المشاركة الأصلية كتبت بواسطة ابو عبدالله.
قول لا اله الا الله معماري
لو اطلع سوالفي كلها. يمكن انضرب بعين بعيد الشر
والله يا جماعه السالفه بسيطه و نمط معيشه بثقافه استهلاكيه لا غير
شرايكم نحسبها بالعقل
الحين احنا برواتب زينه مقارنه مع باقي الدول ولا ضرايب ولا عقبات معيشيه مثل مصاريف للصحه و التعليم الخ
لكن نشوف قله وعي او عدم اهتمام بأن ممكن هالامور تتغير مستقبلا و تتصعب
فليش ما نضبط مصاريفنا و نوجه الوفره الماليه لتحسين الدخل و فتح تجاره او استثمار الخ
للامانه. من ضبط المصاريف الي تكلمنا عنها. و مصاريف ثانيه صار في توفير مبالغ اقل ما نقول عنها. عشرات الالاف
ممكن تكون كافيه لسفره سنويه لاوروبا. دون مبالغه والله
اتكلم عن توفير حتى في اغذيه الحلال بالعزبه. الرودس لو ب 23 للربطه انا اطلب من مزرعه بالشمال وحجمها 50% اكبر و سعر اقل بريال و ريالين فيتوفر لي ايام زياده لعلف الحلال و اشتري كميه تكفي ثلاث شهور ففعليا انا ادفع لشهرين وكم يوم و يطلع لي نص شهر و اكثر ببلاش
وايد امور تشوفونها و سعرها الاصلي اقل من النص
لو تشتري تيدر بثلاث الاف مستعمل. ترى تكلفه عمل الجديد الف و ثمان فقط
الماي الاخضر حق رادييتر الموتر تشتريه فوق الثلاثين وهو جمله بسبع ريال
بطاريه الموتر بخمسميه مثلا وتلقى انواع بضمان سنه ب 320 ريال
رفيجي عنده محل اكسسوارات و عرفت هالسوالف
اغلب المنتجات عندنا مبالغ في سعرها بالمفرد لكن الجمله اقل بكثير
و بعض الامور تلقاها بسعر لكن لو تعرف وين تنباع بمحلات الاختصاص بتلقاها اقل بكثير
هناك خدع في امور ما نشوفها
الشباب يركبون مراوح للنيسان بسبب ضعف تبريد المكيف و يوصل سعر التركيب 800 الى 1500 بحسب نوع المراوح
لكن قليل الي يعرف ان النيسان مكيفه يحتاج زين معين ينحط مع الغاز وهذا يقل مع الوقت و يضعف تبريده
بس حط الزيت و شوف التبريد. بتسكر المكيف من البرد
و محلات تركيب المراوحةرزقهم من قله وعي المستهلك بموضوع الزيت للمكيف لا غير. ولا يحتاج مراوح زياده
ثقافتنا الاستهلاكيه قليله اة سطحيه جدا مقارنه مع الاروربي و الامريكي
هذولا من كثر الثقافه عندهم ينزلون باليوتيوب كيف تسوي كذا بنفسك و كيف تصنع كبينه رحلات بنفسك
و كيف تغير بلاط البيت او اطقم الحمامات اعزكم الله وحتى خشب الباركيه
احنا بسبب الوفره الماديه اذا كانت وفره اصلا ما نفكر الا في كيف نفاصل الهندي اذا نبيه يركب او يصلح شي
ولا حتى تركب معاه تشوف دينمه البرشر اذا فعلا خربانه ولا بس تبي تضغط ع رز الريست و ترجع تشتغل بدون صيانه