السلام عليكم،
محتاج إستشارة أهل الخبرة في هذه التشققات، هل هي خطيرة وكيف يتم إصلاحها، أي مقاول صيانة تنصحوني به؟
|
السلام عليكم،
محتاج إستشارة أهل الخبرة في هذه التشققات، هل هي خطيرة وكيف يتم إصلاحها، أي مقاول صيانة تنصحوني به؟
عليكم السلام ورحمة الله وبركاته
هذي حلها سهل حتى من عمال عاديين بس ممكن ترجع المشكلة مرة ثانية وسببها الحديد عادي من توصله الرطوبة يصدي ويستوي له ما يسمى إدماء مثل سيلان الدم من الجرح ومعاه يكسر الخرسانة وينتفخ الحديد .. في بدايات حياتي العملية واجهتني نفس المشكلة في بيت الوالد القديم الله يغفر لوالدي ووالديكم .. من حول 20 - 25 سنة وكان التأثر أكبر بكثير عمال بسيطين كسروا الخرسانة وعروا الحديد وسووا له تنظيف من الصدأ ورجعوا صبوا بلاستر قوي معاه مواد .. ألحين المشكلة راجعة والسبب الزراعة قرب الجدار والماي تتشرب منه الخرسانة ويزيد الصدأ
هذا الحل الترقيعي السهل واللي تكلفته يمكن بحدود المئات القليلة وألحين تطورت المواد وفيه مواد قوية .. كذلك ممكن تسوي تعرية وتكسير لعمق أكبر وتصب خرسانة مع خلطة مواد مقوية وهذي موجودة عند مابي اللي ملاصق للدي اتش ال في شارع سلوى وعند سيكا وعند المناعي .. وتوجد خلطة الإسمنت البلورية في بعض شركات الردي مكس بس كميتك احتمال قليلة ما يوردون لك
ضروري تعيد التبليط تسوي سلوب بعيد عن الحائط حتى ما يتجمع الماي قربه وتحفر شوي تعزل تحت وتصلح تحت .. الجزء الظاهر هذا راس المشكلة وجذورها تحت وسو حفرة تجريبية
الصيانة صعب تحديد سعرها من البداية لذلك لازم تتفق مع فورمان أمين يسوي الشغل حسب الموجود وتعطيه حقه أثناء العمل وجزء جدار مبني ملاصق للجسور الارضية ورقاب العمدان بعد اتمام التنظيف وعزل الحديد بمادة عازلة للرطوبة ممكن يكون حماية إضافية والشغل لو تم صح بيبقى بدون مشاكل لفترة طويلة 30 سنة وزود
تبغي رقم فورمان باكستاني شاطر عندي مع إني محتاجه بكرة
المشاركة الأصلية كتبت بواسطة معماري قطري
اشكرك اخوي معماري قطر، تشخيصك وطريقة العلاج ما شاءالله جات 100% مع تقرير مقاول صيانة، المقاول عطاني عرض سعر ب 13000 ريال تقريبا، يشمل دار ما دار البيت واجهة البيت و جانبين الفيلا حوالي 45 متر طولي، كلهم فيهم نفس المشكلة، تفاصيل الأعمال مرفقة، شرايك بعرضه؟
الفيلا صار لها عشر سنين تقريبا
سامحني يا اخوي على التأخير
تعرية الحديد والشغل سليم بس عليك بالمواد ومواصفاتها والضمان
تقدر لو حبيت تسوي طريقة مضارب بس مهم تشتري المواد بنفسك وتتابع العمال ولو تجيب فورمان زين .. شغل المقاول اتوقع يسويه من فوق بدون حفر وهنا بتكون مشكلة .. لازم تحدد معاه إن الحفر يكون لين الوصول لين نهاية الجسور الارضية وبداية الطابوق اللي تحت الجسور والعزل بعدين يكون بربرايزد بتومين غاطين أو ثلاثة وبعده بلاستيك سميك ويتم الدفان بدفان ناعم حتى ما يخدش البلاستيك
باقي الشغل صحيح والسعر معقول لا تستهون فيه بس توصيف العمل ضروري وتوصيف المواد
تسلم أخوي معماري قطري ما قصرت، إن شاء الله بخليه يسوي لي الشغل
التعديل الأخير تم بواسطة Breakaway ; 27-01-2021 الساعة 02:12 PM
الله يسلمك
شوف شلون الوضع عندك مقارب لذيه
بس انت تحت الارض في غالبه والضرر اللي تشوفه خارجي ما يبين شالمختفي الا بالتكسير شوي شوي وبعناية
واضح من الصور إن الخرسانة ضعيفة
سؤال .. كم دور البنيان وهل فيه شلوخ فوق وشكثر صار له مبني؟
لو جديد علمنا من المقاول الشرير ذيه حتى نحذر منه شغل واضح إنه رديء للغاية
للأسف فكرة البناء التجاري صارت مثل المرض الخبيث المنتشر في كثير من الفلل وكلها على بعضها لتوفير ما يقارب 80 الى 120 الف من سعر البناء ويجي المواطن يشتري بيت للاستثمار او للسكن ويحصل البناء تجاري)
في نفس الوقت التاجر اللي بنى الارض كان يقدر يبني صح ويبيع بسعر اعلى من سعر بيعه ب 80_120 الف ويكسب دعاء اللي يشتري منه
شبك حديد فوقه طبقة اسمنت خفيفه فوق شبك حديد ثاني ومن عقبها ينضرب كأنه بلاستر
وممكن تضرب من البدايه باسمنت مع كنكري طبقه(يصير كنه صبيه) وفوقه بلاستر
اهم شي لا شفت واحد جايب لك اسمنت ابيض او جبس وقالك تمام
كب الجبس فوق راسه
طبعا ببن طبقه وطبقه على الاقل 6 ساعات عشان يمسك
سويتها في بيت الوالد وتمام صار لها 6 سنين
والمنفذ كان عمال يوميه
حقين بلاستر قلت لهم بدل ال100 يوميتكم بعطيكم 200 ووجبة الغدا علي
في 3 ايام تم الانتهاء وخذوا ال1200 وهم فرحانين
التعديل الأخير تم بواسطة مضارب دوسري ; 26-01-2021 الساعة 10:01 PM
ضوابط المشاركة
رد مع اقتباس