مطلوب مساعده .. ضروريه لوسمحتو

[الامير]

ناوي وبجديه ان شاءلله ف انشاء مزرعه ابقار للاكتفاء الذاتي والبداء ب 50 راس ..او اقل
سوال نو لي حاب يساعدني
1-احد عمل المشروع من قبل عشان نستفيد منه ؟
2- هل يوجد مكاتب متخصصه تعمل لي دراسه جدوى ف هذا المشرروع الخاص ؟
3- كم العدد لي محتاجه من مباني وما عدد الاشخاص وكم تكلفه .
يعطيكم العافيه ارجو تفاعل …
الهدف للاكتفاء ذاتي فقط لا ابي انافس بلدنا ولا غيرها .

[SouthK]

الله يرزقك و تنافس بلدنا و غيرها
التكلفة المبدأية بتكون عالية إذا تبغي تشتغل صح لكن أعتذر عن الخوض في التفاصيل لقلة خبرتي!

[الامير]

شكرا ع تشجيعك ….
الميدان مفتوح يا شباب اذا احد بيفيدنا …

[بوخميس]

التكلفة راح تكون عالية بسبب عدد الرؤوس الصغير ولأنك راح تشتري العلف

مب مثل داندي وبلدنا عندهم مزارع اعلاف

[الامير]

صبحكم الله بلخيررررر

[ابو عبدالله.]

مساء الخير

مثل هالمشروع الافضل يكون عندك اساس تبني عليه الفكره
مثلا اذا عندك عزبه او مزرعه او حد قبل انك تحط حلالك بمزرعته او لقيت من يؤجر لك مساحه بمزرعته. المتر بريال مثلا او ثلاث ريال

الف متر تكلف ثلاث الاف شهريا
المباني كلها بالكيربي اعزكم الله زريبه و كم غرفه عزل للمواليد او المرضى او للعجول الجاهزه للبيع و ايضا مخزن للاعلاف
تقدر توفر بالتكلفه اذا استخدمت شغل الحديد و الكيربي المستعمل.
يمكن نص التكلفه تقريبا

عندك مشكله. ان لازم شهاده حلال عشان تاخذ الاعلاف المدعومه شعير و شوار و الشهاده تطلع اذا عندك عزبه او مزرعه باسمك. او تسجل الحلال باسم صاحب المزرعه وكل سنه لازم تجدد الشهاده و تستخدم بطاقه مالك المزرعه للتجديد. شغله يعني

باقي الاعلاف بتدفع قيمتها كامله مثل الفرودس و الجت و التبن و الاملاح و الفيتامينات و الادويه. و العلف مش رخيص و هالايام في شح في الرودس و الجت و سعره متضاعف لكن بيرجع ينزل شوي خلال فتره بسيطه و المربين يعرفون هالموضوع

افضل اعطيك مقارنه بين تربيه الابقار و الخرفان
البقره تولد بعد تسعه شهور و قيمتها بحدود عشره الاف و تحتاج ثلاث شهور تنظف و ترضع الخ
الشاه تولد بعد خمس شهور و نص و تنظف و ترضع شهرين الى ثلانه

البقره ام عشره الاف لو مات جنينها تضيع عليك سنه تربيه و اكل و مصاريف و تنتظر سنه اخرى
بنفس القيمه تشتري عشر الى 11 شاه و تولد 11طلي و طليه و قليل جدا يموت جنين
الطلي مضمون بيعته ان شاء الله لكن العجل بتاكله لين تلقى الشراي و قيمته بحدود اربع الاف تقريبا
يعني سنه و العائد اربع الاف فقط
الشياه مده اقل و بيعه بعشر الاف

المعزا امراضها كثيره ولا تستحمل الدواء بالابر و موتها وارد فما انصح بها

اذا تبي الفكره تعطي مردود يعطي التكلفه و فوقها ربح و اكتفاء من اللحوم لك و للي حولك

انصح بعدد فوق 170 راس عشان يغطي التكلفه السنويه و يطلع مردود مقبول نظير الجهد و المتابعه

من تجربه
عندي 175 شياه و معز الفاقد عندي هم الماعز موتها كثير و عددها 37 تقريبا و ناوي ابيعها لكن الشياه تنتج نص طليان و نص طليات
فنص العدد اقدر ابيعه فقط و اخلي الطليات للانتاج مستقبلا

الرودس اربع الاف كل شهرين. وهذا سعر جيد لاني اجيبه من معرفه ضعف الوزن و نفس سعر السوق كأني شريب الزباله او الربطه الكبيره بنصف السعر بالسوق

الفين و نص للشعير و الشوار كل شهرين مع انه مدعوم لكن الكمينه كبيره و كيسين شعير يوميا وكيس شوار
الاملاح مئه و خمسين شهريا و الفيتامينات مئه ريال
الادويه يمكن خمسمائة كل شهرين او ثلاثه
عامل واحد يكفي بالزور لكن الافضل عاملين رواتبهم الفين و نص شهريا للاثنين
جز الصوف مره بالسنه بالف و شوي

توصيل الاعلاف ما يكلف لكن حسب موقعك. اذا قريب الشحانيه مثلا النقله للاعلاف خمسين الى سبعين ريال. لا تذكر يعني

لكن اذا بتجيب رودس من مزارع خط الشمال بتكلف 400 تقريبا كل شهرين

اعتقد ان تربيه الابقار صعبه ولازم مزرعه منظمه جدا مع دكتور و عمال كثر و تنظيف يومي للزرايب و تبريد بالصيف بمرشات الماء

حبيت احط لك لك مقارنه و انت و خيارك اخوي

[@north_star@]

دراسة الجدوى ضرورية جدا وتقدر تسويها بشركات تدقيق الحسابات وعمل دراسات الجدوى وبالتوفيق ان شاء الله