من اتبع قليل العقل .. فليدرك أنه أقل منه
الحمد لله هالشيء اكتشفته في عز عطائي وأصبحت أعرف اني أاذن في خرابة مقطوعة عن العمران ولا حد يسمعني .. إخترت اني اوازن بين هذي الأُمور وتوفقت لحد كبير
من أيام بالصدفة تناقشت مع أحد كبار المسؤولين حول نظام إن المقاول يصمم ويبني .. قال لي أريح وعقده ملزم ويلتزم بصيانة لو فيه أي خلل وغرامات كبيرة .. بعدها بيومين رحت صوب مشروع حديث ومسكون من اللي بنوهم بهالطريقة وكان المطر كاشف العيوب .. الأرض كبيرة ومفتوحة ومنبسطة والمواقف كثيرة حول مبنى كبير وفيه تشجير وتوهم بادين بعض المكاتب للحين ما انملى .. اللي واضح لي شغل صيانة وتغيير لليتات وبعض أسقف السيلوتكس لجبس .. الليتات من نيون لال اي دي .. يعني الاشراف والتصميم الهندسي كان كله قديم وبدون اهتمام والتعديلات كلها جديدة ومدفوعة من الجهة المستخدمة والمقاول خذ فلوسه كاش ولا عليه التزام الا لو فيه خلل انشائي قوي
التفت للمواقف وزين حصلت سيارات قليلة يمكن حول 5% من طاقة استيعاب المواقف وزين محصلين موقف ما فيه ماي لأن المواقف كلها غرقانة بالماي .. تخيل التصريف السطحي موجود وبسهولة يخلون سلوبات جهة الخارج حول المواقف ولا سووها .. زين وين المقاول اللي تقدرون تجيبونه أي وقت يعدل؟
مثل ما يقولون الهنود Talk Is Cheap
ما زالت المهنة في دمي وتجيني حتاحيت صغيرة من المشاريع اطقطق فيها
ههههه دائما تعليقك يصدمني بواقع حاصل لكن شنسوي
مهما نشوف الصح ما يعني اننا لازم نطبقه دام خارج سيطرتنا فخلاص نخلي الي موكل به و ضميره
مريت بتجارب علمتني ان الصح يحتاج تسويق احيانا
يا البعض ما يتقبل التغيير او يأخذ موقف دفاعي لاني انا جايب الفكره او الحل مش هو
صارت وايد لين تعلمت كيف امرر الحلول و الايجابيات بطريقه افضل من قبل
عندك فكره سوقها انها فكره الجميع و ان لهم فضل في انجاحها
شخص رافضها دور الي اعلى منه و اقنعه او اقنع الكثره عشان لما نجتمع تلقى الاغلبيه متقبليها و اكثر من الرافضين
ابرز التوفير او الكسب من تطبيق الفكره و تقليل المجهود
وحده من المواقف اضطريت ازور ثلاث جهات عشان يتفقون على افضليه الفكره. لين وصلت ان الجهات هي الي رجعت الفكره لجهه عملي لتطبيقها
والله وايد سوالف بتضحك لو اذكر بعضها. حتى بعضها تنفذ على القطاع كامل مش بس جهه عملي
تصدق ان فكره ضل واحد يناحس فيها و اكتشفت انه عادي بيتقبل لكن عنده مشاكل مع ادارته و يبي يخرب اي شي بس نحاسه
المهم اني مررتها لاداره ثانيه هي مختصه في دراستها و وافقوا عليها و جات لادارته للتنفيذ
السوالف ما تخلص ياخوي بس حبيت اعطيك امثله
مخك نظيف يبي لك بزنس
بو عبدالله لأن مخي نظيف شارد من البزنس
تدري عن الفكرة وعرضها للمسؤول الأكبر .. إحنا تكوين اداراتنا من مسؤول لمسؤول وبعضهم عقليات ما تتقبل وانا كنت في مكان صعب تعرف من هو فيه البغ بوس شكثر مسؤولين كبار .. راح مسؤولي المباشر اجازة وسلموني المسؤولية مؤقت وعرفت إني أقدر اخاطب مسؤولنا الأكبر وكان بين مسؤولي اللي راح مسؤول ثاني
خذت الخرايط وقعدت اعدل فيها واحط السلبيات وكيف الطرق استوت حولنا وكتبت كتاب وضحت فيه آرائي كلها حول تنظيم منطقتنا وكلها لها مدخل واحد والمنطقة خاصة لنا مب للبلدية لكن ممكن نتعاون معاها في بعض الأُمور وصار إن المسؤول الكبير استجاب للي وضحته كله
سووا لجنة وبدوا شغلهم .. انا مب معاهم ومسؤولي اللي مسافر بعد ما جاء زعل مني وعاتبني بدال ما يشكرني اني وضحت هالأُمور .. المهم صار لي طالع عنهم 10 سنين وهم للحين شوية حتاحيت باقية ما سووها مع إن كان الحل شامل لأُمور كثيرة وسهل وضروري ينعمل بكل ما فيه
كثيرين مثلي يمكن يراجعون مركز العسيري الصحي .. المواقف شرق المركز ومدخله غرب وله باب صغير حديد من ورا جهة المواقف .. اللي بيدخل بسيارته يدخل من غرب وتنزله السيارة ويدور بالسيارة حول المركز ويمر شرق لكنه مفصول عن المواقف .. ليش ما سووا فتحة ممكن يوصل من غرب للمواقف؟ كان سهلوا على الناس لفة طويلة .. مثل هذي الملاحظات ينتبهون لها أشغال ألحين لكن الجهات والوزارات المعينة ما تنتبه مع إنها تطور المكان تطوير كامل ومريح