الإشارات والزحمه

[Rider]

السلام عليكم ورحمة الله وبركاتة
كما هو واضح في العنوان الإشارات والزحمه فرحنا بالانفاق والجسور جات الإشارات قتلت الفرحه كنا ساكتين قبل عودة الدوامات والمدارس بشكل كامل لكن الحين نكشف المستور شوارع صارت أكثر من حاره لكن في النهاية تنصدم قدامك بعد كل 500 متر اشارة هل يعقل هذا مثلا الشارع الكورنيش الشارع المحاذي له حسبوا كم شاره وانت جاي من الصناعيه فرحنا تنصدم كم إشارة لين تواصل لو قلنا رايح صوب الدحيل لين كتارا شنو هذا التخطيط لازم تعرف وين تحط الإشارة طبعا غير المخارج لي عند بعض الشوارع مخرج ضيق يالله سيارة وحده تدخل ابغي اعرف من لي يخطط مهندس مختص وعارف البلد ولا بو عيون خضر

[سالم الزهران]

حياك الله اخوي رايدر، فعلاََ الاشارات تقتل المزاج.
بديت الاحظ ان الاشارة ابسط خيار للتنظيم. اظنهم يقدمون موضوع السلامة والتكلفة المادية على حساب العلم والتخطيط وراحة مستخدم الشارع.

عندي تساؤل يدور فبالي من اول، ليش ما يوزعون الحركة بانفاق ومخارج وطرق سريعه دون اشارات.

ويروحون للشوارع الفرعية ويخلون اشارات في التقاطعات المزحومة والكبيرة، اما بقية الشوارع يكفي العلامات الارضية و دعسات التنبية واشارات الأولوية.

ليش اصغر تقاطع او مدخل يحطون له إشارة؟

[sara jsm]

ابغي اعرف من لي يخطط مهندس مختص وعارف البلد ولا بو عيون خضر

وعليكم السلام ..
اتوقع بونقطة حمرة
دايما يسون مشاريع حق سنة جدام .. مايفكرون بالكثافه السكانيه اللي تزيد سنة ورى سنه ..

[Rider]

حتى لو بلعنا موضوع الإشارات على الأقل لازم يكون توقيت فتح الاشارة وقت كبير مب كم سيارة تطوف وتسكر واذا كانت الإشارات بينها 500 متر على الاقل تظل فاتحه كلها مب تطلع من إشارة توقف عند الثانيه

[مرتبش]

فعلا الاشارات الزايدة تقتل انسيابية الحركة.. كمثال لاشارة ازدان الجديدة اربكت حركة الشارع والغريب انها لاتسمح بالحركة في جميع الاتجاهات .. توقيتها وقربها من اشارات البريد يثير التساؤلات.

اشارة جديدة غريبة ايضا لم يتم افتتاحها الى الان في محور صباح الاحمد قبل تقاطع اللاندمارك .. الشارع اصبح سريع من المطار الى اشارة حديقة دحل الحمام والمنطقي استكماله الى الكورنيش ليصبح شارع دائري كامل حول الدوحة بدلا من اضافة اشارة قريبة من تقاطع اللاند مارك .

[Rider]

بلد الإشارات

[معماري قطري]

وعليكم السلام ..
اتوقع بونقطة حمرة
دايما يسون مشاريع حق سنة جدام .. مايفكرون بالكثافه السكانيه اللي تزيد سنة ورى سنه ..

الكثافة السكانية للحين ولا شيء شوفي شبيصير لين تضاعفت .. أمس رحت لوسيل الساعة 10 المفروض ما فيه زحمة وكانت الطرق سالكة بس تعجبت يوم وصلت مسكرين اشارة بحواجز .. اللي صوب المطاعم .. زين سويتوا منطقة حديثة وإشارات شكثر وتعتبر منظمة ( نوعاً ما ) ليش تسكرون تقاطع مرتب حطوا كيمرات وانتوا أصلاً حاطين وخالفوا اللي يغلق التقاطع .. كلش مب حضاري هالشيء .. لا وانا أمشي أحصل الحواجز مالت الطريق على الرصيف حق شجرة جديدة مزروعة والا قطعة بلاط فارطة .. إستووا شوي مهنيين وجيبوا مقاولين عندهم عدة تناسب رصيف يمشون عليه مشاة ولا تسوي منظر مقزز

