مراجعة التصاميم المعمارية وابداء الملاحظات عليها (محدث) [الأرشيف] - الصفحة 14

معماري قطري

22-04-2025, 01:49 PM

مرحبا اخوي ..
ترى في مكاتب تسوي لك التصميم الخاص فيك بس لازم تقرقش مخباتك عدل :ok:
انت ارسم النموذج اللي تبيه بايدك اذا الفيلا لاستخدامك الشخصي ..
فكر وارسم وشخبط وعقب ممكن اي مهندس يضبط لك المساحات من المساحة الكليه للبيت ..
خذ افكار من هني وهناك ومثل ماقال معماري استشير ناس فاهمة .. واذا فيلا شخصيه فكر للمدى البعيد ..

الله يوفقك ..

نصايح مهمة إختي سارة

انا مع العملي والدارج والمريح من التصاميم وبلمسات جمالية للفراغات وللكتل .. ومع الحداثة والبعد عن الكلاسيك والنقوش الزايدة وتركيزي على العملي أكثر من الجمالي .. الجمال في البساطة وفن استغلال المساحات .. ونصيحتي للي يبني الهيكل مهم جداً وهو الهيكل الخرساني نخلصه بدون طابوق أولاً ونخسر على مواصفاته ومواده وجودة التركيب .. رش المياه بعد صب الخرسانة مبدأين بسيطين 10 أيام وزود و 24 ساعة الخرسانة رطبة ليلعبون عليكم بكله نسوي كذا أو العرف الهندسي يقول كذا وكذا .. طبعاً النصايح هذي مكررة ومذكورة مع البنيان وتفاصيله اللي أحطها للي يبي يستفيد .. الهندسة تقول 1+ 1 = 2 والعرف والدجل الماشي عندنا لا عادي 1 + 0 = 2 عندهم يجمل لك مادة معينة مثل البودرة وهي تضرك وتضر بنيانك

بالنسبة للإحتياجات وتحديدها أقول لتبالغ ولا تقصر على نفسك .. العظم تكلفته بين 700 وبين 1200 وممكن زود وممكن تسويه بأقل لو تعبت شوي واجتهدت ونفذت أشياء كثيرة بإتفاق خاص أو مثلنا نشتري مواد والتركيب على المختصين ونشتري جودة ونتحكم في المواصفات اللي نبيها

القصد من كلامي لو تكلفة العظم قدرت توصلها 700 الباقي سهالات .. الأبواب والنوافذ معدل تقريبي 1000 ريال للمتر طبعاً الخشب ممكن أغلى وكل شيء سعره حسب تصميمه ونوعية المواد فيه مناجر تسوي المتر ب 5000 وألحين البعض يتطاول في البيبان مثال على بيباننا 2.6 ارتفاعها والعرض للفتحة صافي 1.1 متر ووايد أقل متر وممكن حتى 90 سم صافي قصدي فتحة الطابوق بعد التركيب ينزل العرض حول 10 سم بشكل تقريبي .. يعني كل باب حول 2.6 متر مربع

الخلاصة التشطيب ممكن نحكمه بحدود 2000 ريال للمتر وممكن ال 2000 هذي بس للأرضيات لو اخترنا نوع تكلفة توريده وتركيبه بهذي الحدود فيه أنواع رخام المتر 20000 ريال هذا أعتبره إجرام وفيه جكوزيات ب 2000 وغيرها ب 50000 وممكن زود .. بعدين انت لو دلعت نفسك بمساحة بناء 1000 متر ما بتشطب كل المساحة ب 2000 ريال للمتر طبيعي بتكون عندك ستورات ممكن تشطيبها يوصل حتى 100 أو 200 ريال يعني المساحة الفعلية اللي بنعيش فيها دوم أوقات ما توصل نص هذي المساحة لذلك زين ندلع أنفسنا بمساحات وفراغات كثيرة تغطي احتياجنا المستقبلي وليس الحالي .. البنتهاوس شيء مهم جداً حتى اللي ما يبيه يسويه ويهتم به حتى لو شطبه أبسط التشطيبات طقم حمامات مثلاً 1500 وبلاط عادي رخيص وارضيات بلاط شعبي وسجاد عملي ورخيص أو يخليها لين حاجتها حتى بسكريد ماشية .. المهم اللي بيبني دور أول 500 متر مربع يضيف فوقه بنتهاوس في حدود المسموح حتى لو 70% بيصفي على 350 متر مربع تعتبر بيت كامل في بعض الدول هذي بتكلفه حول 500 الى 600 الف ريال لو نفذ صح

Qtr37

23-04-2025, 08:27 AM

نصايح مهمة إختي سارة

انا مع العملي والدارج والمريح من التصاميم وبلمسات جمالية للفراغات وللكتل .. ومع الحداثة والبعد عن الكلاسيك والنقوش الزايدة وتركيزي على العملي أكثر من الجمالي .. الجمال في البساطة وفن استغلال المساحات .. ونصيحتي للي يبني الهيكل مهم جداً وهو الهيكل الخرساني نخلصه بدون طابوق أولاً ونخسر على مواصفاته ومواده وجودة التركيب .. رش المياه بعد صب الخرسانة مبدأين بسيطين 10 أيام وزود و 24 ساعة الخرسانة رطبة ليلعبون عليكم بكله نسوي كذا أو العرف الهندسي يقول كذا وكذا .. طبعاً النصايح هذي مكررة ومذكورة مع البنيان وتفاصيله اللي أحطها للي يبي يستفيد .. الهندسة تقول 1+ 1 = 2 والعرف والدجل الماشي عندنا لا عادي 1 + 0 = 2 عندهم يجمل لك مادة معينة مثل البودرة وهي تضرك وتضر بنيانك

بالنسبة للإحتياجات وتحديدها أقول لتبالغ ولا تقصر على نفسك .. العظم تكلفته بين 700 وبين 1200 وممكن زود وممكن تسويه بأقل لو تعبت شوي واجتهدت ونفذت أشياء كثيرة بإتفاق خاص أو مثلنا نشتري مواد والتركيب على المختصين ونشتري جودة ونتحكم في المواصفات اللي نبيها

القصد من كلامي لو تكلفة العظم قدرت توصلها 700 الباقي سهالات .. الأبواب والنوافذ معدل تقريبي 1000 ريال للمتر طبعاً الخشب ممكن أغلى وكل شيء سعره حسب تصميمه ونوعية المواد فيه مناجر تسوي المتر ب 5000 وألحين البعض يتطاول في البيبان مثال على بيباننا 2.6 ارتفاعها والعرض للفتحة صافي 1.1 متر ووايد أقل متر وممكن حتى 90 سم صافي قصدي فتحة الطابوق بعد التركيب ينزل العرض حول 10 سم بشكل تقريبي .. يعني كل باب حول 2.6 متر مربع

الخلاصة التشطيب ممكن نحكمه بحدود 2000 ريال للمتر وممكن ال 2000 هذي بس للأرضيات لو اخترنا نوع تكلفة توريده وتركيبه بهذي الحدود فيه أنواع رخام المتر 20000 ريال هذا أعتبره إجرام وفيه جكوزيات ب 2000 وغيرها ب 50000 وممكن زود .. بعدين انت لو دلعت نفسك بمساحة بناء 1000 متر ما بتشطب كل المساحة ب 2000 ريال للمتر طبيعي بتكون عندك ستورات ممكن تشطيبها يوصل حتى 100 أو 200 ريال يعني المساحة الفعلية اللي بنعيش فيها دوم أوقات ما توصل نص هذي المساحة لذلك زين ندلع أنفسنا بمساحات وفراغات كثيرة تغطي احتياجنا المستقبلي وليس الحالي .. البنتهاوس شيء مهم جداً حتى اللي ما يبيه يسويه ويهتم به حتى لو شطبه أبسط التشطيبات طقم حمامات مثلاً 1500 وبلاط عادي رخيص وارضيات بلاط شعبي وسجاد عملي ورخيص أو يخليها لين حاجتها حتى بسكريد ماشية .. المهم اللي بيبني دور أول 500 متر مربع يضيف فوقه بنتهاوس في حدود المسموح حتى لو 70% بيصفي على 350 متر مربع تعتبر بيت كامل في بعض الدول هذي بتكلفه حول 500 الى 600 الف ريال لو نفذ صح

جزاك الله خير على النصايح المهمة
والله صار عندي وايد استفسارات مابي اكثر عليك خاصة بخصوص الاسعار
وبالنسبة للبنتهاوس افكر ان يتم التأسيس له لكن ابنيه بعد كم سنة من باب تقليل التكلفة علي في الوقت الحالي

معماري قطري

24-04-2025, 02:49 PM

جزاك الله خير على النصايح المهمة
والله صار عندي وايد استفسارات مابي اكثر عليك خاصة بخصوص الاسعار
وبالنسبة للبنتهاوس افكر ان يتم التأسيس له لكن ابنيه بعد كم سنة من باب تقليل التكلفة علي في الوقت الحالي

عادي ولا تهتم انا اراجع حالياً تصميم لأحد الإخوان وعندنا القروب حياك لو تحب تستفيد نقاشات مطولة وسهالات هناك أسهل من الكتابة المطولة هنا .. هذا الرابط وصلنا فوق 600 شخص وممنوعة المشاركات الا في مجال البناء والتصميم والأثاث والزراعة التجميلية والمنزلية

https://chat.whatsapp.com/CgdCfGMCFIyK5bpEQAbJOc

معماري قطري

26-04-2025, 12:51 PM

وصلني تصميم جديد راعيه ناوي يكمل عليه وناوي يبدأ يبني نصحته يعدل تعديلات بسيطة وشكله مقتنع بغالبها لأن سهلة وبتريحه وايد

منها مثلاً ارتفاع الدرج 16.6 سم قدرت أنزله بإضافة 4 عتبات لحدود 14.53 سم

المشكلة الملاحظات كثيرة والبارحة سويت فيديو لها شوي مطول خذ مني 42 دقيقة وتنزيله طول على موقع اليوتيوب وألحين باضيفه هنا للي يحب يتابع

https://www.youtube.com/watch?v=z6wENlPcghY&t=186s

من الملاحظات المهمة انا اللي جبتها سيارات بمقياس رسم حقيقي ودقيق لحدود 95% واللي حاطها الإستشاري كلش غير واقعية باحط صورة لها مع القياس من برنامج الرسم

https://i.imgur.com/Ymous8e.png

اللي بيحصل لي سيارة في قطر بهذا المقاس يجيبها باشتريها

معماري قطري

26-04-2025, 12:58 PM

تخيلوا عرض السيارة متر و 24 سم وطولها 3.58 متر .. هذيلا رسامين استشاريينا المبجلين واللي المفروض عليهم مراجعة وتدقيق من مهندسين مختصين

معماري قطري

26-04-2025, 01:08 PM

هنا اخترت الجي كلاس بمقاسات من النت ماخذها اللكزس شوي أطول أعتقد 5.4 متر

https://i.imgur.com/wWZtMMc.png

معماري قطري

26-04-2025, 01:12 PM

حتى الباب يفترض عرضه 6 متر وهو الأنسب لو ما قدر يسويه 6 ممكن يسويه 5.5 وانا نصحته يصغر شوي في البيت وهو ممكن بسهولة حتى يوسع موقف السيارات ويكون عنده مدخل مناسب للمجلس أو يغير مدخل السيارات جهة اليمين بس شكله مصر على هذا الوضع .. لو سيارته صالون متوسطة الوضع مناسب بس يزيد عرض الباب ما فيه سيارة عرضها متر ونص شلون أقل

معماري قطري

27-04-2025, 02:48 PM

إستكمال للتصميم أستعرض البنتهاوس وترتيباته انا اقترحت يخلي غرفة الدراسة صالة تلفزيون في المستقبل لو احتاج ويحول الصالة الى غرفة نوم ثانية هذا لو تزوج أحد الأبناء ومحتاج شقة خاصة به ودورة المياه سهل تعدل أو تصمم من الحين لتكون دورة مياه متكاملة حتى لو بنسوي صالة هذا ممكن بسهولة أولاً ما نحتاج مغاسل وهذي جلسة خاصة بالبيت وأكل بيكون بسيط

هو كان يبي الصالة مفتوحة على الممر ويبي يحط التلفزيون في الممر والتقسيم هنا مفيد ومريح .. حتى الستور كان فاتحه على غرفة الغسيل

https://i.imgur.com/c6X83h0.png

معماري قطري

29-04-2025, 04:42 PM

سويت مقترح ثاني لدورة المياه الرئيسية وهو عمل بروز 60 سم والإستشاري كان مقترح 70 سم في سقف البنتهاوس كامل من اليمين لليسار وانا شفت ما له داعي لو سويناه أصغر شوي وفي سقف الدور الأول وحتى نعمل منور علوي لمنطقة الشور بتطلع وايد أحلى

https://i.imgur.com/Y11kyY0.png

وسعت كذلك غرفة الملابس وممكن نعمل لها منور مشابه أو نكتفي بقلاس بلوكس من أعلى حتى لدورة المياه ممكن الطوب الزجاجي بس انفتاح السقف للجو والشمس أحلى بوايد

بيكون الزجاج علوي ومرتفع وبسلوب لتصريف المياه .. أنا مركب هشكل حق ليوان الملحق على عرض مترين هذا 60 سم ومن داخل بيكون 40 بس

https://i.imgur.com/Zdjr37C.png

Qtr37

30-04-2025, 12:04 PM

هلا اخوي
حلوة فكرة المنور لغرف الملابس
و برايك تفضل الزجاج العلوي ؟

لان فعلا ودي لاضاءة طبيعية لغرفة الملابس

معماري قطري

30-04-2025, 03:02 PM

هلا اخوي
حلوة فكرة المنور لغرف الملابس
و برايك تفضل الزجاج العلوي ؟

لان فعلا ودي لاضاءة طبيعية لغرفة الملابس

انا من محبي المناور والدرايش بيتي الحالي له قريب عشرين سنة في الصالة قبة فيها 8 نوافذ منحنية معاها وثابتة وحطيت لها صور كثيرة في هذا الموضوع وغيره وشرح لطريقة تنفيذ النوافذ هذي وحتى توضيح بالرسم والفيديو ممكن في يوتيوبيات البناء .. وسويت منور هرمي ماخذ نص مساحة سقف موزع صغير امتداد للصالة وسويت فرق لفل بسيط حطيت فيه طوب زجاجي .. الممر بين المطيخ الداخلي والخارجي مسويه كله عبارة عن منور وكلفني تحت 3000 المنيوم خفيف ورخيص وبولي كاربونيت

ألحين بيت ولدي اللي ينبني مخطط حق 4 مناور وممكن أزيدها خامس يكون فوق الدرج .. واحد في المدخل والدبل هايت وواحد في دورة المياه الرئيسية وواحد في وسط غرفة الملابس مع طوب زجاجي كذلك جهة الغرب .. وواحد كذلك فوق صالة التلفزيون العلوية

