كانت ولم تعد .. (( روايه قصيره ارويها على لساني لكم .. )) ( حقيقيه من المخلب ) ...

[المخلب]

السلام عليكم

قصتي بدات منذ مراحل الطفوله احببت فتاه كانت اصغر مني بثلاث سنوات ..

عشت معها الجو الطفولي الجميل ..

كنا نمزح ونلعب ونتشاجر وبسرعه نتصالح ..

خاصه وانها كانت اكبر فتاه في بيتها ولم يكن لها اخوه او اخوات اكبر منها بالعمر ..

وانا كذالك .. كنت اكبر اخوتي واخواتي ..

(( والكبير بالبيت يعرف معنى كلمه كبير .. )) ..

مسوؤليه وبلاوي وعوار راس لكن كانت حياتي حلوه ..

بدايتها كانت اعجاب .. بسيط ...

ومالبث حتى تطور هذا الاعجاب الطفولي الى مرحله متقدمه من الحب ..

وهي العشق ..!

اي نعم عشقتها عشق الله يعلم ..

يمكن لني كبرت معاها .. !!

او يمكن لني ماكنت اعبر اي بنت غيرها الا هي !! ..

او او او او ..

المهم ان الحب خلاص اصبح شئ اساسي بيني وبينها ..

طبعا لما تكبر وانا اكبر .. بكل تاكيد مااقدر اشوفها مثل اول ..

ماقدر اجلس معها مثل اول ..

( بحكم العادات .. والتقاليد .. وشئ اكيد بحكم الاسلام يمنع ! ) ..

فطورت الامور الى شكل ثاني .. مع مواكبه التطور ..

ورحت واستعملت المسنجر ...

قلت مالاك الا هو !! ..

وجلست ادردش معها بالمسنجر ..

كنت حاطها باسم سبيشل ! .. وبايميل سبيشل ! ..

مابي حد يشوفها غيري ..

كنت ناوي بعون الله .. بعد الثانويه اخطبها رسمي ! ..

طبعا .. فتحت لها موضوعي .. واني حابب اتقدم لها ..

هي بدايتها استحت .. !

ولكن مع مرور الايام شفت الردود الايجابيه .. وحسيت انها خلاص موافقه ..

خلصت الثانويه .. وكلمت امي !..

يمه يمه .. ابي اخطب !! وجاني الرد المحطم ! ..

توك صغير وش تخطب ! ..

يايمه تكفين البنت ابيها وانتي تعرفينهم عدل مايحتاج بعد هم يعرفونا واحنا نعرفهم تكفيييين !!..

قالت ماني خاطبتلك الا لما تكمل جامعه !! ..

انا هنا قلت امري لله .. بدش الجامعه عسى الله يهدي امي وتوافق تخطبلي البنت اثناء الجامعه ..

ودخلنا الجامعه ..

مرت السنين !! .. وكل ماافتح سيرت البنت الوالده تقول وين بتسكنها ..؟ وييين بتعيشها ..؟ وين بتجلس معهاها ..؟ شلون بتجيب مهرها ..؟ وشلون وشلون ...؟؟

تحطمت والله .. وقلت شبسوي لو راحت البنت من يدي ! ..

وبعد الجدال والعفسه والصراخ .. !

وافقت امي .. واتقدمت لها علشان اخطبها ..

ولكن خاب ضني .. (( مثل ماقال بوعبدو .. )) ..

يوم اتصلت امي عليهم .. وطلبت رايهم وان حنا جايين نخطب بنتكم ! ..

قالت امها صبروا يومين ويجيكم الرد ..

وكان الرد الي عفس حياتي ! ..

قالت .. ( البنت جاوبت وقالت انك مثل خوها ..!! ) ..

حياتي هنا توقفت ساعه ! ( صدمه ) ..

كيف مثل اخوها .. من متى .؟؟ وشلون ..؟ وشدخل ..؟ ليكون انا رضيعها وانا مادري .. ؟؟

طلعت البنت من طول المده حبت لها ثاني ..؟

واحد عرف كيف يستغل ظرفي ويخط يده على الجرح ..

وهنا تم الاعلان عن خطوبتها ..

وهي بدورها وافقت عليه .. ونست اايامي معها ! ..

نست من الي قالتله احبك .. وقالها بعيوني انتي ! ..

نست من كان حاطها على راسه .. وهي كانت بوقتها تشتكي له ..

نست ونست ونسها العمر ..

وراحت من يدي .. وصرت انا الحين لحالي ..

وعرفت ان الدنيا ..مافيها حب صحيح ! .. الحب هو حب المصالح ..!!

عطني واعطيك .. غير هذا مافي ..

الله يرحم ايام الطفوله .. ياريتني ماعشتها ابد علشان ماشوف هذا اليوم بعيوني ..

والدمع على الخد ساح ..


تحياتي المخلب ..

