استفسار عن دراسة التصميم الداخلي للديكور

[jaidana]

اخواني واخواتي ..حابه استفسر عن التصميم الداخلي (الديكور الداخلي) هل عندنا وايد قطريين مصممين او لا ؟ وياترا هل اشتغلوا بشهاداتهم في اعمال خاصة ؟؟ اقصد عندهم

شركات او عمل خاص فيهم ؟؟ وهل المربح جيد في التصميم الداخلي ؟؟

لان اللي اعرفه الأسعار نار عندنا في قطر لمجرد تعديل ديكور بالصالة مثلا ،، فحابه اعرف قبل ما ادرس التصميم الداخلي .. وهاي بعض الأشياء اللي ممكن توضح لكم موضوعي اكثر لاني

نزلته بقسم ثاني وماقصروا الأعضاء عطوني آرائهم

دبلوم واقل شي 3 سنوات او 4 والبكالريوس 5-6 سنوات هاي في عمان بس بحط لكم النقاط وانتو فهموني عدل قبل كل شي عشان استفيد منكم

1-انا استفسرت عن دورات الاوتوكاد لكن للأسف العطية ما يطرحونها والباقي ماعتقد انهم اوك لان هالتخصص يبي 2D+3D وبالاضافة لل 3D max وهالاشياء ما تنطرح الا قليل واعتقد ما

يعطون كامل ،، كلمت واحد انجليزي وطلع من اصل هندي وقالي كبداية بيعطيني 8 حصص بمبلغ 3500 QR وفي 4 ايام وقالي انه تعاون بلوسيل والريل الخط الاخضر وسدرة فاذا احد يعرف

هناك احد اسأل عنه وطبعا فرق بينه وبين المراكز الثانية لان الساعات اكثر هناك والسعر تقريبا 2500 ان كان خاص والباقي 1800 ريال و 3 مرات بالاسبوع بمقدار 3 ساعات تقريبا ومادري

اي المراكز معتمدة من الدولة تدرون بهالمشكلة ؟؟..وهذاقال بيعطيني شهادة معتمدة من جامعة بريطانية لانه مدرس فيها.

2-وانا ماقدر اسافر للدراسة بره واهني في فرجينيا وهالدراسة يبيلها تفرغ كامل وبالاضافة اسعار جامعة فرجينيا عالية فافضل معهد او جامعة معتمدة في التعليم ادخل عليه اونلاين ويعطي

شهادة معتمدة واني اصمم ويشوفونها كhome work لان لازم الرسم والتخطي عشان يصير نجاح تمام من وجهة نظري …فاذ احد يعرف جامعات اونلاين ياريت يكتب لي مثل جامعة

بيرشام البريطانية اللي معترف فيها من التعليم العالي بس مادري هل اونلاين او لا https://www.bircham.me

3-هل هالدراسة ناجحة كبزنس لاني ابيها كبزنس خاصة ان اللي عندنا اغلبهم أجانب ويبون جنسيات معينة وما يعترفون بالقطريين واللي اعرفه ان اسعارهم نار ..

4- ابي مراكز اتعلم اوتوكاد (3D+2D) ومعتمدة من التعليم بالإضافة ل 3D Max والعطية ماعندهم للأسف ونفس الشي غرفة التجارة ولا الجزيرة ..

5-ابي جامعات اتدرس اونلاين وبجامعات معتمدة عندنا..


فياريت اتفيدوني

[ابو عبدالله.]

