أبشركم فزنا ببطولة حفريات الطرق على العالم

[معماري قطري]

السلام عليكم ورحمة الله وبركاته

من زمان تكلمت عن أن أي مشروع كبير يقام لا بد يتماشى تخطيط البنية التحتية معاه والتنفيذ لازم يتزامن .. ينتهي المشروع ينتهي مكتمل ما ينتهي البنيان وبعدين تبدأ الحفريات المزعجة والعميقة وتخرب فرحة الإفتتاح

ما حصل أمس قررت وصديق نروح نتعشى في مشيرب ودخلنا من طريق سلوى وفاتتني اللفة يسار اللي تدخل على مشيرب عند شركة المرسدس القديمة وتقاطع كليوباترا رحت سيدة ولا حصلت لفة الا صوب الكورنيش قريب المتحف .. الطريق كان ضيق بحواجز وحفريات كل مكان ومطبات والسيارة تهتز ولو سيارتي نازلة زيادة مثل بعض السيارات الرياضية الفراري واللامبورغيني ومثيلاتها كنت صج صج تبهدلت ويمكن أوقف مكاني

العنوان كان تعليق من اللي معاي وتساءلنا متى بتنتهي هذي الحفريات .. وليش نحتاج حفريات عميقة لهالدرجة وليش ما نتجه لأنفاق الخدمات نقدر نتابع ونصين ونستبدل التالف بسهولة؟

بنفس الوقت لو اعتمدنا المضخات ما بنحتاج نحفر غزير والمضخات نقدر نسوي لها مكان سواء فوق الأرض ولها وصلات للبايبات تحت الأرض تدفع السوائل بالضخ وليس بالجاذبية .. بدال التكلفة ما تكون في الحفر بدون ضمان صيانة سهلة تكون في المضخات والحفر يكون بسيط وحتى البايبات تكون أصغر لأن الضخ يحرك حجم سائل بسرعة وبايب صغير يكفي عن بايب كبير .. مثلاً الجاذبية تحرك حركة بطيئة ونحتاج بايب قطره متر ليمرر السوائل المتوقع حجمها في اليوم ممكن يعادله بايب بقوة ضغط 3 أضعاف قوة الجاذبية فنحتاج لقطر 30 سم أو 40 سم

[معماري قطري]

إستكمال للحديث

مشينا على الكورنيش وكله حواجز بعد وأوقات صعب تركز فيها وتكتشفها لا فيها شريط عاكس وبعضها بارز بطريقة خطرة واللوحات الإرشادية أما صغيرة وما تبين أو لا توجد والكورنيش حالته يرثى لها من الشغل اللي ما اتخيل بيخلص بسرعة .. حتى لوحة ورسمة المشروع لين انتهى شلون بيكون ما لها وجود مع إنهم يطلبونها من اللي بيبني عمارة مثلاً ويخسرونه لكن مقاولينهم المحبوبين ما يطلبون منهم ولازم تكون كبيرة ومضاءة وتبين للكل ولكل مشروع يفترض

المهم سحبتنا السيارة للستي سنتر ما رحناه من زمان قلنا نتعشى هناك ونتمشى قبل شوي .. بعد حفريات حوله والشارع خطر وضيق وقلة اللوحات بلغلط دخلت صوب الفنادق وبعدها وصلت للمواقف وداخل الستي حالة قلة نظافة ومحلات كثيرة مغلقة وبخشب وكله بنفتح قريباً .. تغيرات كثيرة سيئة وتضيق على العالم .. وقت الخروج تصادفنا بالممر الضيق للدفع للخروج وكنت دافع عبر المكينة الخاصة ووصلت لممر ضيق وما ادري شدست عليه بتاير السيارة وزين الموجود هناك فتح البوابة لي بدون ما ادخل البطاقة مع إن قاريء البطاقة المفروض قريب بس تتفاجىء بمكان ضيق صعب تناور فيه ومليء بالأرصفة شكلي ركبت طرف رصيف وسيارتي صالون سبورت .. وذكرت قبل تنظيم مداخل ومخارج الستي سنتر يحتاج وقفة هندسية وأمنية ومرورية قوية هذا مب مجلس خاص مكان عام ينظم باشتراطات تنفع العموم وفي أوقات الطواريء والهلع كيف بيكون الخروج؟

[معماري قطري]

كنت أفكر وايد ومشكلتي أفكر ليش الحفريات في فرجاننا بالبوكلينات المطرقية المزعجة وأتوقع مقاولينهم عندهم حفارات بدون صوت واهتزازات وتكلموا عنها كثير بس ذي مب لنا يا سكان الفرجان حتى لو معانا شياب وعجايز وأطفال ووزراء سابقين وحاليين .. مب مهم القطري يتحمل لكن واجهة البلاد وتجمعات الأجانب هذي استخدموا فيها الحفارات ذي .. صدقوني 24 ساعة ضربات تدخل المخ والنخاع الشوكي

[Rider]

الحفريات شعار لنا مانقدر نستغنى عنها هههههه هذي سياسة التفكير الخطأ

[حمد 2002]

تبون تطور
هذا هو التطور
الحل
بالصبر
ثم الصبر
بعدين بالمستقبل
بنشوف
التطور

[sara jsm]

انزين اي مطعم رحتوا ؟

[بوNasser]

في افتتاح نفق التضامن (تقاطع العلي) ما تم حد من مسؤولين اشغال ما صور وصرح وافتخر بها الانجاز وسرعة تنفيذه والصعوبات اللي واجهتهم وتغلبوا عليها، وبالفعل النفق ممتاز بمساراته.

