استفسار بخصوص البناء عظم بلاستر ام تسليم مفتاح !

[بوجاسم_قطر]

السلام عليكم

انا ياخوي كنت محتار مثلك، بس رحت عظم بلاستر تاسيس اولي حق الكهرباء والماي. والحمدالله اني سويت جذي لاني ابي اشطب على راحتي، اي عامل لو ماعجبني شغله راح اعطيه حقه بالمتر واشوف غيره بس لو مقاول وعقد راح ادبس معاه.

اما بخصوص التوفير اكيد المفتاح يكون اغلى لانه المقاول يحسب عليك رسوم تشتغيلية وادارية..الخ

نصيحتي لك مب كل مقاول شاطر عظم زين تشطيب والعكس صحيح.
وقع معاه عقد عظم واذا اعجبك وقع معاه عقد تشطيب.
في عقد التشطيب لازم تذكر كل شي بالتفاصيل نفس ماقالوا الشباب عشان تضمن حقك.
نصحية اخيرة انا اول مرة ابني بس البنيان مب علم صعب، لازم تشوف وتقرا وتثقف نفسك.. الله يسهل امورك..

[Proxy-Qtr]

,

,


مرحبا


موفق يارب



اسمع كلام اخوي azizuk

حتى نحط النقاط على الحروف

السعر طبيعي وليس غالي 1000 ريال للمتر هذا سعر ممتاز

وسعر التشطيب 1600 رخيص هذا تلاقي سعر البلاط 30 ريال وتشطيب 1800 اذا مواصفات زينه سعر الارضيات 60 ريال

والشركات المعروفه تعطي 2000 ريال اذا المواصفات ممتازه لاهل قطر
في فخامه بالمواصفات سعر الارضيات يوصل الى 100 ريال

السعرمرتتبط بالمواصفات

المشكله عندك ( كبرت المساحه ) اكثر من اللازم


مسئله انك تبني عظم وتوفر ( 100 الف ) هذا ما بيحل المشكله

اذا قيمه التشطيب الي حصلتها مليون و900 وعندك الأثاث بيكلفك بحدود ال 500 الف

والجبس والاضاءه والثريات والديكورات الداخليه بتكلفك اقل شي 200 الف

لازم تعمل حسابك ان خلال ( سنتين ) يكون المبلغ مكتمل عندك

واذا ناقصه كثير

النصيحه انك ( تعدل الخريطه ) وتصغر المساحات ما تتجاوز ال 700 متر الى 800 متر بالكثير

حسب امكانياتك

والنصيحه الاخيره

( اعمل عرض سعر تشطيب ) مع الكهرباء والبيب فيتر والعوازل
خل السيراميك والرخام وبلاط الحمامات والقطع عليك

كذا بترتاح شوي من ( عوار الراس التعامل المباشر مع العمال )
وما راح تقدر تحصل تشطيب جيد اذا انت جبت العمال من نفسك

ما بتقدر تراقبهم لهم أساليب ما يعرفها الا المقاول والاستشاري

عادي ( يلعبون فيك ) ونت تجيب لهم غداء وريوق

وهم يغشونك بالتركيبات السيئه شغل سرعه
وما راح تكتشف الأخطاء الا لما تسكن

بتصير ( تلعنهم )


خل التشطيب على المقاول افضل لبيتك واريح لك


الي يقولك بتوفر بالعظم

ما جرب البنيان او التشطيب


بالتوفيق لك يارب



,

,

يامرحبا ياخوي شموخ دائم

صحيح المساحه عندي كبيرة ولكن للاسف صعب جدا اغير في الخريطة وكل المساحات ضرورية واحتاجها

ابشر باذن الله بناخذ بنصايحكم انت والاخ azizuk وجميع الاخوان في هذا المنتدى الطيب

ماقصرت ياخوي تسلم

[Proxy-Qtr]

مساء الخير على الجميع

يا هلا ومرحبا بإخونا الخفي Proxy-Qtr انا والله ما اذكر اني ساعدتك ولا اذكرك من وشكلك جديد ويمكن من الإخوان اللي تواصلوا معاي على الايميل أو الوتس اب والله يوفقك

كلام الإخوان عزيز يو كي مجرب حديث والله يعينه دخل معمعة انا ما انصح بها ودوم نصيحتي خله شغل كامل وإخوي شموخ دائم يتراوى لي يبني دوم وأعرف مني في هالمشاكل .. المواد اللي فيها اختيار وتخصصية مثل بند اليو بي في سي خله عليك ووضح حدود المقاول في الشغل اللي تبيه للدرايش والأبواب اللي من نفس المادة .. وضح مسؤوليته في إدارة الموقع وحمايته وتجهيز الفتحات صح بالطبقات اللي تبيها .. يمكن تبي الحواف لفتحة الدريشة بحجر والا بلاستر عادي وزوايا ستانلس ستيل مخفية والا بارزة .. يمكن تبغي برا رخام وداخل خشب .. يمكن تبي للأبواب عتبة عازلة يسكر الباب معاها رخام ويمكن تبيها من نفس اليو بي في سي وهم يستخدمون بعضهم قطعة ألمنيوم .. شغل المقاول بالعتبة للأبواب الداخلية أشوفه ضروري بس بعد بيسوي عندك حكرة الهواء ما يدخل من تحت الباب وشفاط دورات المياه ما بيشتغل صح وممكن يخترب

