للإنسان الطبيعي جسمه ينتج أنسولين حسب الحاجة وحاجة الجسم للأنسولين للسكريات أولاً بأنواعها وبعدين للنشويات وبعد بأنواعها فكل ما تاكل هذي المواد تتخزن عندك الشحوم وهذا بإختصار شرح الفيديو الأخير وانا عارفه من بدايات اصابتي بالسكر .. هالأيام كم مرة سويتها أنام متعشي روب وحبة فاكهة خفيفة وبدون ابرة بس حتى اوازن السكر وما ينزل وانا نايم واصحى سكري معتدل وحتى حاس بشبع وشبعان نوم بس ياليت أواصل على هالنمط .. أأخر الغداء وأقلل النشويات وأكثر السلطة وما اتعشى
صراحة الحياة بدون حلويات و مشروبات غازية و شوكلاته و ايس كريم و مناسف و فاست فود و كل الاكل غير الصحي صعبه جدا و قاسية
يا اخوي الدكتور يقولي حتى في كثير انواع فواكه فيها سكر و لا قادر اقرب منها مثل العنب و المانجا .... بس اكل تفاح اخضر و برتقال و جريب فروت ... الحمد لله على كل حال
الله يعطيكم الصحة والعافية جميعاََ، ثالث الثلاثة (الاكل الصحي والرياضة).. هو الصحة النفسية، لازم تكون متفائل ونفسيتك حلوة وتتقبل المواقف المختلفة وتحاول تجد الدعابة او تصنعها ولا عليك من اللي يتكلم لك عن الثقل والرزانة اللي اذا جت حزتها ما تجدها الا في اللي مطبوع عليها، اكيد عرفتم قصدي وهو التظاهر بالرزانة والثقل وتشوف الواحد شاد ويهة كنه اللي انهى الحرب العالمية.
تبي وجهة نظري يا اخوي لتعقد الأمور على نفسك خذ دواء مناسب واكل أكلات تنفعك .. صحيح العنب كله جلوكوز والمانجا حسب النوع بس بعد كلها فواكه صحية وتاكل منها بإعتدال
من ملاحظاتي صج التفاح الأخضر شوي حاد وفيه حموضة بس يرفع السكر أكثر من الأحمر .. الأحمر وايد أخف منه .. فيه معلومات كثير مغلوطة عند الأطباء وبعض خبراء التغذية .. خبيرة تغذية في مستشفى حمد تقول كل جح ( الأحمر اللي تسمونه بطيخ ) وبكمية معتبرة عادي واليوم وازنت بين جح وسلطة بكمية كبيرة مع خل التفاح بحدود ملعقة تقريباً أقل يمكن شوي .. ونص صحن عيش أبيض مع صالونة كرات لحم مفروم .. نمت شوي والا السكر طايح لين 52 طبعاً خذت 18 وحدة أنسولين وحبة جوناميت
من أيام شفت فيديو حق وحدة تحذر من الجح لمرضى السكر وإن ما فيه ألياف وكمية سكر عالية .. هذيلا بعضهم هواة ولا عندهم سالفة ولا أمانة علمية والواقع غير كلش والواقع ما تشوفه من خلال التجربة والفحص المستمر ومن خلال الناس الثقاة
العصير الخالي من الألياف صج يرفع السكر بعضه كثير خصوصاً البرتقال .. لكن البرتقال بشوائبه صحي للغاية وبدون اضافة سكر أكيد
والله يا اخوي بودي اكل تفاح احمر و الا اصفر..... بس راح اسأل في هذا الموضوع
اعتقد افضل طريقه الواحد يسويها هي انه يسوي التجارب على نفسه .... يعني الواحد يجرب كل مرة نوع و يقيس السكر بعد ساعتين و يشوف زاد و الا ما تأثر.... لانه ما هو مناسب لك غير مناسب لغيرك و العكس صحيح.... ايضا يجرب الاكل بالليل قبل النوم يرفع السكر و الا لا ...و طبعا يحرص انه الظروف تكون نفسها 100% علشان تكون نتائج التجارب دقيقة و ما فيها اي لبس
اللي على السوشيال ميديا لو ما كان طبيب او طبيبة او خبراء تغذية فعلا فلا اسمع له .... يعني مب كل واحد يطلع على التيك توك مثلا يقول معلومه سامعها او قاريها و يبي يستعرض علينا فيها انا امشي عليها على طول