كلنا سمع عن موضوع التسجيل المسبق لدخول البلاد للمسافرين من المواطنين وشسوى من ربكة .. من المسؤول إذا احتراز نظام صحي أمني مشترك بين وزارة الصحة والداخلية؟
تضرر عائلة أو عائلتين وتعطل سفرهم شيء محبط للجميع لأننا كلنا كقطريين حكومة وشعب متكاتفين ونتأثر من اللي يصير .. بعدين أقل شيء يؤثر في سمعة البلاد ككل وينتشر ويطيرون به طيور الظلام حولنا وشوضعك يا مبتكر هذي البدعة بعد التراجع السريع اللي أُجبرت عليه؟
تخبط ثاني تكلمت عنه مرات ومرات هو مواصفات الطرق عندنا والمواقف الداخلية .. مستشفى رميلة ومستشفى حمد يعتبرون واجهات للدولة من يمر عليهم يشوف كيف التموجات في بعض الطرق هناك خصوصاً في رميلة .. أما يالجهة اللي سويتي هذي الطرق تتابعين وتصينينها كل شهر مب حتى كل سنة أو تسوين شغلج عدل مثل دول العالم كلنا في كوكب الأرض والجاذبية نفس الجاذبية والتربة متقاربة بل استويتوا تستوردون تربة وقابرو وغيره من كل مكان بدون فايدة
والتخبط دوم يسحب وراه تخبطات ارتدادية .. منطقة مجمع المناعي وما يحيط بها والمطاعم اللي انتهت صلاحيتها والناس كرهوا المرور صوبها هذي شوارعها مأساة ولها سنين ما تعدلت .. فرجاننا يعدلون منهول ويرجع يخترب ويطلعون 10 غيره لا والحفريات ما توقف كل حياتنا استوت حفريات وبمعدات بالية تعتمد على الضربات المزعجة للسكان .. ليش ما تتجهون للتفجير المدروس وبمخمدات صوت وكله ثواني بسيطة يشق الأرض حسب اللي تبغون
التركيز على مناطق كاس العالم بس للبهرجة وبعد ذي بنيانها أشوفه بدائي ويحتاج تطوير صح .. ما صار اللي نتمناه والانترلوك مفكك وقطع مرتفعة ونفس طريقة التركيب الرخيصة البدائية السابقة لا بايبات تصريف للمطر الخفيف تحت ولا خرسانة بسيطة تثبت القطع ما تهبط ولا تتفكك رمل وصف الانترلوك عليه وقول له اقعد مكانك لتتحرك
والموضوع متشعب وذو شجون وباضيف عليه أكيد