اقتباس المشاركة الأصلية كتبت بواسطة ظلال الورد مشاهدة المشاركة

*
*
*

معمـــــاري قطــــــر



يا مرحبا الساع مهندسنا الكبير والمشرف على بناء بيوت كل الي في المنتدى


* بالنسبة للطابوق انا وايد مستانسة على العازل الي موجود فيه وتوقعت بسببه بيتي بيكون بارد صيفا ودافئ شتاء


* أكيد بركب حجر صناعي خلف الطابوق وهني أريد أسئلك:-
الحجر الصناعي شو أحسن طريقة لتركيبه هل الاسمنت ولا البراغي ولا الاثنين مع بعض ؟

الطابوق هذا يعطي عزل مسكت حسب الإختبارات كطابوقة، لكن بعد التركيب كنظام عندج المونة اللي بين الطابوق هذي كلها ثغرات تدخل منها الحرارة وبكميات كبيرة .. مثل ما قلت في السابق مثل اللي يتلحف عدل بس بلحاف فيه فتحات فلازم يحس بالبرد .. ومثل دلة الشاي معزولة من كل صوب وما تبرد بس لو تركناها مفتوحة شوي تبرد بسبب تعادل الحرارة مع الجو الخارجي.

إنتي ما دام بتركبين حجر ركبيه بالبراغي والحديد وبترك فراغ حول 5 سم بينه وبين الطابوق، وهذا الفراغ بروحه يعتبر عازل بس علشان يشتغل كعازل جيد يسوون فتحات صغيرة تحت وفتحات صغيرة فوقه حتى يتحرك الهواء داخل الفجوة ويتجدد بسبب تحرك الهواء الحار من تحت لفوق لإختلاف الكثافة .. زيادة لو تبين عزل أحسن حطي رولات صوف صخري عليها معدن لماع فضي مثل قصدير الطبخ .. ولا بس هذا المعدن ويجي رولات .. ولا عندج العازل الحراري الفوم الألواح وفيه منه عرض 2.5 سم و3 و4 و5 وحتى 7 سم، وأسعاره تختلف حسب الكثافة .. الأخير هو يسوون عزل بالحقن بالفوم بعد ما يركبون الحجر ويتركون فراغ بسيط، وهذا عزل متطور وحسب كثافته ونوعيته .. كل ما قلت الكثافة كل ما زاد العزل لدرجة معينة بعدها يقل.

شوفي خلي الإستشاري والمقاول يسوون لج حسابات لكل نوع وفاضلي بينهم .. والإستشاري لو كان فاهم في العزل الحراري يسوي لج حسابات ويطلع لج ال " u value " لكل نوعية وهي مقدار الطاقة الحرارية النافذة من النظام.

لمتابعة أكثر لموضوع العزل الحراري شوفي الموضوع اللي كتبته في توقيعي.

* كان خاطري وايد في القبة لكن الاستشاري الله يسامحه خلاني أحذف وألغي وايد أشياء عشان ما يزيد علي السعر وفي نفس الوقت حذرني من القبة بحجة إنها تدخل حرارة وصوت في البيت وبعد يمكن إنها تسرب أيام المطر

انا سويت عندي قبة وغامرت فيها بحيث كانت صغيرة وكل شوي كبرتها وسويتها خرسانة وبدرايش ثابتة 8 من البوليكاربونيت المحبب كل وحدة كلفتني 500 ريال والخرسانة ما كنت متفق عليها مع المقاول وسواها بدون مقابل .. بس الدرايش أو الفتحات فيها سويتها بعد ما ركبوا الخشب الخاص بها، وطبعاً إستئذني المقاول في إنه يجيب شخص يشوفها وياخذ الخشب يسوي له مثلها وانا قلت خذ راحتك حتى بيتي لك الحق تسويه لكل حد .. أثناء وضع الحديد على الخشب ركبت مع الفورمن وخططنا الفتحات على الخشب .. وقصينا فوم العازل بعد ما ركبناه فوق بعض كم طبقة بسمك جدار القبة .. وسوينا تشكيلة الفتحات مثل قطعة البرتقالة الضلع الفوقي قصير والتحتي طويل شوي وبميلان .. زيادة في الأخير سوينا كسرة ككرسي يركب عليه الفريم الألمنيوم بحيث من داخل يبين مخفي وما يبين الا البلاستيك ومن برا يبين الفريم ويتسكر حوله بسيليكون خاص وفوقه يتركب فريم ثاني يحمي السيليكون من الشمس.

أتمنى شرحي واضح مع انه يحتاج يكون موضح أكثر بسكتشات .. وعندي موزع بين غرف تقريباً 3 في 4 وحطيت فيه سكايلايت هرمي قزاز .. كلفني 8000 أو 12000 نسيت صراحة كم .. بس معزول ودبل قلاس وصنعوه في الشارقة .. كنت مخطط أسويه صغير وكبرته ل 2.4 متر في 1.2 متر .. وسويت الطوب الزجاجي خط في أعلى حائط الصالة بعرض 35 سم وطول 4.5 متر وتحسفت إني ما سويت خطين أو 3 كانوا بيطلعون أحلى خصوصاً نور الشمس يسطع فيه من فجر لين المغرب .. وسويت سقف كامل بولي كاربونيت محبب تقريباً بمساحة 2 في 5 متر .. والملاحظ كل هذي الأماكن برودتها زينة وتدخلها الشمس بس مب حرارة عالية وأنصح الكل بها.

وإنتوا إختي في الإمارات عندكم كل شيء قريب ورخيص وناس مختصين يسونه صح وبسهولة.

* عندي سؤال بعد لك يا معماري وجميع إخواني الكرام الي متابعين الموضوع :-
كيف أتجنب مشاكل التسرب الي تصير في بايبات المنزل وتسبب تشوه الجدران وتآكل الصبغ؟

والله خارجي أما تتركب البايبات خارج الحائط أو في دكت بس يكون داخلي في زاوية الحمام أو المطبخ ويكون قابل للفتح ببراغي خاصة ويتركب مارين بلايود المقاوم للمياه والتآكل والحشرات وعليه بلاط .. أو البايبات البلاستيك البي بي آر الألمانية المقاومة للشمس والأصلية المضمونة 50 سنة سواءً خارجية أو داخل الجدار .. وعندج تجويف الحجر والطابوق تقدرين تمررينها فيه بس تتركب صح وبلحام حراري وتتجرب قبل.

* أبشرك معماري الحمد لله تم وضع عازل نايلون في خرسانة المنزل وكذلك مبيد حشري وعليه ضمان 10 سنين بعد


ظـــلال الـــورد
*
*
*
بشارة خير إن شاء الله والله يوفقكم

انا صراحة ارتبطت بالكثير من المشاريع مثل مشروع بناء بيتكم وبيت الأخ بو جمال وبيت الأخ مهندس قطر للبترول وبيوت ثانية كثيرة بديت مع ملاكها من بداية التصميم والله يوفقكم جميع