اذا بفيدك بشي فهو كالتالي

وزاره التربيه سمحت بتخصصات اون لاينفأسألي اذا هالمجال من ضمنهم واذا موجود فأكيد محددين جامعات معينه و عندهم لسته بالاسماء

عن البريطاني اذا متأكده من نزاهه شهادته و بيسجلك في احد الجامعات مثلا كوني مطلعه ع التسجيل بنفسك ولا تقبلين شهاده هو يحضرها لك باليد

اي شهاده بيعطيك لازم تكون عبر معهد او كليه ولك تسجيل طالب او ملتحق و رسوم تسجيل و دراسه فتأكدي من وجود هالامور

انا اشوف المجال واعد لكن الحذر من كونه التخصص الوحيد او مصدر الدخل الوحيد لك

يعني خلي لك خط رجعه و وجود مهنه او شهاده توظفك في كل مكان و ليس فقط التصميم الداخلي

توجد اسواق لهذا التصميم غير فلل القطريين

تصميم الابراج و المباني داخليا كتوزيع المكاتب و القاعات الخ

المخازن للشركات و المحلات الكبيره لوكالات المنتجات الفخمه

اليخوت و الشقق الفخمه

بوثات المعارض العامه و اقصد بها. مقرات الشركات في المعارض التجاريه و البيئيه و العقاريه

ما ادري اذا المجال يشمل تصاميم الحدائق او لا لكن ايضا لها زبائنها

اذا حصل و دخلتي المجال. احرصي ان تشمل دراستك على عناصر السلامه المهنيه و الصحه لانها متطلب مهم اثناء التصميم الداخلي خصوصا للابراج و المخازن و طرق التهويه و المخارج اثناء الطوارئ

هالشغله توفر ملايين على الملاك عند طلب رخصه دفاه مدني لاي مبنى و منها التصميم الداخلي للمبنى و توزيعاته

بالتوفيق

[ابو عبدالله.]

حتى البلديه لها اشتراطات للتصميم الداخلي للمباني فكوني مطلعه عليها قبل البدأ بفتح مكتب للتصميم

[مهندس مقيم 2]

برأيي الشخصي فالتصميم الداخلي مهنة حلوة و خصوصا لو الشغل لحسابك الخاص مما يعطيك المرونة في الوقت و الجهد المخصصين للعمل. و لو كانت هده خطتك فما اتوقع ان الشهادة مهم مصدرها مثل ما هو مهم يكون عندك بورتفوليو (ملف عرض اعمالك) تقدري تورجيه للزبون عشان يقتنع بامكانياتك. الزبون ما راح يهمه من وين حصلتي الشهادة.

الأخ اللي علق فوق عنده خلط بين المهندس المعماري و المصمم الداخلي. أغلبية النقاط الي دكرها مهمة جدا لكنها ليست من اختصاص المصمم الداخلي. شغل المصمم الداخلي يتعلق بالمفروشات و التشطيب من دهان و ورق جدران و غيره بشكل اساسي، و معظم دخلك راح يكون من العمولات الي بتحصليها من المحلات اللي اتدلي الزبون يشتري منها و هدا يعني انه المصصم الداخلي لازم يكون قادر على بناء علاقات جيدة مع التجار.

آمل اني افدتك و اعتدر انه حرف الدال بنقطة خربان عندي ههههه

[jaidana]

مشكورين اخواني وتسلمون عالاشياء الحلوة اللي حمستني وايد لكن عندي بعض الاستفسارات بعد طيب اللي اعرفه ان الافضل يكون الشرح واقعي مش اونلاين خاصة بالنسبة للخامات لمعرفتها لاني سألت في كذا جامعة وبنفس الشيء وخاصة اني ابي بالعربي والجامعة اللي حطيت موقعها معتمدة من التعليم لكن مش عارفة اونلاين ولانهم يدرسون بالعربي انا اذا ابي انجليزي بس المصطلحات المهمة ..
وطيب اتعرفون موقع ممكن لو ادفع فيه بس يعطيني شهادة معتمدة وتكون الدراسة فيه مثل الدراسة الجامعية يعني اخذ دبلوم او بكالريوس ؟؟
واخوي بوعبدالله تبي الصراحة انا متخوفة من هالهمد س يقولي انه عنده ماستر لكن الخوف من كونه انه عادي ومثلماذكرت قال انه تعامل بالريل وسدرة لكن مادري خاصة ان سعره خلال 4 ايام توووومتش. لان اهم برنامج هو الاوتوكاد و4 ايام بس عشان اخلص كمبتدأ 🤔🤔🤔 خاصة ان فيه اوامر اشكثر لكن نقطتك نبهتني ولله الحمد... واخوي المهندس المقيم اذا امكن التواصل معاي عالخاص ؟؟
واذا عندكم بعد مواقع اتفيدني ياريت اتحطونها .. وتسلمون

