استفسار عن تصميم الديكور
السلام عليكم
اخواني واخواتي ..حابة استفسر عن التصميم الداخلي (الديكور الداخلي) هل عندنا وايد قطريين مصممين او لا ؟ وياترا هل اشتغلوا بشهاداتهم في اعمال خاصة ؟؟ اقصد عندهم شركات او عمل خاص فيهم ؟؟ وهل المربح جيد في التصميم الداخلي ؟؟
لان اللي اعرفه الاسعار نار عندنا في قطر لمجرد تعديل ديكور بالصالة مثلا ،، فحابة اعرف قبل ما ادرس التصميم الداخلي ولكم جزيل الشكر
للأسف كل شي غالي وصعب التنفيذ لان المرسوم بالتصميم غير متوفر بالسوق المحلي
وإذا متوفر قليل منه وغالي
في مصممه اسمها بدريه كافود عندها حساب بالانستغرام
الله يعينج
شكرا اخوي عالرد بس اعتقد مافهمت قصدي ..احنا عندنا في جامعة فرجينيا قسم تصميم داخلي فهل ياترا فيه مصممين قطريين لان احنا اعتمادنا عالمقيمين وانا حابة ادرس هالتخصص لاني حاولت اطلع من النت بس ماحصلت الا كم وحدة ..وشنو تقصد بكون الخامات مش موجوده ليش هم مايعتمدون على الخامات المتوفرة بالسوق المحلي ؟؟ وبنفس الوقت هل هالتخصص فيه نسبة ربح عالية بحالة اني فتحت مشروع او الربح ضعيف ؟ عالاقل اتجنب اني ادرسه وعقب اكتشف ان القطريين وايد بهالمجال وفوق هاي اخسر فلوسي بدراسة ما بتفيدني بشي بسوقنا المحلي ...المشاركة الأصلية كتبت بواسطة Azizuk
للأسف كل شي غالي وصعب التنفيذ لان المرسوم بالتصميم غير متوفر بالسوق المحلي
وإذا متوفر قليل منه وغالي
في مصممه اسمها بدريه كافود عندها حساب بالانستغرام
الله يعينج
وشكرا لك عالرد
مراحب اسف توني فاهم قصدج
بالعكس لا يوجد قطرين في هالمجال الا القليل وأكثرهم عنصر نسائي عدد محدود يدخل هالتخصص ويعتبر من التخصصات الناجحه لعدة أسباب
شح في هالتخصص بالسوق القطري وبشكل عام الخليجي
بوجود بالكويت والسعوديه والإمارات اكثر عدد من المصممات لديكورات الداخليه والأسباب السوق كبير عندهم المواد متوفره بالسوق المحلي وسهل تنفيذها والتكلفة مناسبه لجميع الأذواق والمستويات
في مصممه كويتيه اسمها نور بن عيدان تعتبر المنتشرة بالسوق لها مكتب بقطر والكويت ولندن وراح تفتح بالسعودية قريبا
وهذا سنابها
مشكله السوق المحلي المواد مب متوفره وإذا متوفره غالي سعرها ومعظم المحلات والمصممين يجيبون من برا يامن الصين او من الدول الأخرى
طبعا اكثر المصممين يسون وخاصه الاثاث يشبه البراندات العالمية من غير لوغو
بعض المصممين يصمم لج بسعر بالمتر يحسبه وبعد التصميم انت تنفذ عااااد روح دور من ينفذ لك بنفس اللي بالرسم والصور يمكن فقط الجبس والأرضيات تقدر تنفذ الباقي بتهلك لين تحصل المواد اللي بالتصميم والمواصفات
وبعض المصممين اذا بغيته يصمم ويشرف وينفذ هذا عااااد سعره واو خيالي لان كل شي على حسابك من تذكرته وسكنه ومواصلاته ومعيشته كلها عليك بالإضافة الى 10% الى 20% ويمكن اكثر من سعر التنفيذ على المالك
هو تخصص يعتبر نادر بالسوق القطري ثاني شي مطلوب وغير هذا ان السوق والنَّاس تبي تغير وتحدث مفهوم البناء والبيوت تغيرت حاليا
الله يوفقج والتخصص هذا حلو ويعتبر راقي
شوفي ردود باقي الأعضاء بالمنتدى ويمكن لو تنقلين الموضوع في قسم استراحة المنتدى وأيد افضل لج لان قسم البناء عدد قليل من يشارك في !!!!
قسم الاستراحة راح تحصلين أعضاء افهم مني في هالمجال راح يفيدونج اكثر وراح يتفاعلون بالردود والنصائح
اهم شي اول تصميم لي يكون بسعر خااااص انا وباقي أعضاء هذا القسم
التعديل الأخير تم بواسطة Azizuk ; 31-08-2019 الساعة 08:51 AM
عرفت مرة واحد وزوجته من خريجي هذي الجامعة وشغالين للنخاع في الديكور وشغلهم ماشي .. من زمان ما ادري شصار معاهم الحين
يعني الحين أي مكان افضل www.bircham.me جامعة معتمدة بقطر كدبلوم او بكالريوس وتاخذ 4 سنوات او الموقع www.nyiad.edu اللي قالت عنه شموخ مع بعض الميزات اللي هي عضوية بامريكا وعرض للتصاميم الخاصة بمدة سنة ونص ؟؟
يا اختي ما عندي خبرة أكيدة في الجامعات ولا الدراسة أونلاين أو دبلوم .. شوفي شالأسهل لج واللي يناسب .. انا فتحت موقع شموخ وشموخ دوم نصايحه طيبة وهو اونلاين وممكن أسهل لج تتعاملين معاه بس تحتاجين مكتب وكمبيوتر شاشته كبيرة .. سوي مثلي مركب شاشة تلفزيون 49 بوصة ومخليها بعيدة عني حول متر
الثانية لو معترف بشهادتها في قطر بعد جيدة .. والله اتمنى تشاركينا الدراسة هنا ويمكن نناقش المواضيع وتترسخ أكثر .. 130 وحدة دراسية قصدهم ساعة دراسية وهذا كل كورس بياخذ نفس النظام التقليدي من شهرين لثلاث شهور ولو خذتي مثلاً عشرين ساعة في كورس تحتاجين تشاركين المحاضرات 20 ساعة اسبوعياً حسب الجدول
ما ادري شلون تسجيل الحضور والمتابعة اونلاين وأكيد العملية وايد أسهل بس أكيد فيه لها ضوابط والتزام ومقاربة للنظام التقليدي
الله يوفقج في اي خيار
وعليكم السلام اختي ..