كلها تفاصيل تنفيذ تدخل المفروض مع التصميم حتى ما يكون فيه اختلاف أو خلاف وحتى تكون مرتاح في بيتك .. الأمريكان والأُوروبين مسئلة البيت يكون غير منفذ للهواء عندهم ضرورة قصوى بس يدخلون نسبة من الهواء النقي مفلترة لكل الغرف وهذي ممكنة عن طريق بايبات أو نعتمد الفراغات البسيطة تحت الأبواب ونلغي الاغلاق التام .. بس في حالة بيوتنا الباب الخارجي والدرايش ألحين تكون يو بي في سي .. بعد مب غلط نسوي فتحة معينة لدخول هواء خارجي يجدد الهواء الداخلي لكل البيت بفلتر معين

بعد ما نتفق على كل التفاصيل وتفاصيل التركيب وتفاصيل البنيان الإنشائي بحيث يبني المقاول الهيكل الخرساني قبل وبعدين يركب الطابوق وهذا له تفاصيل كثيرة المفروض يوضحها الاستشاري بمخططات هندسية ومواصفات واضحة مكتوبة كل شيء يكون سهل

لو بتخلي شراء الأطقم الصحية والسيراميك عليك حدد مواصفات اللاصق بالاسم ونوعية القراوت حتى ممكن بالاسم واللون وخل بند السيراميك على المقاول يكون استلامه وفحصه ونقله لو المورد ما عنده نقل والمحافظة عليه وتركيبه حسب التفاصيل .. انت عليك بس تشتري وكمية متفق عليها ونسبة هالك متفق عليها أي شيء ينقص المقاول يتكلف به

مثال الجبس لو عارف شتبغي ومحدد بالضبط سهل المقاول يسويه أو يشرف عليه ويسعر لك بسعر منافس ويلغي لك البلاستر فوق الجبس بيكون مخفي وما تشوفه .. تبغي طبقة وحدة بدون كورنيش ( مودرن ) وبفرزة في الأطراف وبتوزيع انارة عدة مستويات هذا ممكن .. تبي الفرزة كبيرة وفيها انارة مخفية وانارة سبوتات وثرية بعد ممكن .. كلها تفاصيل لو حبيت تسوي الجبس بالكامل بنفسك ممكن بس تذكر شواجب المقاول الرئيسي في الموقع من حماية معدات راعي الجبس والتنسيق معاه في الإنارة أو التكييف لو تبغي دكت سبلت كل بند المفروض تكون عارف واجبك ومحدد واجب المقاول

يا مرحبا ياخوي الحبيب معماري قطر

نعم صحيح انا من الناس الي تواصل معاك على الايميل والواتسب وللامانه استفدت كثير منك ومن نصايحك لي

بخصوص موضوع البورسلان والسيراميك تواصلت مع اكثر من محل وعندهم نظام حلو مثلا لو تبي تشتري سيراميك للحمامات يكرم السامع المحل الي بتشتري منه يسوي لك تصميم على القياسات الي عندك في الخريطة ويحسب لك الكمية الي تحتاجها بالضبط واتكون دقيقه والتصميم فيه شرح لعملية قص السيراميك وهذا الشي يسهل على المقاول ومايسمح له ياخذ كمية اكبر

هذا النظام حصلته في محل في طريق سلوى اسمه سيراميك الخليج وفي محلات كثيرة تسوي نفس نظامه

والله يعين على باقي الامور الي تحتاج تفاصيل اكثر بحاول ادخل فيها مع الاستشاري على اساس اتكون واضحه وملزمة للمقاول

على العموم جزاك الله خير على النصائح وباذن الله ادونها عندي

شكرا لك ماقصرت

[معماري قطري]

الله يوفقك بس قصدت إنك تخلي عقدك واضح بعضهم ما يتحمل مسؤولية نقص البلاط والاستلام يبغي كل شيء في الموقع وبعدين يتشكى .. الا البلاط متقوس أو متكسر بعضه أو ناقص تعال دبر لي كمية .. يركب قطع صحية غلط ويكسرها ويقول لك كانت مكسورة .. خل العملية يديرها الاستشاري المشرف وبتوقيعات وأوامر كتابية توصلك منها نسخ على الوتس أب أسهل لك من وجع الراس

