المشاركة الأصلية كتبت بواسطة سالم الزهران
خطط البيت على المساحة اللي تكفيك ولا تبالغ
إخوي سالم إحنا تحكمنا عادات وتقاليد في الحياة ونحب عيالنا يكونون معانا وعيالنا في الغالب خلال 15 سنة من سكن بيت جديد يحتاجون يتزوجون .. اللي بنى بيت على قده صعب يبني دور فوق وتعقيدات التخطيط والموافقات وزيادة الحمل الكهربائي هذي كلها تخلي الواحد يفتر ويضعف وممكن يأجل زواج ولده أو يخليه يكتفي بغرفة صغيرة
انا دوم نصيحتي للجميع يبنون بنتهاوس مناسب كشقة كاملة لأحد العيال أو لإثنين لو أمكن .. بناء غرف ملابس كافية وتعتبر خاصة بباب ينقفل عن الخدم بدال الكبتات المفتوحة وهذي ما تكلف جدران وباب وتشطيبها يكون بسيط جداً وتساهم في تقليل سعر المتر المربع للبيت .. شفايدتي من غرفة 6 في 4 مثلاً وعندي إمكانية أعيد توزيعها أخلي 4 في 4 للنوم وجدام ممر مناسب وكاونتر أدراج أو كبت مدمج معاه مكان للتلفزيون لو محتاج له .. وآخذ طرف الغرفة 2 متر في 4 أسوي غرفة ملابس بباب صافي عرضها 1.8 أو 1.9 في حالة باسوي جدار 10 سم .. وممكن اسويه بارتشن اسمنت بورد أو خشب أو جبس ممكن حتى ينزل ل 5 سم أو 7 سم
ويزيد عندي العرض الصافي .. كبتات مفتوحة ما تاخذ مساحة كبيرة تحتاج قواطع بعرض 35 سم وتكون الملابس معلقة نصها بارز لسهولة الفرز والاختيار
الناس صارت تحول البيوت لاماكن عمل لذلك المساحة في الحوش تفيدك كحديقة او زراعة صغيرة وتسلية ولا تنسى تجربة كورونا جعلتنا محبوسين واللي عنده حوش وحديقة حلوة صار محسود.
الحديقة مهمة وتعتبر حشو جمالي .. أي منطقة فاضية عندك ازرعها بدون تأثير على الممرات المباني ابتعد عنها شوي وحط عوازل وحمايات .. أشوف الأمريكان فنانين بموضوع الكراج المغلق للسيارة وهذا متصل بالبيت وفي الغالب قريب منه دورة مياه صغيرة .. عملية للواحد وقت يجي محتاج لها بسرعة وقربها غرفة الغسيل للملابس يقطون ثيابهم وهم رايحين عملهم .. بعضهم يكبرون هذا الموقف المسقوف والمحمي من الخارج ويكون عندهم معاه ستور صغير مفتوح لعدة السيارات وسطح عمل للصيانة الخفيفة
البناء اليوم تطور فابتعد عن التقليد ولا تبالغ في الابتكار ايضاً
استثمر في عزل الاساسات بدل الصرف على قواعد واعمدة مبالغ فيها يمكن ما يحتاجها البيت وتعيق التصميم لاحقاً.
يستثمر في جميع الاساسيات ومنها التصميم لأنه إبو الأساسيات وجزء من الاساسيات موضوع العزل والحماية وتصدق رول نايلون سميك يمكن يكلفك 30 ريال يعزل بيتك كله عزل اضافي للقواعد وحماية .. هذا المقاول وعماله يمنون عليك به ويجيبون رقيق كلش ينثقب وينشق بسهولة ( قشر بصل ) ليش؟ لسهولة التعامل معاه
فيه بيوت كثيرة تصميمها حلو واثاثها اجمل (بعضها قصور ملكية) لكن بنيانها فيه مشاكل معمارية والله يشهد اتكلم من تجربة.
فربما تبني بيت وااو لكنه معمارياً فيه مشاكل .. فالبنيان السليم ياخذ وقت طويل والسرعة نتيجتها الاخطاء.
بناء صحيح على مساحة معقوله و تصميم ياخذ وقته و يندرس صح و تلتزم فيه وتجاهل اقتراحات بعض المتنطعين.
اعتقد سر نجاح البناء الفوري هو التفاهم مع المصمم او المقاول اللي يتقن هذا العمل، اما النجاح على المدى البعيد فهو يعتمد على هيكل البيت واساساته جيدة العزل والنجاح في الصبيات والبناء.
وفقك الله واعانك