ليش شارع النصر مغلق بدون ما يبتدي الشغل

[khaldoon]

ثرى إحنا القطريين هنا من ولدنا مب شرط نخلي الأهمية كلها لكاس العالم ومن بيجون شهر ونترك مناطقنا تعاني طول هالسنين

الحمد لله تم اسكات نباح الكلاب وهذا انجاز سعيت وراه سنتين وفي أمريكا تلفون واحد خمس دقايق الا الشرطة حالين مشكلة أي ازعاج

هو كأس العالم كان مهم ان دولة قطر وضعت نفسها تحت ضغط اجباري و هو انها تقوم بتنفيذ كل مشاريع البنيه التحتيه و التطوير العمراني في قطر قبل 2022 يعني الزمت نفسها الزام انها تنفذ خطتها و رؤيتها لتطوير البنيه التحتيه للدوله ....لو ما كان في كأس عالم فما راح تخلص قطر هذه المشاريع في 2022 ...تتأخر سنة و سنتين و اكثر بعد لانها مب تحت ضغط ....

في ناس كثيره تعتقد انه بعد كأس العالم خلاص ما في مشاريع ولا شي... و كأنه الحياة راح تنتهي تماما..... قد يحدث ركود و تخف الحركة الانشائيه بشكل ملحوظ بس اكيد ما راح تموت و اكيد راح تستمر ان شاء الله ...و هناك أيضا صيانه لما تم إنشاؤه يعني دورة حياة لا تنتهي

[khaldoon]

اغلاق شارع النصر حاليا, هو جزء من مشروع قائم اصلا و جاري تنفيذه لتطوير شوارع المنطقة
شوف رابط حق اشغال هنا

بارك الله فيك على هذه المشاركه القيمه.... انا صارلي أسبوع على الأقل ما دخلت شارع النصر وما اعرف لو بدأو العمل فيه و الا لا ....بس سواء كان مشروع قائم من شهر يوليو 2018 و الا بيبتدي الحين ايش سبب الاغلاق بدون عمل؟؟!!!..... لازم يكون في رؤيه واضحه و دائمه انه الاغلاق لاي مكان حيوي لازم يحسب بالساعه مثل العملية الجراحيه..... كم ساعة بتسكر و متى بتخلص دون أي تأخير....ما ينفع تفتح بطن المريض و تخليه بدون شغل و لا عملية و ما ينفع تعطيه بنج تعطل كل يشي فيه و انت مب جاهز للعملية ولا فاضيله و الا تسكر بطن المريض و ترجع تفتحه كل شوي ....و الشارع نفس الشي

الحين لو كان الهاجس عند المسؤول عن الاغلاق مثل هاجسه يوم احد يجي يشتغل ببيته و يحسب كل دقيقة عمل داخل بيته فأعتقد بيصير الموضوع غير تماما.... هذه لازم تكون رؤية و شعار كل مسؤول عن الاغلاق

تخيل هالمسؤول عن الاغلاق سواء من جهة حكومية او أي شخص اخر له يد في هذا الاغلاق لو جاء عمال عنده و سكروا الميه في بيته و الا كسروا الدنيا في بيته و اصبح جزء مهم و حيوي من بيته غير صالح للاستخدام و طلعوا و غابوا تماما لاي سبب كان مثل انهم راحوا يشتروا قطع جديدة او أي شي..... هل راح يظل براسه عقل؟؟!!!!

لو هو يفكر بهذا الهاجس كيف انه الدنيا كلها متعطله في بيته او في الشوارع و الناس متضررة كان الدنيا بألف خير

لو كل واحد تمنى و رضي للغير ما يتمناه و يرضاه لنفسه الدنيا بتكون بألف خير

[مرتبش]

من ليلتين كنت هناك وماشفت شغل غير حواجز الاغلاقات ( من جهة الطريق السريع).. امام بعض المحلات تحولت منطقة الاغلاق الى مواقف من دون ترتيب وكأن احدهم عبث في الحواجز.. ليش الاغلاق لكامل الشارع وتحويل السير للمواقف باتجاه واحد .

[معماري قطري]

هو كأس العالم كان مهم ان دولة قطر وضعت نفسها تحت ضغط اجباري و هو انها تقوم بتنفيذ كل مشاريع البنيه التحتيه و التطوير العمراني في قطر قبل 2022 يعني الزمت نفسها الزام انها تنفذ خطتها و رؤيتها لتطوير البنيه التحتيه للدوله ....لو ما كان في كأس عالم فما راح تخلص قطر هذه المشاريع في 2022 ...تتأخر سنة و سنتين و اكثر بعد لانها مب تحت ضغط ....

