صفحة 1 من 4 123 ... الأخيرةالأخيرة
النتائج 1 إلى 10 من 39

الموضوع: استفسار بخصوص البناء عظم بلاستر ام تسليم مفتاح !

  1. #1
    عضو الصورة الرمزية Proxy-Qtr
    رقم العضوية
    56115
    تاريخ التسجيل
    May 2020
    المشاركات
    8

    Lightbulb استفسار بخصوص البناء عظم بلاستر ام تسليم مفتاح !

    السلام عليكم ورحمة الله وبركاته

    اخواني الكرام عندي استفسار بخصوص البناء وبغيت نصايحكم لي بارك الله فيكم
    قبل ما ابداء حاب اشكر اخوي معماري قطر على مساعدته لي في تصميم الخريطة ماقصر واسال الله ان يكتب له الاجر


    استفساري هو ماهو الأفضل من ناحيه "توفير المال" بناء عظم بلاستر او تسليم مفتاح ؟
    مساحه البناء عندي 1073م تقريبا

    وجاتني عروض كثيرة تسليم مفتاح مع تركيب حجر سوري للواجهه فقط والاسعار خيالية اكثر العروض تتجاوز سقف المليونين !
    بدون حجر في منها وصل مليون و 800 ألف وفي منها مليون و 900 ألف

    وطلبت من شركات المقاولات يعطوني عرض سعر لعظم بلاستر مع تمديدات الكهرباء والماء فقط
    ووصلني الى الان عرضين

    العرض الاول بسعر مليون و20 الف
    العرض الثاني بسعر مليون 50 ألف

    اتوقع حسبوا سعر العظم بلاستر 950 للمتر تقريبا مب متأكد

    والصراحه انا محتار هل ابني عظم بلاستر بعدها اشوف لي شركة ثانيه تكمل لي التشطيب؟
    او ابني تسليم مفتاح والتوريد يكون على حسابي وهم يتكفلون بالتركيب فقط ؟


    لاتبخلون علي بنصايحكم
    شكرا لكم

  2. #2
    عضو نشط
    رقم العضوية
    28694
    تاريخ التسجيل
    Oct 2009
    الدولة
    QATAR
    المشاركات
    865
    كذا او كذا يعتمد
    يعني لو فرضنا وقعت تشطيب له مميزات منها المقاول هو الي بجيب لك كل حاجة مع المسؤوليه التامة عنه من شحنه وسعره وتخزينه لو حصل ماحصل هو المسؤول عنه.
    وغير هذا التنسيق مع الشغلات الثانية مسؤوليته بخصوص عدة أشياء كهرباء سباكة عزل صبغ تبليط.
    يعني مايلعوزك راعي الكهرباء يقول خل راعي السبك يخلص الاول مثلا او تصير انت حلقة وصل مابين هذولاو راح تضيع بينهم ولو صار اي شي غلط تعال حل الموضوع.
    انا ما اخوفك لكن هذي لها عيوب ومميزات.
    وقع معه عقدين عقد تشطيب وعقد عظم اشوف الأفضل هذا بشرط انك شفت شغله الاثنين طبعا ف كذا فيلا العظم والتشطيب بعدها وقع العقدين اذا خلص العظم وانت مرتاح معاه كمل معاه العقد الثاني وهنا تذكره ف العقد الاول العظم هذي الجزئية.
    الززين ف بناء العظم ممكن تشطب ع راحتك لكن مافيه راحها فيه والاهم انه تكون شاملة العزل والسباكة والكهرباء عقد العظم.
    اي واحد يبني راح يتلعوز شوي خصوصا الي مايعرف شي ف البناء نهائيا ولا بعد بناء ملحق او غرفة.
    فأنت اذا راح ادور اسال عن الشركات الي شغلهم ممتاز للعلم والي اعرفه مافيه شركة شغلهم وتشطيبهم ممتاز كل شركة تتميز بحاجة ماتجيك الشركات كلها 5 ستار كل وحده يميزها شي وبالتووفيق ان شاء الله

  3. #3
    عضو
    رقم العضوية
    41517
    تاريخ التسجيل
    Jan 2012
    المشاركات
    286
    السعر بالنسبه للعظم مع بلاستر المتر يتراوح بالسوق من 900 الي 1000 لو عندك بسمنت ومصعد السعر يتراوح من 1000 الي 1200 ريال. مع بلاستر من خبره انت شطب افضلك الناس ازواق واكيد مهما سلمت الشركه تشطيب ماتوصل لنفس الي انت تبغيه والله يوفقك

