طريق جديد توهم خالصين منه حق فشخرة كاس العالم الآن بدت منهولاته ترتفع وتسبب اهتزاز في السيارة وصوت الا وهو طريق الريان الجميل والحديث واللي خذوا فيه سنين يبنونه .. ذكرت سابقاً هذي الخرسانات الرفيعة للمنهولات المحفور حولها والمدفون مهما دكينا تبقى تربة ضعيفة وتحتاج لتثبت في الارض صب خرسانة حولها وعمل مراسي تثبت جسم المنهول في هذي الكتل الخرسانية.. هي نفس مبدأ الشوكة في الجلد تضغط حولها تطلع.
يساهم في هذا طبعاً دخول المياه لطبقات الدك السفلية أما مياه الأمطار أو الرطوبة الجوفية وفي المستقبل ستزيد المشكلة وقد تحصل تعرجات في طبقات الإسفلت أو هبوطات قوية كما حصل في طريق الفروسية وتم اصلاحه سريعاً ( بسبب قرب كاس العالم والا القطريين والمقيمين ما لهم أهمية قصوى ).
شيء إستغربت منه وكنت على طريق السيلية الجديد وهو امتداد لشارع الوعب وتصميم رائع وواسع لكن وصلت لتقاطع وقفت عند الإشارة وانتبهت لوجود حفر عينات لطبقات الاسفلت وكانت حول 10 عينات في هذا التقاطع فقط .. هذي العينات تحفر لين آخر طبقات الدفان والدك والاسفلت وتؤخذ للمختبر والمشكلة تبقى الفتحات هذي بقطر 15 سم سنين طويلة بدون سد وصحيح ما تأثر في السيارات الا الرياضية تسمع لها صوت بسيط .. تسمى Bore Holes .. وتوجد في منطقتنا لها عمر طويل يتعدى ال 15 سنة الآن لم يتم سدها.
هذا شارع رئيسي وفي تقاطع واحد منه لكن بعد التقاطع كل شوي أشوف كم حفرة ولا قدرت أصور كل الحفر والحفر واضحة حتى للي نظره ضعيف .. الغريبة تكلفة هذي الحفر عالية وعمل الاختبارات عليها غالية كثير ولمصلحة مختبرات التربة ولو عدينا اللي على الطريق ممكن نوصل لرقم كبير جداً .. والمشكلة الأكبر تبقى مفتوحة سنين وتسرب مياه بدرجة كبيرة للبنية التحتية للطريق وتخرب التربة المدكوكة بعمل فجوات بينها تنزل وتستوي التعرجات والمطبات والتشققات بعد فترة وتتأثر طبقات الاسفلت وكذلك طبقات الدفان وتطلع ملامح الشيخوخة على الطريق سريعاً .. ونرجع لتقارير الاستشاريين اللي ما يركزون على صلب المشاكل هذي ويقولون ارض قطر ضعيفة والمياه الجوفية ارتفعت ويركزون على اسباب ثانية تعتبر جوهرية بس هذا سبب جوهري واضح أكثر.
والسبب الجوهري الثاني هو التصميم يفتقد لحماية الطبقة المدكوكة صح ويفتقد لتقوية التربة المدكوكة بمواد اسمنتية بسيطة وبألياف خاصة تعطي تماسك وقوة وصلابة طول العمر وبسعر معقول وهذي تم تنفيذها في الدفنة من عشرات السنين بسبب وجود شركات عالمية تدفن ذاك الوقت وخبرات صادقة وقوية.
هذي صورة التقطتها على السريع ممكن تبين فيها الحفر
أتمنى توصل القائمين على اشغال من الإدارة العليا لأن مبررات الفشل بعدين كثيرة لكن دراسات أسباب الضعف بواقعية ومهنية مفقودة
|
رد مع اقتباس
المشاركة الأصلية كتبت بواسطة sara jsm
