للأسف يا ادارة كرة القدم تحاولون مجتهدين زرع الكورة في قطر بهذي الأشكال .. شعب قطر كله يحب الكورة ويحب يشجع منتخب منه وفيه لكن من بديتوا التجنيس السريع هذي النتيجة
وين قبل أيام الثمانينات كان يمكن واحد اللي مجنس وكان يتكلم عربي .. يذكرها خالد سلمان وتحية خاصة له من بعيد وهو ألحين من اللجنة اللي تستورد وتستكشف لاعبين خارجيين .. ركزوا في الداخل وفيه خير ومعليش مقيمين ومن مواليد قطر لكن من أدغال أفريقيا والبرازيل
في النهاية راي ينطرح ينطرح بدون تجريح وقذف بهذي الطريقة وحتى من يكون ضده في الراي فيه أدب للحوار والملاحظات لو ما وجدت ما انذكرت لتعدل
خلونا يا اتحاد كرة على الأقل نستمتع بشوفة الملعب واللعب بدون شيء يغث والحلول ما قصروا ذكروها الشباب .. إحنا الشياب حتى من وراء الشاشات اغتثينا
انا ما ادري الصراحة ليش الواحد يروح الملعب يشجع المنتخب
اللعيبة مثلاً من الأهل؟ من الجيران؟ من ربع الدراسة؟ من ربع الفريج؟
مافي الا 2 - 3 قطريين والباقي تجميع
شلون تبون جماهير حق ناس ما تحس بانتماء لهم، بس عشانهم لبسوا فانيلة المنتخب؟
نفس منتخب اليد والطايرة وغيرهم حتى اساميهم ما نقدر نحفظها
معماري قطر بوخميس بيض الله وجيهكم على هالكلام لي يقرقع في صدري من سنيين فعلا لحد يزعل ماعاد نحس بطعم هالمنتخب للاسف من فترة بعيده يوم كان يلعب ولد البلد كنا نروح الملعب حتى مبارايات الدوري لكن الحين اروح اشجع من لا هو ولد عمي ولا ولد خالي ولا ولد فريجي واتمنى لحد يدخل في الوطنيه وطبعا حنا مانبغي نتكلم عن كل الالعاب ولحد يقول مافيه قطريين يلعبون في الاندية فيه بس يبغون اهتمام ودعم لانه اذا خلص الثانوية مب مكمل فالكوره عارف انه مستقبله بيضيع والله القلب متروس بس اكتفي
انا واحد كنت احضر تقريباً كل مباريات العربي في ملعبه، وكنت في الملعب يوم فازوا في آخر بطولة في 1996م، وفي لعيبة كنت اعرفهم، وربع وياي في المدرسة، ولعيبة كنا نلعب وياهم في الفريج
لكن عقب ما سووا لخويا والجيش وبعض الفرق قامت تلعب بـ 11 لاعب أجنبي غسلت يدي من الكورة ولا طبيت الملعب من أكثر من 10 سنين
بالنسبة لي هذي مب رياضة، هذي منافسات رياضية يجيبون لها ناس جاهزين من برا، الرياضة يعني ان المجتمع يمارس الرياضة مب يشوف مباريات في التلفزيون
وقلة عدد السكان مب عذر، كاهي منتخبات البحرين وعمان يلعبون وينافسون بدون اجانب، وفازوا على منتخباتنا المحترفة في اليد
عندكم آيسلندا مثلاً، عدد سكانهم حول 400 ألف وتأهلوا كاس العالم وكاس اوروبا ومدرب العربي ومحترفينه من هالبلد الصغير
لكن مشكلة ربعنا يموتون في الانجازات، مع ان محد يحس بطعمها