في النهاية المناور نقاط تبادل حراري مع الخارج وتخلي طبقة الهواء العليا تكون عازلة وحارة نسبياً والسفلية تكون باردة تنزل بسبب كثافة البارد أعلى من الحار

معماري قطري

03-05-2025, 03:01 PM

بالنسبة لمشروعنا القائم جابوا الحديد لبقية تأسيس السور هذا عملناه حفر بسيط بحدود نص متر لبقية الجهة الشرقية نصها تقريباً والجهة الجنوبية كلها وجزء من الجهة الغربية .. وأعتقد معاه حديد أعمدة السور وانا طلبت حديد إضافي باوضح وين بيكون في السور لتقوية السور .. تأذينا من كثرة سقوط السور المؤقت بسبب الهواء وانفتاح المنطقة .. كذلك بيتم الدفان وعمل صبيات الأرضية المسماة صبيات النظافة بس متردد مع الأعمدة ومتخوف من الصب في هذا الوقت

طريقة عمل السور الخارجي باوضحها بالرسم لأني ناوي أسوي طريقة تختلف عن المعتاد

أول شيء هذا مخطط الإستشاري

https://i.imgur.com/iS0Ccfa.png

تم الإتفاق على تعديل السور الخارجي كالآتي

بيكون الإرتفاع 2.95 متر 14 طابوقة وجسر علوي ربط وحماية 15 سم .. البانل اللي فيه خطوط حمراء يوضح تداخل الطابوق مع حديد التقوية في الفجوات والحديد العرضي بيكون للجسر العلوي من فوق والوسطي في وسط الطابوق مار بين طابوقتين

https://i.imgur.com/vy2bRJx.png

البناء بيكون على 3 مراحل رئيسية أولها طابوق بارتفاع 7 طابوقات مع ترك مكان للأعمدة ثم عمل الأعمدة وكمالها دفعة وحدة للأعلى ناقص 15 سم الأخيرة اللي بيجي فيها الجسر العلوي .. كل هذا مع احترام فواصل التمدد هذي ينقطع فيها الحديد كما هو موضح .. اللي جاي وسطي وافقي مغروس من الجهتين في العمود المزدوج اللي بيكون وسطه فاصل التمدد

بين الجسر العلوي والطابوق فيكون فيه قروف بيو شانيل 2 سم في عمق 2 سم وبنشوف لون مناسب يعطي عمق وتباين أفضل الرمادي أو الأبيض وبداية أكيد بيتم بناء الطابوق والأعمدة فقط هذي التفاصيل بتجي مع البلاستر

تحت كذلك عندنا قروف بزاوية ظل يفصل البلاستر الوسطي عن البلاستر السفلي اللي بيكون من عازل اسمنتي تكلمت عنه وهذا بيكون من داخل ومن خارج البيت والقروف معدني وبكامل عمق البلاستر يعني فعلياً يفصل البلاستر

معماري قطري

03-05-2025, 03:10 PM

البانيل هذا هو الأهم لأنه يوضح التقوية الإضافية بالحديد اللي طلبناه مغلف و 8 ملم

https://i.imgur.com/XTL4q0n.png

هذا العمودي منه يجي في فراغ الطابوق ويتركب من بدايات الطابوق ومن هشكل بنعمل الطابوق مع الحديد على مرحلتين مرحلة اولى 7 طابوقات ويتم الصب للأعمدة جزء السبع طابوقات السفلية وجزء السبع طابوقات العلوية بارتفاع 2.8 متر كامل للعمود .. الجزء الأخير جزء ال 15 سم بيتم بعد انتهاء تركيب الطابوق الباقي أو السبع طابوقات للمرحلة الثانية .. يعني صب فجوات الطابوق اللي فيها حديد بيتم على مرحلتين مرحلة اولى مع الأعمدة ومرحلة ثانية مع الجسر العلوي

الفلر بورد حق فاصل التمدد بناخذ نوع أسود نصحني به أحد المهندسين هذا فيه قار زيادة ولا تقربه الأرضة ويعيش طول العمر

بهالطريقة أكون سويت تفاصيل للسور غير عن الدارج وبإذن الله أتوفق

Qtr37

05-05-2025, 01:32 PM

انا من محبي المناور والدرايش بيتي الحالي له قريب عشرين سنة في الصالة قبة فيها 8 نوافذ منحنية معاها وثابتة وحطيت لها صور كثيرة في هذا الموضوع وغيره وشرح لطريقة تنفيذ النوافذ هذي وحتى توضيح بالرسم والفيديو ممكن في يوتيوبيات البناء .. وسويت منور هرمي ماخذ نص مساحة سقف موزع صغير امتداد للصالة وسويت فرق لفل بسيط حطيت فيه طوب زجاجي .. الممر بين المطيخ الداخلي والخارجي مسويه كله عبارة عن منور وكلفني تحت 3000 المنيوم خفيف ورخيص وبولي كاربونيت

ألحين بيت ولدي اللي ينبني مخطط حق 4 مناور وممكن أزيدها خامس يكون فوق الدرج .. واحد في المدخل والدبل هايت وواحد في دورة المياه الرئيسية وواحد في وسط غرفة الملابس مع طوب زجاجي كذلك جهة الغرب .. وواحد كذلك فوق صالة التلفزيون العلوية

في النهاية المناور نقاط تبادل حراري مع الخارج وتخلي طبقة الهواء العليا تكون عازلة وحارة نسبياً والسفلية تكون باردة تنزل بسبب كثافة البارد أعلى من الحار

مابي اتعبك اخوي اذا تقدر ابي صور للمنور خاصة الممر بين المطيخ الداخلي والخارجي

معماري قطري

06-05-2025, 12:13 PM

إن شاء الله عندي صور قديمة بس بحاول أسوي فيديو عن كل المناور اللي عندي في البيت

بالنسبة للي بين المطبخ الخارجي والداخلي حول 6 في 2 وجاي سلوب على جهة وحدة ألمنيوم رخيص خذت أردى نوع ومن محل عادي أذكر سعره في ال 2000 ريال طلع وكله بولي كاربونيت من فوق بس الجوانب زجاج .. كان يسرب ماي شوي حطينا له سليكون ووقف .. يسرب من مكان تثبيت الألمنيوم على الطابوق وشيء بسيط .. المنطقة باردة من فتح الباب عليها والإتصال بين المطبخين سهل مسوي عتبة وحدة صغيرة بس ارتفاع 10 سم لكن في البيت اللي ينبني ألحين بنسوي نفس اللفل للبيت وللملحق وللممر

معماري قطري

06-05-2025, 03:36 PM

نزلت صور قديمة من التلفون

هذي القبة والقلاس بلوك مع بدايات الفجر

https://i.imgur.com/6svst5k.jpeg

هنا النور شوي اشتد

https://i.imgur.com/Yu4rlkW.jpeg

وهنا أكثر

https://i.imgur.com/wiGmv6K.jpeg

الظهر والعصر أكثر وعز الظهر يسطع النور على أرضية الدرج باشوف صور بعدين

هذي القبة من تحت وكان مخطط لها كلها زجاج وأصغر حول نص الحجم ألحين سويناها بقطر 3 متر وقوس بسيط مب نص دائرة والشغل كله ارتجالي الاستشاري صمم بس جسور مقلوبة حتى المقاول نفذها بدون زيادة كانت في العقد سيتفق عليها لاحقاً .. الدرايش تكفلت انا بهم 8 وسعر الوحدة 500 ريال فريم ألمنيوم مركب على كرسي خرسانة يدعم جنبين ببراغي مزدوجة شيء من فوق لتحت وشيء من الجنب + سيليكون يعبي الفراغ البسيط وسيليكون خاص ركبوه قطر يو بي في سي بدال الزجاج استعملنا بولي كاربونيت كان وقتها مستحيل يسوون الزجاجي منحني وألحين ممكن بسهولة .. الشغل تم وقتها ارتجالي بيني وبين الإستشاري من جهة وبيني وبين الفورمن مال المقاول بعد تركيب السيليكون فوق تم تركيب قطع الألمنيوم المسماة فلاشنغ لحماية الجزء اللي فيه السيليكون واللي فاصل بين الخرسانة والوحدات هذي ولله الحمد بنكمل 20 سنة ولا سربت الا وحدة بس من حول 10 سنين انفك البرغي ومن مطر جانبي بس حطينا لها سيليكون وللحين بخير تسريبلس .. فيها شيء يمكن ما يعجب الكثيرين أوقات من التمدد والإنكماش تسوي صوت وأعتقد بسبب سمك البولي كاربونيت 3 ملم بس .. صوت طقة بسيط يبين آخر الليل لو هدوء وصوت المطر على البولي كاربونيت بعد يبين بس يعيش الواحد الأجواء الخارجية

https://i.imgur.com/daHmfTs.jpeg

https://i.imgur.com/iOQMrcz.jpeg

وانا أدور في الصور حصلت ذي لمناسبة كنا حاطين ليتات مع النور الطبيعي شيء

https://i.imgur.com/GvxtpqT.jpeg

هذي الأعمدة ديكورية بدونها البنيان يمشي بس انا أصريت عليها كعنصر جمالي ممتد ولا متصل بالدرج .. المعماري التابع للإستشاري كان شايب توفى سيكي ديانته بس كان جيد وصمم مباني كثيرة اقترح ما اسوي الأعمدة حتى يبقى السقف النازل كأنه طافي ومعلق واقتراحه صحيح وجمالي كذلك والأعمدة بعد جمالية

https://i.imgur.com/L2DwCY3.jpeg

الدرج عرضه من تحت متدرج من 2.1 متر الى 1.8 متر هنا وإحتمال 2.4 تحت وأكون غلطان بعدين فوق يتفرع لإتجاهين 1.4 متر تصمم ليكون تدعيمه بين العمودين على قاعدة تربط بدايته بعد وأسفل البسطة الممتدة 3.5 متر ما يكون حامل أو عمود يعني معلق 3.5 متر ومدعم بحديد طولي بطول كبير وقطر أظن 24 ملم من تحت لفوق ومغروس في السلابة اللي فوق واللي فيها جسر مخفي .. المقاول كان خايف من تنفيذه وأثناء التنفيذ جاوا شلة مهندسين من الإستشاري كانوا شاكين في الشد بالحديد واضافوا هذا الحديد الطويل يمكن لو أشرح بسكتش مع تسجيل فيديو يوضح لكم .. المقاول سوى كل شيء بدون زيادة تكلفة كان سوبر محترم الله يرحم كفيلهم حمد بن خالد بن حمد آل ثاني قائد الشرطة قبل

https://i.imgur.com/SYwRiNy.jpeg

تصدقون للحين أخاف من هذا المكان وباصور شلون من تحت وبفيديو افضل

https://i.imgur.com/Nd9nN06.jpeg

وأخيراً هذي صورة للمنور بين المطبخ والملحق بس بعد باشوف صور ثانية

https://i.imgur.com/zNJawWO.jpeg

هذا منور ثاني في بيت الوالد الله يغفر له انا اقترحته كإضافة للتصميم وفي موزع صغير بين الغرف

https://i.imgur.com/GdkB5oQ.jpeg

https://i.imgur.com/ZL73lze.jpeg

وهذا منور في بيتي في موزع مستطيل بين غرفتين بعرض 2.8 متر وطول تقريباً 6 متر والمنور 1.2 في 2.4 متر وكلف 12000 عملوه قزاز دبل وتم تنفيذه في الشارقة وشحنه من هناك الفريم راكب والزجاج ركبوه بعدين

https://i.imgur.com/ZL73lze.jpeg

عتبات للصالة تحت الدرج نفذتها من البورسلان وبزاوية مقوسة ولها 20 سنة بدون أي كسر ولله الحمد باوضحها بعد فيديو لمنطقة أسفل الدرج والدبل هايت

https://i.imgur.com/HP1RRCK.jpeg

معماري قطري

08-05-2025, 01:34 AM

https://i.imgur.com/L2DwCY3.jpeg

توضيح بسيط بخصوص الدرج وسويت سكتش مبسط عن فكرته يدوي وسريع إن شاء الله يوضح قصدي .. تكلفة الدرج درابزين ورخام بس 125000 أتذكرها عدل واحد 60 وواحد 65 يعتبر قيمة مصعد على وقتنا الحالي وممكن درج مبسط معاه .. وهذا بدون حساب تكلفة البنيان للدرج لأن فيه تعقيد كبير وفي الوقت الحالي ما انصح به .. بالنسبة لتجربتي معاه مريح بسبب ارتفاعه النازل اعتقد بين 12 و 13 سم ومعطي شراحة للصالة نعم ومسوي جو للبيت هو قلب البيت نقدر نعتبره

المهم الفيديو ما اكتمل بالغلط وقفت التصوير بس الفكرة إن الشد والتوزازن للدرج والجزء الطاير منه تحت بدون عمود من التأسيس اللي هو أساس واحد مرتبط بأساس ثاني للجدار المستطيل تحت أعتقد سادس أو سابع عتبة هو موازي للأعمدة الديكورية في الصورة .. معليش طلعت الصورة مقلوبة

https://youtu.be/UPNyaPOdy0A

معماري قطري

08-05-2025, 01:42 AM

بالغلط حطيت صورة ثانية الصورة المقصودة هذي

https://i.imgur.com/SYwRiNy.jpeg

بداية الدرج ما تبين بس حطيتها في صور ثانية .. ولو ألحين باصمم درج مشابه لازم عندي أفكار تختلف شوي باسوي العتبة الأولى شوي أعرض وباسوي بداية الدرابزين ملتفة بشكل دائري ولازم باسوي انارة في كل عتبة شريطية مخفية وإحتمال اسوي الدرابزين مختلف وأبسط والمسكة ستانلس ستيل الستانلس ستيل أنظف وسهل التنظيف وفيه نوع احتمال ما جانا ما تعيش عليه البكتيريا .. هذا يحتاج صبغ خاص وخايف أصبغه صبغ بعد يتطاير من إحتكاك اليد ومن الغسيل ولو أحصل نوعية جودة عالية زين علموني لو فيه .. الحل الثاني أغير القبضة لستانلس ستيل وبتكلفني وايد ممكن حول ال 100000

Qtr37

08-05-2025, 12:43 PM

معماري قطري

08-05-2025, 01:26 PM

جزاك الله خير ما قصرت وضحت لي وايد اشيا
لازم هالصور خاصة المنور اللي ف الصاله وبين المطبخين اوريهم المهندسة لان عندي مشكلة ف الدرايش بسبب اني ابي اكبر المبنى لاقصى حد على الجوانب علشان استغل المساحات كون ان الارض صغيرة.
شكرا جزيلا

عفواً الله يسلمك ولو تحب أراجع مخططاتك كرأي ثاني حاضر سواء على الخاص أو العام مع إني للعام أجتهد أكثر حتى الكل يستفيد خاص يكون شوي مختصر .. وإنت حر تاخذ برأيي أو لا أو تاخذ بشيء جزئي ما بتخسر شيء ما دام انك توك تصمم

معماري قطري

08-05-2025, 02:59 PM

شفت فيديو ونقلته في قروب البناء والتصميم لبيت في الأحساء مركب مكيف استرالي صحراوي يضخ هواء من فوق السطح مكان منور زجاجي قصوه وركبوا الدكت منه .. الحلو أعرف منشيء الفيديو وراعي البيت هنا في قطر عطونا سعر لنوعية تكييف وازالة رطوبة تؤدي هذا الغرض 150000 على وشو كلها وحدة تكييف .. لا وأحد مهندزي التكييف نصحني بعدم استعمال الصحراوي قال يناسب البيئة الجافة لكن هذا يستعمل في الحسا والحسا رطبة بحاول اشوف الفيديو وين انزله وباسئل عن سعر التكييف وكم كلفه يركبونه

معماري قطري

09-05-2025, 02:24 PM

سعر المكيف تقريباً 7500 يحتاج نقطة ماء بس وأعتقد آلية اشتغاله يفلتر الهواء الخارجي ويضغطه لداخل البيت والفلترة تتم بالماء لذلك الهواء الداخل يكون رطب .. تبقى عندنا سالفة الفلتر اللي هم يسمونه كرتون وهذا واضح لي فيه مسامات ينزل عليها الماي يرطبها ويمر الهواء الداخل والمضغوط خلالها من الخارج للداخل.

