افتتاح معلم سياحي في تركيا

[سالم الزهران]

التركي عنده مشكلة تواصل مع العالم كله، لذلك من المفروض اذا صرنا نتردد على بلد وحبيناها نتعلم شوي من العبارات والمصطلحات والأمثال و المداعبات، والله هذي تفرق كثيييييير و تحسس التركي انه انسان لغته مفهومه وتراثه في محل التقدير من قبلنا، فعلى طول يتحول من مجرد مقدم خدمة الى مرحلة الجمالة والإكرام.

[سالم الزهران]

ودي اختم بشغله اننا في العالم الاسلامي باقي متأخرين تنظيمياََ وفي نفس الوقت نبغي من موظغينا يقدمون خدمة أوربية المعايير، لذلك ف اي مكان بالعالم الايحاء بأنك ستعطي بقشيش يخلي امورك سالكة، فلا تتوقع انك بتتخلص من حكاية البقشيش واعتبرها صدقة و ارفقها بابتسامه وكلمة لا تواخذونا هذا اللي معنا... ونكون ايتمتعنا وما خالفنا رغباتنا او لقينا احد يبتزنا.. الى حد ما ومع التعامل تزيد الثقة والمعرفة.

[Dana’1]

اساسا التركي اذا تبين انك خايف او مرتبك راحت عليك
رد عليه بطريقته تماما لو فيها مافيها تلاقيه يقمط.
شفت عراقيه حشرت لها موظفين الإستقبال بأحد فنادق منطقة لِي لي (الخمس نجوم )هي مع اخوها كان عندهم مكتب سياحي لكن هي اللي جات للفندق تتفاهم معهم اللي بالإستقبال يبغون ينصبون على النزيل بس الحمدلله سلم منهم.
لو تسمع أصواتهم عليها و وجيه ودرة هي من ردت عليهم بنفس أسلوبهم و أقوى و لا كلمة حرفيا و لا كلمة و فوقها اعتذار
و إذا على الالقاب
الأتراك زي المصريين يحبون الألقاب و اللي بعضها تجي من لغه ثانيه كاليونانية مثل أفندي بس يفتخرون فيها.
و المصريين يا باشا من الأتراك.
والعرب يحبون يالذيب لا لا يحبون ياالأمير يا الشيخ و الكفو يالعزوه و أنت رايح
و الهنود يحبون بهي ساهب او باي ساب
الأغلب يحبون الالقاب و الإحترام أخوي سالم لكن اذا ماقلتها لهم ما ينفسون عليك .. و إن قلتها ممكن البعض ينبسط بها و تلين قلوب.
و الناس ماهي ملزومه تقول ياسيد و يا سيدة أو اي لقب الا اذا يمثل صفه رسمة بدولته بين الموظفين
لكن ملزومين نحترم و نُحترم ( المحترمين طبعا و القوانين).
لطفا لو سمحت تفضل شكرا جزاك الله خير... تكفي و توفي.
و السلام خير ختام

[سالم الزهران]

صباح الخير، هو المهم ف الموضوع ان تركيا فيها احتشام ومساجد تصدح بالصلوات وهذا اللي يخليها مميزة عندي. وفي نفس الوقت ما اكون مثل بعض العرب اللي عنده نظرة مبالغ فيها لتركيا حتى في احسن اوقاتها اللي تعيشها الآن.

السائح يجب ان يكون عاقل و يعرف قصده وغايته، و البلاد فيها امكانيات اهم من السياحة منها الاستثمار والتجارة لكن لمن؟ لأهل الشأن وللي يعرف الخير والشر.

تركيا استضافت عرب لاجئين ما استضافوهم العرب ومع ذلك حتى الاتراك الطيببن ملوا وزهقوا من كثرة الشوام والعراقيين في بلادهم.. والشوام بالذات سنعهم غريب و مثل اللي محروم وشاف النعمة، لذلك هم اكثر الاجانب اللي الاتراك ما يبونهم.

للاسف نوعية العرب هاليومين عكست صورة نمطية سلبية عند الاتراك، فنحن في نظرهم اما خليجي مترف ومستكبر واما لاجئ سوري تسبب في رفع الاجارات وسكن حتى في اماكن ما كان الاتراك يتخيلونها.

مما يزعجني في تركيا هو التضارب بين الدعايتين الاسلامية و (العلمانية) اللي يمثلها دستور وانظمة البلاد، فحتى مع ثقل الاسلاميين وكثرتهم الا ان شوية حثالات علمانيبن يغلبون ذيج الكثرة لان النظام يدعم العلماني ضد الاسلامي.. والزعيم الطيب اردوغان ما حقق مكاسب الا لانه جمع بين النقيضين (الاسلام والعلمانية) ، حتى في احد مقابلاته يقول اردوغان انه استشار رموز من جماعة اخوان مصر وقالوا له ان شغلك صحيح وانه امورك تمام.

