المشاركة الأصلية كتبت بواسطة الامير
ابي افتح مشرروع صغير هو ايسكريم سياره او ايجار محل اذا ممكن افكاركم وين الاماكن الحلو ومن بيسوي لي دراسه جدوى ع قد فلوسي ومن وين يشترون المكاين والايسكريم بجميع النكهات .. ابي ادرسه عشان ادخل المشروع وانا بقلب قوي وناجح فيه اذا ممكن احد يساعدني حتى لو بنصيحه صدقوني بتكون مهم لي تحياتي لكم وانتظر ردودكم
السلام عليكم ورحمة الله
ما عندي تجارب في السوق، لكن باتكلم عن تجربتي بالنسبة لمكينة الاسكريم.
1- انا طلبت من الصين مكينة وبعدها بكم يوم طلبت الثانية ( مشكلة الفضاوة والتسوق اونلاين من علي بابا) تقريبا بالشحن البحري خذت شهرين وكلفتني المكينة الوحدة تقريبا خمسة الاف ريال. طبعا من غير ضمان (كاتبين ضمان سنة وخمس على الكمبريسر، لكن شلون يصير الضمان، وبينا وبينهم الاف الكيلومترات ولا عندهم وكيل في قطر).
2- انا خذت المكاين للاستخدام المنزلي وليس للتجارة.
وعن تجربة اقول لك
اولا الميزات:
1- خزانين بسعة كذا لتر، ممكن كل خزان نكهة، او نفس النكهة في الاثنين.
2- سهلة الاستخدام و تعطيك اسكريم معصره لذيذ، طبعا حسب الخلطات او البودرة المستخدمة.
3- تصب الخليط في المكينة وتقريبا خلال اقل من نص الى خمس واربعين دقيقة يكون الاسكريم جاهز.
4- الخلطة الوحدة تسوي اكثر من خمسين كوب ايسكريم.
5- تكفي فرحة الصغار بشوفة الاسكريم ينزل من المكينة سواء في الاكواب او اقماع البسكوت ثم الاضافات المختلفة كقطع الشوكليت وفتات البسكويت/كتكات وغيرها من الابتكارات.
ثانيا العيوب/المشقة:
1- متطلبات التنظيف قبل الاستخدام وذلك بفك بعض القطع وتنظيفها على حده وبعض التزييت لقطع التدوير ( تزييت آمن ويسمى Food-Safe Machine Lubricate/Food Grade Grease ).
2- تنظيف الجهاز بعد الانتهاء من الاستخدام، يعني ما يتم الاسكريم لين ثاني يوم، لازم تفريغ الجهاز حتى لو كان مليان ، ويمكن وضع الاسكريم المفرغ في الفريزر.
3- احيانا يكون صوت الجهاز مزعج شوي خصوصا في الاماكن المغلقة.
4- بعض المشقة في التحريك لثقل بعض المكائن نسبيا، وايضا يجب بعد التحريك ابقاء الجهاز بدون تشغيل لمدة خمس واربعون دقيقة حفاظا على الكمبريسر (حسب نصائح المصنعين).
ثالثا نصائح/ملاحظات:
1- الحين في السوق المحلي في مكاين ما بين ستة الاف ريال الى عشرين الف وأكثر، افضل اكيد من الاستيراد الخارجي لتوفر الضمان وقطع الغيار وبعض التدريب (هذا الواجب والمفترض)، السعر حسب المواصفات والصنع، ومزاج التاجر
2- المشروع صيفي بالدرجة الاولي ويصلح في سيارة او تأجير/تشغيل المكاين في المناسبات والحفلات والرحلات، والافضل توفير عامل/عاملة في حالة التأجير.
3- بودرة خليط الاسكريم المتوفرة في الغالب تكون فانيلا/شوكليت/فراولة وباقي الانواع سعرها اغلى، لكن يمكن ابتكار خلطات جديدة باضافة نكهات التوت والمانجو وغيره للفانيلا مثلا. ايضا الابتكار يكون بالاضافات فوق الايسكريم (Topping).
أخيرا: قلب الموضوع في مخك، ادرس الجدوى، خطط صح، واتخذ القرار واعلم يقينا ان التوفيق اولا وأخيرا من رب العالمين.
تقبل الله طاعتكم
ودمتم سالمين
ضوابط المشاركة
رد مع اقتباس