  4. #4
    عضو
    رقم العضوية
    41517
    تاريخ التسجيل
    Jan 2012
    المشاركات
    286
    بالنسبه للحجر السوري الموجود بالسوق الحين سرميد وحلبي خال السبل توقف مايتصدر الحين انا جاني اكثر من عرض الفيلا كامله اربع جهات مع المجلس والصور السعر تراوح من 205000 الي 220000 ريال

  5. #5
    عضو فعال
    رقم العضوية
    42820
    تاريخ التسجيل
    May 2012
    المشاركات
    1,708
    نصيحه اخو خذ تسليم مفتاح

    حدد الاصناف من بورسلان واطقم حمامات ومواصفات الكهرباء والسباكة وديكور ونوع المكيفات والصبغ حتى نوع الغراء المستخدم في التبليط والدرابزين وجميع امورك

    واخذ تسليم مفتاح ابرك لك واحسن لك من وجع الراس

    خطط مضبوط ورتب حالك واختار شركة محترمة وريح بالك حتى لو تدفع اكثر بس اشتري راحتك

    واحاول تختار مواد الادوات الصحية والبلاط وجميع امورك من محل او محلين فقط لا دوخ راسك وتختار من كل محل نوع وشكل

    اذا رتبت امورك المقاول راح يخلصك بسرعة لان مايبي ينتظر لين انت تختار على راحتك انت تتاخر في الاختبار حط في بالك راح تتاخر في استلام البيت

    انا واحد شطبت بروحي وتبهدلت بهدله لعبو فيني لعب

    جميع اموري واغراضي عندي ومتوفره اول مابديت البنيان بس لان اتعامل مع كذا شركة تاخرت ليش التاخير تعال نسق مع الكهربائي والسباك والتكيف والديكور وكل واحد جنسيه غير ومواعيد غير وياخرونك ويتناحسون مع بعض

    نصيحه نصيحه اي حد يبني ياخذ تسليم مفتاح
    التعديل الأخير تم بواسطة Azizuk ; 05-08-2020 الساعة 05:15 PM

  6. #6
    عضو مؤسس
    رقم العضوية
    21272
    تاريخ التسجيل
    Jul 2008
    الدولة
    قطر
    المشاركات
    5,844
    ,

    ,


    مرحبا


    موفق يارب



    اسمع كلام اخوي azizuk

    حتى نحط النقاط على الحروف

    السعر طبيعي وليس غالي 1000 ريال للمتر هذا سعر ممتاز

    وسعر التشطيب 1600 رخيص هذا تلاقي سعر البلاط 30 ريال وتشطيب 1800 اذا مواصفات زينه سعر الارضيات 60 ريال

    والشركات المعروفه تعطي 2000 ريال اذا المواصفات ممتازه لاهل قطر
    في فخامه بالمواصفات سعر الارضيات يوصل الى 100 ريال

    السعرمرتتبط بالمواصفات

    المشكله عندك ( كبرت المساحه ) اكثر من اللازم


    مسئله انك تبني عظم وتوفر ( 100 الف ) هذا ما بيحل المشكله

    اذا قيمه التشطيب الي حصلتها مليون و900 وعندك الأثاث بيكلفك بحدود ال 500 الف

    والجبس والاضاءه والثريات والديكورات الداخليه بتكلفك اقل شي 200 الف

    لازم تعمل حسابك ان خلال ( سنتين ) يكون المبلغ مكتمل عندك

    واذا ناقصه كثير

    النصيحه انك ( تعدل الخريطه ) وتصغر المساحات ما تتجاوز ال 700 متر الى 800 متر بالكثير

    حسب امكانياتك

    والنصيحه الاخيره

    ( اعمل عرض سعر تشطيب ) مع الكهرباء والبيب فيتر والعوازل
    خل السيراميك والرخام وبلاط الحمامات والقطع عليك

    كذا بترتاح شوي من ( عوار الراس التعامل المباشر مع العمال )
    وما راح تقدر تحصل تشطيب جيد اذا انت جبت العمال من نفسك

    ما بتقدر تراقبهم لهم أساليب ما يعرفها الا المقاول والاستشاري

    عادي ( يلعبون فيك ) ونت تجيب لهم غداء وريوق

    وهم يغشونك بالتركيبات السيئه شغل سرعه
    وما راح تكتشف الأخطاء الا لما تسكن

    بتصير ( تلعنهم )


    خل التشطيب على المقاول افضل لبيتك واريح لك


    الي يقولك بتوفر بالعظم

    ما جرب البنيان او التشطيب


    بالتوفيق لك يارب



    ,

    ,



    التعديل الأخير تم بواسطة شموخ دائم ; 05-08-2020 الساعة 05:30 PM

  7. #7
    تميم المجد الصورة الرمزية معماري قطري
    رقم العضوية
    42697
    تاريخ التسجيل
    Apr 2012
    الدولة
    قـــــــــــــــــطر
    المشاركات
    62,560
    مساء الخير على الجميع

