وصلني تغريدتين للمغرد ناصر خان ينتقد فيها ضابط بدون وجه حق ولعدة أسباب بذكرها لك يا ناصر* على السريع و كالتالي:

أولاََ: إذا تبغيها بأريحية فأظن النقد في حد ذاته مقبول إذا وجد (المبرر) و (الأسلوب) اللائق.. فمرحبا بالنقد وراعيه مشكور.

ثانياََ: خلنا نبدي بالنقد البناء وطالما انه نابع من غيرة فلأولى أنك ترتب الجهات اللي تبدأ بها وأعتقد من البديهي والمنطقي أيضاََ أن تبدأ بما يتصل بشكل يومي بمصالح الناس / أو ما يصرف عليه مع قلة الداعي له (تكلم عن مداخيل اللي في الرياضة وفي بعض الهيئات عقب انتقل للي بعدها لين توصل للقوات المسلحة).

ثالثاََ: أعرف يا ناصر أن عندك مصادرك وتقدر تحصل معلوماتك، لكن أحياناََ المعلومة تضر راعيها و تسبب فوضى.. فها أنت قد غضبت واستكثرت على العسكري راتبه.. وكأن اللي بيحمي الدار هي الفلوس؟ خلها تولي الفلوس.. انما ينصركم الله بعقيدتكم وصلواتكم.. وانت تحتاج في مثل مكان الضابط اللي انتقدته ( تحتاج مثله رجال قدوة ومتدين) هذا وأمثاله اللي يزرعون القيم و الأخلاق. أمثاله جديرون بالتوفيق وبالنصر و الرعاية الإلهية.

رابعاََ: طالما أردت أن تنتقد فهلا كان بالحسنى! لو كنت فعلاََ صاحب رسالة تريد إيصالها! لكن ما عندك هدف الا التحريض و لا المفروض تحمل كلام أخوك المسلم على أحسن الوجوه.. لكن غلبك الهوى والمواقف المسبقة يا ناصر.

خامساََ: وصلت تغريداتك لغيرك و سمعت مقطع صوتي لأحد أنصارك يقول..( ولي صكت الحلقه لبطان كلنا حق الوطن! بنركض؟).. وهذا يا ناصر ونت معه يمكن لو يركض واحد فيكم يجيه فتق ما كمل مية متر! حقيقة ترى.. الجري بالعتاد والسلاح يختلف عن الجري بجوتي رياضي على الكورنيش.

سادساََ: بنشدك يا ناصر عن حفلة لندن واللي حضروها! ممكن عن طريق معلوماتك، تقدر تجيب لنا أن واحد منهم عسكري (لا) مستحيل! واحلف عليها ونا غايب.


سابعاََ وأخيراََ: للأسف يا ناصر إذا أحتجت لواحد غريب مثلي يوجهك. واحد (أجنبي) عز عليه إن مثل تغريداتك تتجاوز الحدود هي والمقاطع التشكيكية اللي مثلها، وتصل عند الشانئين و عند الحاقدين و عند الحاسدين.. كم أفرحتهم تغريدتك، هل تعلم؟ أم أنك لا تعلم أنك وقفت مع المشككين ومثيري البلبلة؟ مع الأسف والله

* ناصر حطيت عليه نجمه لأني أعتبره نموذج و لا فأنا أقصده و كل من يتفق معه .