مراجعة التصاميم المعمارية وابداء الملاحظات عليها (محدث)

[sara jsm]

كل الدرايش بتكون داخلة بين 15 و 10 سم من الخارج وبتكون فيه انارة محيطية تجميلية وأعتقد هذا كفاية مع انارة خطية في الكسرات المحددة في الحائط في قليل منها أو أماكن معينة

حلو مسوي ديسكو حق الحمام ..

[معماري قطري]

حلو مسوي ديسكو حق الحمام ..

عيدج مبارك حجية

قصدج دسكاونت؟

[معماري قطري]

من المخططات المهمة هو مخطط السقف وتفاصيل وأماكن التكييف وهذي لازم تنسق مع مصمم التكييف وكثير من الإستشاريين يغفلونها ويتركونها للمقاول وممكن تذكر في العقد كملاحظة وكذلك الحال مع تخطيط سلوبات السكريد وفتحات صرف ماي المطر وتفاصيلها ووين تكون خارجية أو في الجدار

هذا مخطط السقف مبدئياً وأكيد عليه شوية إضافات خصوصاً للتكييف



بالنسبة لبايبات ماي المطر كلها بتكون في الغلاف الخارجي للجدار اللي بسمك 40 سم وبتكون مع بايبات الصرف الصحي اليمين بس بينزل صوب حوض السباحة وبيتمدد له تحت الأرض لين الزراعة .. وعلشان نرضي البلدية بنشيل الزراعة وبنحط سوك أوي لو يبون وبعدين بنسوي زراعة حولها .. نفس هذي البايبات بتنشبك معاها بايبات التكييف الصغيرة

[معماري قطري]

بالنسبة لتصميم بيت ولدي البلدية رجعوا للتعقيدات السابقة التافهة .. مع إنهم وافقوا في البداية صراحة شغل يهال كل يوم كلمة

ولتصميم بيتي وحتى بيت ولدي بنكمله حسب ما يبون بس باراجع أحد المدراء وبإذن الله تتسهل أُموري للبيتين .. مشكلتي باسلم الاستشاري يطبق التعديلات وباسافر وأتمنى تكون جاهزة لين رجعت حتى أراجع بخصوصها

رسيت على هذي الواجهة وعدلت ارتفاع المجلس لتحت ال 6.5 متر اللي طالبينها بس عندي المنور بيكون حول 7.5 متر أبغيه بارز ويبين وبعضهم يقولون ممكن المنور زجاج وما يدخل في الإرتفاع والله أعلم .. البيت وراء حدود الارض 22 متر من جهة الشارع ولا يعتبر مواجه الشارع لأن فيه بعد كبير الواجهة بتكون للمجلس وهذي النقطة ما يفهمونها ولو حركت البيت ليواجه الشارع قصة بيتغير التصميم تغيير جذري .. جهة الجار 18 متر وجبت لهم موافقة الجار .. وفوق ال 18 متر فيه سكة 4 أمتار وجاري بيخلي بيته مقابل جنوب يعني بيعطي بيتي ظهره ولو خلاه مقابل شمال أو شرق هو حر ولا يأثر تفكير مهندسي البلدية رجعي وشباب قليلي خبرة

عندي ارتفاع البوابة 5.9 متر هذي بعد ممكن يعتبرونها كارثة تصميمية



زدت عرض الخدمات وراء حوض السباحة بمقدار 40 سم ونزل عرض الممر ل 1.6 متر قبل كان مترين كثيرة حتى 1.6 فوق الحاجة بس أشوف داخلياً 2.4 عمق يكفي



وأضفت دورة مياه في ليوان المجلس إضافية وقريبة من المجلس الصغير

في المطبخ الداخلي غيرت التوزيع قليل وأشوف هذا أنسب مع عمل الكاونترات للمغسلة وللفرن بعمق 90 سم لفريم الدريشة يعطي إنفتاح أكبر والدريشة تكون ثابتة على رخام الكاونتر بدون طابوق .. يعني ممكن يكون فيه جزء من الكاونتر غير مستخدم .. والجزيرة الوسطية ممكن تكون فيها بس مغسلة مفردة وسطح عمل للتحضير



الأبواب الداخلية الزجاجية بتكون منزلقة اوكورديون تنفتح بالكامل وخليت الحديقة مفتوحة أكثر خالية من أي أثاث الجلسة سويتها بس في الزاوية قرب الشلال وقرب الدريشة وشلت اللنك بين المطبخ الخارجي والداخلي حتى يكون عندي انفتاح رؤية أكثر .. ممكن أسوي سقف خشبي وبولي كاربونيت فوق لحماية الخشب ولتخفيف النور على المنطقة الوسطى وبتكون مزروعة باصيصات