شيصير لو ركبناه؟ وشيصير لو كان راكب بدون ما يشتغل؟

أتوقع بعد لو فيه سحب هواء من داخل البيت عبر مراوح الشفط في دورات المياه وأي مطبخ يتجدد الهواء في البيت حتى بدون رطوبة لأن المكيف مطفي فيصير البيت يتنفس ما يكون محكور صحيح تدخل نسبة هواء شوي حارة ويطلع جزء من الهواء البارد والمكيف بس هذا دوم حاصل معانا في بيوتنا حالياً والهواء الداخل غير مفلتر .. فوق هذا إذا كان البيت محكم الإغلاق ما يدخل هواء وتتعطل المراوح أو تقل كفاءة سحبها أو يدخل لنا غبار من أي مكان مفتوح حتى لو قليل

إضطريت أسوي في بيتي فتحة في باب ألمنيوم في الممر الفاصل بين المطبخ الداخلي والخارجي حتى يدخل هواء بدال المسحوب من المطابخ ولأن مروحة مدخنة المطبخ كانت تطلع صوت قوي وطلع السبب عدم دخول هواء بدل المسحوب وكان الحل هذا .. الهواء اللي يدخل غير مفلتر بس يدخل حتى من سحب دورات المياه وصحيح يجدد هواء البيت بس دخول شوية غبار مشكلة ثانية وغبار رفيع يوصل حتى لداخل الغرف وهذا النوع من التكييف أشوفه يعطي هواء صحيح رطب بس نظيف وبنسبة معقولة ولذلك بيت الدرج مكان مناسب له ويتوزع على كل الأدوار ومنها للغرف ولدورات المياه لو سوينا نظام دخول عبر دكتات علوية مخفية فوق الجبس وهذي خطتي بإذن الله.

زين شنسوي حق المحافظة على برودة البيت ونوازن الهواء المسحوب مع الداخل؟

في رأيي ربط مراوح دورات المياه بسنسر حركة وسنسر رطوبة تشتغل حسب الحاجة يوفر علينا عدم اشتغالها غالب الوقت عندنا مثلاً يمكن كل دورة مياه مستخدمة تشغل مروحتها من الصباح لليل وبعضهم 24 ساعة فإذا قلت فترة اشتغالها بيقل استهلاك المراوح وكذلك الطاقة وكذلك البيت بيكون بارد كفاية

زين لو فكرت مثلاً في النظام هذا مع مؤقت تشغيل كل نص ساعة مثلاً 10 دقائق؟

أتوقع بيكون عندي هواء داخل ومضغوط كفاية كذلك وتنضبط فترة التشغيل على هذا الأساس لين نحصل النتيجة المناسبة ويمكن هذي نحتاج نتابعها بسنسرات متطورة تقيس الرطوبة والحرارة والأكسجين على مدى اليوم

كذلك تساؤل عن النباتات الداخلية وتأثيرها الإيجابي أو السلبي في البيت والمهم هو نسبة تجديد للهواء حتى لو مرة في الأسبوع يعني كل الهواء يخرج ويدخل بداله هواء جديد مرة وحدة في الأسبوع

هذا فيديو قصير عن البريز اير

https://www.youtube.com/watch?v=caKazktgdGg

في قطر قالوا لي بيكلفك نظام تبريد مركزي من وحدة وحدة فقط 35000 ريال قلت مقدور عليها وبعدين شركة قفزت ل 100000 وشركة ثانية ل 150000 .. عندنا ناس طغاة في الأسعار والمشكلة ما فيه شيء مضمون ولازم الوحدة تشتغل 24 ساعة وحتى المهندزين أو المسوقين ما فهموا لي شابغي مع اني أتكلم بلغة واضحة

معماري قطري

09-05-2025, 02:42 PM

هذا رسم مقطعي توضيحي لمنطقة الدرج وتكييفها بمكيفات سبلت إثنين وكنت مفكر في فلتر فوق يكون مصنع محلي عبارة عن بوكس فيه فلاتر تركب وتستبدل لدخول الهواء .. لكن في هالحالة ممكن أستغني عن الفلتر والمكيفات السبلت واركب نفس النظام فوق يفلتر ويضخ هواء

https://i.imgur.com/sypVSG1.png

بشكل تقريبي بيكون الوضع هشكل مع إضافة سكايلايت في منطقة الدرج

https://i.imgur.com/3TxV0UB.png

بس الدكت الموصلة للهواء بتختلف بتكون ضمن الجدار الخارجي ال 40 سم وبتنزل الهواء على فتحتين وحدة مكان كل مكيف في المخطط السابق بحيث تغطي الأدوار كلها

معماري قطري

09-05-2025, 02:48 PM

كنت مخطيء ما يسمى ب Graphical mistake في الرسم فوق همي هو توضيح مكونات رئيسية لكن المفروض انا اشوف جهة الدرج وباصلح الخطأ بإذن الله وباوضحه وقت لاحق

معماري قطري

09-05-2025, 05:43 PM

معماري قطري

09-05-2025, 05:55 PM

بيكون عندي في الدرج من تحت للدور الأول 35 عتبة لو سويتهم كل وحدة 13 سم بيطلع الإرتفاع 4.55 متر نشيل منه حول 50 سم للدكتات والإنارة بيطلع 4.05 معقول أشوفه ولو سويتهم 12.5 سم بيطلع أقل 4.375 متر فرقية نص سم تنفع

الفتحة داخل المعلم عليها ب X بعد هذي فتحة الدرج بإرتفاع 2.6 متر فوقها يجي جسر الربط ويمكن أحلى إننا نلغيه هنا لأن عندنا عمودين جنب وكذلك بيت المصعد أشوف نخلي انفتاح أكثر أحلى

بيجي في نهاية الدرج حلاتها فوقه انفتاح ونفس لفل الجبس مغطي الدرج كذلك ومتصل معاه

https://i.imgur.com/ZTvcwjB.png

معماري قطري

09-05-2025, 06:02 PM

المشكلة هذي التفاصيل الصغيرة تنسيقها ومتابعتها في الموقع وتدقيقها عدل شوي مزعج والا التصميم هذا بسيط .. من هشكل مصمم الإنترير يقوم بعمل جبار وياخذ مبلغ عالي .. تكسية بيت المصعد عندنا أما خشب صناعي مناسب أو ترافنتين اللاصق أو بورسلان قطع كبيرة وعندي الدرايش وديكور التحويفات الحائطية بيطلع مع الدرابزين لو باركب مب حلو ولا مناسب وبدون حتى قبضة درابزين بعد شوي ما دخلت تفكيري بسبب الشكل ما بيركب والا أرفعها فوق وتكون ديكورية مرتفعة ولازم اقرر بسرعة لأن بيجي وقت تنفيذ أو إكمال تنفيذ الدرج وبيت المصعد

معماري قطري

11-05-2025, 02:13 PM

إستعنا برفيجنا اسحاق ويتم الدفان للطبقات المتبقية مع دفان برمل حول البايبات

هذا فيديو قصير لعملية الدفان والشيول التلسكوبي اللي يوصل الدفان لداخل بسهولة وبتكلفة ايجار يومي 500 ريال

https://youtube.com/shorts/SnbnnVWzias

https://youtube.com/shorts/6oLHcXDv1tE

هنا رش الدفان بالماء قبل نقله ونسمع توجيهات البطل اسحق

https://youtube.com/shorts/Znd2Q52042o?feature=share

معماري قطري

11-05-2025, 02:32 PM

مقترح مخطط توزيع الكاميرات الخارجية من شركة جاما .. فيه ملاحظات عليه .. ما نحتاج جهة حوض السباحة ونحتاج في طبيلة السيارات دوم كاميرا ونحتاج في ممر الملحق عادية بس بتكون داخلية

https://i.imgur.com/yD87Wqt.png

باكمل مع الباقي بس غالبهم غلط في غلط يبي لهم تدقيق ومتابعة

معماري قطري

14-05-2025, 01:56 PM

بخصوص تطورات البناء في موقعنا تم عمل إختبارات للعينات اللي تمثل ظروف الخرسانة في الموقع .. تم عملها دفعت وحدة وهي يفترض تنعمل على مراحل بعد اسبوع واسبوعين وثلاثة و 4 .. انا أشوفها زيادة تعقيد تهمنا النتيجة النهائية طلعت كل الأرقام على ما اذكر فوق ال 50 نيوتن وخلاص خذت قوتها وتمت عملية الإدامة أو ال ( Curing ) على أفضل ما يكون مع ملاحظة عدم وجود كراكات نهائياً أو تعشيش لكن طلع تبحيص قليل اللي هو انفصال الكنكري عن الخلطة وفي غرفة السائق مبنى حتى بدون أعمدة يمشي حاله وتمت معالجة هذا التبحيص

هذا تقرير المختبر وأحطه كامل للإطلاع مع إسم المختبر ورقمه للي يحب يسوي اختبار عنده

https://i.imgur.com/BRHfQwL.png

هذي اللي تهمنا نتيجة الفحص وهذا للجسور الأرضية والتي عملت مؤخراً .. الأرقام لقوة الضغط على المساحة بالنيوتن 49.9 + 51.2 + 48.5 هذي نقسمها على 3 ونطلع المعدل يساوي 49.8666 والتصميم على 30 فهذي تعدت ال 30 بنسبة 66.2222% مع جودة المكونات واستخدام الحديد المعزول وعزل الخرسانات بالبيتومين بإذن الله الشغل اللي سويناه أفضل من شغل بيتي من 20 سنة حتى الكنكري قابرو

هذي بعد مكتوب عليها جسور ارضية واحتمال تكون بالخطأ لأن فيه رقاب أعمدة ورقاب الأعمدة تصميمها على 40 نيوتن واللي يهمني مهما تكون غطينا ال 40 بمراحل

https://i.imgur.com/b4QQlN1.png

هنا المعدل 47.03333 نيوتن وهذا يزيد عن المطلوب في حالة ال 30 كان المطلوب ب 56.77777% وفي حالة كان 40 يزيد بنسبة 42.258%

هذي ست عينات للأساسات

https://i.imgur.com/2YbLpKl.png

معدلها 59.16666 نيوتن وزود على ال 40 المطلوبة ب 47.91666%

القصد من كل هذا لو بنستعمل الحكم الهندسي او النظرة الهندسية لقوام الخرسانة والعوامل المحيطة بها وظروف الصب كلها توصلنا الى هذي النتيجة حتى بدون إختبار

الإختبار أكيد بيكون ضروري في حالة الصب في الأوقات هذي ودرجة الحرارة توصل لفوق ال 40 درجة هنا انا ما اوثق في نظرتي الظروف صعبة

https://i.imgur.com/xeK0QG3.png

معماري قطري

14-05-2025, 02:29 PM

هذي شهادة الفيتري إن تمت الأعمال الخاصة بالصرف الصحي وصرف المطر والتمديدات الرئيسية للكهرباء والإتصالات وممكن ندفن المباني لكن الحوش فيه أماكن لمرور الخدمات نخليها لمراحل لاحقة

https://i.imgur.com/adtUaiR.png

وهنا متابعتهم من خلال فيديو وانتبه للدفان وممكن تأثيره على البايبات وطلبت من عمال الدفن إزالة الحجارة حول البايبات حتى الصغيرة وباحط فيديوهات لتوضيحهم

https://youtube.com/shorts/OMBuhh3JgEo

الفيديوهات كلها قصيرة تنقلنا لرابط اليوتيوب

https://youtube.com/shorts/VSEBlpXJaiU

هذا توضيح مسؤول الدفان وطلبت ازالة الحجارة بمشط حديدي حتى من فوق منها خطورة وكلام الفيتري صحيح

https://youtube.com/shorts/R3bjzqkcFsw

https://youtube.com/shorts/OPZ6VNR_rQY

https://youtube.com/shorts/sgGxVVJOQuQ

سامحوني أنقلكم أوقات لحيثيات صغيرة يمكن تكون مزعجة لبعض الأشخاص بس لازم توضيح كل التفاصيل .. يمكن شيء مهم ما علقت عليه وهو تمزق النايلون .. النايلون به وبدونه يمكن نفس الشيء بس نحطه حماية عن خدوش الدفان وكذلك احتكاك المعدات لكن ممكن يعطي حماية 80 أو 90% لكن ما تكون كاملة 100% في السابق كنا نحط بورد خشبي والبورد الخشبي مشكلته أكبر من نفعه لأنه يجمع الأرضة وبقية اخوانها من الحشرات .. البديل البولي كاربونيت لكنه بديل مناسب للي باني بيسمنت ومكلف أكثر من النايلون

