السلام عليكم إخوتي وأخواتي.. كوالد أحب ان بنتي تتعلم وتتنور و تطلع احسن وحدة.. والله من علينا وطلعت بنتي الاولى على البلاد، بنتي مجتهدة لدرجة انا نرتب سفرنا على جدولها، لو اتكلم لكم عنها بطول عليكم (لكن)
اتخيل بنتي غداََ زوجة و أم لأطفال، من بيستحمل جدولها؟ هل زوجها بيرضى؟ والى متى؟
يمكن اختصرت الموضوع عن قصد لكن خلوني أفصل لكم جوانبه شوي..
تعرفون الدولة تنفق على التعليم، و تعلم الجيل باكمله و تبتعثه!
لكن الصراحة مب كل خريج من الجامعة بنفس القدرات، وليسوا كلهم بنفس الدافع و حب العلم!
نوره و دلال و لطيفة و أشواق و خيرية كلهم خريجات و ممكن يروحون بعثات وبيردون بعد بشهادات لكن اذا راحوا سوق العمل بتحصل وحدة منهم (صادقة ومخلصة وأمينة ومتفانية) والباقي شغلتهم يراقبون فلانة و فين راحت وشنو استوت مؤخراََ و بنفس الميزان يبون كلهم يصيرون مثل فلانة المجتهدة!
فاصلة: مع إن المجتهدة ذي المفروض ترد بيتها بأسرع وقت واذا خدمت البلد ببحث أو بحثين فمش مسؤوليتها تستوي مدام كوري على حساب بيتها وراحتها.
لذلك عندي اقتراحات ممكن تكون مفيدة وممكن تكون ما تسوى بيزة (انا اصلاََ راعي غنم وخبراتي محدودة).
اولاََ: الدولة مفروض ما تبتعث الا الأوائل وتطبق معيار (قليل هنّاك ولا كثير عنّاك).
ثانياََ: البنات ما درسناهم الا للعلم و للمعرفة و طبيعي أنها تبغي تعمل لكن المفروض تتقلص ساعات العمل مع زيادة سنين الخدمة، فاذا بدت الموظفة بثمان ساعات مفروض عقب خمس سنين تصير خمس ساعات.
ثالثاََ: تقليص مدة الخدمة ويستثنى بعض الوظائف ذات الطبيعة النادرة.
رابعاََ: يوضع في خانة التقييم الوظيفي مربع لي ولك ولراشد ولحمد وللي زوجاتهم موظفات.. اذا مقصرين في البيت نحط لهم درجة متدنية وينزل تقييمهم العام حق الوظيفة.. (اضبطج يا فلانة).. واكيد عرفتم ان رابعاََ هذا دعابة _ ودنا لو صج
واذا جينا للصدق وللأمانة فبقول للاستاذة و للطبيبة وللمهندسة اذا مب كفو للبيت لا تعرسين وبقول للي بيتزوج موظفة اذا ما بتقدر طبيعة عملها خلها للي بيتحملها.. بنت خالك بنت خالتك (ما راح تنفعك هذي المبررات).
كتبتها من نية صادقة ومن إيمان عميق إن مهما بنتي وبنتك كانوا مبدعات، فاذا ابدعن في كل مجال و قصرن مع اولادهم وبيوتهم! فراح نتحول مثل الغرب و نصير مجتمع مادي بدون أسرة وبدون تقدير وبدون مستقبل.
والله يوفق الجميع لعمل الخير.
|
رد مع اقتباس