الجدوى من ايميلات الشركات والجهات المهمه

[طلعة الروح]

مساكم وصبحكم ربي بكل خير

موضوع بسيط يتكرر والاحظه بشكل دائم

تدخل على موقع جهه حكوميه او شبه حكوميه او شركه خاصه

تبحث عن ايميلهم اللي عادة يبدأ بكلمة info

تقوم ترسل لهم ايميل بطلب او استفسار ؛ تلقى نفسك مريت بوحده او اكثر من هالحالات:

* يوصل لهم الايميل وتنتظر الرد ولا يجيك نهائي
* يوصل لهم الايميل ويجيك ايميل ع صندوق الوارد ان ايميلهم غلط او صندوق الرسايل عندهم فل
فما توصلهم الرساله.
* ممكن يردون عليك ب رد ماله علاقه بالسؤال اللي سألته تماما وترجع توضح لهم المطلوب ولا يجيك اي رد بعدها.

صار الاستثناء والنادر انك تلقى شركه موظفه ناس بروفشنال يفهمون السؤال ويعطونك الاجابه بكل شفافيه وعمليه.

ف نرجو من الشركات والجهات المهمه وغيرهم ان يأخذوا الموضوع على محمل الجد ويبتدون يطورون نفسهم في مجال التواصل مع العملاء واصحاب المصالح.

شاركونا مواقفكم او خبراتكم بهذا المجال وهل توافقون او تعارضون ماذكر.

ولكم مني أجمل تحيه،،

[sara jsm]

للاسف هالشي بس عندنا احنا لكن الدول الغربيه يحترمون كل ايميل يوصلهم ..
وتلقون في قسم كامل حق الردود على الايميلات او الانستغرام او تويتر ... الخ
هالاماكن تحس انهم يحترمونك مب نفس بعض الجهات عندنا ..

اذكر قبل عشر سنوات كنت مسافرة والمضيفه كان اسلوبها جاف وشبه تصارخ ..
قزيت اسمها وطرشت ايميل للشركة باسم الموظفه ورقم الرحلة وكل التفاصيل ..
وانصدمت في اقل من 3 ايام وصلني ايميل من مسؤول في شركة الطيران برد قلبي والله
هاي الفرق بينا وبينهم ..

[معماري قطري]

هذا عيب واضح يحتاج الى توجيه بقوة وقوانين تدعمه

سبق وتعاملت بالإيميل مرات عديدة مع جرايد وتم نشر مقالاتي ومع سمو الأمير الوالد ووصلتني ردود وكانت كلها مقترحات لبعض التطوير وبعضها لاقى استجابة والحمد لله .. مع مكتب رئيس مجلس الوزراء وحصلت استجابة سريعة بخصوص البيطري اللي فاتح قرب بيتي بس اللي حضر من البلدية ما سوى شيء وقال ما يسمع نباح تكرمون الكلاب .. إستمرت المشكلة حول ثلاث سنين وبضغوط وشكاوي كم مرة الحمد لله كتموا أصواتهم بس على خفيف جداً أوقات

أتوقع إيميل الداخلية يتم التعامل معاه وبعض الجهات الحكومية أما الشركات خليهم يعينون ناس فيهم خير والقطريين وايد خبراء في هذي الشغلة حتى من البيت ممكنة ومسؤولي العلاقات العامة المفروض هذي شغلتهم ويقدرون يتواصلون مع أي مدير ياخذون منه الإجابة

[طلعة الروح]

توني مرسله ايميل لشركة عقاريه قابضه جاني ايميل ان ايميل الشركه فل حاليآ.

بعض الجهات ماعندهم call center ولا twitter بحيث يكون التواصل معاهم فوري ومباشر

وحتى لو عندهم تلفون مكتب ماراح يردون عليك اربعه وعشرين ساعه

مع هذي المعطيات المذكوره راح نغض النظر لو هم فعلا مفعلين نظام الايميل المزعوم

والموجود على موقعهم الرسمي

وحده من الحلول انهم يضيفون ارقام طوارئ او طرق تواصل اخرى

لكن يتركون الشخص السائل بدون مايعرف يتصرف هذي مشكله

رحت مره زرت احد الاجهزه الكبرى في الدوله وكان الغرض اسوي معاهم مقابله
تخص رسالة الماستر ورفضوا يدخلوني وعطاني اللي ف الاستقبال بطاقة عمل لشخص
وحاولت اتواصل وابعث ايميلات لهم بطلبي وشفت انه مافي حد يرد ولا يتجاوب
وهذي جهه كبيره في الدوله ولها اسمها.