معماري قطري

15-05-2025, 09:04 PM

بيكون بشكل تقريبي بهذي الطريقة .. بعد نسيت اشيل الدريشة تحت لأنها بتكون على الجدار خلف اللي يشوف أو خلف مكان القطع .. مثل ما يقولون الكبر شين بس معروفة التفاصيل ونتابعها في الموقع أول بأول

https://i.imgur.com/MCbzD7s.png

هذا فقط لتوضيح الفكرة

بنكون كأننا قاصين في الجدار المعلم عليه بعلامة X ثقيلة هنا مكان الدرج .. تحت الدريشة المرتفعة ستور وغرفة الكهرباء وفوق الدريشة الصغيرة كذلك ستور والدرايش الباقية قرب بسطات الدرج وأفكر الغيهم لو ما وافقوا عليهم نازلين واكتفي بالمنور السقفي فوق اللي بيكون هنا مخفي ما يبين عكس الهرميين الباقيين .. إجمالي بيكونون عندنا ست مناور سقفية إثنين مخفيين ما يبينون من الخارج

https://i.imgur.com/qAOL9sj.png

داير نقاش هندسي بين فعالية هذا النظام أو ممكن يدخل رطوبة عالية وحسب النقاش والفيديوهات اللي تعرضه وجربوه في مناطق مثل الحسا رطوبتها عالية وجوها قريب من جونا فالمكيف فعال ولا يدخل هواء مغبر ويضغط البيت على خمس مستويات ممكن تختار منها المناسب وحتى استهلاك المياه قليل وانا أشوف ممكن الإستفادة من الفلتر لدخول الهواء بدون حتى تشغيل المروحة السحب الداخلي بيحرك الهواء للداخل حجم الهواء الداخل يساوي حجم الهواء المسحوب .. هشكل وصلنا لأقل درجة وهي هواء مجدد فقط وحار نوعاً ما لكن نسبة دخوله تعتمد على كمية الهواء المسحوب ومهم نخلي مراوح السحب بحساسات وتماتيك حساس حركة وحساس رطوبة وللمطابخ تشتغل وقت الطبخ هشكل بنضمن تهوية ممتازة للبيت

معماري قطري

16-05-2025, 04:05 PM

إن شاء الله ينجح نظام التهوية لبيت عبدالله وبالنسبة لتصميم بيتي مفكر في تعديلات معينة على التصميم السابق ألحين ممكن أبدأ في التسوير كمرحلة أولى مع البوابات ومكان المجلس بارتبه بحيث يسهل تنفيذه حسب المخطط مع تركيب سور مؤقت حديدي ذيك الجهة جهة المجلس

مختصر سالفة التكييف والتهوية لبيتي هو وجود الحديقة الداخلية اللي بينزل فيها هواء ملطف بتكييف صحراوي من فوق وإحتمال مكيفين .. ما علي من الرطوبة الزايدة وأكيد الحديقة بتكون رطبة وزين للنباتات لكن باسوي نظام ازالة الرطوبة للهواء قبل ضخه لداخل البيت .. يعني هواء داخل للحديقة ملطف ومبرد ورطب وهواء خارج للغرف باسوي له وحدة تنقية إضافية مع إزالة الرطوبة بحيث ينضخ هواء نقي مزالة الرطوبة منه بواسطة جهاز ازالة الرطوبة

معماري قطري

16-05-2025, 04:14 PM

عندنا حجم منطقة الدرج بشكل تقريبي 176 متر مكعب غير مشتمل على العتبات السفلية اللي تغطي مساحة المخزن السفلي واللي بتكون مساحته حول 10 متر مربع لأن فيه مساحة 15 متر ومنها جزء بداية الدرج غير مستفاد منها نازلة وايد وكحجم يمكن ما توصل 25 متر مكعب لذلك أصغر مكيف بيغطيها وزود وأشوف عملها مهواة بمروحة سحب هواء بتكون كافية وزود وفي النهاية هي منطقة نادرة الإستخدام .. المنطقة العلوية تختلف ومن تهويتها يروح الهواء لباقي البيت وخصوصاً للبنتهاوس والدور الأول مع نزوله للأرضي

معماري قطري

16-05-2025, 04:50 PM

أحاول جاهد أذكر التفاصيل الصغيرة لفائدة الجميع وكذلك تفكير ومذكرات لي بصوت عالي وإعذروني لو كنت مزعج شوي

معماري قطري

18-05-2025, 10:51 PM

وصلني تصميم جديد ومستحدث شوي غريب لأحد الإخوان وكان يسأل عن حوض السباحة وانا توقعت إنه للحين ما نفذ التصميم المهم درسته خلال يومين وطلعت ملاحظات كثيرة .. شوي الا مرسل لي يقول انا بنيت العظم وانصدمت كل ملاحظاتك شفتها على الواقع .. القصد من كلامي حتى نتجنب هذي المواضيع والسلبيات المعمارية دوم استشيروا لتترددون واستشيروا عدة أشخاص ما تخسرون شيء وألحين المفروض إحنا في تطور ونوضح كل هالأمور بالصوت والصورة والشرح بالفيديو حتى باحاول احط مقتطفات من تصميميه

أول شيء هو مسوي بيسمنت خدمي في الغالب للخدمة تخزين وغرفة خادمات ومطبخ وحوش نازل تابع للمطبخ ومخزن وغرفة غسيل يعني قليل الإستخدام من افراد البيت بس ممكن تدخل صاحبة البيت أوقات وأنا أشوف ما فيه داعي نسوي السقف للبيسمنت مرتفع قريب 4 أمتار ممكن تحت ال 3 بنكون وفرنا متر وقللنا العتبات للصعود للدور الأرضي والمنور المحفور يكفي وزود ليش نسوي منور ونرفع البيت ونسوي درايش في أعلى سقف البيسمنت وعلى ارتفاع قريب 4 متر .. هذا تخبيص وليس تصميم وين البلدية عنه والمسؤولين عن العملية

معماري قطري

21-05-2025, 01:57 PM

اليوم الظهر الحرارة قاتلة 49 بس صج تاكل الإنسان تحت الظل وفي مكيف السيارة شلون البنيان والخرسانة توها مصبوبة البارحة مثلاً .. كنت أشوف فيديو وعلقت عليه تعليق لاذع لأن راعيه يفتخر بشغله ولا يدري إن شغله رديء لآخر درجة

يبين في دولة خليجية والخرسانة ناشفة حدها في عز الحر مستوي الأخ خبير يقول رش الخرسانة لازم يكون تغريق .. زين اتفقنا لازم يكون تغريق بس وهو يرش أو يغرق تطلع فقاعات من شرب الخرسانة للماء .. هذا يوضح لي إن الخرسانة يوم انصبت زادوها ماي واحتمال كثير وتركوها يتبخر الماي من الحرارة وكذلك من التفاعل شيصير لين تبخر الماي؟

اللي يصير يترك فجوات وهذي الفجوات ضعيفة مثل التعشيشات اللي ما تبين داخلية .. شالفرق بين الكيك والبسكوت؟ كلهم أساسهم عجين بس الأول فيه خميرة ومنفوخ وفيه فقاعات هشة والثاني مضغوط ويابس يمكن تشبيه بس ينطبق على الخرسانة بنبدأ نصب هالوقت للأعمدة بس ولأعمدة السور وبنكمل السور لكن متردد وايد بخصوص سقف الدور الارضي يمكن قد شعر راسي

معماري قطري

22-05-2025, 12:52 PM

أن تعيش وتمشي في مشروع منجز ليس كمراجعة فكر معماري ومشروع تخيلي حتى لو مرسوم بأدق التفاصيل .. دوم فيه تفاصيل صغيرة تلاحظها في المشروع أثناء الإنجاز ويلاحظها المتذوق الأخير وقت المعايشة على أرض الواقع

من فترة وانا أشوف فيديوهات حق مشروع ممشى الكريستال في جزيرة الجيوان في اللؤلؤة لكن ما حصل لي أعايش الواقع الا البارحة وصلنا حول الساعة 11 وكانت وجهة حلوة خذ منا الطريق بين 15 و 20 دقيقة والمواقف كانت متوفرة وسهلة أعتقد بسبب تأخر الوقت .. ما لاحظت وجود مواقف متعددة أدوار أو تحت الأرض كافية ويمكن تكون موجودة

انطباعي عن المشروع صراحة وبدون مجاملات خرافي شوي عليه .. كأن الواحد يمشي في أرض الأساطير واللوحات الأرضية الكرستالية تحف فنية ممكن تكون زجاج ملون بس تبين أعلى من محتواها وقيمتها بكثير من حيث النوعيات والتنوع كل لوحة تقول قصة غير طبيعة وصناعة وعمارة وحتى حيوانات .. شغل مميز بامتياز ما اقدر اعطيه أقل من 10/10 من حيث التخطيط والطرق والارصفة ما تخيلت أشوف هالنوع في قطر حول 5 سم فرق المستويات وأوقات أقل وانتقال سلس للماشي وللسيارات .. ممكن يكون هذا المشروع جوهرة التاج أو كبرى جواهر قطر

تعالوا للتكييف مريح ومن كل الجهات وبانتظام وهواء نقي مريح جداً جداً .. اللي بيسافر للجو يروح هناك كل يوم حتى لو حصلت له فرصة يسكن هناك وسفرة بالسيارة عادي مدتها 20 دقيقة بالكثير وفيه ناس أقرب لهم .. الله يعز قطر ويعز كل من على أرضها ويحفظها بجميع مكوناتها ويزيد المخلصين في مشاريع نوعية هشكل

معماري قطري

22-05-2025, 12:54 PM

كانت عندي ملاحظة وحدة تعتبر سخيفة نوعاً ما وهي عدم تنوع الأشجار الطويلة مركزين فقط على الواشنتونيا مع إن النخيل الملكية وايد أحلى وشبيهتها النخلة الزرقاء والجو ملائم لهذي النوعيات وجوز الهند بس تحتاج تربة ملحية خاصة والجو كذلك ملائم لها

معماري قطري

27-05-2025, 04:07 PM

زيارتي لبيت عبدالله في 26/05/2025 وكانت ملاحظاتي عامة ولي تخوفات بسبب اننا لازم نخلص صبية نظافة الأرضيات أولاً بخرسانة يفترض بقوة عادية 20 نيوتن تكفي والفرق بين 20 نيوتن و 40 حتى لو حصلت الأعلى وبدون زيادة سعرية إن ال 20 تتميز بالقوة المناسبة وكذلك بعدم الحاجة لعملية إدامة طويلة وما تتشلخ مثل القوية حتى 15 مناسبة .. والحديد رفعناه 5 سم والخرسانة 10 سم يعني الحديد بيكون عندنا وسطي والسبب حتى يقاوم قوى الشد من الأوزان فوق وكذلك يقاوم قوى الشد من الإنتفاخ لو حصل في التربة من تحت لأي سبب .. الشبك ما ركبنا ايبوكسي وهو 8 ملم

الفيديو إن شاء الله يوضح كل شيء ووعد القائم على التخشيب وصب الخرسانة بأن لا يكون فيه أي ضرر على الأعمدة

https://youtu.be/LVgX96DX1N0

معماري قطري

27-05-2025, 04:56 PM

معليش الفيديو ما طلع كامل كنت باتكلم عن العتبة الطايرة وتكلمت عنها في السابق وشرحتها على الرسم هذي كلها بتنصب صبة ثانية فوق الصبة الأساسية اللي للتأسيس واللي جاية داخل الجسور الأرضية وهذا توضيح بالفيديو على الرسم لما تم توضيحه في الفيديو السابق

https://youtu.be/1qYdrZ0P43Y

معماري قطري

27-05-2025, 05:09 PM

وهذا توضيح لسؤال أحد الإخوان عن تفصيل نقطة تصريف مياه المطر فوق السقف

https://www.youtube.com/watch?v=wUHW-I1wtFo

معماري قطري

29-05-2025, 01:43 PM

أمس مريت الموقع اللي نبنيه وكانوا شغالين آخر الليل حول الساعة 11 صورة فيديو بعد بس شغلة أنقله لكم ما فيه تطور واضح .. عدا الحديد قربوا يخلصون تركيب الأعندة وخلصوا أساسات السور وبيشتغلون على الأعمدة للسور .. تساءلت من اللي يشتغلون وكانوا يشتغلون في ملحق حوض السباحة .. توقعتهم الفيتري حق تمديد الخط الرئيسي حق الصرف الصحي طلع الحداد والنجار المتابع معانا وهو كشف غلطة سواها مقاول الدفان لأنه دفن الملحق زود هو عند لفل +15 من الحوش والحوش ذيك الجهة +30 من الشارع وقربه المجلس اللي بيكون + 30 من الحوش و + 40 أو 45 من الرصيف .. الحوض بيكون + متر و 5 سم من الحوش مستواه العالي ومستوى الأوفرفلو أقل ب 8 أو 10 سم وكل هذا ممكن التحكم فيه لأن ما بدينا نبني الحوض بس اتفقنا عليه والفورمن بيشتغل على التأسيس وبخرسانة كريستالية بعد ما تسرب وبمضخة Shooting crete وبسعر يقارب نص سعر الشركات كتأسيس مبدئي وعلى دفعات مريحة عكس الشركات الكبرى .. بنسوي الحواف دائرية كذلك والتشطيب بيجي في الأخير والمعدات ممكن نستوردها بروحنا .. فيها توفير حول 50% بإذن الله

المهم المقاول يشتغل على إزالة الدفان ومضطرين نخلي المبنيين للأخير اللي هم ملحق الحوض + المجلس والسبب تمديد خط الصرف الصحي الرئيسي وعمل منهول أخير بيكون فيه الرداد بين المجلس وملحق الحوض وذلك بعد إنهاء أشغال للمنهول مالهم حيث التمديد جاهز بس ما سووا المنهول الأخير .. حل ثاني إننا نبني الملحق ونبني الحوض ونخلي الممر وأرضيته مال الملحق للأخير لأن تمديد الصرف بيكون تحت أرضية الملحق وكذلك تحت أرضية خدمات المجلس مار تحت ومجهزين لتمديده للحين ما دفننا هناك

معماري قطري

31-05-2025, 03:44 PM

تمت مغامرة الصب في الأجواء هذي ولله الحمد بإذن الله تكون ناجحة .. جمعت الفيديوهات القصيرة اللي يرسلها لي الحارس والمسؤول عن الصب والمقاول وولدي أوقات بس مب مرتبة

https://www.youtube.com/watch?v=R-wvm4LxHXg

هنا وصف الخرسانة وقوتها 20 نيوتن ومعاها فيبر وانا طلبته حتى تكون مناسبة للصب في الحرارة وما تتكسر وبنستمر على هذا النوع حتى للأعمدة بس خلاص فوق بدون مقاومة للأملاح

https://i.imgur.com/qgKI4tp.jpeg

درجة حرارة الخرسانة وانا ما تهمني كثير لأني عارف إنها خلال ساعة بتوصل 40 وممكن تزيد بسبب التفاعل وبسبب الجو وصبينا قبل المغرب بشوي وانتهى الصب في الليل .. اللي حبيته في الصورة ذي قوام الخرسانة وتجانسها والكنكري أظن طلبناه 10 ملم أعلى شيء

https://i.imgur.com/FrEpi96.jpeg

ذكرت سالفة عدم إعتمادي البورد القابل للإنضغاط وبديل عنه البلاستيك 1500 مايكرون أو 1.5 ملم والخرسانة كتلة ومقواة بالفيبر ما بتستوي كراكات وبتقاوم الضغوط الحرارية بمشيئة الله ولازم باصور بعد اسبوع أو عشر أيام وإن شاء الله النتيحة مرضية ودعواتكم الكل ضدي بسالفة البورد وانا ضدها لأنها ممر لدخول النمل الأبيض

