شركات خاصة لشفط المجاري ( الله يعزكم )

[الحياة الخالدة]

السلام عليكم و رحمة الله و بركاته

السالفة مب لي
بس المهم بيت اللي سألوني في دحيل
و اتصلوا بالبلدية اكثر من مرة من قبل العيد .. يوعدونهم و ما يجون
ولما يتصلون فيهم يقولون احنا جيناكم و انتو وقعتوا لنا على ورقة
طبعاً محد جاهم ولا وقعوا على شي

المهم السؤال الحين :
حد عنده أرقام شركات يكلمونهم عشان يجونهم يسحبون المجاري ( الله يعزكم جميعاً )

و جزاكم الله خير مقدماً

[Miss]

فيه ابليكيشن في الايفون للبلديه
تسجلين اللي تبينه منهم ويومين او ثلاثه بالكثير وهم عندج

شركات خاصه ما عرف

[وليف الشوق]

برنامج البلديه في الايفون

[النهار]

اش كثرهم في ملاحق الجرائد

[برويقن]

برنامج البلدية فالايفون بس دخلو عنوان البيت المنطقة ورقم الشارع ورقم البيت

[النهار]

برنامج البلديه في الايفون

استلعنوا الحين قاموا يأخذون فلوس اذا ماعطيتهم اول مره يتلهونك المرات الجايه
في بيت عزوب كرمكم الله المجاري طافحه عندهم وطالعه في الشارع
اتصلت فيهم وعطيتهم رقم البيت والشارع واسم الشارع
وانا راد البيت احصل السياره واقفه جدام البيت الا يجيني اتصال منهم يقول لي وين البيت وانا شايفهم
قمت احدد له الموقع ادري هم يبون يشوفني علشان اعطيهم شي
عموما بعد شويه قالوا وصلنا البيت خليتهم وانا قاعد اراقبهم يجيني اتصال يقول لي بيت عائله قلت لهم بيشلر ( عزوب )
قالوا احنا مانقدر ندخل لازم حد يطلع لنا وانا شايف العزوب داشين طالعين قلت دش البيت ماعليك البيت كلهم عزوب
نصف ساعه خلصواشغلهم اتصلوا قالوا خلصنا الشغل قلت لهم مشكورين وماقصرتوا بعد ماديشيت البيت جاني اتصال
احنا خلصنا شغلنا وباقي شي بسيط في ناس غير بيجون بكره بيكملون الشغل لانه اختصاصهم قلت لهم مشكورين ماقصرتوا
عرفت سالفة الفلوس من خياط عنده المجاري مشترك مع مطعم والبيت يقول لي كل شهر اطلبهم كل مره يأخذون مني 300 ريال
التسليك يكون من عند الخياط والبيت الشعبي

[معماري قطري]

هذي قطر وهذي أَشغال تقول قطر تستحق الأفضل

[الحياة الخالدة]

جزاكم الله خير
بقول لهم ينزلون التطبيق
و بنفس الوقت يشوفون ملاحق الجرايد كحل سريع

[الحياة الخالدة]

طلعوا منزلين التطبيق .. و مطرشين أكثر من مرة بس مافي فايدة
كل مرة يقولون بنطرش لكم و ما يطرشون حد

و نفس الشي بخصوص الشركات الخاصة يقولون لهم احنا ما نقدر .. لأن البلدية مضيقة عليهم ما تخليهم

[Red rose]

احنا كنا نطلب منهم عن طريق البرنامج في الايفون ومساكين ما يقصرون يجيون لنا بعد يوم او يومين