هذا تقريب لمنطقة المطبخ الداخلي والخارجي



أتمنى الصور واضحة والفكرة كذلك .. أضفت درج حلزوني لخدمة السقف .. بتكون فيه زراعة سقفية مقابل جلسة البنتهاوس وممكن تكون فيه مكيفات للبنتهاوس فوق سقف البنتهاوس

في الصورة الأُولى أضفت غطاء قرميد على السور في بعض الأجزاء كتشكيل ديكوري للواجهة ولموازنة القرميد الموجود على سقف غرفة المكتب وبتكون فيه انارة مخفية تحت امتداد القرميد .. ما ابي انارات قوية ممكن بتكون انارة في سقف البوابة تنور داخلها وانارة خاصة بليوان المجلس انارة جدارية موزونة وعندنا انارة الشوارع بتكون جاهزة ومشروع البنية التحتية ينتهون منه في شهر 4 سنة 2024 مع المواقف ما قصروا أشغال ولا قصر إستشاريهم إيطال كونسالت ومديره الطيب عبدالله الصادق ( أبو غازي ) اللي وقف مع طلبات أصحاب المنطقة كلهم ووضحها لأشغال

[معماري قطري]

في الصورة الأولى يبين برج الدرج الخارجي بشكله المربع بارز فيه فتحتين جنب بعض وتحتهم بعد نفس الفتحات بعرض 40 سم وارتفاع متر و 20 وبيكون فيهم حديد مشغول أو درابزين الدرج الداخلي بيكفي كحماية والباب تحت حديد ينقفل ويفتح من الداخل حتى يكون هذا الدرج كمهرب للطواريء بعد

هنا أوضح يمين الصورة .. فيه تكييف بيكون خاص بالحديقة الداخلية ممكن صحراوي قرب الدرج بيكون وبعيد عن جلسة السقف لو بنسويها وناوي اركب جهاز للرذاذ أو اللي يسمونه ضباب لهذي الحديقة بعد بيكون فوق وسهلة صيانته من خلال الركوب بالدرج هذا

[معماري قطري]

حالياً أقرأ كتاب عن 1000 سؤال في الهندسة المعمارية والمدنية وفيه شوية ملاحظات وتوضيحات حبيت أوضحها لكم .. المؤلفين وهم 2 كان المفروض يوضحون أكثر

هذا أحد الأسئلة المضللة للعامة من الناس .. البعض ممكن يحسبه شلخ عادي وغريب .. لكن هذا فاصل بناء المفروض معبأ بمادة مرنة تسد الفاصل وتسمح بحركة أي جانب من المبنى في أي اتجاه .. يعتبر في نفس الوقت فاصل تمدد بس هو في الأساس فاصل انشائي يفصل المبنى بحيث ممكن هدم جزء وترك جزء

باواصل معاكم في شرح الأسئلة اللي شوي فيها لبس وباشوف شلون لو أقدر أنزل الكتاب ممكن اللي يحب يستفيد من باقي الأسئلة

[معماري قطري]

مثل ما ذكر المؤلف تتم تغطيته بقطعة ألمنيوم تكون ثابتة في جزء متحركة في الآخر تغطي فقط مع تعبئت الداخل بأي مادة مرنة منعاً للحشرات والنمل ومع وضع مبيد مناسب وطويل الأمد .. السيليكون ممكن يكون سيء لكن نوع جيد منه ممكن ينفع أو من المواد التخصصية وطويلة العمر

[معماري قطري]

يفترض يذكر هذا الشرط في عقد المقاولات وتذكر إجراءات الفحص وعدد العينات وبأن يجب يكون كل العينات تعطي قوة 90% وظروف تخزين العينات انا أشوفها تكون في الموقع وتنرش بالماء مثل باقي الخرسانة حتى تعطينا مقياس واضح .. وتذكر تكلفة فحص الكور تست على من وتذكر لو ثبت أن نتيجة الكور تست سلبية فالحل يكون في الهدم وإعادة البناء

[معماري قطري]

آسف الصورة طلعت صغيرة وإن شاء الله تكون واضحة ومقروءة الكتابة لكم

[معماري قطري]

سالفة إننا نرش الخرسانة صباحاً وليلاً فقط يمكن تسبب لنا مشكلة كبيرة لو نشفت بسرعة لأي ظرف من الظروف .. يفترض ما تجف وتكون رطبة على طول لمدة 28 يوم ونتجاوز ونقللها لفترات اقل حسب العنصر الخرساني .. كذلك توجد خرسانات بمواصفات معينة لا تحتاج إدامة وهذي تفرق .. في الوضع العادي التغطية بالخيش وفوقه بلاستيك ممكن افضل بس نتأكد إن الخيش رطب دوم ونرطبه بالماء كلما جف ونرجع نحميه بالبلاستيك حتى ما يتبخر الماي