طلبنا الخرسانة بهبوط عالي كذلك مع إنها تمشي بهبوط بسيط وبدون مميعات أو ما يسمى ب Retardant Agent اللي هو مؤخر التصلب واللي يخلي التفاعل بطيء حتى ما تتأثر الخرسانة بالحرارة .. كل هذي تكاليف إضافية ولا شيء صراحة المقاول إذا يسويها يطلعها من عين المالك ويدفعه وايد زود وإحنا براحتنا وكلها تقديرات موقف وإدارة مشروع حسب الحاجة

https://i.imgur.com/ff8WInE.jpeg

معماري قطري

01-06-2025, 11:44 AM

توضيح بس للقصد من كلامي في الفقرة السابقة هو إن التوفير ممكن يكون 5 الى 10% لكن تطلبه من المقاول يزيد عليك ممكن 20% ويستغلك الا تكون محدده كشرط في العقد وموافق عليه هو ومسعره تسعير مسبق ويمكن حقاني فيه حتى ياخذ المشروع ويفوز بالمناقصة .. بعضهم المشكلة يغشك يجيب خرسانة عادية ويدعي إنها بالمواصفات اللي ذكرتها ولو كشفته سواء من فاتورة التسليم أو بفحص ما تقدر تاخذ حقك منه الا بقضية ومحكمة وطريق شائك طويل .. إدارة المشروع المرنة والتحكم في يدك يختلف .. كان بسهولة أقدر آخذ خرسانة 30 نيوتن أو 40 وتكلف بين 300 و 350 للمتر المكعب لكن هذي 20 كفاية وفوق الكفاية حتى 15 أو 10 كفاية لأنها على الارض والأرض قوتها 7 حسب الفحوصات والتربة المدكوكة ممكن 5 أو أقل شتفيدنا فيه قوة 20 على أرض 5 اللي نستفيد منه الخمسة فقط .. زين ناسي من سعر المتر المكعب طلع بس احتمال كبير قريب من سعر المتر العادي والمقاوم العادة حول 30% زود الطابوق أذكره العادي 1.7 ريال كنا نشتريه وزاد أعتقد شوي والمقاوم 2.2 ريال 50 درهم على 170 النسبة تطلع 29.411%

معماري قطري

01-06-2025, 02:36 PM

الطريقة اللي إحنا متبعينها تحتاج متابعة مهندس دائمة وتحتاج دراية بالمواد المتوفرة وتحتاج إدارة مشروع وصراحة بعض الشباب العاديين أجادوها إجادة ممتازة يمكن من ملاحظاتي إنهم بس خياراتهم في التصميم ما درسوها صح .. مثال أحد الشباب سوى بيسمنت وسوى الدور الأرضي مرتفع حتى يفتح درايش بعدين شافها على الطبيعة شكل قبيح وإضطر يستغني عنها .. إستعمل الكريستالايزد كونكريت للصبيات تحت الأرض وهذا صرعة في البيسمنت يعزل عزل قوي بس ضغط المياه ما نأمنه وكان المفروض عمل فرنش درينيج .. طبعاً فيه بديل للدرايش وللتهوية تحت الأرض فيه إنارة تعطيك الجو الخارجي بالضبط لو تحب ال اي دي بس ذكية وفيه إنارة تسوي الجو اللي انت تبغيه بضغطة زر يعني تقدر تسوي جو مغيم في البيسمنت أو سقف كله غيم ونور خفيف أو نور الفجر أو نور المغرب تربطه مع الخارج وتخليه تماتيك أو مع الداخل مستقل وانت تتحكم فيه ومنه أنواع بعضها بانلات تنباع في قطر وموجودة عند إخونا صالح جوهر مشارك معانا في القروب وهو اخو محمد جوهر صاحب حملة الحج المعروف ورجال قمة في الإحترام والله يوفقه

بس دوم رأيي الجو الطبيعي ونافذة نازلة مع حوش نازل حتى لو منور بعرض 50 سم أو المتوفر حتى 30 ممكن بس الإتساع مثل بلكونة هابطة أفضل بكثير وحتى ممكن أرخص

القصد عندنا مسارين رقم 1 التصميم وحيثياته .. ورقم 2 التنفيذ وحيثياته واضافاته وعمل تحليل دائم للبدائل ووشو الأفضل والأوفر أو الأنسب وكل مرحلة تحتاج مختصين

معماري قطري

02-06-2025, 12:39 PM

أمس مريت الموقع مال بيت عبدالله وصورت فيديوهات دمجتها في فيديو واحد 16 دقيقة أنزله على اليوتيوب وياخذ وقت شوي حتى ينزل هاي دفنشن .. التصوير كان الساعة 11 ونص وأسعدني وجود 3 مقاولين شغالين نفس الوقت .. مقاول حوض السباحة أسس وعدل اللفل ودك زين فوق تأسيسنا المبني على صبة النظافة .. يعني هذا تأسيس ثانوي وكان يصب صب نظافة حق قاعدة الحوض وبنفس الوقت خزان التوازن .. كنت مسوي خزان التوازن أنزل من الحوض في العمق بس سوى قاعدتهم وحدة وبيكفي إن شاء الله حسبتها على المخطط نحتاج عمق 55 سم حق خزان التوازن علشان نغطي ال 10% المطلوبة من سعة الحوض .. حول 4.3 متر مكعب وهذي تعطينا طاقة استيعابية للحوض بحدود 10 أشخاص وأتوقع نادر اللي بيكونون 10 في نفس الوقت في حوض هشكل منزلي .. بنحتاج حول 10 سم نرفع حافة الخزان وال 10 سم ما بتأثر وايد في ارتفاع 75 سم بتستوي 65 سم نشوف جزء الماء النازل الملامس للجدار

بداية الفيديو تصوير لي طالع من بيت الوالدة الله يحفظها ومار في أرضي من المدخل اللي حاولت في تعديله مع أشغال والخروج من بوابة ارض ولدي الثاني هشكل بيكون تصميم البيوت ثلاث مقابلين جنوب .. ممكن بيت ولدي الثاني يكون مقابل جنوب غرب بس باصممه تصميم يختلف وبحاول أخليه جنوب بالضبط بواجهة ثانوية غرب مع انفتاح على بيتي اللي بيكون شرقيه .. المهم نفس المسار اللي مشيت فيه بيكون طريق السيارات بين البيتين ونفس الشيء يوصل لبيت عبدالله

أتمنى الفيديو يكون واضح شوي أتشتت وقت التصوير

https://youtu.be/LB2yAQrhjVc

معماري قطري

02-06-2025, 12:41 PM

بقيو المقاولين نسيتهم كان النجار اللي ماسك الموقع شغال وكذلك شركة التيسير شغالين في الحديد

معماري قطري

02-06-2025, 01:33 PM

من هذي الصورة نلاحظ الفرق بين مستوى أرضية ملحق الحوض اللي يبين يسار الصورة وعمق الحوض اللي بيكون تحت حول 90 سم

https://i.imgur.com/xG0KRy9.png

ما ادري إذا شاركت هالصورة أو لا بس هنا تتضح المستويات أكثر .. الحوض بيكون محفور له جزئياً ومستوى الليوان يسار بيكون أسفل المثلث اللي يبين الرامب ذيك الجهة وبيكون بسيط بارتفاع 60 سم .. الرجال اللي يبين طويل هذا المار في ممر الملحق وراء الحوض والرجال الواقف في داخل الحوض يبين نازل والمرة الجالسة على الكرسي هذي اللي بتكون وراها جتات الجكوزي متفقين على 4 وبيتم التمديد لها داخل الخرسانة .. هذا ماي بيبي بروجكت خصوصاً منطقة الحوض مهتم فيها وايد

https://i.imgur.com/LiB69Dd.png

معماري قطري

02-06-2025, 01:40 PM

الخط السميك يسار يمثل قطعة الزجاج أو البولي كاربونيت اللي بتطلع جزء من واجهة الحوض يبين الماي من المكتب والصالة داخل البيت .. بيكون سمك الجدار أكثر من 20 سم 20 سم بس للخرسانة و 15 سم طابوق وراه يعني بنحاول نسوي القص اللي بتتركب فيه قطعة الزجاج جهة الخارج أكثر والسبب حتى نعطي مجال أكبر للبايب الستانلس ستيل اللي للتمارين البسيطة وللمسك بحيث يرجع الواحد راسه لوراء وهو ماسك البايب

معماري قطري

02-06-2025, 02:53 PM

https://www.youtube.com/watch?v=CbaKnTe_WVc

معماري قطري

04-06-2025, 03:39 PM

أمس تمت زيارة الموقع ليلاً 11 تقريباً وعمال تأسيس الحوض راحوا لكن عمال النجارة يشتغلون على الأعمدة .. شغل تأسيس الحوض ما اكتمل ولاحظت فيه خلل في فهم اللي يشتغله مع إنه كان معاهم طول الوقت والرسم واضح وهو متمرس شغلته بنيان أحواض .. هذي الصورة توضح شلون المفروض كان يمد الحائط المرتفع ليلتقي مع زاوية الحائط المقابلة ويسوي لها تشريك زين لأن الحوض غير وخزان التوازن غير ومبني معاه .. أصلاً خزان التوازن مسويه انا نازل أكثر وهو سواه نفس اللفل مال أرضية الحوض ماشي بتقل سعته شوي كان 17% من الحوض والمطلوب 10% وإحنا مغطينها وزود حتى لو نفس اللفل

https://i.imgur.com/B8oFBNh.png

وهذا الفيديو للزيارة والمتابعة وسامحوني الصوت شوي ضعيف وصوت الطقطقة مزعج وفيه هواء

https://www.youtube.com/watch?v=Ud45nqhDbw8

معماري قطري

04-06-2025, 03:42 PM

الإستشاري يقول خلصنا تقريباً ال Dirty work وكلامه صحيح انا باعتبره خلص لو كملنا الأسوار حتى لنص الإرتفاع وتخلصنا من الشينكو .. والمرحلة الجاية ممكن نبني الطبيلات بنفس الشينكو والا نصبر شوي نخزنه على جنب

معماري قطري

04-06-2025, 04:48 PM

البنيان فعاليات ومراحل ولكل فعالية مواصفاتها وطريقة شغلها وتكلفتها وموادها .. أول مرة أتبع هالطريقة وأشتغل بعقلية مقاول واستشاري ومصمم ومالك .. معليش تحملوني مشروع بعد الستين شوي يحتاج صدمات كهربية تطلع اللي في المخ .. مشينا مع التصميم سنوات وشهور قبل لنشوف التنفيذ ومراحله ودوم أكرر لحفظ شاللي علينا نسويه

هذا الفيديو السابق في وسطه شوية تصوير بدون تسجيل مسحت الصوت بالغلط وأضفت عليه تحليل للوضع اللي صاير على الرسم

https://www.youtube.com/watch?v=Kz1A_vqJE5M

معماري قطري

07-06-2025, 01:27 PM

متابعة تاريخية لمنطقتنا الجديدة في الوجبة من قوقل ايرث بمناسبة نزول تحديث جديد من شهر 2 اللي راح

https://youtu.be/QaVbHbWGl2A

معماري قطري

07-06-2025, 01:30 PM

الطرق ومسمياتها وترقيمها والأسماء للمنشأءات ما كانت موجودة أرض مفتوحة بس هذي الحديثة على القديم للإستدلال وأقدر أزيلها أخلي الأرض كما كانت

معماري قطري

08-06-2025, 02:57 PM

إحدى مهندسات التصميم الداخلي تنتقد تصميم غرفة طعام انا معمارياً ما اشوف فيها شيء بس هي تكلمت وايد عن المداخل لها بابين مثلاً والبابين مضطرين لهم باب من المجلس وباب للخدمة ولا مأثرين في شيء .. بعدين تورطت في وضعية طاولة البوفيه وبعد ذي سهلة وحطتها في ضلع قالت لازم نحرك الدريشة حتى تكون وسطية وكأن طاولة البوفيه بيكون حيزها واصل للسقف وهي أساساً بعرض 60 سم وارتفاع ما يزيد عن 90 سم .. بأحط رابط فيديوها في التيك توك وباحط ردي عليها بسكتش في اليوتيوب

نقلت الفيديو لليوتيوب وهذا الرابط

https://www.youtube.com/shorts/89adXimvCV0

وهذا ردي على الفيديو

https://youtu.be/oPkng70cbbg

معماري قطري

08-06-2025, 03:40 PM

هنا دمجت الفيديوهين مع بعض

https://www.youtube.com/watch?v=sFPZj9bxX2Y

معماري قطري

10-06-2025, 03:28 PM

زيارة ثاني العيد لموقع بيت عبدالله في الوجبة

https://youtu.be/K4L29hOGehU

وهذي صورة للطابوق للسور للتأسيس جهة المجلس طالع طابوقيتين مثل ما يبين ومليانين خرسانة والطابوق مقاوم للأملاح وهذا جيد وضروري وإحنا رفعناه وأعتقد كفاية ما يحتاج عزل اسمنتي مثل ما كنت مقرر قبل كنت مفكر بدال البلاستر من الداخل والخارج بإرتفاع طابوقتين أو طابوقة بالكثير .. بنشوف كم يكلف وممكن نسويه إحتياط إضافي فقط وفوقه بنركب ستيل فاصل يفصل البلاستر هذا عن العلوي اللي بيكون عادي وممكن نغير الصبغ بدرجة معينة أغمق تحت وفوق ابيض مثلاً

https://i.imgur.com/d1hL65V.png

زيارات الموقع دوم تعطيني فكرة معينة وممكن تعديل بسيط على التصميم ومن الأفكار اللي استجدت هذي الفكرة اللي تتلخص بأن حاولت قبل أسوي الحافة الأخيرة للحوض مكان المصب بعرض كامل الحوض 4 متر وعمق بسيط 70 سم حتى ما ننقص طول الحوض وايد بيكون صافي 8 متر والعرض صافي 4 متر لكن عندنا المكان هذا اللي بعمق 30 سم بس حق كراسي التشمس وعرض 70 سم قليل .. وهذا متفقين نجهز حق 3 نافورات صغار فيه يكونون بين كراسي فقط 2 للتشمس غاطسين جزئياً في الماي .. بس فكرت في حل يسوي العرض متر ونص أو و 60 سم أو حول هالرقمين أو زود شوي بيكون أكيد أوسع وممكن بسهولة بعمل الجزء الأخير ممتد والماي يصب في وسط خزان التوازن أو طرفه بدال ما يصب مباشرة على الحافة بيكون هشكل أوسع وحتى ممكن أحلى الماي يصب مثل الشلال

https://i.imgur.com/t8qkOcA.png

بيكون تقريباً مثل السكتش هذا معليش سكتش مال طلاب ثاني ابتدائي بس يوصل الفكرة

https://i.imgur.com/yQcjPXL.jpeg

انا باسوي بإذن الله حوض السباحة حق بيتي بشكل مقارب يمكن عندي فكرة تختلف قليل مفكر أسوي المقدمة مكان نزول الماي بواجهة زجاجية نص ارتفاع الحوض وأسوي جدامها جلسة غاطسة مستوى الحوض أعلى منها وخزان التوازن تحت والجلسة أسفل مستوى الحديقة بس راس الواحد وكتفه يبين مرتفع عن الأرض وأكيد باشوف على الطبيعة أي تغييرات ممكنة لكن باسويه مقارب