[qatarman8008]

الدراسة اعتقد ممكن تكون عند احد المعاهد المشهورة بهالمجال..
طبعا بيكون التدريب يركز على كيف استخدام البرنامج ..
ثم المهم والاهم وهو استلهام الفكرة والتصاميم هذي لازم تشتغلين في شركة متخصصة بهالمجال حتى لو براتب رمزي..

[sweet qatar]

يا هلا و مرحبا

هل عندنا وايد قطريين مصممين او لا ؟ وياترا هل اشتغلوا بشهاداتهم في اعمال خاصة ؟؟ اقصد عندهم

شركات او عمل خاص فيهم ؟؟ وهل المربح جيد في التصميم الداخلي ؟؟

نعم عندنا مجموعة من القطريين في هالمجال ولكن ما اثبتوا وجودهم في السوق او دخلوا وخرجوا بخسارة لأسباب

منها ان واقع العمل مختلف عن الدراسة .. والبعض تسرع وفتح مكتب والمفروض ياخذون خبرة في شغل المقاولات قبل لا تتحطم تصاميمهم بسوء التنفيذ

لكن لا زال البعض منهم صامدين و في طور التعلم والتطور والله يوفقهم

اختي المصمم الداخلي مب شرط يتعامل مع برامج التصميم

الاساس رغبة العميل و تقييم المكان والميزانية وتحقيق تناغم ما بينهم اما المخططات ممكن يسوونها الرسامين

طبعا الشغل الاحترافي يتطلب معرفة بسيطة بالهندسة وهو رسم المخطط floor plan و رسم sketch وهذا تقدرين تسوينه باليد

التصميم يتطلب فهم الالوان و عمقها و الخامات واستعمالاتها

المنتج الاساسي للمصمم الداخلي هو design board عبارة عن تجميع الافكار والخامات وعرضها على العميل

و المنتج النهائي عبارة عن مخططات موضحة بالسانتي للأثاث والاضاءة و الافياش و تصميم الطوفة وتصميم السقف وتصميم الارضية لضمان تنفيذ التصميم بطريقة صحيحة


التصميم الداخلي مثل الرسم ممكن الواحد يدرسه بشكل اكاديمي ويمكن يمارسه

او ممكن يشتغل مندوب مبيعات و مسوق مثل ما قال الاخ مهندس مقيم لأن هذا الدارج والي يحقق ربح

[sweet qatar]

نسيت اذكر اني درست دبلوم التصميم الداخلي online

عن طريق هالموقع

https://www.nyiad.edu

تاخذين منه شهادة عملية وليست اكاديمية

بالتوفيق ان شالله

[blueZircon]

والله الاسعار للتصميم الداخلي مبالغ فيها صحيح، وفوق هذا كله اسعارهم ماتشمل خدمة المتابعه مع المقاول اللي راح ينفذ التصميم. عن نفسي انا صممت بيتي مع مهندس تصميم داخلي بالاوروغواري وكلفني التصميم للبيت كامل تقريبا اقل من عشرين الف.

[jaidana]

نسيت اذكر اني درست دبلوم التصميم الداخلي online

عن طريق هالموقع

https://www.nyiad.edu

تاخذين منه شهادة عملية وليست اكاديمية

بالتوفيق ان شالله

شكرا يا سويت على المعلومات ،،وممكن اتواصل معاج عالخاص عشان موضوع الدراسة