يوتيوبيات البناء .. مقاطع تثقيفية متجددة

[معماري قطري]

هذا بيت في سيري إحدى مدن بريطانيا أتوقع .. خذت منه صورة لباب المدخل وايد تناقشنا فيه مع شباب قروب بناء وتصميم وانا ضد المبالغة في الإرتفاع ومصمم بيتي وبيت ولدي على ارتفاع واحد لجميع الأبواب داخلية وخارجية 260 سم وأفكر في المحوري لو حصلت نوعية زينة وعازلة للغبار والصوت وبسعر معقول



تابعوا فيه تفاصيل كثيرة ونمط ثاني من التصميم والبناء

[معماري قطري]

[سالم الزهران]

صباح الخير بو عبدالله، يعطيك العافية بيت الانجليزية هذي مميز، ينطبق عليه المقولة (السعة لا بارك الله في الضيج).. التصميم فيه افكار وفيه تعمد لتكبير الممرات. تنفيذ حلو لكن الديكور بعد فيه اختيارات مب حلوه حتى في الإضاءة. بعد مخصصين غرفة مال قرقيعان.. هذي مفتاحها تعلقه ف مشبك مثل لوليين؛)

[سالم الزهران]

يا هلا إخوي بو زيد صباح النور

تركيا وغالب الدول الكبيرة تبني مدن وإحنا نقلدهم بس أوقات تقليدنا فيه أخطاء وأماني كبيرة وإبهار زايد يفقدنا مصداقيتنا .. دبي تشتغل شغل احترافي وبالتدريج ولها عمر طويل .. المسئلة مسئلة منظومة متكاملة وأُسلوب حياة وعيش ومدنية .. إن شاء مشاريع المدن والمشاريع الكبرى معاها تنجح وتستمر حتى لو تخلص على مراحل المهم تكون فيها خطة جاذبة للجميع خصوصاً أهل البلاد

عدل كلامك والله، الحين يا زين المكتوب والمعلن و يا بعد الشيء اللي يتم تنفيذه على ارض الواقع.

اي مسعول أو مسؤول ودي اقول له هذا التخطيط والاهداف زينة لو بتحقق! بيقول لك : وليش ما تحقق؟ قل له مدري اصل عبد السميع حط البتاع دوكها ونا مليش دعوى

[سالم الزهران]

فيه فيديو لمسؤول تركي رئيس بلدية من بلديات اسطمبول زار موقع وقابل مهندس المشروع، ولاحظ أن توزيع الحديد غلط والمسؤول بنفسه مهندز متقاعد وحشرهم بالاسئلة ههه اذا حصلت المقطع يوتيوب بحطه هنيه لكن اذا انستا بطرشه لك

[معماري قطري]

صباح الخير بو عبدالله، يعطيك العافية بيت الانجليزية هذي مميز، ينطبق عليه المقولة (السعة لا بارك الله في الضيج).. التصميم فيه افكار وفيه تعمد لتكبير الممرات. تنفيذ حلو لكن الديكور بعد فيه اختيارات مب حلوه حتى في الإضاءة. بعد مخصصين غرفة مال قرقيعان.. هذي مفتاحها تعلقه ف مشبك مثل لوليين؛)

مساء الأنوار بو زيد .. الإنجليز في تأثيثهم دوم متحفظين وهي بنفسها تقول غرف كثيرة تتعدل ويضاف لها الأثاث بالتدريج حسب الحاجة وهذا أشوفه صح لأن بيت أي واحد ما يعتبر معرض أثاث ولازم يحتاج وقت حتى يستغل كل غرفة فيه .. الأولوية حق المناطق الرئيسية

السعة زينة بس شوف منطقة المدخل والدبل هايت ارتفاعها معقول مب ارتفاعاتنا وبعدين الزجاج معمول قطعة وحدة والفريم ما يبين حتى أو مسوينه مخفي .. المنطقة عريضة حول 4 أو 5 متر منطقة المدخل قصدي ولكن عمقها حول متر ونص ويمكن تحت .. تكفي تعطيك إنبهار واحساس مختلف بالمدخل والنور اللي يجيك من انفتاح النوافذ والسكايلايت

عندنا حتى لو سوينا نوافذ كبيرة لازم بنغطيها بستاير ولازم نراعي الخصوصية لذلك انا في تصميم بيت ولدي فكرت في هذا الشيء على سبيل المثال حتى النوافذ العلوية سويتها أصغر من التحتية اللي كبرتها وخليتها واصلة للأرض والدبل هايت هنا في تصميمنا وين من قلب دبل هايت حول 9 متر ولو تحسب الإرتفاع لقمة المنور الهرمي اللي بيكون تقريباً في وسطه حول 10.5 متر .. يعني مستحيل تقول لي ركب ستاير طويلة للدرايش والا ليتات فوق هذي يبي لها ميزانية مفتوحة للتغيير بس