سالم الزهران

10-06-2025, 07:34 PM

الله يوفقكم اخونا ومهندسنا العود بو عبدالله، عقبال ما تبني لنا بيت في كازا :)

معماري قطري

11-06-2025, 01:39 AM

شكلك هناك يا بو زيد

وإياكم والجميع .. البنيان ممتع للحين ما نتفت شعري بس من شوي قاعد مع واحد ما يجمع ومعاه مقاول او واحد يقول مقاول مسعر له ورقتين ورؤوس اقلام بس مع إني أمس مكلمه وقايل له عطنا التفاصيل كاملة واليوم أكدت عليه حط اختيارات وتسعيرها ووصف واضح لكل شيء بتسويه طلع شكله ما يفهم واللي ما يفهم بيتعب المالك

معماري قطري

11-06-2025, 03:02 PM

الشغل على حوض السباحة ماشي كتأسيس خلال هالفترة ووافقنا اللي شغال عليه على التعديل البسيط اللي تكلمت عنه في السابق وباحط فيديو توضيحي ثاني شوي أوضح عنه جاري تنزيله .. اليوم يشتغلون على الحديد

بالنسبة للصبية للأرضيات اللي تمت أثناء ارتفاع درجات الحرارة لاحظت كراكات بسيطة ومضطر أوقف الصب خلاص لين شهر 10 الصبيات الباقية أساسية .. صبة الحوض مغامرة بس مضطرين نواصل فيها وبالشوتنغ كريت أو الخرسانة المقذوفة تفرق شوي .. كذلك صب أعمدة السور عادي نخلصها أثناء الصيف .. مشكلتنا كذلك لازم نصب أعمدة الدور الأرضي لأنهم جاهز حديدهم

https://youtu.be/BiwiQbHU8LQ

معماري قطري

14-06-2025, 06:21 PM

حالياً جاري بناء طابوق السور لإرتفاع 6 طابوقات للتخلص من الشينكو المؤقت اللي دوم يطيحه الهواء وهذا فيديو لزيارة البارحة للموقع

https://youtu.be/n_s64iEQM1g

معماري قطري

15-06-2025, 01:40 PM

طلعنا شاريين حديد جديد كفاية ايبوكسي بعد والحديد الجديد رخيص مقارنة بالمستعمل لأن نزلت الأسعار وهذا بنستخدمه للطابوق ولحديد الربط بين أعمدة البيت وبيسويه المقاول من شغل القص وحني الحديد في الموقع بمقابل طبعاً 300 ريال في اليوم لعاملين جيدين ولازم يستعملون ايبوكسي لنهايات الحديد مكان القص .. إن شاء الله شغل السور يخلص خلال شهر مع صب الأعمدة ننطر بس تأكيد من مقاول الكهرباء بعدم حاجته للتمديد خلال الأعمدة .. بيكون فيه تمديد في حديد السور أكيد للإنارة وللكاميرات

هذا منظر عام للبيت وشغل التخشيب ووزنية كل عمود

https://i.imgur.com/ayuIJyw.jpeg

أحد المقاولين نبهني لسالفة ربط الأعمدة مع بعض ممكن لو صار خلل أثناء الصب في عمود يأثر على اللي حوله باسأل فيها الإستشاري المشرف والنجار مع اني أشوف التدعيم جيد والجيكات مثبتة زين في الخرسانة المصبوبة

https://i.imgur.com/tV0BiaR.jpeg

هنا يبين التدعيم وما اكتمل 100%

https://i.imgur.com/3h7RHzu.jpeg

https://i.imgur.com/lNJbjjq.jpeg

https://i.imgur.com/Iwuktt4.jpeg

هذا تصوير أمس كله

زاوية المصعد تم تنفيذ الشطفة 45 درجة فيها وهذي بيتم تشكيلها بعدين بالبلاستر أو بالتكسية ببديل الخشب ممكن تطلع أفضل .. ألحين تأسيس خرساني فقط

https://i.imgur.com/k3K4FKY.jpeg

https://i.imgur.com/MFOaznd.jpeg

باب المصعد

https://i.imgur.com/TuMCPwo.jpeg

حوض السباحة تم عزله وتمت حماية العازل ببلاستيك خاص وبيتم تركيب الحديد ومن ثم الخرسانة المقذوفة مع تشكيل الحواف لتكون مقوسة وليست 90 درجة وحادة .. التقويس هذا بنستخدم فيه بورسلان مقصوص أو تبليط خاص بالمسابح مقصوص وطولي بيطلع شكله أحلى ولون غير يحدد الحواف والداخل العمودي بيكون لون غير مناسب وقطع بورسلان أكبر والخارجي في الغالب حجري فيه شوية خشونة لمنع التزحلق

https://i.imgur.com/gWT7xiC.jpeg

https://i.imgur.com/R8qqDGL.jpeg

ارضية المجلس فيها كراكات بسيطة جداً وأعتقد السبب من إختياري عدم وضع البورد القابل للإنضغاط للحصول على التصاق شبه تام بالجسور لعدم ترك منفذ للأرضة وإن شاء الله ماشي الحال ولا حتى يحتاج معالجة لأن بتجي فوقه طبقة سكريد ثانية تحت البلاط بيكون كل البنيان بإذن الله رمل لس

https://i.imgur.com/JnX0a2H.jpeg

الملحق

https://i.imgur.com/SrNe8XA.jpeg

معماري قطري

15-06-2025, 01:55 PM

الضغوط الحرارية قوية وتسبب كراكات لو ما تم استيعابها بفاصل تمدد العملية أشوفها ناجحة واليوم زار الموقع واحد مختص جزاه الله خير وبيعطينا حلول وزيارته مجانية بس بنتعامل معاه في الردي مكس عن طريق قطر رديمكس وانا احبهم سمعتهم قوية وأصحاب اختصاص ومضطرين لنوع خرسانة جودة عالية وتنفع للصب في الحرارة وبيكون بس للأعمدة وبنوقف شغل صب خرسانات لكن بنكمل أعمدة المباني الثانية والسور بنفس الخشب .. يعني صب الأعمدة بيكون على دفعتين

بالنسبة لنوعية الردي مكس اخترنا هذي ذاتية الإستواء والدمك وغالية شوي الفرق 70 ريال عن العادية في المتر المكعب 70 على 300 تساوي 23.3333% زود تسوى وفيها اضافات خاصة بمنع الكراكات

https://i.imgur.com/dyEXAXx.jpeg

https://i.imgur.com/NYjTkCB.jpeg

الشركتين توب الربان وقطر رديمكس حتى قطر رديمكس عطونا سعر مساوي للربان للخرسانة العادية

sara jsm

16-06-2025, 10:58 PM

بوعبدالله عيدك مبارك اول شي ..
ثانياً يبي لك تصوير بطياره درون من فوق :oops: احس بيطلع حلو وتضمه مع هالفيديوهات ..
ومنها للذكرى .. ;)

معماري قطري

17-06-2025, 03:11 PM

بوعبدالله عيدك مبارك اول شي ..
ثانياً يبي لك تصوير بطياره درون من فوق :oops: احس بيطلع حلو وتضمه مع هالفيديوهات ..
ومنها للذكرى .. ;)

حي الله الشيخة سارة .. الله يعيده علينا وعليج واحنا في حال أحسن وأمان وخير

تصدقين أمس أكلم خليفة ولدي أقول له متى بتروح تصور يالمصور المحترف صدمني قال الرموت مال الطيارة ضايع .. باشوف حل إن شاء الله

معماري قطري

17-06-2025, 03:27 PM

أمس مريت على الوالدة الساعة 11 الليل وكانت الليتات تشتغل صوب البيت رحت صوبه الساعة 11 ونص ونزلت شوي شفت شغالين على تخشيب الأعمدة الباقية ومستغلين فترة الليل طقطقة ولله الحمد أقرب جار ساكن لنا يبعد حول 200 متر ما يوصله شيء يمكن حتى 250 متر وبيت الوالدة حول 150 متر وانا في الحوش ما اسمع بعد .. بس ما قدرت أطول ولا أصور ما فيه تغييرات كبيرة والأمور ماشية بفضل الله .. اليوم بيكملون طابوق السور لإرتفاع 6 طابوقات لكل الجهات وبعدها بيتم تمديد حديد الأعمدة ومعاه الحديد القطري اللي بيدخل بين الطابوق بعد الطابوقة السادسة طلبناه ووصل في الموقع .. وقبل صب أعمدة السور بنركب حديد طولي في تجويف الطابوق في وسط كل بانل بس قطعة وحدة لمنع الضغوطات الحرارية والكراكات وإن شاء الله تنفع .. وخلاص لهالمرحلة بنوقف لين نص تسعة على الأقل

مشكلتي وقتي قصير وعندي صيانة أو هدم البيت القديم وللحين البلدية ما ردوا علي بالتوجيه وعندي سفرة في 18/ 7 أحضر لها .. المشكلة كل شيء يحتاج ترتيب ووقت .. عندي كذلك خطتي لتسوير ارضي مبدئياً مع البوابات بس قبل أحتاج للموافقات على الدي سي 1 على الأقل وللحين ما اتفقت مع استشاري حاط في بالي واحد قطري دكتور في الجامعة مدحه لي واحد يخلص التصميم اللي ابغيه واحتمال كبير أعدل على التصميم بعد تعديلات جذرية

معماري قطري

20-06-2025, 01:02 AM

تكلمت عن تفاصيل الربط بين الأعمدة بجسر ربط بسيط وهو بيكون عتبة الدرايش والأبواب .. للداخل بسمك الجدران وللخارج هذي التفاصيل لأن يدخل فيها العزل الحراري كذلك ونظام الإنارة والديكور والستارة مكان الدرايش .. إحنا في بدايات التنفيذ وأفضل نركب حديد ينشبك معاه جسر الربط في الأعمدة قبل الصب وتم تركيبه لله الحمد في آخر الفيديو توضيح من الحارس لكن باوضح أكثر لو زرت الموقع بكرة

https://youtu.be/cQMInE0cweU

معماري قطري

20-06-2025, 01:21 AM

هذي صورة ناقلها من الفيديو لحديد الربط للجسر وهذا غير موجود في المخططات الإنشائية بس متعارف عليه ووايد ما ينفذونه .. انا أشوفه مهم يعطي قوة للحوائط المرتفعة ويمنع الكراكات وكذلك هو عتبة الدرايش العلوية والأبواب لذلك وحدت ارتفاعها ل 2.6 متر

https://i.imgur.com/iZRXQaK.png

معماري قطري

20-06-2025, 05:34 PM

يمكن كان المفروض أشرح في الفيديو السابق عن العزل الحراري انا ركزت على التفاصيل وما ركزت على ذكر ليش .. جسور الربط في يدنا نسويها 30 أو 40 سم أو حتى ممكن 20 سم .. للجدار الخارجي باخليها 40 أفضل لأن فيه مسافات طويلة بدون تدعيم من أسفل وحسب المعادلة عرض الفتحة على 8 تعطينا الإرتفاع .. عندي أطول مسافة لواجهة زجاجية 5.25 متر وهذي تحتاج عمق 65 سم ممكن نسويها 65 أو 60 وممكن نغامر في 40 كذلك الحائط الجانبي الطابوق المليان خرسانة وحديد قطعة وحدة أشوفه يكفي وزود ما يحتاج عمود جانبي .. بس باتأكد من العمق أو ارتفاع العتبة هل أسوي 60 أو لا بكرة أسوي 40 وتتقوس ويزعلون علي سكان البيت يقولون مهندز أي كلام

بخصوص العزل الحراري لو حصلنا يو فاليو منخفضة مثل هذي للبوليسترين الموسع اللي هو الأبيض والخفيف وللأزرق الثقيل المبثوق ممكن تكون شوي أعلى ممكن بحدود 0.01 وهذي صراحة خرافية في بيتي الحالي 5 سم مع نظام العزل تعطيني حول 0.02 أو أكثر .. المكون المهم أو الأهم في العزل الحراري هو الفوم وهو الأرخص كمادة عازلة وبين كل مكونات الجدار عندنا البلاستر أغلى والصبغ أغلى والطابوق أغلى نبخل في قطعة فوم تستر برد أو حر الجو ؟

https://youtu.be/O0q43tezs08

معماري قطري

20-06-2025, 05:38 PM

ممكن أسوي عزل منطقة الأعمدة خارجي بارز شوي بفوم 7 سم لكل أعمدة البيت وتكون كجزء من الديكور الخارجي نفس الحال لبرواز الدرايش نفس نظام هالكو وشركات كثيرة تشتغل في هذا المجال وأشوفه حل فعال ومناسب

معماري قطري

20-06-2025, 05:58 PM

صدمة اليو فاليو للخرسانة جدار 20 سم وايد عالية تعني تسريب حراري 14 ضعف التسريب الحراري من 5 سم فوم وعندي انا 40 سم يعني ناخذ نصها 1.4 وبعد تعتبر عالية

The U-value of a concrete wall varies based on its thickness and whether it has any insulation. A solid concrete wall without insulation typically has a high U-value, indicating poor insulation. For example, a 200mm concrete wall with plaster on both sides might have a U-value around 2.80 W/m²K, according to MCS Certified. Adding insulation, like internal wall insulation, can significantly lower the U-value, improving thermal performance.

عزل الفوم على العموم A wall with 100mm of EPS insulation might have a U-value of 0.28 W/m²K, according to an external wall insulation supplier.