انا العبد الفقير من اللي يثني على تركيا وعلى اردوغان بما هو فيه وفي نفس الوقت لا اوقع لهم على بياض ان ما قاموا بهزفي تركيا هو نموذج يحتذى.

فنحن فيما بيننا يا مسلمين منا من يقول الاتراك لابد يسوون جذيه والتغيير ما يحصل بين يوم وليلة، ونا واللي مثلي نشوف للاسف اننا مع الوقت صرنا نقتنع بذاك الشكل الاسمي للدولة المسلمة وندافع عن اي نظام او قانون اساسه علماني كما هو الحال ف تركيا، بل صرنا نطمح لان نصل لحالة تركيا؟

للأسف التدرج تدرجنا فيه نحن يالمسلمين وصرنا نيمح بشيء من المنكر ولدواعي السياحة والانفتاح الخ، بينما فتحنا الباب على مصراعية لعلمنة الانظمة والقوانين.. الخ

نرجع لاردوغان وموازنته العجيبة وللعلم انا ادعمه ف مقابل الجلاب (ولا تواخذوني في العبارة) اللي مترشحين ضده، لكن نفس فهم اردوغان للدين وللحكم هذي حالة تدرجت فيها تركيا مثل ما تكلمت سابقاََ، اقصد ذاك التدرج اللي خفف حمية الدين بدل ما يعززها، وكرس حالة نمطية كنت اشوفها من عشرين سنة عند الاتراك.. وهي انك تحصل تركي في مقهى جالس وامامه بطل راكي مالهم وفي نفس الوقت ماسك في يمينه سبحة، وفي يساره مولع سجاره.. واذا جا يقوم يقول يا الله؟

[سالم الزهران]

هذي التناقضات موجودة ببلادنا حتى وبقطر وبالخليج عموماََ، وهي من آثار العولمة ومن الفهم السيء للدين والحريات، وكالعادة تصير السالفة فيها نوع من الطرح السياسي عند البعض والتحفطات عند البعض الآخر، وهي نفس القضية ان طرحت الدين واجهتك السياسة وان تكلمت في السياسة بتواجهك القيم الدينية اللي انت مؤمن فيها، ونجد من يفهم ونجد من يتظاهر بعدم الفهم ومن يتهم وما نقول الا اللهم اننا لا نعلم الا ما علمتنا وانا نعوذ بك من جهلنا في حقك وحق دينك وحقوق المسلمين علينا اميرهم ووزيرهم و صغيرهم قبل كبيرهم، ونعوذ لك من شتات الامر وتفرق الكلمة و سطوة الفاسد وعجز الثقة.

[Dana’1]

ماهي موجودة بالخليج عموما هالتنقضات الجوهريه لكن نعم موجودة ببعض البلدان و طريقة الكلام عنها و الإنتقاد و التعامل معها تختلف عن غيرها من البلاد و هذا هو التناقض بعينه.

[سالم الزهران]

حياك يا اخت دانة، الحين ف الخليج ليش الاعلام ما يدعو الناس للقيم الدينية ويعزز الثقافة الأصيلة!

اللي قاعد يسويه الإعلام هو تغيير مفاهيم الناس الدينية والثقافية عن طريق المسلسلات والندوات والاعلانات وعن طريق المظهر العام للمذيع والمذيعة بغض النظر عن مستوى الكفاءة عند المذيع! ما حصل لاحظتي وجود أخوات في التلفزيون! ووحدة فيهم تآكل الحروف، الراء عندها غاء! اتكلم عن تلفزيون قطر وبقية تلفزيونات الخليج اسوء بمراحل.

الحين المحافظين في تركيا (اللي ما نحب سياستها) يقدرون ينتجون افلام ومسلسلات وبرامج دينية، والعلمانيين يسوون العكس ينتجون مسلسلات وافلام وبرامج تحارب الدين والثقافة.

الحين هل يوجد في تلفزيونات الخليج نظام ساعة وساعة (اقصد مسلسل ديني ومسلسل هابط؟)

اظن الاغلب بيقول ان برامج التلفزيون طالعة من مطبخ علماني هدفه سلخ المجتمع وتنشئة جيل متهالك لا يرتبط بدين ولا يعرف عادات ولا سنع.