المعالجة بالرمل ونشارة الخشب أول مرة أعرفها وعلى العموم كلها رؤوس أقلام تحتاج لإسهاب وتوضيح يمكن وضحت أهمها

[معماري قطري]

بس متعوا نظركم بحجم الأساسات هذي مثلها كلش ما تشوفون في قطر

[معماري قطري]

معليش إسمحوا لي أتابع لأن الكتاب فيه 1000 سؤال وبعضها إجابتها واضحة وسهلة لكن بعضها تحتاج إسهاب

مثال أحد الأسئلة عن درجات حرارة الصب المناسبة وكان الرد ما تزيد عن 35 ولا تقل عن 4 درجات .. هذا واضح واللي غير واضح إن هذا المجال من درجات الحرارة لازم يستمر أقل شيء لفترة اسبوعين ولو لفترة 4 أسابيع أكيد أفضل

تجاوزاً بداية البناء هذا الوقت وقصدي صب الخرسانات مناسب حتى لو ارتفعت الحرارة في وقت معين لحدود 40 درجة مئوية



هذي طريقة مطورة ومسهلة للهوردي بعمل فراغات دائرية ( هواء ) وكبيرة بحجم الكور هذي .. الشكل الكروي تتحرك حوله الخرسانة وتملأ الفراغات وأكيد الوزن أقل بس لازم بعد لها حسابات هندسية وجسور مخفية .. تفرق عن الهوردي التقليدي في انها ما لها أعصاب متكررة ومتقاربة فقط جسور رئيسية متباعدة

[معماري قطري]

هذي مهم نعرفها حتى لو احتجنا لتقوية عمود متكسر وتنفع للجسور والأسقف بطريقة مقاربة تختلف قليلاً وأكيد المبنى قبلها يحتاج تدعيم ومتابعة هندسية اشراف جيد وتوثيق بالتصوير ليستوي شيء خطأ بالإنجليزي تسمى Jacketing كأنك تلبس العمود جاكيت جديد .. أوقات تضطر حتى تقوي العمود تزيد مساحة مقطعه وما يسمى الأشاير هذي قطع حديد تنغرس في العمود بالعرض وما يضرنا شيء لو سوينا فتحة كاملة بالدريل من جهة لجهة وأدخلنا فيها قطعة حديد وعبيناها ايبوكس لاصق قبل



أعتقد الصورة واضحة للعمود



شكله في أمس الحاجة لتركيب الكانات ( Stirrups ) ما عرفت الكانات الا بعد متابعتي للفيديوهات وأحب الإسم العلمي لها لأنه متعارف عليه .. وكذلك سحبوا الحديد سووه منحني والمفروض يحافظون على استقامته أو أثناء التكسير حوله حصل هبوط خلى الحديد ينحني ولا أشوف دعامات قوية وكافية

[معماري قطري]

أي قاريء عادي يستحيل يفهم هالكلام وانا واجهتني صعوبة في فهم الرِجل .. لين اكتشفت المقصود بها حديد الربط أو الترسية بين الجسر والعمود وهذا موضوع المفروض ما علينا منه ومسؤولين عنه الإستشاري المصمم والمشرف والمقاول .. شروط عامة وأساسيات في البنيان بطريقة أعمدة وجسور وأسقف



واضح الحديد العلوي اللاف داخل العمود ولازم يدخل داخل العمود مسافة لها حسبة معينة أو يكون لاف على شكل يو وراجع من تحت في الجسر وهذا لضمان ثبات وقوة اتصال العمود بالجسر

[معماري قطري]

سؤال عن فائدة الكانات في الأعمدة وهذا الرد عليه وهذا واضح لكن مهم تعرف إن مفتاح الكانة اللي هو في الزاوية العليا يسار هذا المفروض يكون تبادلي يعني الكانة اللي تحتها واللي فوقها تكون تحت يمين مفتاحها .. كذلك مهم نعرف إن تكثيف الكانات في الثلث العلوي والسفلي ضروري مثل لو في الوسط كل 20 سم بين كانة وكانة الثلث العلوي كل 15 أو 12 سم أو حتى 10 سم التكلفة تزيد قليل بس مهم وبحسبة انشائية لكن نعرف حتى نلاحظ الفروقات ذي .. كذلك مهم الكانات تستمر في تداخل العمود مع الجسور والأرضيات