فيها خير ونتمنى بحركة جديدة فيها ..


تنعكس على شخصية الرجل القطري ..........................

[الجـــوديّ]

كثير المجالس (الا ما اقل) فقط مباني خرسانية هدفها الأساسي (اشهد ان مجلسهم كفو) او (مجلسنا اكبر من مجلسهم).
حب التباهي سمة يمتاز بها مجتمعنا وهو شي جميل لو كان في أشياء معينة يكون التنافس فيها مفيد للمجتمع. المجالس مدارس وابسط ما يمكن تعلمه هو الجراءة فالكلام ولكن لا يعتمد عليها في كثير من الامور كمصادر للمعلومة.
تعجبني الكويت في دواوينها اللي يتم الاكتفاء بديوانية/ مجلس لعائلة او قبيلة وكثير منها يقام فيها ندوات سياسية وفكرية ودينية حتى.
فيه مجالس تقوم بنفس هذا الشي ولكن معدودة على إصابع اليد الواحدة.
موضوع شيق وسبق ان أثرته في رد ع موضوع اخر

شكرًا ومتابع لباقي الردود

...

شكلك شايل نفس الهم ..

فعلاً مباني خرسانية ... ولو تفعلت هذي المباني وتوجهت هذي التجمعات

بأي شكل كان للثقافة والتنوير ومنارة للعلم واستضافة العلماء

بيكون تاثيرها فارق جداً ... حتى جرأة الكلام ... وآدابه وأصوله ..

هذي من صفات العرب الأساسية .. قوة المنطوق واللسان ومازال


تصير مناظرات فكرية بروح ودية .. مبارزات شعرية يكفلها الاثرياء ..

هم يبون السمعة والصيت .. مايمنع رواد المجالس ينظمون نفسهم.

كنت استغرب من المغردين الكويتين من اسلوبهم وتناولهم وتعبيرهم

ومناصرتهم للقطريين .. كاشخاص ما اعرفهم

لين صادف اني مارة بمكان وكان فيه شخص كويتي كان يتكلم عن قطر ..

يحمل نفس الاسلوب .. المنطق والموقف والجرأة بكل أدب

ويننننننناااااا احنا ؟؟!!!!

دخلت يوتيوب اشوف شسالفة الدواوين الكويتية ..............

طلع اللي عندهم ترتييييب اعتقد بنبطي نوصل مواصيلهم

مع احترامي .. ما احب اقارن حد بحد .. لكن الكويتين أصحاب تجربة يحتذى بها ...

وأنتو أبخص بانعكاس هاللشي عليهم كأفراد ومجتمع .


شاكرة لك المتابعة ................ stay in zone

[الجـــوديّ]

,

,


مرحبا


شكرا على الموضوع


الحاله الاقتصاديه في اخر 10 سنوات في قطر بفضل من الله زادت كثير عند جميع الناس
نحمد الله ونشكره

وظهرت فئه ما كانت معروفه ( تحاول ) تعلن عن نفسها من خلال ( المبالغه ) في المظهر العام للمجالس وسعه الأراضي والموقع المميز
وكبر وفخامه المجالس

أتكلم عن ( البعض )

يمكن ينقصهم حب الظهور وهذي وسيله سهله

تعطيهم هذا الإحساس ( بالظهور ) الي يلبي حاجه في انفسهم

هذي النوعيه من المجالس مافيها غير اللعب بالورق
وفئه قليله من المقربين يجالسونهم


هناك مجالس صغيره وروادها ما شاء الله بشكل يومي وفيها الراحه النفسيه والسمعه الطيبه


الموضوع المهم
هو المجالس ( الثقافيه ) وما يدور فيها من ( مناقشات )
هناك دول سابقتنا كثير
مثل الكويت في مجالسهم جلسات علم وجلسات سياسيه واقتصاديه
وفيها مفكرين ومحللين
وفنانيين بشكل اسبوعي عندهم موضوع يتناولونه

في قطر ما زال هذه النوعيه من المجالس ( تعد على الأصابع )

لاعتبارات كثيره جدا أهمها

المجالس عندنا تتسم ( بالبساطه ) وتتجنب الخوض في المجالات السياسيه او المواضيع
( الحساسه ) او المواضيع العميقه

ما انتشر عندنا المجالس الثقافيه او تحويل المجلس الى مكان ثقافي


المجلس بمفهومه البسيط سابقا
مكان التقاء يومي و للمناسبات والضيوف ويجمع الاهل والأصدقاء واهل المنطقه
او اهل الفريج الواحد
تجمع جميل وعاده رائعه تنتقل بين الأجيال وهي مدرسه يتعلم فيها الصغير فن الحديث
والعادات والتقاليد ويتعارف اهل المنطقه ويزيد اللحمه بينهم



المجالس الحين ( البعض ) منها

لعب ورق
لعب بلاي ستيشن
واكثر من يجلس فيها المراهقين

اذا كل واحد جالس بمجلسه ( كيف يلتقي الناس )



,

,

اتفــق ..

الطفرة المادية للبعض جعلت منهم يكبرون مجالسهم ..