الله يعين كعبة المضيوم بلادي مضيومة من هالأشكال اللي تدير هالشغلات وبعضهم مساكين ما في يدهم شيء من فوق مفروض عليهم ولا حد يسمع لهم

[معماري قطري]

بلد الإشارات

أعتقد الطرق الداخلية الفرعية تناسبها الإشارات وممكن تصير عليها زحمة لكن الكورنيش مثلاً المفروض جسور وتحويلات لأنه طريق رئيسي وحيوي .. فيه طرق طويلة كلها إشارات وناس يمشون بطيء جداً وبطريقة مملة يزيدون عبء الإشارات عبء بطء الحركة والبلادة .. الطريق اللي يمر من محطة بترول الجزيرة ويروح جنوب في عين خالد عليه يمكن 5 دورات ومن طريق سلوى يبدأ بتقاطع فخم وإشارات ممشية الحال لكن ضيق ودوارات وطويل وتستوي عليه زحمة خانقة ربع سوء على مهلك سوء بكرة الدنيا تروء مع إحترامي لشادية لكن ذيلا حنونين وايد على السيارات ولا يتحركون الا يتأكدون الدوار فاضي

مستغرب ليش ما وسعوه وحطوا اشارات صج ذكية مب غشمرة وفوق هذا نحتاج كيمرات رقابة اللي يلف من أقصى اليمين لليسار فجأة لين وصل التقاطع هذا يقطعون أذانيه واللي يمشي بطيء واللي يمشي بعد مكيم ويتلصق في الناس وزين يخلون السرعة 100 بدال 80

نفس الشيء ينطبق على الشارع المحوري في معيذر واللي يقطع مسافة طويلة من شرق لين غرب ويخدم عدة أحياء كله دوارات ومطبات شكبر وإشارات غثيثة وحفريات لها ثلاث سنين وأكثر ما انتهت ولا اظن بتنتهي

منطقة السيلية نفس الشيء .. شهالشغل الرديء

[Rider]

الله يعين الطرق الداخلية ماعليه ماقلنا شي حط إشارات بس مب بالمزاج حنا انتكلم عن الطرق السريعة ليش تخربها بالتوقفات عند الاشارات ليش ماكملتها جسور ونفاق هم لو يسألون اهل البلد هم اعرف ببلادهم مب العيون الملونه

[معماري قطري]

الله يعين الطرق الداخلية ماعليه ماقلنا شي حط إشارات بس مب بالمزاج حنا انتكلم عن الطرق السريعة ليش تخربها بالتوقفات عند الاشارات ليش ماكملتها جسور ونفاق هم لو يسألون اهل البلد هم اعرف ببلادهم مب العيون الملونه

العيب خليط ومكس عجيب من إداريين ما لهم خبرة كلش بالشغلة الى مهندسين إختصاصات ثانية وبعضهم حتى أبسط قواعد الطرق ما يعرفها وشوف التشويه بوضع جسم صلب على رصيف صغير في نفق والمفروض يبتعدون عن أي شيء يسبب اصطدام مباشر .. وليش ليتات النفق منورة ليل ونهار حد سأل نفسه؟ كله حتى الأمان وما تتغير الرؤية فجأة

ألحين محور صباح الأحمد الضخم خلصوه بسرعة بس تعال للمسارب التحتية اللي تشتغل فيها شركات حصية على حصية هذي يبي لها سنين ضوئية حتى تخلص وشغل غش .. تجي شارع نظيف وجزء ثاني نظيف وبينهم فاصل بس يمكن 10 سم يشق التاير شق .. مب كل الناس عندها سيارات فورويل

ما فيه تركيز على اصلاح الطرق صح والله الحكومة غلطانة لازم تتصرف سرعة وتجيب فريق صيني وفريق كوري وفريق تركي وتعطيهم الشغلات ذي التافهة وتشوف شلون الفرق .. أما التصميم بنعاني منه سنين خصوصاً مع النظام الجديد تصميم وتنفيذ ( قصاب والجلوة في يده مثل ما يقولون ) وتحصلون المنفذ يدور أرخص استشاري يمشي معاملاته ويغطي عيوبه