سؤال قانوني

[عضو قديم]

السلام عليكم جميعا
قدر الله ان يصير حادث لابني شهر يناير والغلطان السيارة الاخرى وكان الحادث الساعه السابعه مساء
وكانت فيه اصابه بسيطه لابني والحمدلله على كل حال وتنازلنا عن الاصابه ولكن اتضح ان صاحب السيارة المتسببة بالحادث ماعنده تامين والتامين منتهي من سنة 2018 وقام كفيل السائق بعمل تامين بعد الحادث ب23دقيقة واقر السايق انه هو غلطان واحضرنا فواتير من ثلاث كراجات بقيمة التصليح والتي تقدر ب66الف ريال واخذ ولد الكفيل يماطل بدفع قيمة الاضرار بشكل ودي سواء عن طريق المرور او نيابة المرور لمدة عشرة شهور بصراحة انا عرضت على ولد الكفيل انه يعطيني 30 الف ونسكر الموضوع ومع ذلك اخذ يماطل

الى ان رفعت عليهم قضية بقيمة الاضرار المذكورة بالاضافه مايثبت تقرير الحادث و مستخرج من تامين المتسبب يفيد بقيامه بالتامين بنفس تاريخ الحادث الساعه ال7,23مساء و الحكم الجنائي على السائق الذي حكم عليه القاضية بالغرامة 3000ريال

سؤالي هو ماهو وضع ابني القانوني ؟
مع العلم اني بعت السيارة سكراب وهي لاندكروزر استاندر 2016
وشكرا لكم

[عضو قديم]

يوم الخميس الماضي اتصل فيني محامي قد وكله صاحب السيارة المتسبب بالحادث واخبرني بالحرف
انا المحامي فلان من مكتب فلان للمحاماة والذي يملكه والد القاضي نريد ان نحل الموضوع ودي على المبلغ 30 الف وقلت له ماعلاقة القاضي بالموضوع رد علي وقال انا حبيت اعرف عن نفسي فقط حسسني ان قضيتك خسرانه لان القاضي نعرفه وان قضيتك فاشله وقلت له ابي قيمة التعويض كاملة غير هذا الكلام ماعندي وان ال30 الف كان عرض مني لان مابي ادخل محاكم اخبرني ان بيتواصل مع الكفيل ويرد علي وطبعا مارد

[عضو قديم]

يوم الجمعه اول امس اتصل فيني محامي اخر يبي يحل الموضوع ودي ويعمل تسويه على 30 الف ريال وقلت له ولا ريال ابي فلوسي هذا حقي قال بكلم الكفيل وبرد عليك وطبعا مارد وعندي جلسه يوم الثلاثاء القادم وهي الجلسه الثالثه لان الجلستين السابقتين لم يحضر صاحب السيارة المتسببه بالحادث وتم الاعلان عن الجلسه بالعنوان والوطني

[ماجد البدر]

يوم الجمعه اول امس اتصل فيني محامي اخر يبي يحل الموضوع ودي ويعمل تسويه على 30 الف ريال وقلت له ولا ريال ابي فلوسي هذا حقي قال بكلم الكفيل وبرد عليك وطبعا مارد وعندي جلسه يوم الثلاثاء القادم وهي الجلسه الثالثه لان الجلستين السابقتين لم يحضر صاحب السيارة المتسببه بالحادث وتم الاعلان عن الجلسه بالعنوان والوطني

حمد الله على السلامه
اتوقع قضيتك رابحه ان شاء الله و الاتصالات عليك دليل انها رابحه و المحامين عارفين الوضع القانوني خاصة من ناحية انتهاء التامين و تجديدة لو اثب ذلك بيكون لصالحك
ويريدون تسوية الموضوع معك قبل لا يحكم القاضي لصالحك بالتعويض الكامل و اعتقد بالحق العام

مشكلة المحكمة انها تطول وعليك تتحمل وتتابع او تضع محامي يتابع كل تفاصيل الي صار معاك

[sara jsm]

الحمدلله على سلامة الولد ...
والله يعوضكم خير ان شاءالله ..