في ناس كثيره تعتقد انه بعد كأس العالم خلاص ما في مشاريع ولا شي... و كأنه الحياة راح تنتهي تماما..... قد يحدث ركود و تخف الحركة الانشائيه بشكل ملحوظ بس اكيد ما راح تموت و اكيد راح تستمر ان شاء الله ...و هناك أيضا صيانه لما تم إنشاؤه يعني دورة حياة لا تنتهي

معاك في هذا والهمة عالية وبإذن الله تكون فيه مواصلة

ما ذكرته بأن التنمية ضرورية والاهتمام بالقطري مطلب مستحق وما نركز على مناطق معينة ومناطق مهملة قمة الإهمال

شوف مثلاً منطقة كبار الموظفين في الدفنة .. شوارع لين دخلت فيها ودي انزل واحتضن الشارع واقول له وينك ما شفناك من زمان بسبب سوء وضيق الدواعيس في مناطقنا ومناطق كثيرة وبسبب نتوء وارتفاع المنهولات وهذي لازم لها التفاتة .. ملينا من شارع مؤقت لين متى؟ واسم شارع أصلاً ما ينطبق عليه

حكومتنا بنت شوارع كثيرة في دول كثيرة ومستشفيات ومنازل وقطر في حاجة للبناء مثل هذي الدول بس يبي لها نظرة مسؤول فاهم يصور ويكتب تقرير مفصل ويحسب التكلفة لسلسلة مشاريع أو ليش ما تكون مشروع واحد ينفذ مرة وحدة وينفذ صح

ليش نتجه للحفر الغزير والتعقيد ولا نتجه لأنفاق الخدمات الضيقة واللي تبقى مفتوحة نقدر نضيف عليها خدمات ونعدل بسهولة .. كل اللي نحتاجه جدران خرسانية بركاست وتغطية وهذي أنظمة معمولة في دول عدة وانعملت أخيراً في لوسيل .. مب لازم نعتمد على الجاذبية بيب 20 سم بمضخة ضغط ما تحتاج تحفر له أعماق الارض وبيضخ 10 أضعاف بيب 60 سم معتمد على الجاذبية

[khaldoon]

سهل هذا الكلام لكن الصعب هو استباق احتياجات المنطقة وترتيبها قبل افتتاح مشاريع كبيرة فيها تسبب زحمة واغلاقات وخسائر لهذي المشاريع


هذا اسمه غياب الرؤية الصح و التخطيط الصح
كان الشارع شبه ميت سنوات طويلة وكان ممكن تخطيطه والبدء فيه خلالها إحنا نتكلم عن الإدارة وعن تخطيط المشاريع وكذلك جدولتها حسب الحاجة في وقتها

حسب التخطيط و الميزانية و الأولويات .... يعني مثلا خلنا نقول مشروع تعديل شارع النصر يكلف 150 مليون مع البنية التحتيه بينما بينما إعادة رصفه بدون بنية تحتيه تكلف مثلا 80 مليون بينما إزالة القشرة الخارجية من الاسفلت المليانه رقع و وضع طبقه جديدة فقط و ع السريع تكلف 30 مليون فتلاقيهم مثلا يقولك سويها ب 30 مليون الحين لانه ما في مخصصات ب 150 مليون و بنأجل الترميم الشامل كم سنة حتى توفر له الميزانية المطلوبه بالإضافة طبعا لاعتبارات أخرى


والله اللي اشوفه حرام مول كبير مثل المرقاب وفيه شغل مكلف وافتتح وحوله أرصفة مكسرة وحفر من كل جانب لا والمشروع افتتح متأخر .. حتى فيه مشاكل في الكهرباء وحاطين مكاين تغذية مؤقتة .. في دولة حصارية ما ودي اذكرها كمثال يتم عمل جسور خاصة وواسعة للمولات بحيث تضمن سهولة الحركة ويتم عملها وانهاؤها قبل الافتتاح وهذي اللي يسمونها جدولة صح

هالمول انشغل فيه اكثر من عشر سنوات و تحسه مول جميل و كبير وسط خرابة للأسف الشديد .... مكانه لا يناسب الشارع ولا الطاقة الاستيعابية للشارع تسمح بوجوده و كمان فتحوا امامه مولين جديدين.... يعني كملت

بخصوص ما تفضلت فيه يا سيدي العزيز بخصوص الجدولة صح.... لانه في مكاتب استشارية كبيره عالمية مختصة بالجدولة و التخطيط مستعدة تشتغل عندهم ....اعتقد السبب معروف ...لانهم ما يبون كفيل شريك ب 51% ...يبون يشتغلون لوحدهم بدون شريك مواطن...على سبيل المثال لا الحصر

الرد بالازرق

[khaldoon]

فيه شارع في معيذر مسكرينه شهور طويلة والشغل واضح إنه بسيط جداً لكن طول وايد حول ست شهور والقطعة حول 10 أمتار وتوهم فاتحينها وللحين فيها خفقة كبيرة ما تم رصفها

