العمالة الفنية في قطر
السلام عليكم
كيف الحال يا اخواان
عندي موضوع لفت انتباهي لمت سافرت بريطانيا
بخصوص العماله هناك
لاحظت ان أي شخص هناك عنده مهنة معينة لازم يكون عنده رخصة او ليسن
وهذا الليسن ما ياخذه الا بعد عده اختبارات
يعني اللي كهربائي لازم رخصه او شهاده انه يقدر يشتغل
اللي ميكانيكي نفس الكلام
والفيتري وغيره
ليش مافي جهه تتبنى هالشي لان العماله مهنتها حسب التجارب مع الناس ويخرب اكثر من شي لما يوصل للخبرة
ومرت علينا تجارب وياما مع عماله أي كلام بتاع كلوا
التصنيف جميل والرزق على الله واللي يبدع في شغله الله يحبه
صار لي حول سنتين وانا انادي بضرورة هذا الشيء وفوق ذلك ضرورة ايجاد عقاب رادع للي يشتغل شغلة مب شغلته
من شوي يكلمني ولد عمي عن شخص طلب صيانة لمكيف سبلت في بيته من محل تصليح مكيفات وأخطأوا في الاصلاح وصار حريق خرب البيت كله .. مثل هذا متروك بدون حساب ولا عقاب
صحيح بتكون شغلة على الأجهزة المختصة بس هذا واجبهم ومن صميم عملهم والا بنكون كأننا عايشين في غابة وبعدين بتنتعش معاهد تدريب تخصصية وهي اللي المفروض تختبر وتعطي شهادات وتراخيص تحت اشراف الحكومة
الله المستعان هذا اللي ماودك تسمعه شي يزعل للأسف انك تسمع هالشي الموضوع موضوع كنترول لا اكثر وليس محاربة الطرف الاخرالمشاركة الأصلية كتبت بواسطة معماري قطري
كل شيء المفروض له قانون وله ضوابط وعقوبات لو تم تجاوزها
حتى أبسط شيء في وكالات السيارات ( بعضها ) يشغلون فيه مختصين فقط .. لو تم التطبيق بتكون حتى معاهد صغيرة مختصة هي اللي ترخص أو الجامعات وعندنا جامعات تقنية تخصصية كثيرة ولازم تؤدي خدمة للمجتمع وبمقابل مب ببلاش بس المفروض بعد مقابل معقول
أحد المقاولين باكستاني شيبة طيب وحبوب ولغته على قد الحال .. من عيال فريجنا ( فريج الغانم اللي للحين يسمونه يديد ) .. المهم هذا ربى عياله كلهم على هذي الصنعة لكن أصغرهم دخله كلية تقنية سيريلانكية في قطر وخذ دبلوم هندسة .. يعجبني بلبل عربي وانجليزي وفاهم ويناقش نقاش هندسي .. هذا اختياري ولو اضطروا الكل حسب القانون بنحصل خدمات زينة بسعر يمكن أغلى شوي بس مضمون فيه أمان وفيه ضمان وفيه جودة
هذا يقودنا لضرورة وجود جمعيات أو ما يسمى ب Association ما ادري ترجمتها بالضبط شلون وهذي تجمع قدامى المهنة وخبراؤها وايجاد قوانين وتصنيف لمن هم فيها وخبرات قانونية وفنية .. مثل تركيب الحجر لو لهم جمعية تحت اشراف الدولة وادارة واشتراكات تدفع للتوثيق للعقود ما بنحصل مقيول حجر يلعب علينا ويسوي 80% من الشغل ويقول ما اتفقت على كل الواجهات والكمية المحددة خلصت وهذي الأعذار اللي يطيحون فيها الغالبية
تجمع للمحامين وللأطباء وممكن حتى فرعي لكل تخصصات الطب وعندنا جمعية المهندسين القطريين بس ما لها حس لا منشورات الكترونية ولا أخبار ولا فعاليات .. عندنا المدارس ممكن تساعد وزارة التربية ( أمحق تربية ) كانت تربية قبل .. المهم هذي ممكن استغلالها وقت العصر كمقرات للتدريب العملي لكل التخصصات هذي
ليش رخصة وليسن ولويه
(أنا في معلوم) يضبط لك كل شي
ههههه هالنوعية اللي خربت بيوتنا
فقط الجهات الي تقدم خدمه للمجتمع ترخص
مثل كهرماء و الصحه ترخيص كهربائي و تراخيص مهن طبيه