مادري عاد يوزعون شرهات والا شموضوعهم

الله يبارك لهم ويزيدهم من فضله ..

يمكن احنا نحتاج لهذول الأشخاص ان مجالسهم تكون عامرة بأصحاب العلم والفضل ..

وتصير في رمضان في بعض المجالس .. نبيها طول السنة

عادة قديمة إن الأثرياء يجمعون حواليهم العلماء والا الشعراء ويكفلونهم ..

بس عاد نبي الابديت 2020


وحتى مجالس البلاي ستشين .. شباب كافين خيرهم وشرهم لو قضوا وقتهم باعتدال

واذا ماصار هالشي ..

تخيل كم يدفع هذا الثري في مجلسه بحسبة اقتصادية على لا شي

كنت اشوف المعماريين شلون يحسبون اقتصاديات المكان في البيت من مساحات الإشغال



اذا مجلس حجمه 23م*12 = 276م مربع مساحة شقة .. والبعض مساحة بيت كامل

لمجرد استقبالات كل يوم (لعل مقامه الاجتماعي يتطلب) ............

كم نسبة الهدر المادي على المستوى البعيد؟

وبالشكـــر تــــدوم النعــــم


^

فكرة مشينة إنا نحسبها بهالشكل ..

لكنها تحسب عند البعض عشان يشوفون المردود من هالصرف يسوى والا مايسوى !

...

أما البساطة .. مطلوبة والراحة والانسجام .. فيه بعض المجالس ..

مجلس كبير للمناسبات والعزايم والصغير جلسة ارضية للراحة والبساطة

(((( بس مش على طول ... مايتوافق هالشي مع وضعنا اليوم .. )))

الحين من كثرة المجالس كلن ينطر الثاني يجيه ... !



احترامي وتقديري

[الجـــوديّ]

صحيح 100% والشيء الطيب يتباهون به هله

عندنا مجلس فريجنا من أيام الوالد عبدالعزيز بن خالد الغانم الله يرحمه وتتابعت فيه أجيال وتمت فيه بعض الإضافات والتعديلات بس الأساسي والقديم كلش بعمر يزيد على الخمسين سنة موجود .. وموجود ليس كمكان فقط بل نجتمع فيه كلنا بعد صلاة الجمعة ويومياً على مدار الساعة مفتوح وأوقات فيه ثلاثة أجيال جالسين مع بعض

في بعض المجالس في دول مجاورة وقلة قليلة جداً في قطر

المجلس يحمل تاريخ الأسرة .. من كبارها وشعرائها ومشاهيرها

بالاسم والصورة ومعروضة بشكل جمالي ... علشان على الاقل الجيل الجديد يعرفون جدانهم

وبعض المجالس شبيهة بالمتاحف القديمة .. بعد شي جديد يصير يتعلم

الضيوف بمسميات هذي الادوات وذكرياتها مع أصحاب المجلس

وفيه أمثلة كثيرة من المجالس النوعية .. الله يزيدها.


الله يرحم الميتين اللي تسمت المجالس الطيبة باسمائهم

ولين اليوم تنذكر بالخير .............. هذي أحدى المزايا .. جعله عامر بأهله.

[معماري قطري]

قبل شيابنا الله يرحمهم يحبون الجلوس في الخارج وكانت المجالس بسيطة دكة او دجة بلهجتنا الدارجة .. كانت في منطقتنا ثلاث منها معروفة واحدة لخالي رحمة الله عليه وواحدة لجدي رحمة الله عليه حضر حاكم قطر الأسبق الشيخ علي بن عبدالله رحمه الله عزيمة عشاء عليها .. كانت باقية لفترة قريبة وتم هدمها والبناء مكانها

صحيح هذي المجالس كانت تراث بعضه اندثر وبعضه ما زال شامخ .. سأُحاول تصوير جزء من البنيان القديم وكان طابوق وخشب .. صحيح تم تجديده لكن الأساس باقي من ما يزيد على 50 سنة

مجلس جدي رحمه الله أذكره كان يستند عمود في الليوان والأعمدة دائرية وكان يقرأ القرآن قبل الفطور أيام رمضان وأذكر استغرابي لمعرفته القرآءة وكنت تقريباً 7 سنين .. سألته من علمك تقرأ قال ابوك رحمهما الله أذكر هاللقاء وكأنه فلم حافظ تفاصيله

هذا المجلس تم هدمه وبناء مسجد صغير مكانه .. الخشب اللي فيه للسقف قطع كبيرة غير عن الدنجل مربعة تقريباً بقطاع عرضي 25 سم في 20 سم حولها وطول حسب عرض المجلس يقارب ال 5 متر أو 6 متر وكان وقتها صعب بنيان غرفة بهذا العرض بخشب عادي أو دنجل

[معماري قطري]

يمكن البعض شافوا تصميمي للمجلس المثمن الشكل من الخارج والجلسة داخله الدائرية بحيث كل جالس يحس إنه قريب من الآخرين .. هذي رؤيتي للمجلس مب شرط يكون كبير وأعتقد عرضه حول 11 أو 10 متر ومنطقة الجلوس دائرة قطرها 9 متر تكفي ل 24 كرسي