حلمك إن اللي يصير للصالح العام حلم حلمناه كم مرة وعرفنا النتيجة الشق أكبر من الرقعة مثل ما قال غانم السليطي
حلمك إن اللي يصير للصالح العام حلم حلمناه كم مرة وعرفنا النتيجة الشق أكبر من الرقعة مثل ما قال غانم السليطي
يحيكم إحنا يوقفون يمكن نص ساعة أو ساعة ويرجعون يطقطقون 24 ساعة متواصلة .. حتى وقت الصلاة وصلاة الجمعة .. طريق الوعب واستاد خليفة قريب
على طاري استاد خليفة مشيت في مواقفه من فترة شغل انترلوك رخيص وغش قطعة مرتفعة وقطعة نازلة .. إستغربت شلون ما فكروا فيه للحين وشكلهم مقتنعين إنه زين أو ممكن مب حق كاس العالم
أسباير مسوينه بدون بنية تحتية وآخر الليل أظن الساعة 2 يجون يفضون خزانات الصرف الصحي وهناك منشآءات كثيرة .. حتى عندنا كم مرة أشوف فاتحين منهول ومدخلين فيه هوز كبير يسلكونه أو يسحبون السوائل المتجمعة .. وشاحنة خاصة ببمب كبير تشفط هذي السوائل ولها صوت متوسط مب قوي وايد .. أتوقع وقت الشغل يتم التخزين في البايبات والسحب منها
يعلم الله كتبت الموضوع وانا حزين على هذا الوضع والأموال المهدورة على شركات تلعب ومكاتب هندسية دون المستوى .. كلها كم موظف عندهم ذمة يروحون الصين أو كوريا ويجيبون شركات تسوي شغل مع تصميم بصفة مستعجلة وبدون وكيل وبدون تعقيدات يخلون الشركات تجيب كل عدتها وعمالها ويسهلون لهم كل شيء
حسب معرفتي ان المنطقة مب صخرية ولو كانت صخرية فصخور ما تحتاج الطق والشغل المزعج، لكن اتوقع طالما هناك حفر فهم يطقون الركائز الحديدية اللي تشوفونها في المشاريع وحتى هي لها معدات خاصة.
اخوي معماري اتفهم أسفك والله، وفي كل مكان بالخليج تحصل نفس المشاكل. أنا ودي لو يكون للساكنين في الأحياء والفرجان ثقل.. بحيث يقدرون يشتكون على المقاول اللي تبين خلل أو قصور في عمله ( مثلاََ شبكة تصريف ولا طق مطر تعبت الشوارع).. خلاص يكفي كمن صورة وتروح تشتكي علي انا ابو زيد اللي خذيت اربعين مليون عشان اسوي تصريف شارعين وما عرفت..وتحاسبني جهة الاختصاص.
لكن
اذا اي خطوة من هالخطوات تعثرت.. فمعناه أن القادم بيكون كله تغطية أخطاء وانعدام شفافية... الخ
تُنسى ، كأنَّكَ لم تَكُنْ ..