و مع هذا نلقى كهربائيين بلا رخصه بالباطن يعني
مع اني اتفق مع الطرح في فكره ترخيص المهن بشكل اكبر لكن اعتقد بتحتاج وقت كبير لتطبيقها
لوصدر قرار بيوم واحد بينشخلون صدقني مافي شي صعب القانون ينظم كل شي
التنظيم يحتاج تشريعات و جهه و موظفين يتفرغون لدراسه الاوضاع و تحديد الشروط. و توفير البدائل لحين تنظيم المهن و رخصها
و سنوات لكشف السلبيات من التنظيم و تطويره
المشكله ان تنظيم الرخص يرفع الاسعار و رواتب المرخصين للحرف و يقل عددهم و تتعطل عشان يجيك واحد و يتشرط عليك بعد
الحين و مب مفتكين احنا ههههه
السخانه عندي تفصل الكهرباء السايق جاب واحد يقول غير السخانه كامله و الاسلاك و شغل يد
طردته و جبت واحد بنفسي. قال غير الكويل بس. وذاك بغى يدفعني فوق 400 ريال عالفاضي
تخيل لو في رخص لهم و يقل عددهم. و يقول لك برأيي الفني لازم تغير كل شي. وانا مرخص و فاهم و ما اشتغل الا جذي و اذا مب عاجبك انتظر غيري كم يوم عشان تلقاه و يجيك
بيتفقون بوهناد ع تسعيره و تشرط
تنظيم العملية مب معناه قيود تعجيزية
بعض المهن الوضع فيها سهل وبعضها أكيد تحتاج دراسات ووقت وتحضير .. إحنا لو خلينا لكل مهنة جمعية خاصة بها تستشرف لنا القوانين الخاصة بالترخيص وتعدل عليها باستمرار حسب الحاجة بيكون الوضع أفضل
بنفس الوقت فيه مهن كثيرة تنظمها جهات مختصة مثل الصحة والتعليم والكهرباء وغيرها كثير .. وبنفس الوقت فيه مهن وأُمور سهلة تقدر تطورها كهواية وتمارسها .. المرور في الفترة الأخيرة لاحظ ضرورة تصنيف سيارات النقل الثقيلة 3 طن وفوق مثل المازدا الطويلة ونوعياتها على إن ضروري لها ليسن ثقيل والمرور مؤدي واجبه في هذي التصنيفات والترخيص حتى للسيارات سووا فحص فني .. المفروض هذا يطبق في كل مجال .. حتى الاختبارات الخاصة ببعض التراخيص ضرورية لتبيين الجيد من الرديء والغير مناسب بتاتاً
مثال بسيط .. وثقت في واحد قال لي بص حضرتك حأنئل لك الأرقام من تلفون سامسونغ لآيفون بس صعبة شوي وروح وتعال لي .. سوى لي قصة ويوم رجعت حصلت أرقام وايد ملغية وأسماء بدون أرقام وملخبط لي ويبي 100 ريال تهاوشت معاه وهزأته وطلعت عنه .. ورحت عند هندي سواه في دقايق وانا اشوف .. مثل ذيلا ضروري لهم ترخيص ولازم تكون عندهم خبرات .. صحيح اختبارهم يحتاج لناس مختصين يختبرونهم ويرخصونهم
عمال التكييف .. شكثر منا تورطوا معاهم وكثير حرامية .. يشتغل في شركة والا خاص لازم له ترخيص يحدد خبراته ومقدرته بالضبط
واحد من الربع مهندس الله يذكره بالخير التزم بدورة تدريبية وخلص وجانا حاط شعار على صدره pmp اللي هو بروجكت مانجر بروفشنال وكان مستانس مع إن له خبرة تفوق 20 سنة .. مدرسنا في الجامعة شيبة شعره كله أبيض ومقرب يتقاعد قال انا باروح دورة صيفية 3 شهور ولاية ثانية بعيدة باخذ كورس في برمجة آلة حاسبة كانت اتش بي .. وياخذ عليها شهادة .. هذي التراخيص تطور المجتمع وتنظمه ومب ضروري القائمين عليها يكونون كوادر كلهم مخصصين 100% لها بس .. ممكن لبعض الأشخاص بالاضافة لعملهم وللبعض اللي في هيئات وادارات كبيرة شيخسرون لو خصصوا عدد معين .. هذا إجراء ماشي في كل العالم المتحضر
ضوابط المشاركة
رد مع اقتباس