مب مستعيل وتبي تبني براحتك تقدر تسوي نظام المرحلتين بنيان عظم وتوقف وتكمل مع مقاول ثاني يشيل كل التشطيبات بس النتيجة في الغالب وحدة والتكلفة لو ما انضبطت بمواصفات معقولة للمواد وتركيبها لازم بتطلع غالية .. كثيرين بنوا عظم وشطبوا بروحهم وحسبوها صح وطلعت تكلفة 800 متر مربع تتعدى 3 مليون وناس بنوا عن طريق مقاول وبعد مقاول قوي بدون مشاكل والتكلفة محدودة لبنيان حول الالف متر مربع بحدود مليونين

شركات التشطيبات المختصة غالية ويبالغون وايد وشغل المقاول حتى لو عادي في التشطيب يقدر يسوي أي شغل مختص بحدود معقولة .. مثال مقاول بناء عادي ما يقدر ياخذ معاك شغل أبواب الا عن طريق منجرة وشغل يو بي في سي الا عن طريق شركة يو بي في سي وشغل درابزين الا عن طريق مختص فيه وحتى شغل رخام .. والمقاول لو حب يسوي هذي الشغلات كلها سهلة عليه لو كان قوي وعندنا مقاولين قطريين عندهم الردي مكس وعندهم المنجرة تابعة لهم واليو بي في سي وكل شيء .. وفيه مقاولين يحصلون مواصفات أعلى وسعر أرخص .. مهم المقاول عنده ادارة وعلاقات وخبرة .. وعن تجربة وشرحتها بالكامل في موضوع العقود وحطيت صور لعقدي بالأرقام حصلت أسعار من مليون و110 آلاف ل 3 ملايين ولحسن الحظ الأقل كان لشركة سوبر قوية في السوق والأعلى لبعض شركات زملاء لي في السوق إحداها إكتشفت لاحقاً إن الفورمن يلقط عمالة سايبة ويسوي شغل .. الأقل كانت شركة مقرها مليان اداريين ووقت الصب يجي جيش من العمال لبيتي وشغل يخليني مبتسم دوم .. الشركة هذي لين دخلت مكتب مديرهم الشيبة وشفت كم جهاز مراقبة ومتابعة عنده للعمل داخل الشركة ونظام سكرتاريا وقاعة اجتماعات ارتحت لهم وفوق هذا سعروا حساب الكميات كامل بثقة .. شركات ثانية قالوا وشو هذا اللي جايبه احنا تسعيرنا مختصر رؤوس أقلام تبي زين ما تبي دور غيرنا .. قعدت سنة في معمعة اتخاذ القرار بس أخيراً توفقت

بعدين جات مشاريع سريعة وأصحابها من أهلي القريبين كالوالد رحمه الله واخوي رحمه الله كذلك ووالدتي الله يحفظها لوالدتي مشروعين مشروع بطريقة المناقصة وبنته شركة تابعة لهندسة البناء القطرية وبضمان هندسة البناء القطرية والحمد لله من 1998 للآن والمبنى دخل تكلفته ويمكن ضعفها .. ثاني مشروع العملية تمت سرعة وكان اختيار مباشر بناءً على الخبرات السابقة وكلهم التكلفة ما زادت الا الثاني شوي بسبب اشتراطات الدفاع المدني .. المشروعين الأول خذ حول سنة والميزانية ما زادت درهم وتسليم مفتاح وكلف المتر شوي أقل من الالف ريال عقد المصعد كان غير ويعتبر تكلفة اضافية مستقلة .. الثاني زاد شوي بسبب تلاعب الاستشاري في البداية بطلبه أساسات قوية رافت فاونديشن وكان التسعير على خرائط غير لأساسات أقل + متطلبات الدفاع المدني والمشكلة كلها من الاستشاري العلة اللي معينه إخوي رحمة الله عليه .. بس الزيادة ما تعدت 10% والحمد لله التأخير كان بسيط وبعد مشى الحال

البيوت للوالد بيتين اثنينهم بمساحة كل واحد 970 متر وبأرضيات رخام وشغل قرميد ومساحة حوش فوق 2000 متر شغل تبليط مع خرسانة تدعيم وصار البنيان بحدود 2.2 مليون للبيت الواحد سنة 2007 تقريباً وكانت الأسعار وقتها غالية بعد والمقاول معروف وقوي ومقره في السد مكاتب وادارة مب مكتبه سيارته ووعوده كلام يقوله اليوم وينساه بكرة

[معماري قطري]