المنطقة غالبها أرض صخرية صخور جيرية سهلة الكسر .. هم لو يستخدمون ديناميت مدروس بكميات بسيطة ومصدات لصوته وبحيث تأثيره يكفي لحدود مترين مكعبين من التربة بيستوي أسهل بدال الضربات المتتالية والقوية ذي .. مرة شفتهم يستخدمونه عندنا في منطقة برية .. وهم عارفين تأثيره وقوته والصوت يجيك فرقعة خفيفة وفيه مخمدات صوت حتى يقدرون يسوون آلاف التفجيرات .. حفر بدريل كبير قبل دائري يسوي فتحة قطرها 5 سم وينزلون العبوة فيه تحول الحجر لتراب في أجزاء الثانية .. وما ذكرته لصفائح الحديد المغروسة هذي تستخدم للاراضي الطينية والرملية واللي مستواها مختلف وسهلة تنهار عندنا يحفرون 15 متر بدون حمايات جانبية من الإنهيار بس يحطون حواجز خرسانية لحد يطيح
بعدين يا اخوي ليش ينتظرون ردة الفعل من العامة مب هم مدراء مشروع يصممون ويحطون شروطهم ويعينون المقاول الكفؤ والقادر ويتابعون التنفيذ ومشاكله ويعرفون كل صغيرة وكبيرة فيه يفترض وكل مشكلة .. والمفروض لهم مكتب ميداني والمفروض أكثر هذي أمور خلاص انتهينا منها ألحين عارفين شالتكنولوجيا اللي تخليك تسوي الشغل في فترة مناسبة .. انت الطبيب ما تخلي عليه مشرف خريج إدارة لكل مجموعة استشاري يتابعهم ويقيمهم عملياً وعلمياً ويعرف أداؤهم .. وما تجيب طبيب أسنان يوجه أطباء جراحة ونفس الوضع للهندسة وتخصصات البناء وهي كثيرة ما تجيب دكتور مهندس كهربائي يتابع ويوجه حتى دبلوم هندسة بنية تحتية .. الثاني مختص والأول إختصاصه غير
إذا مرة مهندس طرق في أشغال يقول لي هذا أمر مدير المرور وتدخل مدير المرور في أمان الطرق وقت التنفيذ قلت له انت مدير المشروع والمشروع تحت يدك ما يحق لأي شخص غير مختص يتدخل .. ممكن مديره المباشر أوكي في أشياء إختصاصية لو كان مختص
غالبية كراكات البيوت والمباني اللي عندنا تكون كامنة من سوء التنفيذ وتتوسع شوي شوي وتبين مع مرور دورات البرودة والحرارة السنوية .. فيه بيوت لها سنين طويلة مبنية ويحفرون حولها ولا فيها شيء وفيه بيوت توها لها سنة وتبين فيها هذي العيوب .. ببساطة سوء التنفيذ وأوقات ما يركبون فواصل تمدد في الأسوار .. مريت على بيوت كثيرة تنبني في نفس المنطقة وعددتها لواحد معاي كنت رايح اشوف بيته .. لا والمقاولين يشوفون الكراك متعرج وواضح وحتى قبل البلاستر ويصلحونه بشوية مونة إسمنتية ويوهمون المالك إن هذا الحل الصحيح والوحيد والحل لو ما فيه فاصل تمدد يقصون مكان الكراك المتعرج قص للطابوق سيدة من فوق لين تحت والمفروض يفصل حتى الأساسات ويحطون مادة مرنة تسمح بالتمدد والإنكماش
والله ياخوي معماري انا معك
الي متعارف عليه دوليا هو عمل بنية تحتية متكاملة صرف صحي
وكهربا وخطوط اتصال وبعد ذالك تسليم الارض جاهزه للبناء
بس شيسوون اهم مستلمين مناطق بنيت وخلصت وما عندهم
كثير من الحلول
انت بس احسب حجم المشاريع الي يديرونها من شمال قطر الى جنوبها
وصحيح انهم في الدفنة يقطعون الارض واعذرهم منطقة
حساسة فيها السفارات وكبار الموضفين
واعذرهم الات قطع التربة الي مثل البوكلين بس لها راس دائري يقص
في الارض هذي الات حديثه ومش كل الياتهم بهذا الشكل
صحيح فيه شوية اشغال يبلها تطوير وتحديث طريقة التنفيذ
بس انا اقول وين كنا ووين صرنا قارن بين الوضع قديما