لو تبينا نتكلم بصراحة .. الناس هني تعتمد على جنسيات معينه في هالمجال ..
يمكن بعض الناس تجيها الفرص وبعضهم لا .. المدخل عالي جدا .. لكن هل في طلب في السوق عليه ام لا !!؟
اكثر المصممين يوفرون الخامات من برع عشان جذي السعر عالي .. لان سوقنا المحلي فقير جدا بالخامات ومافيه تنوع ،.
والشي اللي تحصلينه في هالبيت تلقينه في نص بيوت هل قطر .. ومع العصر الجديد والانفتاح الناس قامت تشوف اشياء غير ومستوى الذوق يرتفع ويرقى .. فاللي في السوق مايملي العين ..
:
:
الله يوفقج ان شاءالله لكن فكري بعدة جوانب واستخيري وشاوري هلج بعد ..
بالتوفيق عزيزتي
تُنسى ، كأنَّكَ لم تَكُنْ ..
مشكورين وماقصرتوا بس عندي استفسار في مواد معينة لازم تدرسها مثل الاوتوكاد وهو اهم برنامج في التصميم وللاسف مافي احد يدرسه الا قليل وباسعار عالية مثلا واخد طلب مني 3500 qr بس عشان 8 حصص خلال 4 ايام والمعاهد للاسف ماتطرح ومشكلتي ما اقدر ادرس في جامعة فرجينيا كومنلوث لانه دوام كامل وانا موظفة لكن اذا اتعرفون مكان او موقع يعطي دورات عدلة في الاوتوكاد وبعد في التصميم مع شهادة عالمية ياريت اتفيدوني �� واخوي عزيز شكرا للمعلومات واذا عندك امثر بعد اكتب لي واختي سارة فعلا مثل ماقلتي احنا اهني نعتند على الجنسيات الثانية وكأن عيال البلاد مامنهم رجا���� وما في ثقة فيهم ��
,
,
مرحبا
تصميم الديكور الداخلي من اجمل التخصصات وأكثرها متعه وفيها دخل ممتاز
ويفتح مجال كبير للإنسان انه يعمل ( بزنز ) يفتح عمل خاص مسائي او دخل إضافي لنفسه
الأفضل الدراسه في جامعه او دبلوم معترف فيه
وليس مجرد دورات صغيره فهذا التخصص يحتاج المام شامل فيه بكل جوانبه
اما اخذ دوره صغيره والعمل بالتصميم فهذا لا يلبي الحاجه للسوق ولا راح يكون فيه ثقه او اقبال عليك
لان هذا شغل مبتدئين وليس شغل ( مصممين ) !!
الاتوكاد
اهم برنامج وهو رقم 1 ومن الضروري لكل مهندس او مصمم ايجادته
والمفروض الواحد يأخذ دورات عليه ( اساسيه ) وبعدها الانسان يطور نفسه في معاهد
مثل معهد ( العطيه ) ويجي معاه شهادات
اما الطريقه التقليديه
فهو التعامل مع ( مهندس ) هندي قديم في قطر
يعطي دروس خصوصيه ويجي للبيت في وقت فتره فراغه بعد انتهاء دوامه
ويكون مدرس خاص يعطيك كل معلومات العمليه لهذا البرنامج
ومن البرامج المهمه 3 d max
من اهم البرامج بالتصميم لانها تعطي الشكل النهائي والحقيقي للمكان بعد التصميم
والزبون يشوف مشروعه بصوره مكتمله ومتكامله وفكره شامله تساعده في اتخاذ القرار او التعديل عليه
من ارضيات ومن حوائط ومن شغل الاسقف والاضاءه
ويقرب الصوره امام من بيعمل في التنفيذ
من نجارين وصباغين واهل الجبس واهل الأثاث واضاءه وارضيات
اما الشي الأهم
فهل شخصيتك انتي قادره على ( اداره عمل خاص ) ومقابله الزبائن وأصحاب المشاريع
وعندك سعه الصدر للنقاشات والاخذ والعطاء معاهم مثل الفلل الخاصخ والقصور
وتحمل طلباتهم !! والعمل تحت الضغط في اكثر من مشروع مع بعض !!!
وكذلك الاعمال التجاريه من ديكورات لواجهات الشركات الداخليه والخارجيه
والمحلات
هذا السؤال محد يقدر يجيب عليه الا انت !!
هل عندك الشغف والمتعه بهذا العمل !!!!
السوق محتاج لهذا النوع من التخصصات بل على العكس يوجد نقص وشح
في المصممين القطريين بالذات
وكل اهل المكاتب والشركات صاحبه قطري وممكن يوظف عنده جنسيات أخرى بالمكتب
فالعمل ممتع فيه اذا صاحبه عنده الطموح في هذا المجال
,
,
التعديل الأخير تم بواسطة شموخ دائم ; 31-08-2019 الساعة 01:59 PM
رد مع اقتباس