دوم يا اخوان المناقصة والمحددات اللي نحطها والأشياء اللي نشيلها نخليها علينا لازم نكون عارفين خطتنا كم بتكلفنا وعلى شكثر من الوقت نقدر نمول بنياننا .. الحراسة ضرورية وحماية الموقع ولو تركتها بدون تنظيم بتضطر تجيب ناطور وفي الغالب من العمالة السائبة ( مب قانوني ولا تابع لمقاول ) حتى في حالة السرقة ما تقدر تطالبه بشيء العقد بينك وبينه كلامي وممكن ما تحصله وقت السرقة .. لذلك الحارس تابع للمقاول الرئيسي ويوفره طول فترة البناء شيء ضروري .. وفي حال مطالبات معروف من المسؤول ضمنياً عن الموقع المقاول ولو المقاول متقيول ومتطفل على الشغلة ما بتهمه سمعته ولا أغراض شاريها بفلوس المالك وعادي يقول للمالك نوقف الشغل ونتجه للمحاكم .. لكن مقاول موجود في السوق وله سمعة ومشاريع متعددة ما يبي شوشرة ويصلح أي خلل صار بسرعة وحسب الأُصول

[doha_vip]

السلام عليكم

وقبل كل شي

حاول تدور مقاول ممتاز بترتاح 80% من تعب البنيان ( لو تبعد عن الجنسيات العربيه بيكون افضل لك)

وشوف مشاريعه قبل البلاستر (طابوق فقط) وركز على الجسور والخرسانات

ونوع الحديد اللي بيستخدمه معزول او عادي

ولو تبني عظم بلاستر مع تمديدات الكهرباء والماء والصرف الصحي .. والتشطيب انت تجيب المواد وهو يركبها بعد بيكون ممتاز

والله يوفقك

[معماري قطري]

السلام عليكم

وقبل كل شي

حاول تدور مقاول ممتاز بترتاح 80% من تعب البنيان ( لو تبعد عن الجنسيات العربيه بيكون افضل لك)

وشوف مشاريعه قبل البلاستر (طابوق فقط) وركز على الجسور والخرسانات

ونوع الحديد اللي بيستخدمه معزول او عادي

ولو تبني عظم بلاستر مع تمديدات الكهرباء والماء والصرف الصحي .. والتشطيب انت تجيب المواد وهو يركبها بعد بيكون ممتاز

والله يوفقك

إذا بتترك الحرية والخيار للمقاول في اختيار الحديد أكيد بيفضل العادي .. شوي أرخص سمعت 5% ثاني شيء الاشتغال به سهل ولا يتجرح ويحتاج صبغ

[doha_vip]

إذا بتترك الحرية والخيار للمقاول في اختيار الحديد أكيد بيفضل العادي .. شوي أرخص سمعت 5% ثاني شيء الاشتغال به سهل ولا يتجرح ويحتاج صبغ

صحيح بوعبدالله المقاولين يسترخصون في الحديد مع ان الفرق قليل .. وماعطين الناس فكرة ان الحديد المعزول مايمسك مع الصابيه

وللأسف بعضهم تشوف الحديد العادي اللي يستخدمه مصدي قبل صب الخرسانات والجسور

[معماري قطري]

صحيح بوعبدالله المقاولين يسترخصون في الحديد مع ان الفرق قليل .. وماعطين الناس فكرة ان الحديد المعزول مايمسك مع الصابيه

وللأسف بعضهم تشوف الحديد العادي اللي يستخدمه مصدي قبل صب الخرسانات والجسور

يدور الأسهل له شغل متعود عليه .. بعدين الحديد العادي يجيبونه في شاحنة ويسحبونه سحب بدون أي اهتمام المغلف لازم شيل بفورك لفت أو كرين وربط بعناية .. وانت تشترط في العقد وتحط مشرف يعرف حيثيات التعامل ولازم مقاولك فاهم ومجرب يركب ويشتغل بالحديد المغلف وشغله ثرى سهل بس شوي متعب

[معماري قطري]

انا استشاريكم هنيه أقول كل شيء بحيادية ووضوح بعض الاستشاريين تابعين للمقاول أو على قد حالهم ما يعرفون شالفرق .. بعض المقاولين يقول لك باسوي الطريقة الشعبية في البناء باصف الطابوق وبعدين ابني الأعمدة ويجملون لك الطريقة لأنها في صالحهم وما تتعبهم لكن البناء كفريم خرساني أفضل وبعدين الحشو بالطابوق بين الأعمدة وهذي المعتمدة في المواصفات القطرية .. بنيانك يتماشى مع التصميم الهيكل مصمم هو يشيل الحمل والطابوق قواطع ليش انا احمل الطابوق أوزان وضغوط الخرسانة وهي تكبر شوي بعد الصب وتضغط وتستوي عندي شلوخ حتى لو مخفية ما تبين الا بعدين

هذي النقطة استشاريين النص كم يحاولون يسهلونها للمالك ويطبقها المقاول أي تعشيش حتى ما يبين والطابوق يمتص رطوبة الخرسانة وينشفها .. أوقات اللي مثلي لو بيسترسل بيطلع أسباب كثيرة