فهذا مثال على تناقض تشترك فيها التلفزيونات الخليجية اللي تتوجه من ريموت كنترول واحد وهذا الوضع لو اخذناه كمثال للمقارنة نلقى الأتراك يقدرون يصنعون اعلام بديل ويفتحون قنوات ويعبرون عن رأيهم وقناعتهم الدينية والثقافية اللي تخالف سياسة العلمنة والتهتك اللي ملأ الآفاق ودخل الى بلدان المسلمين من التلفزيون والانترنت والأجهزة الذكية.

[Dana’1]

يحيك يا أخ سالم ، الخليج فيه من يدعو للخير و يعزز الثقافه الدينية و التراثيه بالإعلام و بالواقع
و بالمقابل فيه برامج مفتوحه و عامه مثل مافيه دينية التنوع موجود و الإختيار للمشاهد.
و التلفزيون غالبا ماعاد له جوه مثل قبل الحين كله بالجوال و كلن يدخل المواقع اللي يحبها و الحسابات اللي بالبرامج تكون على جوه عندك من التويتر لين التيك توك و السناب و أنت رايح.
و العادات و السنع أول ما يعرفها البيبي و الطفل من بيت أهله من ثم جماعته و الحي من ثم المدرسة و المجتمع بشكل عام.
وحفاظ كتاب الله و الحديث و الذكر شفنا حلقاتهم بالحرمين الشريفين و يجون من كل العادم الإسلامي
و أيضا بالمساجد و الدور المخصصه لهذا العلم بالمملكة العربية السعودية

أنا ما تهمني تركيا و سياستها نهائي هذا أمر خاص فيهم و أتمنى لنا و لهم و لكل شعب مسلم الخير و رغد الحياة بس طرحت اللي شفته عندهم الإحتشام موجود عندنا وعندهم و السفور موجود ببلداننا وهم عندهم السفور بزيادة .
و حتى مع المحجبات عندهم أمور فيها سهالات أنا مثلا رغم أنهم يشوفوني بلبسي ومع ذالك كم مره واحد لما نتعرض لمواقف مع عوايل كم و كم من الرجال يمد يدة صوبي يبغى يصافحني عادي عندهم رغم أن حتى أهلهم لابسين الحجاب.
ما أخذ المسأله إنها قلة ذوق معي رغم الإختلاف لأن هم كمجتمع بغالبيته عادي جدا هذا الشي الا العوائل الملتزمه جدا بالدين و العادات القرويه.
طبعا غير عاد العادات الثانيه المتعلقه بالعين و الرقص الصوفي النقشبندي بالمساجد أول ماسمعت كلمة نقشبند عندهم و منهم و لما يقولك التركي العادي هذا نقشبندي يعني مره واااو و عالم و يطلب منه الدعاء.. بإستثناء العلماني و الملتزم بالكتاب و السنه و المتعلمين بصفه عامه مايعطونهم فوق مكانتهم.

[سالم الزهران]

فعلاََ الاتراك من الناحية الدينية مختطفين والصوفية هي اللي اضعفت الدولة العثمانية

[سالم الزهران]

في يوم من الأيام استغرب تركي من توجيهي لنصيحة له، ورغم أن النصيحة دينية الا أن هذا الأمر ما شفع لي كوني عربي وخليجي ويبين علي أني ملتزم.

هذي بعد مب خاصة في التركي لكن موجودة عند العرب، اقصد أنك ربما تظن نفسك مثقف أو ذو اطلاع أكثر من الشخص الملتزم/المطوع /التقليدي اللي ما يصبّح في كوفي شوب راقي ويصور فنجان القهوة كل يوم!

يمكن من لطفك وحسن ظنك أن تعتقد أن الملتزمين أكثر معرفة أو دراية بالأمور الدينية وبس، لكن بتتفاجأ اذا عرفت أن الملتزمين من الرجال والنساء أوسع اطلاعاََ من البقية. فهذي الصورة النمطية أن الملتزم او المحافظ اقل انفتاح او معرفة بثقافة الآخر مب دقيقة، بل العكس هو الصحيح فنسبة كبيرة من الملتزمين لديهم دافع ديني للدعوة وإرشاد الآخرين اكثر من الإنسان اللي يبين انه كول ويلملم في كتب الطاقة البشرية وكيف تكسب الآخرين وروايات الفستق والحمص.. الخ.

يمكن هالنقطة مالها صلة بالموضوع السياحي هذا لكن في النهاية نبغي نتبادل الآراء والخواطر اللي تحوم حول الآخر وشلون تتعامل معه سواء كنت سائح أو زميل عمل الخ.