    يا هلا ومرحبا بإخونا الخفي Proxy-Qtr انا والله ما اذكر اني ساعدتك ولا اذكرك من وشكلك جديد ويمكن من الإخوان اللي تواصلوا معاي على الايميل أو الوتس اب والله يوفقك

    كلام الإخوان عزيز يو كي مجرب حديث والله يعينه دخل معمعة انا ما انصح بها ودوم نصيحتي خله شغل كامل وإخوي شموخ دائم يتراوى لي يبني دوم وأعرف مني في هالمشاكل .. المواد اللي فيها اختيار وتخصصية مثل بند اليو بي في سي خله عليك ووضح حدود المقاول في الشغل اللي تبيه للدرايش والأبواب اللي من نفس المادة .. وضح مسؤوليته في إدارة الموقع وحمايته وتجهيز الفتحات صح بالطبقات اللي تبيها .. يمكن تبي الحواف لفتحة الدريشة بحجر والا بلاستر عادي وزوايا ستانلس ستيل مخفية والا بارزة .. يمكن تبغي برا رخام وداخل خشب .. يمكن تبي للأبواب عتبة عازلة يسكر الباب معاها رخام ويمكن تبيها من نفس اليو بي في سي وهم يستخدمون بعضهم قطعة ألمنيوم .. شغل المقاول بالعتبة للأبواب الداخلية أشوفه ضروري بس بعد بيسوي عندك حكرة الهواء ما يدخل من تحت الباب وشفاط دورات المياه ما بيشتغل صح وممكن يخترب

    كلها تفاصيل تنفيذ تدخل المفروض مع التصميم حتى ما يكون فيه اختلاف أو خلاف وحتى تكون مرتاح في بيتك .. الأمريكان والأُوروبين مسئلة البيت يكون غير منفذ للهواء عندهم ضرورة قصوى بس يدخلون نسبة من الهواء النقي مفلترة لكل الغرف وهذي ممكنة عن طريق بايبات أو نعتمد الفراغات البسيطة تحت الأبواب ونلغي الاغلاق التام .. بس في حالة بيوتنا الباب الخارجي والدرايش ألحين تكون يو بي في سي .. بعد مب غلط نسوي فتحة معينة لدخول هواء خارجي يجدد الهواء الداخلي لكل البيت بفلتر معين

    بعد ما نتفق على كل التفاصيل وتفاصيل التركيب وتفاصيل البنيان الإنشائي بحيث يبني المقاول الهيكل الخرساني قبل وبعدين يركب الطابوق وهذا له تفاصيل كثيرة المفروض يوضحها الاستشاري بمخططات هندسية ومواصفات واضحة مكتوبة كل شيء يكون سهل

    لو بتخلي شراء الأطقم الصحية والسيراميك عليك حدد مواصفات اللاصق بالاسم ونوعية القراوت حتى ممكن بالاسم واللون وخل بند السيراميك على المقاول يكون استلامه وفحصه ونقله لو المورد ما عنده نقل والمحافظة عليه وتركيبه حسب التفاصيل .. انت عليك بس تشتري وكمية متفق عليها ونسبة هالك متفق عليها أي شيء ينقص المقاول يتكلف به

    مثال الجبس لو عارف شتبغي ومحدد بالضبط سهل المقاول يسويه أو يشرف عليه ويسعر لك بسعر منافس ويلغي لك البلاستر فوق الجبس بيكون مخفي وما تشوفه .. تبغي طبقة وحدة بدون كورنيش ( مودرن ) وبفرزة في الأطراف وبتوزيع انارة عدة مستويات هذا ممكن .. تبي الفرزة كبيرة وفيها انارة مخفية وانارة سبوتات وثرية بعد ممكن .. كلها تفاصيل لو حبيت تسوي الجبس بالكامل بنفسك ممكن بس تذكر شواجب المقاول الرئيسي في الموقع من حماية معدات راعي الجبس والتنسيق معاه في الإنارة أو التكييف لو تبغي دكت سبلت كل بند المفروض تكون عارف واجبك ومحدد واجب المقاول

  8. #8
    تميم المجد الصورة الرمزية بوخالد911
    رقم العضوية
    5855
    تاريخ التسجيل
    Jan 2006
    الدولة
    QTR
    المشاركات
    46,956
    هلا بكم

    مريت بذي التجربة قبل 4 سنوات

    أتفقت مع المقاول بس عظم وكان سعره 900 ريال
    ومساحة البناء عندي 860م
    بيتي كلفني 3.5 مليون ، عليه حجر من 3 جهات
    والتشطيب كملته مع شركة ثانية.
    التشطيب لازم تذكر تفاصيل التفاصيل بالعقد.
    مثال : باب الغرف ، تبيه باب سادة أو عليه نقوش وحفر وفوق مثل التاج ، المفصلات لازم تختار نوعية زينة والمقبض في منه أشكال وأنواع.