وشوف الفرق مع ان اشغال سابقا مشاريع بسيطة
ولان المشاريع مالها حد والي تديرها
جهة وحده
العمل الان مدروس
جسور المشاة لقطع الطريق طالبنا وتكلمنا فيها قبل 20سنة
الان كل الشوارع فيها جسور مشاة مشاريع تنفذ ومشاريع
في الطريق جايه يشكرون بصراحه تحديث وتطوير
وتجميل شوف الحديقة الي في المنطقة التعليمية
شلون جميلة ومطوره ومكيفه
احنا نسير بخطى ثابته لرسم مستقبل جميل
بس نحتاج مواكبه التطور واخد احدث واجمل ما فيه
ونمشي على المثل
اذا اردت ان تطاع فامر بالمستطاع
ما اعذرهم ولا شيء
انا وغيري خصماؤهم يوم القيامة .. ما يسوون المشاريع بلاش وبغالي وايد .. كفاية باصات التاتا اللي بدت تنقرض من صرخنا عنها صرخات قهر واللي يستوردونها بالية ومنتهية من الهند .. هذي مليونير كبير ربح منها وايد رحمه الله .. جاب كمية مهولة شفتها في أرض له وكان يبغي يسوقها حق كروة أعتقد وكروة تعاقدوا مع مصانع مباشرة وكانت نقطة إيجابية ايجابياتها نقطفها ألحين تلوث قليل وباصات تفتح النفس مقارنة مع تاتا
مقاولينا للأسف يلقطون بعضهم عمال من الشارع وبعضهم إعارات وآليات منتهية ونكتشف مؤخراً إن حسب المناطق وساكنيها يهتمون بالشغل أو مب مهم عذبوا السكان في الدنيا قبل الآخرة
بالنسبة لعمل البنية التحتية لبيوت قائمة إحنا عندنا كل شيء حتى انترنت سريع الفايبر اوبتكس نقصنا تصريف المطر ومستغرب ليش حطوا بايبات إطفاء وحتى محطة الإطفاء جنبنا بسهولة توصل لأي بيت .. وما دام هذي بيوت قائمة وناس ساكنينها وناوي تطور طور بس بآليات صح وتخطيط صح وبسرعة لتأذي العالم هشكل .. ثرى المقاولين أوقات ربحهم من المشروع يوصل مئات الملايين ولا يتنزلون يشترون آلية تبيض الوجه كله مال رخيص ومش حالك .. أشوفهم عمال يقطعون الإنترلوك والغبار على السيارات بدون أدنى مسؤولية ومنظر مقزز ومزعج .. من يضبطهم إذا أشغال والا ايش قال يبونا نشتكي وهم يديرون من مكاتبهم والشرطة ما لها خص
بعدين يا اخوي ادارة المشاريع كلها توقيع عقود مع شركات اشراف عالمية .. جنبنا بارسونز الاستشاري الأمريكي بس مؤكد هم فارضين عليه يتساهل مع المقاول بهذي الحفارات وممكن جزء من عقده .. يمكن هم يوقعون العقد ويصورون وقت الإفتتاح بس
ذكرتني بجسور المشاة مسوين خوش جسر للمشاة يقطع شارع الفروسية صوب اسباير من جهة الغرب لهم حول سنة يشتغلون فيه حصية على حصية نبني الجسر يا بنية .. المهم شهالجسر هذا لدبابات أو لبشر .. مسوينه دفان وحوائط استنادية وكتلة كبيرة تطلع تمشي على سلوب طويل .. صحيح يبين لي ممكن للكراسي المتحركة بس تعليقي على الكتلة المصمتة بدون فتحات فيها .. كنت قبل تمر بالسيارة تشوف إنفتاح أسباير جدامك ومن الجهة الثانية تشوف المحلات التجارية صوب معيذر .. من اللي صممه ومن اللي وافق على التصميم مستغرب؟
ربعنا لهالدرجة ما عندهم بعد نظر ويتخيلون إن مثل هذا الجسر يسوونه في دول ثانية الجاذبية نفس جاذبيتنا هناك وهنا = 9.81 متر/ ثانية تربيع ( أذكرها من أيام الدراسة ) والهواء عندنا مستحيل يطير جسر خرساني أو حديدي ثقيل ومنطقتنا بعيدة عن الزلازل .. في دول ثانية يسوونه في أيام وقطع تركب تركيب ومنفتح من كل الجهات ترى حوله مب الرامب مصمت بهذا الشكل المزعج