لكن

فوق النفق الوضع مختلف، كل الأكتاف من كل الجهات حفريات وكتل اسمنتية ودواعيس وشاحنات وحالة كسيفة.

نعم اكتشفنا ان الافتتاح كان جزئي، والصور اللي في الجرايد غير عن الواقع، بس ليش هالزبو و الفشخرة و المهايط وحب الظهور على انجاز غير مكتمل بنسبة كبيرة.

تحياتي للجميع ودمتم سالمين.

[سالم الزهران]

يا جماعة الخير انا مب مهندس لكن من خارطة جوجل يبين المكان المرتب من اللي جاي صدفة.

المشروع وأي كان نوعه سواء بنية تحتية أو تطوير منطقة.. الخ لابد أن يثبت جدواه من خلال أهميته للمشاريع اللي تجي عقبه (لانها بتكمل وبتبرز أهمية المشروع اللي كان رقم واحد في ذاك المكان بذيك السنة).

بتشوفون مشاريع فعلاََ ذات جدوى عالية ومن هالنوع.. وبتشوفون مشاريع مالها أثر يذكر..

احد الزملاء هنا دائماََ يذكر مثل (اللي يأذن بخرابه) وانا اتفق معه وبالخص في نقطة المشاريع و لاشك ان الاخوان اللي يدهم في الشغلة يعرفون اكثر منا وحنا يادوب يجينا مشاكل العقود وصرنا شبه ملمين باغلب اسباب المشاكل بدءََ من ترسية العقد.. والله كريم

[معماري قطري]

انزين اي مطعم رحتوا ؟

أهم سؤال .. لحقنا على أبل بيز قبل ليسكر

[معماري قطري]

يا جماعة الخير انا مب مهندس لكن من خارطة جوجل يبين المكان المرتب من اللي جاي صدفة.

المشروع وأي كان نوعه سواء بنية تحتية أو تطوير منطقة.. الخ لابد أن يثبت جدواه من خلال أهميته للمشاريع اللي تجي عقبه (لانها بتكمل وبتبرز أهمية المشروع اللي كان رقم واحد في ذاك المكان بذيك السنة).

بتشوفون مشاريع فعلاََ ذات جدوى عالية ومن هالنوع.. وبتشوفون مشاريع مالها أثر يذكر..

احد الزملاء هنا دائماََ يذكر مثل (اللي يأذن بخرابه) وانا اتفق معه وبالخص في نقطة المشاريع و لاشك ان الاخوان اللي يدهم في الشغلة يعرفون اكثر منا وحنا يادوب يجينا مشاكل العقود وصرنا شبه ملمين باغلب اسباب المشاكل بدءََ من ترسية العقد.. والله كريم

إحنا عارفين الخلل وين وحطيت عليه علم كم مرة .. في رأيي يبدأ من إدارة المشروع الهندسية لازم تكون مفتحة للأنظمة الحديثة والسهلة وتسوي دراسات جدوى حق فترة طويلة 50 سنة مثلاً .. دراسة شاملة الصيانة وعدم التأثير على المباني والعامة وكأنك كل مرة تسوي مشروع جديد بالكامل وتخرب كل اللي بنيته من 5 أو قول 10 أو حتى 20 سنة

الدراسات الهندسية تقوم بها شركات عالمية في الغالب ومفتحة على أنظمة متطورة ليش نلزمهم بالبدائي وإذا شركاتنا ضعيفة نستورد شركات من برا ومب شرط أوروبية الصينية والهندية رخيصة وينفذون حسب التصميم .. الوضع ما يحتمل تأخير والباقي 6 شهور تقريباً لازم نخلص كل مشاريعنا فيها .. اللي معاي مطلع ويأكد لي إن مشروع بنية الدوحة التحتية بينتهي في 2027 .. وايد وايد شهالمشروع الريل خلص بسرعة .. زين ومشيرب اللي بيستوعب عدد كبير من السكان هذا الشغل حوله بيستمر وقت كاس العالم والا بيغطونه مؤقت وبيرجعون يحفرون مرة ثانية ؟

الربكة ما تصير الا لو ما فيه تصميم وجدول زمني سريع يضمن تخليص المشاريع مكتملة أول بأول وللأسف غالب اللي يديرون العملية همهم نبني ويبين بنياننا ولا يركزون في الخدمات وهذي عادي بنسويها بعدين .. وعارف الضغوط عليهم والميزانية ولا يقدرون يخلصون كل شيء في وقته وهنا نقول ضرورة الإستفادة من الخبرات الخارجية والعقود تكون واضحة بعمل كل شيء مب شيء ونخلي شيء بعدين