وإياكم اخواني جميع
إحنا نكمل بعض وكثير من الإخوان معلوماتهم وخبراتهم كبيرة بدون ما اعدد .. حتى اللي يتكرم ويسأل أو يوضح بصورة مشكلة صارت معاه هذا يخلي غيره يحتاط وينشر المعرفة
هذا القسم ما شاء الله كتاب متكامل في العمارة كل يوم الكل يشارك في تأليفه وفي الإضافة عليه .. يمكن وصلنا 1000 صفحة بدون ما ندري
صباح النور إخوي بو جاسم
الله يوفقك شغلك صح وما عليك بعض الناس مصدقين المقاولين اللي يبون راحتهم .. بس انتبه وقت بناء الطابوق له اجراءات لازم يتبعها المقاول مثل تشريك الطابوق نص طابوقة كل صف متداخل .. وشبك الحديد كل صفين طابوق نركب في الثالث والروابط الحديدية بين أي عنصر خرساني ( عمود أو جسر أو سقف ) وصف الطابوق .. ويمكن تحتاج جسر رابط ويستحسن هذا تسويه فوق عتبات النوافذ لو النوافذ عندك بارتفاع 2.6 أو 2.4 بدون مبالغات في الإرتفاع وسقف الغرفة مرتفع زين يجي الجسر الوسطي مع جسر أعلى النوافذ .. وإحتياط لو حاب تقوية مضمونة وضد نشوء أي شلخ ركب حديد رأسي في التجويف كل متر قطعة مع خرسانة في التجويف .. مهم التشريك بزوايا وشبك زاوية بعد وبمسدس خرساني ومسامير خرسانية ما تصدي
السلام عليكم ورحمة الله وبركاته
ياجماعة الخير بغيت استفسر اذا حد اشتغل او عنده معلومة عن شركة مقاولات اسمها فافكوتيك صاحبها قطري وعطوني سعر بناء عظم مغري جدا وضمان سنتين على البنيان والمهندسين والعماله كلهم هنود
تقريبا عطوني سعر العظم 880 ريال
رتب مواصفاتك عدل حتى للبنيان العظم مواصفات وتفاصيل وحط استشاري مشرف جيد وتابع معاه التنفيذ .. لو صادقين وقت التوقيع بيبين وشوف موضوع العقود لو حاب تطبق ضمان الصيانة أو حساب الكميات المنجزة والمفروض المقاول يحدد لك الكميات وسعر كل كمية ومنها سعر كل مرحلة .. هشكل عقدك بيكون واضح ومريح لك وله
مرحبا اخوي معماري طال عمرك عطوني العقود كلها مفصله وقريتها وعطيتها الاستشاري وقالي كل البنود واضحه وتمام والبنود اللي تحفظ حقوقك واضحه وجدول الدفعات واضح وفيه شرح لمرحلة كل دفعه وكل هالامور تمام بس السعر مخوفني وحتى بصراحه الاستشاري قالي السعر يخوف بس انا حبيت استفسر اذا حد يعرف هالشركه حق الاخ محمد احمد العلي رجل ونعم فيه واجهته مره بس ابي اعرف اذا في حد يعرف معلومات عن شغل الشركة
الله يوفقك ما عندي فكرة عنها مع إني أعرف غالبية العلي إذا العلي المعاضيد عيال عمي .. بس مستغرب المفروض بنود العقد يحددها الاستشاري والمقاول يحاول يحط بدائل لو عنده أو يوافق على كل الموجود والسبب إنك تعرف التسعير عدل وتقدر تقارن
الأسعار وايد رخصت والشركات تبي شغل تنزل سعرها غصب .. السعر ما يخوف بالعكس معقول .. أحسن شيء تشوف شغل ألحين الشركة تسويه ولو تكلم شخص سووا له بنيان وخلصوا بيكون أحسن هو بيعطيك الراي الأكيد