السلام عليكم

واحد من مشاهير السوشل ميديا القطريين مسوي اعلان حق محل تان ، المشكلة بالموضوع بان راعي المحل طلع وتكلم وقعد يكذب ويقول بان هذي الاجهزه مفيده وفيتامينات وعلاج ومن هالكلام !!

وكل الدراسات اثبتت بان هذي الاجهزه تسبب melanoma وهو اخطر نوع من سرطان الجلد ، والاشعة الي تطلع منها اقوى من اشعة الشمس ب١٢ ضعف !

وقبل كم سنه كنت في امريكا ورحت اسوي تان (للاسف) والعجيب بانهم حاطين لافته بالمحل وكاتبين بان استخدام هذي الاجهزه يرفع من نسبة اصابتك بالسرطان ( مثل الزقاير يعني ) يعني القانون عندهم يلزمهم بانهم يذكرون هذا الشي ! المصيبه ان عندنا القانون مخليهم على راحتهم وفوق هذا يكذبون على الناس !

وللاسف الشخص المشهور الي مسوي لهم الاعلان ماتهمه صحة الناس ؟ يعني ادفع لي وبمدح فيك لين باجر ؟!

والله فيه يهال اعمارهم ماوصلت ١٨ مايفهمون بهالسوالف ويصدقون الي يشوفونه ويمشون مع موضة التان ولا يدرون عن مخاطرها ، اتمنى وضع عقوبات صارمة واقتراح بان كل من يبغي يسوي تان لازم المحل يخليه يوقع على ورقه ويكون مكتوب فيها بان الشخص واعي بان هذي الاجهزه ممكن تكون سبب في اصابته بالسرطان .