كمبيوتري فيه ملفات تجسس شنو الحل؟

[ممنوع اللمس]

السلام عليكم ورحمة الله وبركاته
كمبيوتري فيه ملفات تجسس اتوقع حد مخترقه
ياليت حل لازالتها وانا توني مسوي فورمات للجهاز ورجعت المشكله مره ثانيه :(

[أبو العمرين]

السلام عليكم ..

اخوي ممكن تعطيني اسم مكافح الفايرسوات الي عندك .. وعلى اي اساس حكمت انه جهازك مخترقينه ..؟

وكيف عرفت انه في ملفات تجسس ..؟

تحياتي

[ممنوع اللمس]

انا ويندسوز 7 واللي عندي انتي فايروس
سويت حركه لقيتها في قوقل وكانت النتيجه ان فيه ملفات تجسس

[الزجاجي]

عليك ببرنامج حمايه قوي واصلي

[أبو العمرين]

انا ويندسوز 7 واللي عندي انتي فايروس
سويت حركه لقيتها في قوقل وكانت النتيجه ان فيه ملفات تجسس


طيب اخوي لو ممكن تعرف لي شنو اسم الانتي فايرس الي عندك .. وتقول لي شنو الحكره الي سويتها وبينت لك انه في ملفات تجسس

عشان اعرف شلون ممكن اقدر اساعدك

بانتظار ردك

[فيصل الشمري]

ادخل على الوندوز بالـ Safe mode
الطريقه
تسوي إعادة تشغيل
و اول ما يطفي الجهاز ويشتغل
اضغط على زر F8
ضغط عليه اكثر م مره
لين ما يطلع لك خيارات كثيره
شوف اول خيار مكتوب Safe mode
اضغط عليه

بعدين اضغط start
بعدين run
واكتب msconfig

ادخل على startup

وبدعين اضغط Disable all

الا الأنتي فايرس لا تلغيه عشان بنحتاجه

بعدين روح لقسم services
شوف تحت في مربع اسمه Hide All Microsoft Services
علم عليه
بعدين اضغط زر Disable All

وارجع علم على الأشياء التابعه للأنتي فايرس
اي شي تلقى قدامه مكتوب اسم الأنتي فايرس حقك علم عليه

الحين اضغط اوكي وبيطلب منك ريستارت
سوله ريستارت
بعد مايشتغل سو بحث كامل بالأنتي فايرس
بس قبل كذا لازم تتأكد ان برنامج الأنتي فايرس شغال اوكي ومحدث
اذا البرنامج ماهو اصلي ما اضمن لك انه ينشال
لانه يمكن يكون من نفس البرنامج

اذا تعرف مكان ملف التجسس روح واحذفه يدوياً

[إنسٌان بسِيط]

أخوي الأمر بسيط بإذن الله انا عملت بعض الدروس وراح تفيدك بشكل كبير انت وباقي الاعضاء

http://bit.ly/jOa7F2

روح إلى قسم : قسم الحماية من الهكر والفايروسات وشوف الدروس بالتدريج من الدرس الأول حتى الدرس الخامس


حمل البرنامج وبإذن الله تشيل ملف التجسس ولو كان يصنع نفسه من جديد فيه دروس عملتها لحل مشكله ملف التجسس اللي يعملها الهكر

وانت تحتاج إلى إدارة ProcessExplorer

http://download.sysinternals.com/Files/ProcessExplorer.zip

[ممنوع اللمس]

الله يعطيكم العافيه جميعا وانا بحاول فيه وان ما نفع بسوي فورمات وتسلمون كلكم

[إنسٌان بسِيط]

اخوي ممنوع اللمس هذا مب حل ... كذا انت الخسران ..

لازم تحل مشكلتك لان كل ما صارت مشكله اعمل فورمات وهذا الغلط ..


الدروس اللي عملتها اخليك تشوف بعينك ملفات الهكر وكيف ينتشر ملف التجسس بالجهاز

وكذا انت تتعلم ونقطه مهمه قبل لا تفتح اي ملف كان صوره او فيديو او مقطع صوتي لازم تفحصه

لان الهكر ممكن يضيف ملف التجسس فيه بكل سهوله

على كل حال الوندوز عندك أصلي ولا تروح للمحل وتعمل فورمات ؟؟

[ممنوع اللمس]

الويندوز عندي 7 مركبه لي راعي المحل

[ممنوع اللمس]

اخوي ممكن ترسل لي ايميلك لو ماعليك امر

[إنسٌان بسِيط]

تفضل ..

AnsanBseeT@hotmail.com

[ممنوع اللمس]

الله يعطيك العافيه اخوي وانا ضفتك وانتظر تقبل الاضافه

[أبو العمرين]

اخوي راجع هالموضوع من مجهود اخوي انسان بسيط رح يفيدك ان شاء الله ..

واذا عندك اي استفسار او تحتاج مساعده حاضرين ...

هذا رابط الموضوع ..

http://www.qatarshares.com/vb/showthread.php?t=451502

تحياتي

[محمد]

يفضل الفورمات لان اغلب التروجنات و الباك دورز تربط نفسها بملفات السستم وصعب التخلص منها بشكل كامل الا بالفورمات

[ممنوع اللمس]

الله يجزاكم الجنه

[أبو العمرين]

ان شاء الله اخوي انسان بسيط رح يكفي ويوفي باذن الله ..

اتمنى اذا انحلت مشكلتك تعطينا خبر وتطرح لنا طريقة الحل ..

تحياتي ..

[ممنوع اللمس]

الله يعطيكم العافيه على حل المشكله
واخص بالشكر الاخ انسان بسيط اللي بنفسه اخذ كمبيوتري وسوى له المطلوب والله يجزاه الخير ويجزاه الجنه ويرزقه من حيث لا يحتسب والله انه ما قصر وانسان قمه فالتعامل والاخلاق
الله يعطيه الف عافيه وماقصر
والشكر موصول لكم

[إنسٌان بسِيط]

الله يبارك فيك ولا أحتاج الا دعائك في ظهر الغيب لوالدي بالشفاء ولي بالتوفيق والثبات ..

[ممنوع اللمس]

الله يشفيه ويعافيه ويلبسه لباس العافيه
...
الله يثبتك ويرضى عليك