    صبغ الغرف : تبيه لون عادي جوتن أو شي أحلى وهو أكادورو إيطالي

    هالشغلات لازم تنكتب بالعقد أضمن لحقك.

    أطقم الحمامات : طب وتخير من المحلات ، أنا اخترت محل كافود . عنده تنوع في المعروضات تناسب كل الأذواق.


    نصيحة : لا تسترخص في البنيان عشان ما تتعب بالنهاية.
    التعديل الأخير تم بواسطة بوخالد911 ; 06-08-2020 الساعة 02:12 AM




    ead.php?t=284476"]اندونيسيا كما رأيت يوليو 2009 بقلم بوخالد911 وتصويره[/URL]
    [/COLOR]

    سفرتي الى سنغافورة + استراليا + بانكوك 2008


    سفرتي الى بانكوك مارس 2009

  9. #9
    عضو الصورة الرمزية Proxy-Qtr
    رقم العضوية
    56115
    تاريخ التسجيل
    May 2020
    المشاركات
    8
    اقتباس المشاركة الأصلية كتبت بواسطة ALJokar مشاهدة المشاركة
    كذا او كذا يعتمد
    يعني لو فرضنا وقعت تشطيب له مميزات منها المقاول هو الي بجيب لك كل حاجة مع المسؤوليه التامة عنه من شحنه وسعره وتخزينه لو حصل ماحصل هو المسؤول عنه.
    وغير هذا التنسيق مع الشغلات الثانية مسؤوليته بخصوص عدة أشياء كهرباء سباكة عزل صبغ تبليط.
    يعني مايلعوزك راعي الكهرباء يقول خل راعي السبك يخلص الاول مثلا او تصير انت حلقة وصل مابين هذولاو راح تضيع بينهم ولو صار اي شي غلط تعال حل الموضوع.
    انا ما اخوفك لكن هذي لها عيوب ومميزات.
    وقع معه عقدين عقد تشطيب وعقد عظم اشوف الأفضل هذا بشرط انك شفت شغله الاثنين طبعا ف كذا فيلا العظم والتشطيب بعدها وقع العقدين اذا خلص العظم وانت مرتاح معاه كمل معاه العقد الثاني وهنا تذكره ف العقد الاول العظم هذي الجزئية.
    الززين ف بناء العظم ممكن تشطب ع راحتك لكن مافيه راحها فيه والاهم انه تكون شاملة العزل والسباكة والكهرباء عقد العظم.
    اي واحد يبني راح يتلعوز شوي خصوصا الي مايعرف شي ف البناء نهائيا ولا بعد بناء ملحق او غرفة.
    فأنت اذا راح ادور اسال عن الشركات الي شغلهم ممتاز للعلم والي اعرفه مافيه شركة شغلهم وتشطيبهم ممتاز كل شركة تتميز بحاجة ماتجيك الشركات كلها 5 ستار كل وحده يميزها شي وبالتووفيق ان شاء الله

    يامرحبا يا اخوي ALJokar

    انا خبرتي في البناء Zero ههههههههههههه والله يكون في العون

    تسلم على النصائح ماقصرت جزاك الله كل خير

  10. #10
    عضو الصورة الرمزية Proxy-Qtr
    رقم العضوية
    56115
    تاريخ التسجيل
    May 2020
    المشاركات
    8
    اقتباس المشاركة الأصلية كتبت بواسطة ابراهيم 2012 مشاهدة المشاركة
    السعر بالنسبه للعظم مع بلاستر المتر يتراوح بالسوق من 900 الي 1000 لو عندك بسمنت ومصعد السعر يتراوح من 1000 الي 1200 ريال. مع بلاستر من خبره انت شطب افضلك الناس ازواق واكيد مهما سلمت الشركه تشطيب ماتوصل لنفس الي انت تبغيه والله يوفقك
    هلا أخوي ابراهيم 2012

    نعم صحيح هذا الي حصل معاي سعر العظم بلاستر احسبوه لي على 950 ريال للمتر ولان عندي مصعد زاد السعر شوي بسبب الخرسانه الخاصه بالمصعد

    تسلم على النصيحه

صفحة 1 من 4 123 ... الأخيرةالأخيرة

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •