السلام عليكم ورحمة الله وبركاته
اخوكم الحين قاعد يشطب وعندي بعض الاستفسارات عن عدة أمور من الاخوان لتعم الفائده على الجميع
السؤال الأول : محتار بين الانترلوك والبلاط لحوش البيت ايهما افضل على المدى البعيد والمتانه مع مرور السيارات عليه
السؤال الثاني : بالنسبه للباركيه هل ينصح به على المدى البعيد ولا مع الوقت والماي يتبطط ويخترب
السؤال الثالث والأخير : المطابخ والمخازن هل الأفضل خشب ولا المنيوم وسلامتكم
ننتظر ارائكم وخبراتكم وتجاربكم ليستفيد الجميع
الاول : البلاط افضل واسهل لتنظيف ويتحمل اوزان السيارات حتي اكثر من 10 طن
الانترلوك سهل الفك التركيب بس صعب التنظيف مقارنة مع البلاط
الثاني : البورسلان افضل واجمل واسهل لتنظيف
الثالث : الخشب اجمل من الالمنيوم للمطبخ بس الالمنيوم سيفتي اكثر من الحرائق
للمخازن الالمنيوم افضل ويجيك جاهز في ايكيا وغيرها
عليك بطريق الحق ولا تستوحش لقلة السالكين، وإياك وطريق الباطل ولا تغتر بكثرة الهالكين ..”
المشاركة الأصلية كتبت بواسطة سعود.
بيض الله وجهك
وكلامك طيب ونصيحتك وافيه
صباحكم ورد
مؤيد لكل ما قال اخوي سعود وحتى البورسلان فيه منه اللي يعطي شكل باركيه .. والباركيه أنواع عديدة وفيه منه البلاستيكي والمصنع يقاوم أكثر ولكل نوع مواصفات وضمان وسعر وحتى طريقة تركيب
المخزن سويته انا تفصيل المنيوم قطاع ضعيف ورخيص وسكرت الأطراف بسيليكون ولبست الحوائط ببقايا السيراميك .. سويته صراحة مرقع أبيض على بيج على أزرق ما همني المنظر همني يكون سهل التنظيف وعملي والحمد لله للحين قريب 15 سنة عايش كأنه جديد وتتحمل عليه أوزان ثقيلة
بالنسبة لحوش البيت ابتعد عن أي صناعة قطرية لأن خلطات المواد لو جاتك زينة في عينة تجيك شوائب وبودرة في عينة ثانية وشوف شلون التآكل والتكسر خلال فترة وجيزة .. وأفضل تركب على خرسانة .. ولد عمي راواني صور لبيته مركب رمادي قطع مختلفة ثلاث مقاسات بطريقة هندسية حلوة وطالع وايد حلو .. وشفت بيت مسوي بقايا الرخام وجاية قطع وكسرات مختلفة بإسمنت وخلطة قوية وطالع لوحة فنية بس مؤكد تحته خرسانة والا ما عمر هالفترة
وأشوف البعض يركبون بورسلان سميك هذا لا يشرب ماي ولا يتغير شكله بس يحتاج قراوت خاص وقوي
المطابخ مصنعيات وماركات الزين يدوم سواء المنيوم أو خشب أو ستانلس ستيل
رايك طيب ونصايحك في محلها
بس المطبخ على المدى البعيد اعتقد الالمنيوم خيار جيد
لكن المشكله انه يتفكك مع الوقت
انا ركبت خشب مصنع في مصنع تابع لماركة كرابتري الانجليزية ويصنع غربينا .. حق مطبخ وبانتري ومعاه ركبت المنيوم يصنعونه في قطر والالمنيوم على وقتها 2005 تقريباً كان أغلى من الخشب اللي انا خذته .. بعد هالسنين والاستخدام الألمنيوم يحتاج استبدال وسوينا كم مرة صيانة له أما الخشب للحين من أفضل ما يكون وللعلم مصبوغ صبغ حراري في أفران ومعالج ومحمي بمواد خاصة وتحت له نعلة بلاستيك عازلة للحشرات .. تفاصيل تصنيع عالمية مب شغل ربعنا هوي هوي
ايّامك غير يابوعبدالله الجوده تلعب دور كبير
السنوات اللي انت بنيت فيها تختلف عن الحين
في السابق انت تتكلم عن جوده
حاليا الغش والعمال لاعبين لعبتهم
البنيان والجودة بالسابق كانت افضل
جودة المواد من جميع النواحي كانت اجود ومتانه فيها
حاليا الجوده قلت ومفهوم البنيان تغير
في السابق ماكان في نت وتواصل اجتماعي لمعرفة الجديد والتواصل مع الشركات الام والمصانع بالساهل
حاليا اَي استفسار على طول إيميل وبجيك الرد والمعلومات عن المواد ولاكن الجوده قلت
وعليكم السلام اخوي سليمان
المخازن ضروري يكون المنيوم على شكل خزانه مفتوحة ومرتفع عن الارض لسهولة التنظيف ..
المطابخ على حسب الاستخدام .. الاغلب الخارجي يكون المنيوم والداخلي التحضيري خشب ..
في شركة تسوي المنيوم بس وايد راقي على شكل خشب سعر المتر بين 2500-3000 مقارنه بالالمنيوم اللي يجيك سعره بين 800-1800 للمتر
شوف من بيستخدمة وانت حدد لان الخشب يبي له عنايه خاصه ..
:
الله يوفقك اخوي ..
تُنسى ، كأنَّكَ لم تَكُنْ ..
هلا اخت ساره كلامك مفيد جدا
انا ودي بالباركيه بس خايف مع الوقت انه يتفكك او يطلع حشرات
اللي فهمته منكم انه يعتمد على النوعيه والتركيب
عليكم السلام ورحمة الله وبركاته
حياك الله .. وصلت وان شالله تلقى الي يفيدك
المتانة و تحمل السيارات يعتمد على قوة الطبقة الي تحت
البلاط اذا تركب صح بيتم طول العمر واجمل واريح للسير عليه
في ناس ركبوا الباركيه من سنين وماشالله لليوم مثل ما هو
المطابخ تعتمد على الذوق لكن اذا بتحط المنيوم تأكد انه من نوعية جيدة مب مع اول استعمال ينكسر
اختار الي يناسبك واهتم بالجودة لا يغرك ارتفاع السعر او رخصه
المخازن الافضل الالمونيوم
الله يعينك على هالمرحلة الصعبة و يوفقك وييسر أمرك
ما ارد للجاهل ولا اسمع حكاويه ... حيــاي يمنعني من القيــل والقــال
The best way to survival is to save each other
الأجواء الساحرة في جزيرة البنانا .. شاركوني متعة اللحظات ..!
ضوابط المشاركة
رد مع اقتباس