الإي بي اس تعني اكستروديد فوم واللي هو الفوم الأزرق وحسب السمك يزيد العزل

معماري قطري

21-06-2025, 03:58 PM

موضوع العزل الحراري موضوع شائك ومعقد وتبسيطه بالعلم المختص به وهو مستحيل يكون دقيق 100% لكن دقيق بدرجة معقولة توصل ل 90% بسبب إختيار النظام المناسب والقضاء على الجسور الحرارية وتعريفها هي النقاط الضعيفة اللي تتسرب منها الحرارة وكذلك البرودة لحيز مغلق ومعزول ونبغي درجته الداخلية تختلف عن الخارجية.. إنت كمالك لمبنى يهمك تحصل نتيجة مرضية من العزل والدجل اللي صاير ومن مختصين كثير في هذا الموضوع ويصححونه مع الوقت .. مثال في السعودية بدوا بيو فاليو معينة وبعدين زادوها أو بالأحرى نزلوها لحدود 0.25 واط لكل كالفن ولكل متر مربع ولهذا استعملوا الفوم في الجدران 7.5 سم بدال ال 5 .. كذلك إكتشفوا إن المونة بين الطابوق تسبب جسور حرارية حول الطابوق لذلك سووا نوع يتداخل فيه العازل .. هذي المعلومات ما تحتاج تدريج لهذي الدرجة .. باقي ثغرة كبيرة وهي الجسور والأعمدة وما سووا لها حل للحين

خلوني أبسط شوي عندي انا الأعمدة للواجهة الغربية اللي ذكرتها في الفيديو وصلت 11.4% من المساحة واليو فاليو لها 1.4 وهذي ثغرة حرارية كبيرة لو بنسوي حسبة يو فاليو كمعدل مثلاً نفترض إننا وصلنا لحدود 0.2 للجدران وممكن 0.35 لمنطقة الجسور وهي بشكل تقريبي 10% وانا أقدر أحسبها بدقة لكل واجهة وعندنا الدرايش تختلف بعد لكل واجهة هذي خلوا نقول مساحتها 20% واليو فاليو لها 0.5 تستوي اليو فاليو للمكونات لكل واجهة كمعدل .. 1.4 ضرب 11.4 + 0.35 ضرب 10 + 0.5 ضرب 20 + 0.2 ضرب 58.6 ( اللي هي النسبة المتبقية من مساحة الجدار واللي تعتبر أعلى عزل ) ونقسمها على 100 بتطلع لنا 0.3668 وهي اليو فاليو المعدلة للجدار ككل أو للواجهة الغربية وتعتبر عالية .. صحيح أقل بكثير من النظام غير المعزول بس ما وصلنا لل 0.2 أو 0.25 الرقم المناسب والفرق حول 46.72% زود وهذا يعني الجسور الحرارية سيطرت على الوضع

زين وشي مساهمة كل قطاع في دخول الحرارة أو في التبادل الحراري بين الداخل والخارج كطاقة وات في المتر المربع وفي فرق درجة الحرارة وخلونا نفترض 30 درجة حرارة برا 50 وداخل نبغيها 20 .. نبدأ بقطاع الأعمدة اللي هو 11.4% واليو فاليو له 1.4 هذا يسرب 15.96 واط لكل متر ولكل فرق درجة حرارة ولازم نضربها في 30 تطلع 478.8 واط لكل متر ونضربها في المساحة كاملة وبشكل تقريبي عندي مساحة الواجهة 288.75 متر مربع قستها بشكل مضبوط مب تقريبي تطلع 138253.5 واط وهذي طاقة التكييف لهذا الجزء بس لكن لو بنحسبها بدقة بتكون نجمع كل اللي نحصله ومن كل الواجهات فتطلع لنا الإجمالية وهذا بس بسبب جسر واحد ومساهمته لكن لو بنحسبها على اليو فاليو المقدرة عندنا 0.3668 بتطلع أكبر لكن المساهم الأكبر فيها قطاع الأعمدة

زين ناخذ قطاع الدرايش اللي ممكن بسهولة نوصل ليو فاليو 0.5 وممكن حتى 0.4 وممكن أقل حسب طبقات الستاير ونوعها وهو يشكل ما يقارب 20% هذا يدخل 10 لكل متر لكل فرق حرارة مئوبة 1 وعلى فرض ال 30 يستوي 300 وات للمتر وللأعمدة طلعت 478.8 لكن بسبب مساحة الدرايش وهي تقريباً ضعف الأعمدة تطلع لنا أكثر لو حسبناها كم كرقم مثل الحسبة العلوية .. في النهاية تطلع الأرقام عالية وايد لكن بدون عزل الوضع يكون وايد وايد وضغط قوي على التكييف وكذلك ضغط على الطاقة يعني مثل الثلاث أضعاف وزود وأوقات توصل لأعلى حتى لعشر أضعاف وأعتقد هذا واجب وزارة الكهرباء تسوي حسابات ومقارنات للإستهلاك للمباني وأمثلة على العزل الفعال والجيد وتشجع عليها

حاولت أبسط الموضوع وأحد الإخوان أعتقد مهندس أو مهتم معانا في قروب الوتس اب حطيت أرقام لليو فاليو للطابوق والخرسانة من جداول المواقع وهو خاطب شات جي بي تي وطلع لستة له وكانت مقاربة لما حطيته بس ذكر إن النظام الدارج في الخليج .. بانقله لكم وهذي فايدة النقاش هناك والشباب المهتمين بالبناء ومشاكله وايد .. آخر واحد دخل معانا أمس صيني مختص بالتسويق من هناك للأثاث ويقول كل شيء وتعامل معاه واحد من الربع وله وكيل في قطر كذلك يتعامل معاه .. ما شاء الله متفاعل ويتدخل مع إن لغته الإنجليزية والصينية مرة بالغلط كتب بالصيني

بانقل صورة مما قاله شات جي بي تي

https://i.imgur.com/Li5nAGs.jpeg

https://i.imgur.com/LSqa7jb.jpeg

هو الجواب بإختصار وللمادة بروحها لكن في سيستم بناء وحائط الموضوع يحتاج دراسة أكبر وتفصيل .. هذي الأرقام تفيدنا بس اللي يفيدنا أكثر هو تركيبة الحائط فيها مثل ما ذكرت نسب مكونات وشات جي بي تي يعرفها ويعطيك الحسابات بدقة أكيد بس تعطيه صورة مقطع الحائط ومكوناته والشباب الطالعين حديثاً جيل التسعينات وال 2000 أفضل منا إحنا منتهين الصلاحية جيل الستينات ويعتمد عليهم في هذي الشغلات

معماري قطري

21-06-2025, 04:10 PM

من الجدول الأول الفرق بين عمود خرساني مفصخ بدون عازل واليو فاليو له 2.5 في أول الجدول ونفس العمود ملحفينه من برا باكستروديد بوليسترين بس خمسة سم وهو نفس طريقة شركة هالكو في تركيب الفوم الخارجي 0.5 الأول أعلى من الثاني 500% يعني تسريب الحرارة عالي حطينا 5 سم فوم بس سوى فرق كبير جداً وهذا القرار اللي اتخذته بتغليف الأعمدة من الخارج بالفوم وممكن بتشكيلة بسيطة يعطي شكل ويعزل عزل ممتاز بإذن الله

معماري قطري

24-06-2025, 01:23 AM

لله الحمد تم تفصيخ الأعمدة ثيابها اليوم ( شلنا الخشب ) والنتيجة مبدئياً مرضية للغاية لي لكن كان المفروض يضربون الخشب من تحت على مستوى الإنسان بمطرقة حتى ما يستوي تسويس ولو بسيط واللي استوى كلش لا يذكر وحتى بدون معالجة يمشي معاي لكن بنعالجه بقراوت مابي قوة 60 نيوتن .. وأتأمل بإذن الله تكون قوة الخرسانة وقت الفحص فوق ال 40 نيوتن ومتوقعها 50 وفوق بمشيئة الله

أترككم مع الصور

https://i.imgur.com/Ws0fMzD.jpeg

https://i.imgur.com/0WWLblN.jpeg

هذا ما يبين لي له تأثير خفيف جداً حتى شلون يتعالج

https://i.imgur.com/viwKsep.jpeg

العمدان البعيدة حديد الربط للجسر يبين لي زين لكن هذا القريب كأنه أخطأ فيه وسهل يتضبط بعدين

https://i.imgur.com/RtKDjkJ.jpeg

هذا التسويس البسيط

https://i.imgur.com/kRToIKM.jpeg

الخرسانة جودة عالية من قطر ردي مكس وأنا أشوفها كذلك يمكن التنفيذ كان يحتاج ضربات خفيفة على الخشب لتحريك بعض المكونات في الأطراف

https://i.imgur.com/1L4a6D1.jpeg

يعجبني الإستشاري دقيق وايد وخلوق هذا بالنسبة لي أمشيه وأنا مغمض

هنا شغل حوض السباحة تتم عليه إضافات بسيطة في الحديد وفي التمديدات تمهيداً للصب في 5/ 7 تقريباً لأن المنفذ الرئيسي المقاول مسافر شوي وبيرجع قريب .. بتكون الخرسانة مصمتة كريستالية اللي ما تسرب مياه

https://i.imgur.com/cFCLVoZ.jpeg

يبين واضح تأسيس مكان اللي يسمونه Sun Bed وهذا بيكون 30 سم تحت الماء وبعرض 1.4 متر وطول 4 متر يكفي حق 3 كراسي استرخاء وتشمس يمر الماي من تحتها ويلامس اللي جالس عليها مغمور جزئياً يكون حسب ارتفاع الكرسي وبنسوي فيه 3 نافورات صغار مع إنارة مدمجة تغير لون الماي .. كذلك تم عمل التمديدات حق المياه الراجعة قالوا ضرورية نسبة معينة من الأوفرفلو ونسبة من تحت وهم لهم حساباتهم ووافقت بدون نقاش زايد

https://i.imgur.com/uO7Et5E.jpeg

من اليسار مكان المجلس اللي له درايش تطل على منطقة الاوفرفلو بين الخزان النازل والحوض المرتفع أقصى اليمين

https://i.imgur.com/vqSk1lb.jpeg

https://i.imgur.com/dm1gr24.jpeg

تربيط الحديد ما انتهوا منه وعندنا الطابوق الحامي والغطاء الخرساني تحت 5 سم ومن الجوانب 3 سم تحت + خرسانة نظافة 10 سم + دفان مدكوك + خرسانة تأسيس 10 سم ثانية يعني شبه مستحيل توصل رطوبة ومن الجوانب الطابوق

يمين يبين تأسيس حديد الدرج الخرساني وبعد بيكون عندنا تأسيس لحديد الكرسي اللي فيه جتات الجكوزي

https://i.imgur.com/VW1ermq.jpeg

هنا جنب ليوان البيت ويمين كلش المكتب وفوق شوي يمين الصالة والحوض بيكون 60 سم مرتفع عن أرضية الليوان وأرضية البيت داخل حول 47 سم وفيه واجهة زجاجية أو بولي كاربونيت بيتم التأسيس لها

https://i.imgur.com/LHCpKXT.jpeg

تصميمي لحد يعيب خصوصاً وحدة أعرفها زين قوية دوم تجلد

جهة الجار حطينا البورد القابل للإنضغاط هذا كثير القار وجودة عالية يبين من لونه أسود

https://i.imgur.com/z5P5DTC.jpeg

هنا تم تركيب الحديد بس دبل وانا ابغي قطعة وحدة 8 ملم تكفي وباحط فيديو شرح بهذا الخصوص

https://i.imgur.com/57SQ0cE.jpeg

https://youtu.be/eREG1iRabTY

معماري قطري

24-06-2025, 01:26 AM

هنا أقصى اليمين هذا بايب للماي الراجع بيروح جهة مكان كراسي التشمس للنافورات اللي هناك بين الكراسي https://i.imgur.com/LHCpKXT.jpeg

معماري قطري

24-06-2025, 01:30 AM

تركيب الحديد الإيبوكسي للحوض يحتاج طلاء النهايات ايبوكسي بعضها مب مطلية وهذا الفرق بين عمال عاديين وشركة مثل التيسير ما لاحظت عليهم كلش هذا النقص

معماري قطري

24-06-2025, 01:37 PM

تم شراء القراوت الخاص بمعالجة التسويس والتعشيش من مابي بسعر 40 ريال للعبوة ووحدة تكفي وتزيد بإذن الله

SouthK

25-06-2025, 08:26 AM

التعشيش عندك في الاعمد بسيط .. زين انك متابع

معماري قطري

25-06-2025, 01:29 PM

التعشيش عندك في الاعمد بسيط .. زين انك متابع

من الجنون إني ما اتابع والمتابعة سهلة ومن الإستشاري أكثر مني ومن ولدي كذلك والفورمن هناك انا عني ما اشوف هذا تعشيش ولا تسويس حتى وعادي أمشيه بس بعد أراعي راي الإستشاري والمعالجة سهلة كلفت 40 ريال فقط مواد وشغل الفورمن بدأ يصلح شغل ربعه اللي ما تابعوا الصب بالضرب على الخشب من برا .. الخرسانة كانت ما تحتاج هزاز

صورت البارحة فيديوين هناك واحد فيه ملاحظات حق عبدالله يتابعها وواحد عام بادمجها وبانزلها على اليوتيوب وبانقلها هنا

معماري قطري

25-06-2025, 02:05 PM

هذي بعض الملاحظات اللي لازم تتعدل لاحقاً بإذن الله وهي بسيطة وممكنة حتى تتسق مع الشكل المعماري المطلوب .. انا تكلمت وايد فيها بس أكتشف التنفيذ تم على عكس ما طلبت لأني طلبت المستوى للأرضية نفس أرضية البيت للممر بين البيت والملحق وكذلك للملحق و في هذي الحالة السكريد بيحل الموضوع بس بيكون بسمك 25 سم لرفع الملحق لكن الممر محلول موضوعه للحين ما دفنا ولا بندفن الا بعد انتهاء تمديد الصرف الصحي الخارجي

الأمور بالنسبة لي من صب الأعمدة مرضية للأخير وكان سعر الخرسانة 370 ريال للمتر المكعب فيها إضافات وشديدة الهبوط وحطيت عنها شرح وصور وخذناها من قطر ردي مكس وبيتم اعتماد نفس النوع للسلابات بس بيتم عملها بعد شهر 9 وبعد تحسن درجات الحرارة

https://youtu.be/wqGWA5ukYE0

SouthK

26-06-2025, 05:53 AM

الله يوفقك اخوي معماري

معماري قطري

26-06-2025, 01:02 PM

الله يوفقك اخوي معماري

وإياكم يا اخوي

يمكن توضيحي للي صاير وبالتفاصيل الصغيرة مذكرة لي وللمتابع اللي حاب يستفيد .. أوقات أقول الكتمان مهم والسرية بعدين أفكر في سالفة لو صرت أناني وكتمت كل شيء ما بافيد الناس والمهتمين خلني أقول السلبيات قبل الإيجابيات ووشي حلولها وللملاك الخيار

اللي متابعين معاي وأقصد البنيان وخطته وتدخلوا في التصميم كثيرين آخرهم الحفيدة الصغيرة هيا قالت تبغي مرجيحة ( دورفة بالقطري القديم ) طلعت لها مكان مناسب فوق حوض السباحة

أهم فايدة استفدناها إحنا خلني أقول طاقم إدارة المشروع هي إننا مستمتعين بالشغل وولدي متحرك ومتابع وحتى هو واللي اقترح علينا هذي الطريقة وساعدنا ببعض المواد وحتى الحارس اللي كان عنده والفورمن اللي نفذ هيكل بيته ناوين يفتحون شركة مقاولات وانا أشجعهم .. ثاني فايدة وهي يمكن الأهم إننا ندير حسب الحاجة وحسب المتابعة والمواد .. صحيح صبينا في جو صعب بس مواصفات الخرسانة عالية والحديد كذلك باقي الإختبار يحين موعده ونسويه ويكون زين بإذن الله للخرسانات ذي اللي ممكن تكون قبل الأخيرة والأخيرة اللي للمجلس والسور وغرفة السايق وملحق الحوض ممكن تكون الأسبوع الجاي واللي بعده سفر وإيقاف العمل وبإذن الله والسور منتهي وشايلين السور المؤقت