[ROSE]

تدري يالمخلب ذكرتني بالقصص اللي نشوفها في التلفزيون

مااقصد اني انتقص من مشاعرك بالعكس مشاعر سامية وحقيقية اللي عشتها

واحلى مشاعر وكنت اتمنى لك انها تستمر معاك بس للاسف

احلامك مشاعرك تحطمت


ولكن هل هذا هو مقياس الحب عندك ؟

مستحيل الحب يتوقف على شخص معين او تحطم مشاعر في زمن معين


الحب مستمر دام الوجود مستمر

وهذي حب طفوله بيكون عميق بس مع الايام راح تكتشف كل يوم انه كان حب طفولي


وانه مايستاهل كل هالالم وراح تزيد عندك القناعة ان الحياة احلى والحب كلما جاء على


مرحلة متقدمة في سنك يكون احلى واجمل واعمق


والله يوفقك مع بنت الحلال ان شاء الله :nice:

[khaldoon]

لا حول ولا قوة الا بالله

ما اقولك غير مثل ما قالت اخت روز
مستحيل الحب يتوقف على شخص معين او تحطم مشاعر في زمن معين


الحب مستمر دام الوجود مستمر

الله يعينك اخوي المخلب وما تزعل ...الرسول صلى الله عليه وسلم قال احبب من احببت فأنك مفارقه ...على العموم انا ما راح ارد على موضوعك الحين ...ان شاء الله ردي قريب على الموضوع

[بنت الحرمي]

من وين ابتدي :rolleyes:

اول شي يعطيك العافية على سردك لهالقصة الواقعيه ..

ثاني شي مشاعر الطفوله والأحاسيس اللي نمر فيها في هالفترة شي طبيعي ممكن ان هالمشاعر تنمو وتزيد وممكن انها تموت لسبب او لأخر مثل الانشغال بهموم الحياة ومشاغلها نظرة الانسان للموضوع نفسه بحكم نضوجه وتجاربه في الحياة او لأي سبب ثاني ..

شي طبيعي اخوي المخلب ان اذا تذكرت هالموضوع تحزن وتزعل وتتأثر وتتضايق لأن الموضوع كنت ماخذه بجديه على الأقل من طرفك انت،،لكن من غير الطبيعي انك تعيش باقي حياتك على ذكريات الماضي والتحسر عليه .. وان شاءالله .. ان شاءالله كلها فترة والله بيرزقك ببنت الحلال ،، وما تدري رب ضارة نافعه يمكن الله يبغيلك الخير في زواج ثاني ..
وان شاءالله حزتها راح تتذكر هالموقف و((يمكن)) تقول زين ان الموضوع انتهى بهالشكل ..

اخوي المخلب المفروض ان الانسان ما يتشائم او يحزن على اول موقف سلبي يمر فيه او على تجربه سابقه وغير ناجحه سواء في زواج ،، عمل،، او في اي شي ثاني بالعكس يفترض ان يكون فشل الانسان نقطة انطلاقته ويحاول يتدارك اخطائه عشان ما يتكرر هالفشل ..

والسموحه على الاطاله .. وتسلم يدك المخلب مره ثانيه ،،

الله يوفقك ويوفق الجميع ان شاءالله

[سهم الخيانة]

قصتك وايد مؤثره :shy: يا المخلب بس الحياة والحب ما ينتهي لان الحياه مستمره في دورة الحياة ونشاءالله تلقى من هي احسن منها :looking: والله يوفقك في حياتك omen

[المخلب]

ايييييه .. والله ان الزمن لو رجعته الف مره ماااقدر ..

احس ان الدنيا خلاص صارت ماتسوى ولا حتى بيزه ! ..

ان لله وانا اليه راجعون ..

وياقلب مالنا الا الله ..

[خاربه خاربه]

ايييييه .. والله ان الزمن لو رجعته الف مره ماااقدر ..

احس ان الدنيا خلاص صارت ماتسوى ولا حتى بيزه ! ..

ان لله وانا اليه راجعون ..

وياقلب مالنا الا الله ..

بصراحه قصتك مؤثره وايد ونزلت الدمعه من عيني

:eek3: :eek3: :eek3: :eek3:

صج الحب أحلى الأقدار نفس ما قال عبدالحليم

بس هذا حكم القدر والخيانه هذه الأيام بدمنا

طبعا البعض وانا اعرف ناس لأنهم ما قدروا يرتبطون

هاجروا من مكان لمكان ترا صج والله

وكل قصة حب لها نهايه اما حزينه او سعيده

وكل قصه لها سببها ان كان تافه او قوي

وما اقول غير ربي يعوضك يارب بوحده تحبك نفس ماتحبها شعور صادق

بدون اي دافع ثاني الا انها تحبسك بالقفص الذهبي

ترا انا عندي قفص ذهبي :shy:تخطط عليه :deal:

[المخلب]

:) شكرا يااخاربه .. والله يعافيج على احساسك الطيب .. وكلامتك الروعه ..

تحياتي لج .