المشاركة الأصلية كتبت بواسطة ابو عبدالله.
هههههه الظاهر موضوع السيارات لفت انتباهك
كلن و نظرته لهذه التجاره
قبل كم سنه شريت سياره من اوروبي و عرضتها للبيع بموقع قطري
اتصل شاب قطري الظاهر حديث خبره بهالتجاره و جلس يكلمني ان الموتر فيه وفيه و اذا جاب لك خمسين بيع بسرعه
قلت له الموتر كذا وكذا و اعرف ان له زبائن يشترونه فوق السبعين. قال والله انا بالسوق و اعرف هالقطر ما يدفعون هالقيمه
قلت له لا ماتعرف كل الزبائن و انواعهم
في زبائن ما مروا عليك و يتصلون يبون موتر و اذا عندك ورقه الفحص و اموره طيبه يقول لك طرش الموتر بالسطحه وخذ 90 الف
حتى ما يجي يشيك الموتر
من الصور و ورقه الفحص راضي به
في عمداء و ضباط كبار و غيرهم كبار سن و مشغولين حدهم ما يعورون راسهم بشيك و بفحص بنفسي
يشيل و يدفع اعلى من القيمه الي تظنها مناسبه
و بالمثل الاوروبي يموت على الاودي و الطوارق خصوصا اللون الداكن وانت يا القطري ما تجيب لك 25 الف لو تعرضها لكن هو يدفع الضعف يمكن
ما ابي اوضح اي مواقع اشتري و ابيع و اعرض عبرها كل سياره لها موقع مناسب تعرضها فيه بحسب صناعه بلادها
الاوروبي تشتريه من زبائن بموقع كذا و تعرضه بموقع ثاني
و العكس صحيح مع الياباني و الامريكي
و ايضا المراكب البحريه اقصد الطراريد تلقاها غاليه بموقع معين وضرب الكف عليها و ضاربتها الشمس لين قالت بس حتى موديلات 2006
لكن تعال بموقع ثاني فيه اجانب وايد تلقاه اجدد و مكينتين ياماها و غرفه و حمام اعزكم الله و مجدد كامل بمالك امريكي لمعه الفايبر للحين فيه ما ضربته الشمس ارخص بفارق لا يقل عن عشرين او 25 الف بالميت هههه
برجع لك للمواتر
تصدق ان في ناس تتصل بي بحكم المعرفه و يقول لي عندي كروزر مال البيت شيله بأي قيمه و جبت بداله جديد
2003 شد وكاله حتى مسجله وكراسيه ملبسه من طلع من الوكاله
بعشر الاف
اتصال من شخص ثاني نيسان 2012 ماشي 116 الف نظيف ورده حتى توايره جداد بخطوطها ب 30 الف
خليته للدوام ما بعته
وايد امور تمر علي بحكم تصفح الانترنت و المواقع
و بحكم ثقه التعامل مع كذا شخص مب فاضيين يحطون اعلانات و سنداره شريطيه و روح فحص الخ
صارت معاي مرتين ان موترين شريتهم و بعتهم ما لحقت انقل الملكيات بأسمي من البايع للمشتري على طول بس المواتر اخذتهم و غسلتهم مع بولش سريع و اعلنت عنهم
و موتر كروزر قديم ماشي شوي عند اوروبي غسلته من الداخل بعشر ريال بس و اعلنته و راح بكم يوم بفارق 11 الف زياده
ما اتعب نفسي بكم الف محدد صفقات ما تقل عن عشره و طالع اقل ما اشتري و ابيع ما عندي وقت ولا سنداره كذا زبون عشان بيعه وحده
حتى الي بيشتري مني ممكن يربح من السياره لاني اشتري بسعر يفرق كثير عن السوق و ابيع بفارق بسيط عشان تنباع بسرعه ما اخلي الموتر يتم فتره ابدا
الا الي ابي استخدمه فتره هذا شي ثاني
جرب هالتجاره. حلوه كهوايه و مربحه بلا تعب حقيقي