معماري قطري

29-06-2025, 02:36 PM

تم بحمد الله تركيب الكاميرا على عمود حديد بتكلفة 1400 ريال تكلفة كلية وهذي صور منها البارحة حول الساعة تسع

https://i.imgur.com/YupWu1r.jpeg

نلاحظ بداية اكتمال السور باقي الطابوقة الأخيرة وجسر الربط بيتنفذ بعدين بعد الأعمدة

https://i.imgur.com/rSIGkKZ.jpeg

https://i.imgur.com/ujW1j5g.jpeg

https://i.imgur.com/2QszA5u.jpeg

فيه حاجة نسيتها نبهني لها ولدي وهي الشبك تم تركيبه كل 3 صفات بالإضافة للحديد الوسطي العرضي والطولي وممتد قليل بيرتبط مع خرسانة العمود لثبات أكبر من المسمار أما البيت لازم نستخدم أما المسمار أو الإيبوكسي والحديد المزروع وشكلي باتجه للحديد المزروع

SouthK

30-06-2025, 07:55 AM

منزل عامر بإذن الله
ممكن بس توضح الي تقصده بكلامك:

"وهي الشبك تم تركيبه كل 3 صفات بالإضافة للحديد الوسطي العرضي والطولي وممتد قليل بيرتبط مع خرسانة العمود لثبات أكبر من المسمار أما البيت لازم نستخدم أما المسمار أو الإيبوكسي والحديد المزروع وشكلي باتجه للحديد المزروع"

معماري قطري

30-06-2025, 12:38 PM

في هذا الفيديو إخوي ساوث كي موضح وهذا حديد زيادة وهذا السور الخارجي بنيانه غير عن الجدران الداخلية هذا يعتبر نظام بين الطريقة التقليدية اللي هي بنيان الطابوق أول وبعدين صب الأعمدة وطريقة صب الأعمدة قبل .. مسوين تقوية وربط للطابوق مع العمود بهذا الحديد العرضي قطعة وحدة بس 10 ملم

https://www.youtube.com/watch?v=eREG1iRabTY&t=13s

للبيت بيكون الوضع غير بنينا الأعمدة قبل وطلعنا منها أشاير جسر الربط .. جسر الربط على ارتفاع 13 طابوقة وطابوقة 10 سم .. 270 سم من الأرضية قبل التشطيب و 260 بعد التشطيب مثل ما هو موضح في الصورة هذي

https://i.imgur.com/rXITRie.jpeg

وضحت مكان جسر الربط وين بيكون وبتكون له تفاصيل باناقشها في وقتها لأنه بيحمل بوكس البلاك آوت عن الشمس ومكان الدريشة ممكن غير

غير جسر الربط عندنا من تحت نبدأ من الداخل طابوق 20 سم مفرغ وأول صف طابوق مقاوم للأملاح مفرغ ومليان مونة اسمنتية مقاومة للأملاح كذلك .. وخلف الطابوق جهة الوسط 10 سم فوق أو 7 سم + 3 سم فراغ أو 8 + 2 سم فراغ للتهوية وبعدين جهة الخارج طابوق 10 سم مفرغ بعد وفيه ربط بين الطابوق الداخلي والخارجي وكذلك فيه ربط بالشبك أو السلم الحديدي لو حصلنا نوعية جيدة 6 ملم تكفي بس الشبك ضعيف وشفت تقارير عنه ما ينفع للمدى الطويل وتقارير اوروبية .. هذا الربط يكون إضافي .. بالنسبة لإلتصاق الطابوق في العمود عندي حلين أما بلاصق خاص قوي غير عن المونة الإسمنتية خلطة تختلف ولا يفك ولا يسبب كراك بين العمود والطابوق أو بالحديد المزروع مع إيبوكسي ومونة عادية كل ثلاث رصات مستبعد الزاوية والمسمار مع إنها مستعملة دوم لكن ممكن أنفذها بين وبين

أتمنى وضحت الصورة ولو ما وضحت مع البنيان باركز عليها بإذن الله .. وتبي الصج مبالغات ممكن بدونها يمشي الحال

معماري قطري

30-06-2025, 12:41 PM

صف الطابوق علمت مكانه فوق بيكون 13 صف طابوق عادي 20 سم + صف في الأخير 10 سم ينعمل فوقه الجسر .. الجسر بيكون بعمق 35 سم جهة الداخل يعني مع الوجه الداخلي للجدار ومن برا داخل 5 سم لأني باعزل الوجه الخارجي للجسر بفوم 5 سم وهذا شرحته سابقاً يمكن في الصفحة اللي قبل بفيديو

معماري قطري

30-06-2025, 01:08 PM

هذا شرح فيديو أوضح على الصورة

https://www.youtube.com/watch?v=SSu6bwIezXI

SouthK

01-07-2025, 09:45 AM

لا عدمناك اخوي

معماري قطري

01-07-2025, 02:20 PM

ولا عدمناك والله لا يحرمنا منك

كلها إجراءات بعضها ممكن فيها مبالغات بس في النهاية بتكلفة شوي زود وتستاهل نسويها .. الضعف مشكلة في العزل الحراري وفي المواد وجودتها وفي التركيب وفي النهاية تبغيها متوازنة ومتسقة مع الشكل المعماري اللي تسعى له

أمس أحد الإخوان عنده أرض بحدود 1000 متر يبغي يبنيها وإستئذنت من واحد تصميمه حلو واستعرضته قبل وأرضه مقاربة وإشتغل على التصميم في الكويت وحالياً ينفذه بنظام البوست تنشن .. والمالك الله يوفقه مهندس كهرباء واتصالات .. يمكن تذكرون تصميمه اللي فيه تجاويف مزروعة ومساحات داخلية .. إقترحت عليه هذا التصميم بس بيفقد مساحة حوش بتطلع أكثر مع تصميم ثاني معدل عليه بعد ومصغر مني .. الرجال صاحب التصميم قال لي عطني رقم تلفونه باكلمه وبشرح له اللي يبغي والتصميم حلال على اللي يبيه .. عجبني هذا التعاون وعدم الأنانية شيء زين بيننا أهل قطر وطبعنا من زمان نتعاون وكلنا أهل بيت واحد هو قطر .. الرجال مسافر مع إخو له يعالج وله أربع شهور ويبي يتمم تشطيب بيته والله يعينه المفروض يبدأ بالأساسيات وشوي شوي

SouthK

02-07-2025, 07:10 AM

شي طيب انك تلاقي من يعين الغير على الطيب!

معماري قطري

02-07-2025, 12:39 PM

شي طيب انك تلاقي من يعين الغير على الطيب!

صحيح الله يجزاه خير وتصميمه مميز ومتكامل حتى الإنتريور ومن مكتب كويتي .. هو يقول لكل واحد متطلباته واللي قريب مني ممكن يعدل شوي واللي يبي يسوي نفس الشيء يسعدني وهذا المفروض .. والعكس صحيح قابلت واحد هنا سوى لي أزمة تصميم دارج وموجود عند الكثيرين وعدلت عليه كثير يوم ركبته على أرض واحد ثاني كلمني خاص قال هذي كلها أفكار الأهل وإنت هشكل تنشر التصميم .. قمت اشتغلت على تعديلات إضافية وقلت له التصميم دارج ما يبي يصدق صراحة التعديلات الجديدة طلعت أحلى من اللي عنده بوايد مع إني إجتهدت معاه لكن يوم شفته هشكل اجتهدت أكثر للي طالب التصميم الثاني بتعديلات أكثر

معماري قطري

02-07-2025, 12:55 PM

عندنا بإذن الله تجهيز 58 عمود للسور فقط بالحديد ومستغرب سعر حديد الأعمدة طلع 6000 وشوي وهذا طبعاً غير عن سعر الأساسات والطابوق والخرسانة حديد بس .. السعر الإجمالي تراكمي وصعب تحديده بدقة وحتى بشكل تقريبي .. وزين سمعنا نصيحة النجار بعدم صب الأعمدة كلهم دفعة وحدة لتوفير الخشب والتركيز في الصب وجودته

أعمدة السور بيكون لها النوع العادي من الخرسانة مع إضافات بسيطة مثل الفيبر أما عندنا أعمدة المجلس أعتقد حول ال 8 أو العشرة زود + غرفة السايق + ملحق حوض السباحة هذي غير وبيتم صبها بالخرسانة الجيدة نفس اللي استعملناها للبيت وذكرتها في السابق مع الفاتورة والمواصفات حسب الكتلوج من قطر ردي مكس .. معانا في القروب مسؤول الربان ردي مكس وتواصل يسأل وينكم وهو عارف ويننا واننا سحبنا عليه بسبب الكراكات في خرسانة الأرضيات وهذي بتتم معالجتها ولو ما تمت بيجي فوقها سكريد مناسب بيخفي الكراكات

معماري قطري

02-07-2025, 01:53 PM

هذي الكاميرا اللي ركبناها للموقع

https://i.imgur.com/hGS1SjD.jpeg

معماري قطري

04-07-2025, 05:58 PM

حالياً أنزل فيديو لمراجعة بيت أحد الإخوان والتصميم فيه نواقص كثيرة .. سويت عدة فيديوهات للوتس اب + فيديوهات خاصة أرسلتها له أوضح فيها بعض التطوير الممكن وجمعت بعض الفيديوهات الأخيرة بتسلسل في فيديو واحد شوي بيكون طويل بس مفيد للي يحب يستفيد واللي يخطط يبني شيء مقارب

https://youtu.be/8_7Of05CAGw

معماري قطري

08-07-2025, 02:19 AM

عندي فيديوهات كثيرة بعضها لمراجعة تصميمين بعد بادخل في تفاصيلهم وفيديوهات لزيارتي اليوم بادمجهم في فيديو يوتيوب واحد أشوفه أحلى للذكرى وبعدين باركز على بعض التفاصيل في الموقع وأكيد انا مار عليها في الفيديوهات بشرح بسيط وواضح وأشوف الفيديوهات تكفي

هذا الفيديو المجمع لعدة فيديوهات للزيارة والملاحظات

https://youtu.be/sYtHL0slSqY

معماري قطري

08-07-2025, 06:14 PM

أسوي فيديوهات لمناقشة التصاميم وتطويرها وهي ضروري تكون مفصلة والشرح شوي طويل بس بديت أضيق فيديوهات قصيرة على التيك توك وأجمعها في فيديو طويل لليوتيوب لنفس الموضوع للي يحب يتابع بتفصيل وممكن يناسبه تصميم أو فكرة وهذا أحدها مقتبس ومعدل من تصميم سابق والأهم دقة عالية

https://youtu.be/cvvNi_oKdAw

معماري قطري

09-07-2025, 03:19 PM

هذي صورة ناقلها من فيديو حق خلل في تركيب حديد الأعمدة مالت السور وبيتم تعديله بإذن الله بتتركب البسكوتات 2.5 سم بس في الوسط هنا بيتم تمرير البورد القابل للإنضغاط لفاصل التمدد يعني نحتاج 2.5 + 2.5 + 2 سم أقل شيء بعد للحديد وهذا صعب عمله هنا .. الكانات 8 ملم والحديد أعتقد 12 كان مصمم 14 نزلت منه وحتى ال 10 ملم تكفي وحتى ال 8 .. صراحة مبالغة كبيرة والمبالغة هذي تتسبب في مشاكل انشائية مستقبلية

بس إن شاء الله ما عندي مشكلة وتارك الشغلة للحداد يرتبها لأن الحديد إيبوكسي وفوق حتى لو نزل الغطاء الخرساني ل 1 سم يمشي الحال لكن حبيت أوضح للجميع هذا لو تحت مستوى الأرض ما ارضى به ولازم يعدل وإحنا زدنا السمك تحت للخرسانة حتى نوفر غطاء خرساني كافي

https://i.imgur.com/5iB0Yln.png

على النقيض أحد الإخوان الله يعينه يبني عن طريق مقاول واستشاري من النوع اللي يفتخر ‘نه درجة أولى لا ويقول انا مب من عقدي ازور الموقع وقت الصب بس لي زيارات ويتهرب .. بانقل لكم الصورة للفائدة

https://i.imgur.com/KzdKBAt.jpeg

هذي تعتبر جريمة من الإستشاري أولاً ومن المقاول كلمت الإستشاري قريب الساعة اتصال نقاش والمالك يسمع والله يعينه الإستشاري من النوع اللي يبربر ويبرر وبس وكل شيء يتصلح

باشرح المشكلة والإستشاري يقول انه شاف تركيب الوتر ستوب الأزرق غلط في الطرف بدال ما يكون في الوسط وعلى عتبة مرتفعة تسمى Kicker وهذي شغلتها تنصب مع جزء من الحديد بارز لتقوية الزاوية وبعدين يتم صب الجدار ولو تحبون فيديو للشرح مع سكتش باوضح أكثر .. زين الإستشاري تغير في هذي المرحلة ويقول انا يوم شفت هالوضع طلبت نوع ثاني من الوتر ستوب ينحط في الوسط غير هذا الأزرق والنوع الثاني ينتفخ ويسد الفجوات أو الوصلة بين الخرسانة القديمة والجديدة .. وهذي خرسانة بيسمنت والجدار 20 سم بس وهذا خطأ تصميمي وقد يكون تجاوز من المقاول والإستشاري بدال ما يكون 30 عاملينه 20 ما يضر بالنسبة لهم لكن بالنسبة للمالك دافع قيمته والتوفير للمقاول والضرر ممكن يطلع بعدين وبعد سنوات وممكن سريع وبعد ممكن سوء تنفيذ وجهل من المقاول

الإشكالية اللي صارت بعد الوتر ستوب يربطونه بأسيام قوية في الحديد بحيث يكون معلق وثابت زين ما ينحني من فوق ويسد على الخرسانة وتستوي فجوات مثل الدرايش اللي تشوفونها في الصورة والحديد تم وضعه بلا إهتمام لأي غطاء خرساني وحسب كلام المهندز عارف إن الغطاء الخرساني كبير جهة الخارج وانا مستعد أجزم إنه سيم سيم .. شلون بيسوي كفر خرساني من جهة وبيخلي جهة

بيسوون حلول ترقيعية بسيكا وطلبوا ثلاث شركات تعطيهم عروض ومتخصصة وأتوقع بيدفعون المالك مسكين والله يعينه .. انا نصحت بعمل غطاء خرساني بالمادة 2 سم على الأقل من الداخل والخارج وهذا بيكلف كثير والحل يتحمله المقاول المفروض والمفروض أكثر تدخل البلدية ويكون فيه إشراف عام لحل مثل هذي الحالات ومحاسبة المقاول والإستشاري صاحب الدرجة الأولى