عاد بالصدفة أنسق شغل التكييف والأسقف مع شركة بتسوي هذا الشغل والمشكلة ما يستوعبون مديرهم يقول لي أول مرة واحد يطلب منا هالشيء واقترح تكييف منطقة الدبل هايت بكج .. قلت له ابيها تكييفلس .. ههههه ما ادري ليش حاب لس النافية ( هذي لغة عربية يا بو زيد ) تصدق انصدم قال لازم نزيد تكييف الصالات قلت له كشكها متعرضهاش .. يا اخوي ما يركزون الا في شكثر يقدرون يبيعونك تجهيزات لا ولا يحسبون حساب العزل الحراري اللي انت مسويه

لكن الحمد لله تصميم التكييف وعقده ماشي زين باحط صورة للدبل هايت والأبعاد فيه حق بيت ولدي



هو بيكون فيه فتحة لدخول الهواء قبل طلبت جهاز ينقي الهواء ويدخله لهذا القسم هواء خارجي لموازنة ضغط الهواء المسحوب عن طريق مراوح السحب .. مقاول قال لي موجود من متسوبيشي بعد ومقاول ثاني اللي شكلي باتفق معاه ضايع شوي قال لي مكينة سحب الرطوبة اللي للمسابح قلت له ما ابي سحب ابي إدخال هواء نسبة قليلة للدبل هايت ومنه خلال فتحات فوق الجبس مخفية يسوي دورة للغرف تجديد هواء بنسبة بسيطة ومنها لدورات المياه تسحب فيها المراوح وقت الإستخدام فقط يعني نسبة الهواء المجدد معقولة ومدروسة وبنفس الوقت الهواء الداخل كبديل ممكن التحكم فيه لو ما نفعت السالفة واستوى حر زيادة مثلاً

[معماري قطري]

فيه فيديو لمسؤول تركي رئيس بلدية من بلديات اسطمبول زار موقع وقابل مهندس المشروع، ولاحظ أن توزيع الحديد غلط والمسؤول بنفسه مهندز متقاعد وحشرهم بالاسئلة ههه اذا حصلت المقطع يوتيوب بحطه هنيه لكن اذا انستا بطرشه لك

حتى الانستا حط الرابط عادي

[معماري قطري]

هذي صورة مقتبسة من الفيديو اللاحق بخصوص تصميم بيت في الكويت .. معروف عندهم البيسمنت ممكن يعملونه على كامل المساحة للأرض بس مستغرب كلش ما فيه تهوية ولا إنارة للغرف تحت كلها تكون من المدخل .. شلون الخدمات والصرف الصحي قصص كثيرة والموضوع بيكون مزعج .. بالنسبة لمواقف السيارات ممكنة حق 4 بس لازم نطلع اللي ورا حتى يطلعون اللي جدام .. وباب المجلس يبين لي لو انعمل باب واحد عريض شوي بدال صفاقتين أفضل مساحته حول 8 في 8 ما يناسب باب صفاقتين وبعدين حلاته الباب في الوسط وتوزيع الكراسي شكل حرف يو مقابل الباب والتلفزيون جنب الباب وبعد ممكن نسوي الباب قزاز متصل مع دريشة قزاز لأن فتحة الرامب قريبة يدخل منها نور



ما ابغي أكثر الصور بس أفضل يسوي رامب لمدخل المطبخ في الدور الأرضي لسهولة نقل الأغراض وممكن يستعمل في الحالات الإضطرارية كمدخل لأي كرسي متحرك وعنده طول يسمح

أفكار حلوة ويحتاج تطوير أكيد وانا دوم مع غرف الملابس المغلقة بباب أفضل للأمان من سرقات الخدم

[معماري قطري]

بديت أغيرها في بيتي سهلة وإضاءتها أحلى حتى النيون الطويل الدائري فيه بس يتغير الفكسر ماله وانارته وايد زينة اللي مايل للأصفر لدورات المياه ممكن ناخذ شوي مايل للأبيض وفيه بعد الدائري بأحجام عدة 20 وتحت وأتوقع بعد أكبر من 20 يجي دائري كبير

[معماري قطري]

إنتاج طابوق الفوم .. العملية سهلة وما تكلف ولا تحتاج معدات غالية ومواد كثيرة والمفروض يكون رخيص

[معماري قطري]

هذا تأسيس شبكة صرف قبل الرافت فاونديشن حق عمارة وشغل معقد وايد حتى يركبون الجسور للصب يعني تأسيس شبكة وصب عليها

[سالم الزهران]

هذا تأسيس شبكة صرف قبل الرافت فاونديشن حق عمارة وشغل معقد وايد حتى يركبون الجسور للصب يعني تأسيس شبكة وصب عليها

حوسه ذي الطريقة، نظام ادفن وانسى

[معماري قطري]

حوسه ذي الطريقة، نظام ادفن وانسى

صحيح مضطرين عليها صج مغامرة

المفروض حتى الدفن لا لأنها داخلية لو صار تسريب إخترب التأسيس وانت ما تدري به .. يمكن مسوين نظام الرافت تحت وهنا بيركبون جسور شغالين عليها وبيدخلون البايبات هذي ضمن الجسور وحولها دفان والله أعلم وبيقومون جدران على الجسور

[معماري قطري]

[معماري قطري]