والله يا اخوي واضح اللي يصير .. أمريكا يوم ضربت أفغانستان وبعدين تفرغت وافترت على العراق جهزت فترات طويلة كم قاعدة لها في المنطقة + سفن حربية وتسليح والدولتين منهكتين والعراقيين مستسلمين وهاربين حرقوهم بالطيران والقنابل وشفنا مجزرة من حدود الكويت لداخل العراق .. هذي محد تكلم عنها وعن هل هي أخلاق محاربين نبلاء أو قاتلين بدم بارد .. كلنا عايشنا الوضع والعراق محاصر سنين ومحارب ومنهك ونفس الوضع مع أفغانستان
حرب جبناء بامتياز .. تجي لحرب روسيا في أفغانستان أو الإتحاد السوفييتي حرب إشتغلوا عليها العالم كله وكرهوا السوفييت وساعدوا الأفغان وبعض الدول مفتينها عطوا شبابها فتاوي الجهاد وأن الجنة للشهيد .. في النهاية طلعوا السوفييت خاسئين وتفكك اتحادهم وذلوا في الأرض وألحين دول كثيرة ملت من عنجهية الروس ويتمنون إضعاف روسيا بدخولها الحرب وبيساعدون اوكرانيا وبيضخون سلاح وحتى متطوعين للقتال .. وممكن في عز التهاء روسيا بأوكرانيا نحصل ضربة من إسرائيل ومن وراها لإيران وروسيا والصين وايران ووراهم كم دولة منهم كوريا الشمالية وبعض بقايا الإتحاد السوفييتي المهيمنة عليهم روسيا بتحصلهم مستعدين لهذا السيناريو ومناوراتهم المشتركة في بحر العرب خير دليل
الكاوبوي الأمريكي لا بيركب حماره وبيحارب ولا بيسوي بؤرة توتر مضادة صوب ايران لأنه عرف الرد خلاص وبيمسك الحرامي المدلل إبن صهيون عن أي حماقة .. يعني إحتمال ضرب أوكرانيا يزيد ترجيحه أكثر وأكثر مع زيادة الإستعدادات وتكاليفها على الروس