مستغرب يجيبون مقاولين من وين وشلون ما يتابعونهم .. أحد أصدقائي شغال معاهم يقول عندهم تكدس من كثر المهندسين بس اللي اشوفه بدون فاعلية

كان الله في عونهم ......مهندسين وايد وما يشتغلون هذا تسيب و ترهل اداري و اهمال و تقصير في الواجبات اللي عليهم لازم يكون في حزم اكبر و متابعه صح .... يبيلهم شدشدت براغي ....لازم يكونوا اكثر فعالية .... والا راح تصير هيئة الاشغال العامة اسمها لا سمح الله هيئة الاشكال الهاملة

[معماري قطري]

كان الله في عونهم ......مهندسين وايد وما يشتغلون هذا تسيب و ترهل اداري و اهمال و تقصير في الواجبات اللي عليهم لازم يكون في حزم اكبر و متابعه صح .... يبيلهم شدشدت براغي ....لازم يكونوا اكثر فعالية .... والا راح تصير هيئة الاشغال العامة اسمها لا سمح الله هيئة الاشكال الهاملة

العيب اخوي خلدون في الاجراءات الادارية والروتين واتخاذ القرار الاداري .. القرار الهندسي والتصميمي سهل وسريع لكن الاجراءات الادارية هي اللي تعرقل العمل .. ما ننسى الاجراءات الادارية تجمع عدة آراء لو فيه اختلاف وتآمر بالمشي في الأنسب

البارحة مريت هناك وانا اسوق قست السكر الا 57 وآثار النزول بادية علي قلت ما لي الا السمك المفضل .. وحظي كان الطريق سالك وصلته بسهولة ونزلت ركبي ما تشيلني فوق الدرج طلبت قبل لا اركب وركبت .. بس يوم فتحت شوي مع طلعتي شفت شلون التعقيدات والاشارات المكتوبة يدوياً وما تبين بسهولة والتسكيرات .. شيء يحزن كانت عشوائية ويبين اللي مشرف عليها مب مختص .. محلات كثيرة سجينة والحفر كان غزير وبالنسبة لي معروف السبب تطوير الصرف الصحي بنفس الطريقة القديمة والاعتماد على الجاذبية

ما ننسى الحفر يسبب خلخلة للأرض ومشاكل للأساسات ويفرغ الضغط فترتفع المياه الجوفية وأي مبنى فيه بيسمنت ممكن تتسرب له المياه بسبب هذي الخلخلة وحدوث كراكات بسبب ضغط المياه ومهما يكون معزول يصب الماء فيه مثل الشلال

[معماري قطري]

الرد بالازرق

بالنسبة للأخير مكاتب كثيرة حتى محلية تسوي دراسات وجدولة والدراسات غالبها انشائية وسهلة حتى لو فيها تفاصيل هندسية بس تكون مبنية على احتياجات البنية التحتية للمنطقة وحالة الموجودة والتوجيه بالدراسة .. لو تتم الدراسة بحرية تامة ومكتب قوي جداً من مختصين عالميين وبعرض عدة حلول يختارون أنسبها .. كحل الأنفاق المحمية للخدمات كلها حتى سحب النفايات وتوصيل الغاز والفايبراوبتكس .. وممكن يدمجون معاها مواقف اضافية وهذي الدراسات لازم يتم فيها ذكر التأثير الاقتصادي والبيئي والاجتماعي على المنطقة .. وبنفس الوقت مقترح التكلفة والشركات العالمية اللي ممكن تنفذ


الفقرة اللي قبل معروف إن ألحين الموازنة استثنائية لهدف استعدادات البلاد ل 2022 ولو تم اختيار الحلول المؤقتة بيضطرون لعمل الحل الشامل بعدين ففي رايي نتجه للحل الشامل من الحين أفضل والمفروض متجهين له من زمان قبل ليقوم القطاع الخاص بانهاء مشاريعه .. وأوافقك الرد الأول المفروض تكون هناك رؤية استراتيجية تتبعها كل ادارات أشغال مفروضة ومتابعة من جهات عليا واتوقع هذا موجود إدارياً لكن الأهم وجوده هندسياً وتخطيطياً .. مهما يكون الاداريين غالبيتهم حتى ثقافة هندسية ما عندهم بقدر يمكنهم من اتخاذ قرار سليم

[بوخالد911]

أتمنى ما يكون هناك تراخي بعد انتهاء 2022

[معماري قطري]

جدام بيتي حفروا الشارع للكهرباء اعتقد وحطوا حواجز مضيقة شوي بس وخلوا الشغل كما هو الظاهر ينطرون الجن يكملونه وله أيام .. أدري ممكن جهة ثانية مثل كهرماء بس هذي مشكلة عامة تؤثر في الشوارع