المشاركة الأصلية كتبت بواسطة ابو عبدالله.
اذكر ان كان في عروض من بنوك اسلاميه للتمويل المنتهي بالتملك
لكن هذا له مخاطره على العميل ايضا
لو تعثر بالاقساط يروح عليه العقار
غير ان الارباح على التمويل ممكن ترتفع اذا رفع المركزي الفائده
هالتمويل مختلف عن السلفه العاديه الي ثابته الارباح
يوجد تمويل طويل الاجل 15 سنه او اكثر بحسب الراتب و العقار طبعا
و مقدم 30% طبعا
لكن ايضا يتأثر العميل بالفوائد لانها على سنوات طويله و ممكن توصل الى نفس قيمه العقار او اقل قليلا
لو ظ¥ظھطœ فوائد ثابته بتصير 75% على 15 سنه
تخيلوا بيت تموله بمليونين يصير ب 3 ونص مليون بالاقساط. هذا اذا ما رفعوا الفوائد ولا تعثر العميل بالسداد
الافضل ان كل عميل يشوف المناسب له
تبي بيت ادخر و ادفع مقدم زين و تمويل بسنوات معقوله افضل من تمويل كامل للعقار
تقريبا بكل العالم محد يشتري عقار بسهوله مقارنه بالراتب
لكن عندنا المجال افضل حتى لو نشوف العقار متضخم السعر لكن نضل افضل حالا من كثير من الدول
غيرنا يمول بيت بسنوات طويله لكن عندنا الادخار من الراتب اسهل و اكبر
معليش بس بصراحه الرفاهيه ماخذتنا شوي
توه مشتغل موتره بمئتين وشوي و راتبه ينصرف كامل على غير الاساسيات. هذا وهو نايم و ماكل و ثيابه تنكوي له ببلاش ببيت العائله هذا غير انه ساحب سلف العمل و صارفها
ببلاد ثانيه يدفع اجار و اكل و فواتير من اول ما يشتغل
عندنا يشتغل كم سنه بلا ادخار و يجي الزواج يخليه يستلف اكثر و يضل كم سنه يدفع فينعدم الادخار مضبوط
جاه ياهل او اثنين بيطلع ببيت اجار
يعني اول عشر سنوات ما سوى شي
لو يفكر شوي كان اخذ سياره مقبوله و ادخر نصف راتبه كم سنه و تزوج بلا ديون
من ثاني ياهل بيكون مدخر مقدم لبيت و يمول على البنك كم سنه
يقدر يشتري ارض بمليون و 400
و يبني ب 700 الف
اتمنى محد ينتقد الحسبه لانها جدامي و شايف الخيارات
واحد من عيالنا تزوج من توفير راتبه و الحين عنده كم ياهل و قادر ان يبني فيلا صغيره مناسبه لعائلته
هذا غير الاسكان طبعا
الي يبي يجتهد بيقدر لكن لازم يفهم نقطه مهمه
تبي الخير اسعى له
افهم ثقافه الادخار
اتعب بأول حياتك بترتاح بعدين
ما يبي لها بيت على عشرين سنه ولا زواج تقسطه على خمس سنوات
راتبك بتقدر توفر منه النص و اكثر لو تبي و بدون ما تصير بخيل بس اترك عنك الرفاهيه الزايده ومش لازم تصير مثل ربعك او مثل ولد فلان او علان
شفت كذا مثال حتى بين عيال اخواني
جينير تزوج من توفير الراتب و حوش للبناء
و سينير ست سنوات ببيت إيجار و مضغوط ببناء بيت الاسكان الحين
و السينير راتبه ستين الف على ما اذكر لكن ايجار 13 الف و مواتر له و للبيت قيمتها فوق نص مليون الخ
هذا بينتقد و الجينير يقول الامور طيبه والله و شاري طراد و فاتح محل يعني ماشي افضل من ولد عمه الي راتبه ضعف الراتب
حبيت اشارك بالي اعرفه يمكن ينفع بعض القراء
رد مع اقتباس