[معماري قطري]

الحمد لله على سلامة ولدك والله يعينك على القضاء عندنا ألحين

صار لي حادث من زمان 1982 وكان معاي اخوي الله يغفر له توفى من وقت قريب بسبب آخر بس وقت الحادث صار في راسه تجمع دموي ومستشفياتنا علاجهم من فوق لفوق وما عليهم من الداخل .. طلعنا علاج غصب على الأطباء والمستشفى ورحنا لندن وعالجنا .. إخوي سووا له عملية في المخ مستعجلة خذت 8 ساعات وتشافى بصعوبة وانا علاج طبيعي للظهر 3 شهور وقبل علاج لجروح في كل جسمي وكان السكر في بدايته مشرف وعلاج الجروح بروحه خذ وقت وللحين تبين آثارها حتى تحت العين اليسار شق خيطوه بس يبين مكانه

اللي دعمنا شيبه إماراتي وطلعوه من يومه الوالد الله يغفر له وعمامي ما رضوا يقعد في السجن واحنا 3 أيام في العناية المركزة لين صحينا .. بعد ما رجعنا من العلاج طالبت كفيله القطري وكان واحد من هله يعطيني حقي تعويض السيارة اللي تكنسلت وماطل ورفعت قضية وجاني يركض .. مع خالي الله يغفر له وعمي خالي شيبة وكان بمثابة جدي وقلت له اللي تامر به قال الرجال بيعوضك 30000 عن السيارة وكانت قيمتها جديدة 34000 قلت خلاص موافق .. كنت 18 ولا افهم حقوقي كاملة ومنحرج من الكبار ومقدرهم مع إن خالي قال لي لا تسوي شيء الا مقتنع به وراضي

القاضي كان اسمه صبري مصري بس قوي ولابس قطري دخلت عنده مع كفيل الاماراتي وقلت له ابي اسحب القضية وخلاص تصالحنا .. عصب علي وقال انت لك حقوق ولإخوك تعويض جسماني + تعويض السيارة + الحق العام وعصب علي وقال لي انجلع انا اخبر قاضي محد يقدر يقول له شيء ويمثل الحاكم بس انجلع كلمة كبيرة ومعاي كفيل الاماراتي شيبة معروف من شياب قطر الله يرحمه .. قلت له سويت اللي علي والقاضي رفض .. المحكمة صارت بسرعة ما طولت والقاضي حكم ب 30000 تعويض للسيارة و 4000 أضرار جسمانية لي .. ونص دية حق اخوي وكانت وقتها الدية 60000 ريال

وقتها غير حقك يطلع يطلع وما يطول .. ألحين شغل فهلوة وقبل مصريين وألحين مصريين في الغالب بس ألحين فيه فساد كبير وطريق القضاء صعب وطويل .. إذا إجراءات تحويل قضية من المركز تاخذ شهور وللتحويل تتدخل النيابة وتمنع التحويل وذكرت قبل سالفتي وسالفة طويلة

[Abdulraman]

الحمدلله على سلامة الولد
الحق مع ولد وخلك معاهم بتاخذ حقك
موفق ان شاءالله

[توشيبا]

الحمدالله على سلامه ولدك والله يحفظه لكم

اذا ولدك اموره طيبه عنده ليسن واستاره السياره مب منتهيه لا تخاف كل الحق معكم ان شاء الله

[shadad]

استغرب من الناس اللي تتنازل عن حقوقها بالشكل ذي؟
اخوي معوض خير. والحق وياك 100% . لا تتنازل عن حقوقك بالكامل. هو لو كان مهتم ما ساق بدون تأمين ... ولا ماطلك ويجازك خير انك وافقت على التسويه وبعد ما بين فيه. اجلد وخذ حقك.

[سالم الزهران]

الله يكفينا واياكم شر الحوادث.. والف سلامة لولدكم.

الحين انت ما بيدك شيء، رجل تضررت وخسرت سيارتك و كان عندك مبادرة انتهت صلاحيتها ولا لأحد عليك أي كلام.

لكن فيه أمور تخص تقييم سيارتك.. يعني أنت مقيمها بالطريقة النظامية ومعك أوراق من المرور ومن الجهات اللي تقيم؟ لأن هذه النقطة هي الوحيدة اللي باقي يشتغلون عليها (إذا ما أخذنا في الاعتبار أنك بعت السيارة سكراب) ربما و ربما! هل سيارة طرف في قضية تتحول سكراب الا وهي منتهية نظاماََ وأوراق الحادث وتقديرات الضرر مكتملة.

مثل ما قالوا الربع.. انت في حقك شيخ وحر التصرف.. لكن توقع إن الطرف الأول في الحادث طالما قد بادرت معه مهب تارك المحاولات.. وجعلها آخر الحوادث