لدرجة اني حاولت*ادورلي
واسطه عشان حد يقابلني هناك والقى رد على اسئلتي

وانتهت رسالتي وماقابلت حد منهم

وقس على ذلك امور كثيره

كل جهه يجب ان تفعل نظامها اثناء التواصل مع الجمهور حتى لو تكون محايده في التفاعل والرد وتصعيد الطلبات
اذا كان الامر مب خاضع لصلاحياتهم.
لكن ترك الامور سبهلله واستهتار ، اعتقد ان الدوله ماحطت لهم مكاتب وتلفونات عشان يتجاهلون الطلبات.

[طلعة الروح]

اسئلة تطرح نفسها ويجب معالجتها من قبل الجهات:

- هل ايميل الشركه وسيلة تواصل معترف فيها من الاساس ام اجراء شكلي موجود على الموقع لذر التراب على العيون؟ بحيث تذهب الايميلات للمجهول ولا احد يدري عنها شيء لعدم وجود تفعيل للنظام؟

- اذا كان الايميل معترف فيه ومعمول فيه، هل هناك مسؤولين موجودين فعلا ووظيفتهم النظر والرد الفوري على الاسئلة التي ترد عليه ام لا؟

- هل هناك من يراقب الايميلات الوارده ويحاسب المسؤولين على الرد والتجاوب مع الاسئله ام ان الامر متروك للمزاج ومتى ما ارادوا جاوبوا ومتى ما ارادوا تجاهلوا ( الطاسه ضايعه) ولن تجد من يحاسبه اذا لم يرد ؟

[حمــد]

اتفق معاك بكل ما طرحته هذيله موظفين مريحين راسهم

[سالم الزهران]

اعترف اني من النوع اللي اكتب للجهات والشركات ولكل من يحط عنوان مراسلة يبغي معلومات راجعة او تطوير خدمة الخ.

من تجربتي خصوصاََ مع الجهات العامة.. اما انك تجد رد الكتروني في وصلات وعناوين اقسام تختص اكثر.. أو انه يقول تم استلام رسالتك ونشكرك.

لكن بعض الجهات اللي ما ترد.. والأمر هنا مضحك بالنسبة لي.. لو تواصلت مع التجارة مثلاََ في موضوع يخصهم وما ردوا عليك، ارجع اطرش لهم ايميل اسأل عن موضوع مثلاََ عن الجمارك.. يردون طوالي ويقولون هذا مب اختصاصنا تواصل مع الجمارك؟ لا ويعطونك لستة وصلات قد تفيدك
طيب انتم ليش ما رديتم عن الشيء اللي يخصكم! شاطرين بس تصيدون الاخطاء؟

ومع ذلك فيه جهات تتواصل معك و فيه جهات يرد عليك باتصال في غضون ساعة (لكن كله عشان يقفل الطلب وجودة الخدمة).

في النهاية كل موظف الآن مطنش بيجي له يوم يطلع ويتحول لمراجع سواء لاشغاله أو أشغال عياله ولا بيحصل الا نفس منهجية التطنيش اللي تركها وراه من يوم كان موظف.

[إينشتاين]

ارسلت ايميل شهر اكتوبر الي طاف لهيئة الضريبة وردوا قبل اسبوعين

[سليمان احمد]

للاسف في عالمنا العربي لايوجد تقدير لما يسمى الايميل وحتى طرق التواصل في الغالب تكون مجديه
فلا الهيئات ولا الموسسات وحتى الشركات لايحترمون ثقافة اسمها العميل او الزائر او الكستمر او غيرها
من المسميات وهناك مشكله اكبر وهو ان اغلب الاشياء اللي ممكن تستفسر عنها بالتلفون مفقوده لازم تدق
سلف وتروح للمكان بنفسك وهناك طامه اكبر وهي انك لو وفقك الله ولقيت رد على التلفون بعد مايحولونك
للبداله او للشخص اللي الفروض يرد يسحب ويتم التلفون يرن لين ترجع للبداله نظام الوطن العربي يحتاج
سنوات الى ان يوصل لنظام امريكا مثلاً واللي حتى محلات البيتزا ترد على الايميلات في وقت وزارات عندنا
مايردون هذي ثقافة الاستهتار للاسف مترسخهومتجذره عندنا بشكل كبير اما بعدم الرد او بالردالمتاخر

[طلعة الروح]

وفي جهات اذا دقيت سلف ورحت يقولون لك ف الاستقبال
جاي من غير موعد؟ ويرفض يدخلك
واذا عطاك كرت الاتصال وحد منهم رد يقولك خذ هالرقم وكلم
فلان وتتصل على المختص فلان ولا يرد
وتيتي تيتي

مادام مافي رقابة ومحد يهتم بجودة الخدمات او حتى سمعة المكان
ف عادي تحصل هالانحدار